माजी राज्यमंत्री एकनाथ गायकवाड यांचे निधन

 

हिंगोली, (जिमाका) दि.28: माजी राज्यमंत्री एकनाथ महादेव गायकवाड यांचे कोरोनाचा संसर्ग झाल्याने आज सकाळी निधन झाले. मुंबई येथील खाजगी रुग्णालयात त्यांच्यावर उपचार सुरू असताना त्यांची प्राणज्योत मावळली.  सातारा येथे 1 जानेवारी, 1940 रोजी त्यांचा जन्म झाला होता. राज्याच्या शालेय शिक्षणमंत्री वर्षा गायकवाड यांचे ते वडील होते.

एकनाथ गायकवाड हे धारावी मतदारसंघातून 1985, 1990 आणि 1999 आमदार म्हणुन निवडुन आले होते. त्यांनी आरोग्य, वैद्यकीय शिक्षण, सामाजिक न्याय, कामगार, उच्च व तंत्र शिक्षण विभागाचे त्यांनी राज्यमंत्री पद भूषविले होते. एकनाथ गायकवाड यांनी लोकसभेचे माजी सभापती मनोहर जोशी यांचा पराभव केला होता. ते दोनवेळा खासदार म्हणून निवडून आले होते. एकनाथ गायकवाड हे मुंबई काँग्रेसचे अध्यक्ष देखील होते.

******