सुकापूर येथे सेवा संकल्प अभियानांतर्गत विविध प्रमाणपत्रांचे वाटप

 सुकापूर येथे सेवा संकल्प अभियानांतर्गत विविध प्रमाणपत्रांचे वाटप

         हिंगोली, दि. २८ (जिमाका) : सेवा संकल्प अभियान, भटके-विमुक्त हक्क व प्रमाणपत्र अभियान तसेच महाराजस्व समाधान शिबिराचे आयोजन आज (दि. २८) औंढा नागनाथ तालुक्यातील सुकापूर येथे करण्यात आले. जिल्हाधिकारी राहुल गुप्ता यांच्या मार्गदर्शनाखाली आणि तहसीलदार हरीश गाडे यांच्या उपस्थितीत आयोजित या शिबिरास नागरिकांचा उत्स्फूर्त प्रतिसाद मिळाला.

         या शिबिरात मंडळ व तहसील स्तरावरील विविध विभागांच्या सेवा नागरिकांना एकाच ठिकाणी उपलब्ध करून देण्यात आल्या. शिधापत्रिका वाटप, उत्पन्न प्रमाणपत्र, आधारकार्ड, जात प्रमाणपत्र वितरण, महिला शेतकरी तसेच नमुना क्रमांक ८ मधील नोंदी आदी विविध सेवांअंतर्गत एकूण २२० प्रमाणपत्रे व कागदपत्रांचे वितरण करण्यात आले.

        यावेळी संजय गांधी निराधार योजना, श्रावणबाळ सेवा राज्य निवृत्तीवेतन योजना, इंदिरा गांधी राष्ट्रीय वृद्धापकाळ निवृत्तीवेतन योजना आदी योजनांबाबत नागरिकांना मार्गदर्शन करण्यात आले. तसेच आरोग्य, कृषी, पुरवठा आणि पंचायत समिती विभागाच्या विविध शासकीय योजनांची माहिती देऊन पात्र नागरिकांना लाभ मिळवून देण्यात आला.

        शिबिरात तहसीलदार हरीश गाडे, सहायक संचालक, इतर मागास बहुजन कल्याण विभाग, हिंगोली प्रदीप धर्माधिकारी, आरोग्य विभागाचे डॉ. गिते, पुरवठा निरीक्षक कल्याणी हटवार, कृषी अधिकारी शिवप्रसाद संगेकर, मंडळ अधिकारी आशा गिते-गायकवाड, ग्राम महसूल अधिकारी जी. एस. मुकीर, रूपा कळसकर, एस. बी. दुबे, महसूल सहायक नितीन कुलकर्णी, वहीद खान पठाण, महसूल सेवक केशव फलटनकर, विनोद साळवे, अक्षय कांबळे, भगवान कदम तसेच संबंधित विभागांचे अधिकारी-कर्मचारी आणि मोठ्या संख्येने नागरिक उपस्थित होते.

                                                                            ***