सेवा संकल्प अभियानातून हिंगोलीत विविध उपक्रमांना गती -मुख्य कार्यकारी अधिकारी विवेक गायकवाड

▶️ स्वच्छता, आरोग्य, शिक्षण, पोषण आणि लाभार्थी-केंद्रित उपक्रमांवर भर 

▶️सेवा संकल्प अभियानात नागरिकांनी सक्रिय सहभाग नोंदविण्याचे आवाहन

▶️८७५ शाळांमध्ये उपक्रम; ५०२ अंगणवाड्यांमध्ये अंगणवाडी उत्सव; लाभार्थ्यांच्या यशकथा ठरताहेत प्रेरणादायी

हिंगोली, दि. २ (जिमाका) : हिंगोली जिल्ह्यात १७ सप्टेंबर ते १७ ऑक्टोबर २०२६ या कालावधीत राबविण्यात येत असलेल्या ‘सेवा संकल्प अभियान’ अंतर्गत स्वच्छता, आरोग्य, शिक्षण, पोषण, वृक्षारोपण तसेच नागरिकांना विविध शासकीय सेवांची माहिती व लाभ मिळवून देण्यासाठी विविध उपक्रम राबविण्यात येत आहेत. यासोबतच ‘स्वच्छ सेवा आकलन’ उपक्रमही जिल्ह्यात राबविण्यात येत आहे, अशी माहिती जिल्हा परिषदेचे मुख्य कार्यकारी अधिकारी विवेक गायकवाड यांनी दिली. या अभियानात नागरिकांनी सक्रिय सहभाग नोंदवावा, असे आवाहनही त्यांनी केले.

पालकमंत्र्यांच्या हस्ते अभियानाची सुरुवात

सेवा संकल्प अभियानाची सुरुवात १७ सप्टेंबर रोजी पालकमंत्री नरहरी झिरवाळ यांच्या हस्ते करण्यात आली. सेनगाव येथे मोटारसायकल रॅली काढण्यात आली. तसेच विविध गावांमध्ये रॅलीच्या माध्यमातून नागरिकांसाठी उपलब्ध असलेल्या शासकीय सेवांची माहिती देण्यात आली.

 *८७५ शाळांमध्ये विद्यार्थ्यांचा सहभाग* 

अभियानांतर्गत २६ सप्टेंबर रोजी जिल्हा परिषदेच्या ८७५ प्राथमिक व माध्यमिक शाळांमध्ये चित्रकला आणि वक्तृत्व स्पर्धा घेण्यात आल्या. स्वच्छतेबाबत जनजागृती करण्यासाठी विद्यार्थ्यांच्या रॅलीही काढण्यात आल्या. गावागावांत स्वच्छता मोहिमेत विद्यार्थ्यांचा सहभाग वाढविण्यात आला.

 *पंचायत समित्यांमध्ये स्वच्छता मोहीम* 

जिल्ह्यातील पाचही पंचायत समित्यांच्या परिसरात १७ सप्टेंबर रोजी स्वच्छता मोहीम राबविण्यात आली. तालुकास्तरावर विविध गावांमध्येही स्वच्छता उपक्रम आणि मोठ्या प्रमाणात वृक्षारोपण करण्यात आले.

 *'सेवा सेतू'मधून दाखल्यांचे वितरण* 

सेवा सेतू उपक्रमांतर्गत कळमनुरी तालुक्यातील गुंडलवाडी येथे विविध दाखल्यांचे वितरण करण्यात आले. याच ठिकाणी १४ घरकुल लाभार्थ्यांना त्यांच्या घरांचा लाभ देण्यात आला.

 *विविध ठिकाणी आरोग्य शिबिरे* 

जिल्ह्यात विविध ठिकाणी पाच आरोग्य शिबिरे घेण्यात आली. नागरिकांना आरोग्यविषयक सेवा व मार्गदर्शन उपलब्ध करून देण्यात आले.

 *५०२ अंगणवाड्यांमध्ये अंगणवाडी उत्सव* 

अंगणवाडी उत्सवांतर्गत जिल्ह्यातील ५०२ अंगणवाड्यांमध्ये उपक्रम घेण्यात आले. यामध्ये अंगणवाडीतील बालकांच्या माता तसेच स्तनदा मातांचा सहभाग घेण्यात आला. त्यांच्या कार्याचा आणि सहभागाचा गौरव करण्यात आला.

 *नागरिकांच्या सहभागातून सेवा ज्योत यात्रा* 

पालकमंत्री नरहरी झिरवाळ यांच्या हस्ते सुमारे १५० नागरिकांच्या सहभागातून ‘सेवा ज्योत यात्रा’ काढण्यात आली. शासकीय सेवा आणि विकासकामांमध्ये नागरिकांचा सहभाग वाढविण्याचा संदेश या माध्यमातून देण्यात आला.

 *लाभार्थ्यांच्या घरी ‘आशीर्वादाचा दिवा’* 

शासकीय सेवांचा लाभ मिळालेल्या लाभार्थ्यांनी आपल्या घरी ‘आशीर्वादाचा दिवा’ प्रज्वलित केला. या उपक्रमातून लाभार्थ्यांच्या जीवनात झालेल्या सकारात्मक बदलाचा यातून संदेश देण्यात आला.

 

 *भारताच्या आकारातील मानवी रांगोळी* 

सुमारे ८६४ लाभार्थ्यांच्या घरी रांगोळी काढण्यात आली. भारताच्या नकाशाच्या आकारातील मानवी रांगोळीच्या माध्यमातूनही जनजागृती करण्यात आली.

 *शेतीतील उत्पन्नवाढीच्या यशकथा* 

शेतकऱ्यांना मिळालेल्या विविध लाभांमुळे त्यांच्या उत्पन्नात झालेल्या वाढीच्या यशकथा अभियानातून पुढे आणल्या जात आहेत. डॉ. बाबासाहेब आंबेडकर योजना आणि बिरसा मुंडा क्रांती योजनेतून विहिरींचा लाभ मिळालेल्या काही शेतकऱ्यांच्या उत्पन्नात मोठी वाढ झाली आहे. पूर्वी ५० ते ६० हजार रुपये वार्षिक उत्पन्न मिळविणाऱ्या काही लाभार्थ्यांना आता शेतीतून ८ ते ९ लाख रुपयांपर्यंत वार्षिक उत्पन्न मिळत असल्याचे यशकथांमधून समोर आले आहे. अशा लाभार्थ्यांचा गौरव करून त्यांच्या यशकथा तयार करण्यात येत आहेत.

 *पोषणविषयक जनजागृतीवरही भर* 

जिल्ह्यात ‘माझ्या बाळाची पोषण कहाणी’ या उपक्रमातूनही जनजागृती करण्यात येत आहे. बालकांचे पोषण, आरोग्य आणि कुटुंबाचा सहभाग याबाबत नागरिकांमध्ये जागृती करण्याचा प्रयत्न केला जात आहे.

सेवा संकल्प अभियान आणि स्वच्छ सेवा आकलनाच्या माध्यमातून शासकीय सेवा नागरिकांपर्यंत पोहोचविण्यासोबतच स्वच्छता, आरोग्य, शिक्षण, पोषण आणि लोकसहभागाला चालना देण्यावर जिल्हा प्रशासनाचा भर असल्याचे मुख्य कार्यकारी अधिकारी गायकवाड यांनी सांगितले.