भटके-विमुक्त हक्क व प्रमाणपत्र अभियानांतर्गत तीन गावांत शिबिरे

 भटके-विमुक्त हक्क व प्रमाणपत्र अभियानांतर्गत तीन गावांत शिबिरे 

▶️रेशन कार्ड, जात, रहिवासी, उत्पन्न प्रमाणपत्रांसह आयुष्मान भारत कार्डचे वाटप

हिंगोली, दि. २९ (जिमाका) : विमुक्त जाती व भटक्या जमातींच्या नागरिकांना आवश्यक शासकीय प्रमाणपत्रे व कागदपत्रे सुलभतेने उपलब्ध करून देण्यासाठी जिल्ह्यात २७ ते २९ सप्टेंबरदरम्यान ‘भटके-विमुक्त हक्क व प्रमाणपत्र अभियान’ राबविण्यात आले.

अभियानांतर्गत हिंगोली तालुक्यातील कोथळज, औंढा नागनाथ तालुक्यातील सुकापूर आणि कळमनुरी तालुक्यातील पोतरा येथे विशेष शिबिरांचे आयोजन करण्यात आले होते. या शिबिरांमध्ये पात्र नागरिकांना रेशन कार्ड, जात प्रमाणपत्र, रहिवासी दाखला, उत्पन्नाचा दाखला तसेच आयुष्मान भारत कार्डचे वाटप करण्यात आले.

२७ सप्टेंबर रोजी कोथळज येथे तहसीलदार श्रीकांत भुजबळ व उपविभागीय अधिकारी समाधान घटुकडे यांच्या उपस्थितीत शिबिर झाले. २८ सप्टेंबर रोजी सुकापूर येथे तहसीलदार हरीश गाडे यांच्या उपस्थितीत शिबिर घेण्यात आले. २९ सप्टेंबर रोजी पोतरा येथे उपविभागीय अधिकारी श्रीमती प्रतीक्षा भुते यांच्या उपस्थितीत शिबिराचे आयोजन करण्यात आले.

भटक्या जीवनशैलीमुळे आवश्यक कागदपत्रे मिळविण्यात येणाऱ्या अडचणी दूर करून नागरिकांना त्यांचे मूलभूत हक्क व शासकीय सुविधांचा लाभ सुलभतेने मिळावा, हा अभियानाचा उद्देश आहे.