राष्ट्रीय गुणवत्ता आश्वासन मानांकनासाठी आरोग्य संस्थांनी प्राधान्याने कामे पूर्ण करावीत - जिल्हाधिकारी राहुल गुप्ता
* १५ दिवसात सुधारणा न झाल्यास जिल्हाधिकारी राहुल गुप्ता यांचे कारवाईचे निर्देश
हिंगोली, दि. २९ : जिल्ह्यातील ११ प्राथमिक आरोग्य केंद्रे, आरोग्य उपकेंद्रे आणि ग्रामीण रुग्णालयांनी राष्ट्रीय गुणवत्ता आश्वासन मानांकन (एनक्वॉस) प्राप्त करण्यासाठी आवश्यक निर्देशांकांनुसार पायाभूत सुविधा, सेवा गुणवत्ता आणि रुग्णाभिमुख कार्यपद्धतीत सुधारणा करून सर्व कामे प्राधान्याने पूर्ण करावीत, असे निर्देश जिल्हाधिकारी राहुल गुप्ता यांनी दिले.
जिल्हाधिकारी कार्यालयातील सभागृहात आज जिल्हाधिकारी राहुल गुप्ता यांच्या अध्यक्षतेखाली आरोग्य विभागाची आढावा बैठक घेण्यात आली होती.
यावेळी जिल्हा परिषदेचे मुख्य कार्यकारी अधिकारी विवेक गायकवाड, जिल्हा आरोग्य अधिकारी डॉ. कैलास शेळके, अतिरिक्त जिल्हा आरोग्य अधिकारी डॉ. रवींद्र पुरी, जिल्हा क्षयरोग अधिकारी डॉ. देवेंद्र जायभाये, निवासी वैद्यकीय अधिकारी डॉ. दत्ता डूडूळे, तालुका आरोग्य अधिकारी डॉ. गणेश जोगदंड, डॉ. डी. व्ही. सावंत, डॉ. संदीप काळे, जिल्हा कार्यक्रम समन्वयक डॉ. प्रशांत पुठावार यांच्यासह सर्व वैद्यकीय अधिकारी, समुदाय आरोग्य अधिकारी संबंधित अधिकारी आणि कार्यक्रम समन्वयक उपस्थित होते.
या बैठकीत जिल्हाधिकारी राहुल गुप्ता व जिल्हा परिषदेचे मुख्य कार्यकारी अधिकारी विवेक गायकवाड यांनी राष्ट्रीय गुणवत्ता आश्वासन मानांकन प्राप्त करण्यासाठी सर्व आरोग्य संस्थांनी जबाबदारीने व नियोजनबद्ध पद्धतीने काम करण्याच्या सूचना दिल्या. आवश्यक पायाभूत सुविधा, दुरुस्तीसाठी निधी हा ज्या विभागामध्ये सुधारणा करायच्या आहेत आणि सद्यस्थितीतील गुणांकनाबाबत आणि भविष्यातील गुणांकनाबाबत सुधारणा होणार आहेत, याची माहिती लेखी स्वरूपात सादर करण्याचे निर्देश जिल्हाधिकारी राहुल गुप्ता यांनी दिले. कोणत्या खंडातून निधी उपलब्ध करता येईल, तसा उल्लेख करण्यात यावा, विनाकारण प्रस्ताव सादर न करण्याचे स्पष्ट निर्देश देण्यात आले. उपलब्ध स्थानिक निधीतून खर्च भागविता येत असतील ते त्या उपलब्ध निधीच्या माध्यमातून तातडीने पूर्ण करावेत.
शासकीय आरोग्य संस्थेत प्रसूतीचे प्रमाण वाढविण्यासाठी प्रसूती गृह हे स्वच्छ आणि निटनेटके असले पाहिजे. कुशल कर्मचारीवृंद असावा आणि आरोग्य विभागात देत असलेल्या सेवांवर जनतेचा विश्वास असला पाहिजे असे काम करावे लागेल अशा सूचना दिल्या.
रुग्णालयांतील सेवा अधिक गुणवत्तापूर्ण, पारदर्शक आणि रुग्णकेंद्री करण्यासाठी आवश्यक सुधारणा तातडीने राबविण्याची गरज असल्याचे त्यांनी नमूद केले. जिल्ह्यातील आरोग्य सेवेचा दर्जा उंचावण्यासाठी प्रभावी उपाययोजना करण्यावर विशेष भर देण्यात आला.
या बैठकीत बाह्यरुग्ण विभाग, प्रसूती सेवा, प्रयोगशाळा, औषध भांडार, प्रधानमंत्री आयुष्मान भारत कार्ड योजना, रुग्णालयातील विविध आरोग्य सुविधा, स्वच्छता व्यवस्थापन, मनुष्यबळ उपलब्धता तसेच वैद्यकीय यंत्रणेच्या एकूण कामकाजाचा सविस्तर आढावा घेण्यात आला. रुग्णांना दर्जेदार व वेळेवर आरोग्य सेवा उपलब्ध करून देण्यासाठी सर्व स्तरांवर समन्वयाने काम करण्याच्या सूचनाही जिल्हाधिकाऱ्यांनी दिल्या.
राष्ट्रीय गुणवत्ता आश्वासन मानांकन प्रक्रियेच्या प्रगतीचा नियमित आढावा घेण्यात येणार असून, सर्वांनी पुढील १५ दिवसात सुधारणा करावी. ही शेवटची संधी आहे,
यानंतर कामांमध्ये सुधारणा न झाल्यास कारवाई करण्यात येईल, असे सक्त निर्देश जिल्हाधिकारी राहुल गुप्ता यांनी दिले.
या कामात हलगर्जीपणा अथवा दिरंगाई करणाऱ्या अधिकारी व कर्मचाऱ्यांविरुद्ध प्रशासकीय कारवाई प्रस्तावित करण्यात येणार असल्याचे निर्देश जिल्हाधिकारी राहुल गुप्ता यांनी दिले.
00000
No comments:
Post a Comment