बालकांच्या संरक्षणासाठी पोक्सो कायद्याविषयी जनजागृती आवश्यकहिंगोलीतील कै. बाबुराव पाटील कनिष्ठ महाविद्यालयात ‘सुरक्षित बचपन अभियान’

हिंगोली, दि. १ नोव्हेंबर : बालकांचे लैंगिक गुन्ह्यांपासून संरक्षण करण्यासाठी कायद्याविषयी जागरूकता, योग्य खबरदारी आणि गुन्ह्यांची निर्भयपणे तक्रार करणे आवश्यक आहे, असे प्रतिपादन पोलीस उपनिरीक्षक प्रेमलता एन. जगताप यांनी केले. तालुका विधी सेवा समिती, हिंगोली यांच्या वतीने बालकांचे लैंगिक गुन्ह्यांपासून संरक्षण कायदा (पोक्सो), २०१२ अंतर्गत अखिल भारतीय शालेय जनजागृती मोहिमेचा भाग म्हणून कै. बाबुराव पाटील कनिष्ठ महाविद्यालयात ‘सुरक्षित बचपन अभियान’ राबविण्यात आले.

तालुका विधी सेवा समितीचे अध्यक्ष तथा प्रमुख जिल्हा न्यायाधीश श्रीकांत एल. आणेकर यांच्या मार्गदर्शनाखाली झालेल्या या कार्यक्रमाच्या अध्यक्षस्थानी सह दिवाणी न्यायाधीश, कनिष्ठ स्तर, डी. व्ही. भंडारी होत्या. प्रमुख मार्गदर्शक म्हणून पोलीस अधीक्षक कार्यालयातील पोलीस उपनिरीक्षक प्रेमलता एन. जगताप, तर प्रमुख पाहुणे म्हणून जिल्हा वकील संघाचे अध्यक्ष अॅड. एस. आर. घुगे आणि महाविद्यालयाचे प्राचार्य डी. पी. इंगळे उपस्थित होते.

पोक्सो कायद्याविषयी विद्यार्थ्यांना मार्गदर्शन

पोलीस उपनिरीक्षक प्रेमलता जगताप यांनी पोक्सो कायद्यातील विविध तरतुदी व कलमांची माहिती देत बालकांच्या लैंगिक शोषणाचे प्रकार, त्यामागील कारणे आणि प्रतिबंधात्मक उपाय स्पष्ट केले. नातेसंबंधातील अतिविश्वास, पालकांचे दुर्लक्ष, मोबाईलवरील समाजमाध्यमांचा गैरवापर आणि वाईट संगत यांमुळे बालकांच्या सुरक्षिततेला धोका निर्माण होऊ शकतो, असे त्यांनी सांगितले. अशा गुन्ह्यांचे परिणाम पीडित बालकासह संपूर्ण कुटुंबाला भोगावे लागतात, याकडेही त्यांनी लक्ष वेधले.

लैंगिक गुन्ह्यांना बळी पडलेल्या बालकांची ओळख गोपनीय ठेवली जाते. त्यामुळे भीती न बाळगता अशा घटनांची तक्रार करावी, जेणेकरून पुढील अनर्थ टाळता येईल, असे आवाहन त्यांनी केले. तसेच, अशा गुन्ह्यांना प्रतिबंध करण्यासाठी घ्यावयाची काळजी आणि दामिनी पथकाच्या माध्यमातून शाळा-महाविद्यालयांना दिल्या जाणाऱ्या भेटींबाबतही त्यांनी माहिती दिली.

अध्यक्षीय समारोपात न्यायाधीश डी. व्ही. भंडारी यांनी ‘जागरूक बचपन, सशक्त भारत’या अभियानाच्या संकल्पनेचे महत्त्व विशद केले. बालकांच्या लैंगिक शोषणाच्या घटनांमध्ये जागरूकता आणि योग्य वेळी मदत मिळणे महत्त्वाचे असल्याचे सांगून त्यांनी तालुका ते राज्य स्तरापर्यंत विधी सेवा प्राधिकरणामार्फत उपलब्ध होणाऱ्या मदतीची माहिती दिली. तसेच, अशा गुन्ह्यांना बळी पडल्यास पीडितांनी पुढील कायदेशीर कार्यवाही कशी करावी, याबाबत मार्गदर्शन केले. इंटरनेटच्या माध्यमातून होणाऱ्या फसवणुकीच्या प्रकारांबाबतही त्यांनी विद्यार्थ्यांना सावध केले.

दक्षता जनजागृती सप्ताहानिमित्त भ्रष्टाचारविरोधी शपथ

महाराष्ट्र शासनाच्या वतीने २६ ऑक्टोबर ते १ नोव्हेंबर २०२६ या कालावधीत आयोजित दक्षता जनजागृती सप्ताहाच्या अनुषंगाने ‘समृद्धीसाठी सत्यनिष्ठा’ या संकल्पनेवर सहशिक्षक व्ही. बी. अंभोरे यांनी मार्गदर्शन केले. भ्रष्टाचाराच्या दुष्परिणामांची माहिती देत त्यांनी उपस्थितांना भ्रष्टाचार न करण्याची शपथ दिली.

कार्यक्रमाचे सूत्रसंचालन जिल्हा वकील संघाचे सचिव तथा विधिज्ञ एम. ए. कांबळे यांनी केले. महाविद्यालयातील विद्यार्थी, शिक्षक, शिक्षिका आणि शिक्षकेतर कर्मचारी या कार्यक्रमात सहभागी झाले. तालुका विधी सेवा समितीचे वरिष्ठ लिपिक डी. बी. हनवते आणि कनिष्ठ लिपिक एन. एस. दिंडे यांनी महाविद्यालयातील प्राध्यापक व कर्मचाऱ्यांच्या सहकार्याने कार्यक्रमाचे नियोजन केले.

आरोग्य सेवा अधिक लोकाभिमुख करण्यासाठीमंत्री प्रकाश आबिटकर यांचा हिंगोलीतून आरोग्य संवाद

> *सुधारित दौरा कार्यक्रम ३ *

हिंगोली, दि. १ (जिमाका) : सार्वजनिक आरोग्य व कुटुंब कल्याण विभागाच्या वतीने 1 नोव्हेंबर ते 5 डिसेंबर 2026 या कालावधीत राज्यभर ‘आरोग्य संवाद यात्रा’राबविण्यात येत आहे. या अनुषंगाने सार्वजनिक आरोग्य व कुटुंब कल्याण मंत्री प्रकाश आबिटकर सोमवार, 2 नोव्हेंबर रोजी हिंगोली जिल्ह्याच्या दौऱ्यावर येत असून आरोग्य यंत्रणेचा सविस्तर आढावा घेणार आहेत. तसेच विविध स्तरांवरील पदाधिकारी, अधिकारी, आरोग्य कर्मचारी आणि लाभार्थ्यांशी संवाद साधणार आहेत.

मंत्री आबिटकर 2 नोव्हेंबर रोजी सकाळी १०.३० वाजता वसमत येथील मा. बाळासाहेब ठाकरे हळद संशोधन व प्रशिक्षण केंद्राचे अध्यक्ष आमदार हेमंत पाटील यांच्यासमवेत नांदेड येथून वसमतकडे प्रयाण करणार आहेत. सकाळी ११ वाजता वसमत येथील मा. बाळासाहेब ठाकरे हळद संशोधन व प्रशिक्षण केंद्रास मंत्री आबिटकर भेट देऊन पाहणी करणार आहेत. त्यानंतर ११.३० वाजता वसमत येथील उपजिल्हा रुग्णालयासही भेट देऊन आरोग्य सुविधांची पाहणी करणार आहेत. सकाळी १२ वाजता वसमत तालुक्यातील दुष्काळग्रस्त भागाची पाहणी करून शेतकऱ्यांशी संवाद साधणार आहेत.

कळमनुरी तालुक्यातील बाळापूरकडे सकाळी १२.३० वाजता आमदार संतोष बांगर यांच्या समवेत प्रयाण. दुपारी १ वाजता कळमनुरी तालुक्यातील बाळापूर येथे विविध आरोग्य संस्थांच्या कामकाजाचा आढावा घेऊन आरोग्य योजनांच्या लाभार्थ्यांशी संवाद साधणार आहेत. दुपारी दीड ते दोन हा वेळ राखीव असून दुपारी २ वाजता बाळापूर येथून ते हिंगोलीकडे प्रयाण करतील. 

दुपारी २.३० वाजता हिंगोली जिल्हा सामान्य रुग्णालयास भेट देऊन कॅथलॅब व अन्य वैद्यकीय सुविधांची पाहणी करतील. दुपारी ३ वाजता हिंगोली शहरातील लक्ष्मी लाईफ केअर हॉस्पिटल आणि ढाले हॉस्पिटल येथे मंत्री आबिटकर सदिच्छा भेट देतील.

दुपारी ३.३० वाजता जिल्हाधिकारी कार्यालयातील जिल्हा नियोजन समिती सभागृहातून दूरदृश्यप्रणालीद्वारे हिंगोली जिल्ह्यातील सार्वजनिक आरोग्य विभागांतर्गत कार्यरत विविध आरोग्य समित्यांचे पदाधिकारी व अधिकारी यांच्याशी आरोग्य संवाद साधणार आहेत. त्यानंतर सोयीनुसार हिंगोली येथून मोटारीने मुंबईकडे प्रयाण करतील.

चारा साक्षरता अभियानातून पशुपालकांना चारा व्यवस्थापनाचे मार्गदर्शन

युरिया प्रक्रियेद्वारे निकृष्ट चारा सकस करण्यासह मुरघास, अझोला व हायड्रोपोनिक्स चाऱ्याची माहिती

हिंगोली, दि. १ नोव्हे (जिमाका) : जिल्ह्यातील संभाव्य दुष्काळसदृश परिस्थितीच्या पार्श्वभूमीवर पशुधनासाठी भविष्यात उद्भवणारी चारा टंचाई टाळण्यासाठी पशुसंवर्धन विभागामार्फत विविध उपाययोजना राबविण्यात येत आहेत. याच अनुषंगाने जिल्हा पशुसंवर्धन उपायुक्त, हिंगोली यांच्या मार्गदर्शनाखाली पशुवैद्यकीय चिकित्सालय, आखाडा बाळापूर, ता. कळमनुरी अंतर्गत रुद्रावाडी येथे ३१ ऑक्टोबर रोजी चारा साक्षरता अभियान राबविण्यात आले.

या अभियानांतर्गत पशुपालकांना युरिया प्रक्रियेद्वारे निकृष्ट चारा सकस करण्याच्या पद्धतीबाबत मार्गदर्शन करण्यात आले. तसेच अझोला उत्पादन, मुरघास निर्मिती आणि हायड्रोपोनिक्स चारा उत्पादन याविषयी सविस्तर माहिती देण्यात आली. संभाव्य दुष्काळी परिस्थितीत चारा व पाणीटंचाई निर्माण होऊ नये, यासाठी उपलब्ध चाऱ्याचे योग्य नियोजन, चाऱ्याची साठवणूक आणि पर्यायी चारा उत्पादनाच्या उपाययोजनांचे महत्त्व यावेळी विशद करण्यात आले.

यावेळी उपस्थित पशुपालकांना व्हीएमडीडीपी (VMDDP) योजनेंतर्गत विविध घटकांची माहिती देण्यात आली. जिल्हा वार्षिक योजनेंतर्गत चारा बियाण्यांची मागणी नोंदविण्यासाठी गुगल अर्ज भरण्याचे आवाहन करण्यात आले. तसेच पशुधन विमा योजनेची माहिती देऊन पशुधनाच्या संरक्षणासाठी विमा योजनेचा लाभ घेण्याचे आवाहन करण्यात आले.

पुढील तीन महिन्यांनंतर उद्भवू शकणारी चारा टंचाई लक्षात घेता, नागरिकांनी व्हीबी-जी राम जी (VB-G RAM G) योजनेत मोठ्या संख्येने सहभागी व्हावे आणि चारा टंचाईवर मात करण्यासाठी आवश्यक कामांमध्ये योगदान द्यावे, असे आवाहन यावेळी करण्यात आले.