आंतरराष्ट्रीय दत्तक महिनानिमित्त कळमनुरी तालुक्यात जनजागृती

हिंगोली (जिमाका), दि. 29 : महिला व बालविकास विभागाच्या वतीने जिल्ह्यात नोव्हेंबर महिना हा आंतरराष्ट्रीय दत्तक महिना म्हणून साजरा केला जातो. या दत्तक महिना निमित्ताने कळमनुरी, आखाडा बाळापूर येथील पोलीस स्टेशन, बसस्थानक, उपजिल्हा रुग्णालय या ठिकाणी जनजागृतीपर कार्यक्रम घेण्यात आले. यावेळी उपस्थितांना दत्तक इच्छुक पालकास कायदेशीर दत्तक प्रक्रियेसंदर्भात माहिती देण्यात आली. दत्तक इच्छुक पालक Cara Central Adoption Resource Authority यांचे संकेतस्थळ www.cara.wcd.gov.in यावर रजिस्ट्रेशन करुन कायदेशिररित्या बालकास दत्तक घेऊ शकतात. तसेच Foster Care And Foster Care Adoption या बाबत प्रतिपालकत्व स्वीकारु इच्छिणाऱ्या पालकांसाठी बालगृहातील काळजी व संरक्षणाची गरज असणाऱ्या बालकांचे प्रतिपालकत्व स्वीकारणे तसेच जिल्ह्यात विधवा माता, कुमारी माता यांना नको असलेल्या नवजात बाळाचे सुखरुप समर्पण करण्याबाबत सखोल मार्गदर्शन करण्यात आले. अनाथ, सोडून दिलेले, परित्याग केलेले बाळ इत्यादी बालकांसंदर्भात माहिती मिळाल्यास तात्काळ जिल्हा महिला व बाल विकास अधिकारी कार्यालय हिंगोली किंवा चाईल्ड हेल्प लाईन (1098) यांना संपर्क करावा, असे आवाहन जिल्हा बाल संरक्षण अधिकारी सरस्वती कोरडे यांनी केले. यावेळी महिला व बालविकास विभागाने तयार केलेले पोस्टर्स, जाहीर आवाहन संपर्क क्रमांकासह, भिती पत्रके लावण्यात आली. याप्रसंगी जिल्हा बाल संरक्षण कक्षातील बाल संरक्षण अधिकारी संस्थाबाह्य जरीबखान पठाण, चाईल्ड हेल्प लाईन (1098) चे प्रकल्प समन्वयक संदीप कोल्हे, समुपदेशक अंकुर पाटोडे उपस्थित होते. *****