क्रॉपसॅप प्रकल्प 2016-17 हिंगोली जिल्ह्यात सुरू

            हिंगोली, दि. 10 :- पिकांवरील किड रोग सर्वेक्षण व सल्ला प्रकल्प 2016-17 सोयाबीन, कापूस, तुर व रब्बीमध्ये हरभरा या महत्वाच्या पिकावर वारंवार तसेच आकस्मिकरित्या उद्भवणाऱ्या किडरोगामुळे होणारे शेतकऱ्याचे नुकसान त्यामुळे उत्पादनात होणारी घट लक्षात घेऊन क्रॉपसॅप प्रकल्प सुरू करण्यात आला आहे. आवश्यक मनुष्यबळ कंत्राटी पध्दतीने निविदा प्रक्रीयेव्दारे महात्मा फुले मल्टीसर्विसेस वसमत रोड परभणी यांनी किड सर्वेक्षक 22 भरले असून त्यांचे सनियंत्रन करण्यासाठी उपविभाग स्तरावर कृषि विभागाचे कृषि पर्यवेक्षक बोथीकर के. एच. व खंदारे एम. पी. हे करत आहे.

            या प्रकल्पांतर्गत  शेतकऱ्यामध्ये किड रोगाची ओळख निर्माण करणे त्यांना प्रशिक्षीत करुन किड रोगाचे वेळीचे व्यवस्थापन करणे. किड रोगाच्या प्रादुर्भावाबाबत जागरुकता निर्माण करणे व पुढील संभाव्य नुकसान टाळून उत्पादनात वाढ करणे. किड रोगाच्या आकस्मिक प्रादुर्भावामुळे शेतकऱ्याचे होणारे नुकसान टाळणे. वारंवार येणाऱ्या किड रोगाबाबत सांख्यिकी माहिती संकलित करून व कायम स्वरूपाच्या व्यवस्थापनाबाबत कृषि विद्यापीठाच्या सहाय्याने शिफारशी निश्चित करणे. ही कामे करण्यात येणार आहेत.

            वरीलप्रमाणे कार्ये करण्यासाठी पुर्वी उपविभाग स्तरावर संगणक प्रचालक हे पद होते परंतू 2016-17 मध्ये संगणक प्रचालक हे पद वगळण्यात आले आहे. त्यामुळे सदरील प्रकल्पाचे शेतकऱ्याना एसएमएस व्दारे देण्यात येणारे पिक संरक्षण सल्ले व इतर कामे प्रकल्प अधिकारी, पाक्षिक अहवाल उपस्थिती अहवाल देण्यासाठी अडचणी येणार आहेत. किड सर्वेक्षक यांना स्मार्ट मोबाईल फोन असणे बंधनकारक असून मोबाईल व्दारे एनआयसी पुणे यांचे संकेत स्थळावर ऑनलाईन अहवाल नोंदणी डाटा एन्ट्री सोमवार, मंगळवार, बुधवार, गुरूवार, शुक्रवार, दरदिवशी चार फिक्स व चार रॅडम प्लॉट प्रमाणे 5 दिवस काम करण्यात येणार आहे.

            पहिल्या 3 दिवसाच्या अहवालावर गुरूवारी अडव्हायजरी तसेच गुरूवार शुक्रवारच्या अहवालावर सोमवारी ॲडव्हायजरी येईल ती तालूका कृषि अधिकारी यांचे क्षेत्रीय कर्मचाऱ्यामार्फत ॲडव्हायजरीच्या जम्बो झेरॉक्स करून गावातील वार्ताफलकावर लावण्याची कार्यवाही करण्यात येणार आहे.

            किटकनाशकाचा व रसायनाचा अनावश्यक वापर टाळण्यासाठी तसेच किड रोगामुळे पिकाचे होणारे नूकसानीची पातळी ओलांडताच शेतकऱ्यानी कृषि विभागामार्फत प्रसारित होणाऱ्या संदेशानुसार वेळीच व योग्य पध्दतीने उपाययोजना करून किड नाशकाचा वापर करावा व होणारे आर्थिक नुकसान टाळून पिकाचे उत्पादन वाढवावे, असे आवाहन जिल्हा अधिक्षक कृषि अधिकारी बी. पी. लोंढे व उपविभागीय कृषि अधिकारी यु. जी. शिवणगावकर यांनी प्रसिध्दी पत्रकान्वये केले आहे.

*****