हिवताप निर्मूलनासाठी नागरिकांचा सहभाग महत्वाचा

हिंगोली (जिमाका), दि. 20 : राष्ट्रीय हिवताप निर्मूलनासाठी उपचाराबरोबर प्रतिबंध महत्त्वाचा आहे. त्यासाठी नागरिकांचा सहभाग महत्त्वाचा आहे. या आजाराच्या प्रतिबंधासाठी परिसर स्वच्छ राखणे आवश्यक असल्याने नागरिकांनी खबरदारी घ्यावी, असे आवाहन जिल्हा हिवताप अधिकारी डॉ. गणेश जोगदंड यांनी केले आहे. राष्ट्रीय कीटकजन्य रोग नियंत्रण कार्यक्रमांतर्गत दरवर्षी 25 एप्रिल हा दिवस जागतिक हिवताप दिन म्हणून साजरा करण्यात येतो. याच पार्श्वभूमीवर हिवताप आजाराविषयी जनतेमध्ये जनजागृती निर्माण होऊन प्रतिबंधात्मक उपाययोजना व अंमलबजावणीमध्ये सक्रिय सहभाग करून घेण्यासाठी हिवताप जनजागृती मोहीम राबविण्यात येत आहे. हिवताप हा किटकजन्य आजार असून अनेक आजारांपैकी एक गंभीर आजार आहे. गर्भवती महिला व बालकांना हिवतापापासून सर्वाधिक धोका संभवतो वेळीच उपचार घ्यावा. आवश्यक उपाययोजना : कीटकनाशक, आळी नाशकाची, डासोउत्पत्तीस्थानामध्ये डासअळी भक्षक गप्पी मासे सोडणे, डासांचा उपद्रव पूर्णपणे टाळण्यासाठी पाण्याच्या सर्व टाक्या तसेच पिंप साठे व्यवस्थित झाकून ठेवावे, इमारतीच्या गच्चीवर आणि परिसरात अनावश्यक पाणी साचू देऊ नये, वैयक्तिक सुरक्षतेसाठी मच्छरदाणीचा वापर करावा, डास प्रतिबंधक यंत्रे, मलम, अगरबत्तीचा वापर, घरांच्या खिडक्यांना बारीक जाळीचे पडदे लावणे, घराच्या सभोवतालील परिसरामध्ये पाण्याची डबके साचू देऊ नये. ते वाहते करावी किंवा त्यामध्ये जळके ऑइल किंवा रॉकेल टाकावे, नारळाच्या करवंट्या, टायर्स, फुलदाण्या, कुलर्स यामध्ये पाणी साचू देऊ नये. कोरडा दिवस पाळा, हिवताप, डेंगू आजार टाळा : आठवड्यातून एक दिवस शनिवार हा कोरडा दिवस म्हणून पाळण्यात यावा. या दिवशी आपल्या घरातील सर्व पाणी साठा स्वच्छ पुसून कोरडे करून त्यामध्ये पाणी भरावे. जेणेकरून डासांची उत्पत्ती होणार नाही याकडे सर्वांनी लक्ष द्यावे आणि हिवताप, डेंगू आजार टाळावा, असे आवाहनही जिल्हा हिवताप अधिकारी डॉ. गणेश जोगदंड यांनी केले आहे. ******

निवडणूक खर्चाची तृतीय लेखे तपासणी 23 एप्रिल रोजी

हिंगोली (जिमाका), दि. 20 : हिंगोली लोकसभा मतदारसंघातून लोकसभा सार्वत्रिक निवडणूक लढविणाऱ्या सर्व उमेदवारांची तृतीय निवडणूक खर्च लेखे तपासणी मंगळवार, दि. 23 एप्रिल रोजी होईल. जिल्हाधिकारी कार्यालयाच्या पाठीमागे जिल्हा कोषागार कार्यालय हिंगोली येथे ही तपासणी सकाळी 10 ते सायंकाळी 5 या वेळेत होणार असून, सर्व उमेदवार अथवा त्यांच्या अधिकृत खर्च प्रतिनिधींनी प्रत्यक्ष उपस्थित राहून तपासणी करून घेण्याचे आवाहन खर्च सनियंत्रण कक्षातर्फे करण्यात आले आहे. 15-हिंगोली लोकसभा मतदार संघासाठी निवडणूक खर्च निरीक्षक अन्वर अली व कमलदीप सिंह यांच्या उपस्थितीत ही तपासणी होणार आहे. निवडणूक खर्च सादर करण्यात अपयशी ठरलेले उमेदवार लोकप्रतिनिधीत्व अधिनियम 1951 च्या कलम 77 (1) अंतर्गत दंडात्मक कार्यवाहीसाठी पात्र राहतील, असे निवडणूक खर्च सनियंत्रण कक्षातर्फे प्रसिद्धीपत्रकाद्वारे कळविण्यात आले आहे. *****

लोकसभा निवडणुकीमुळे 25 एप्रिल रोजीची स्थानिक सुट्टी रद्द

हिंगोली (जिमाका), दि. 19 : जिल्हाधिकारी जितेंद्र पापळकर यांनी सन 2024 या वर्षासाठी गुरुवार, दि. 25 एप्रिल, 2024 रोजी हजरत सिरेहक शाह बाबा रहेमतुल्ला अल उर्फ चिरागशहा दर्गा संदल ऊर्स हिंगोली, बुधवार‍ दि. 11 सप्टेंबर, 2024 साठी ज्येष्ठा गौरीपूजन (महालक्ष्मी) व गुरुवार दि. 31 ऑक्टोबर, 2024 रोजी नरक चतुदर्शी याप्रमाणे तीन स्थानिक सुट्ट्या जाहीर केल्या होत्या. हिंगोली जिल्ह्यातील लोकसभा निवडणुकीचे मतदान दि. 26 एप्रिल रोजी असल्याने मतदानाच्या सुट्टीसह 25 ते 28 एप्रिलपर्यंत सलग चार दिवस शासकीय सुट्या येत आहेत. हिंगोली जिल्ह्याच्या लोकसभा मतदानाच्या टक्केवारीवर या सुट्ट्याचा परिणाम होण्याची शक्यता आहे. त्यामुळे दि. 25 एप्रिल, 2024 रोजीची स्थानिक सुट्टी रद्द केल्याचे आदेश जिल्हाधिकारी जितेंद्र पापळकर यांनी दिले आहेत. *****

आदर्श आचारसंहितेची प्रकरणे विचारात घेण्यासाठी स्थायी समितीची स्थापना

हिंगोली (जिमाका), दि. 19 : सर्व राजकीय पक्ष व उमेदवारांच्या सहकार्याने निवडणूक आचारसंहिता, आदर्श आचारसंहितेच्या अनुपालनाची खात्री करण्यासाठी आणि त्या संहितेच्या उल्लंघनाची विनिर्दिष्ट प्रकरणे विचारात घेण्यासाठी जिल्हाधिकारी तथा निवडणूक निर्णय अधिकारी जितेंद्र पापळकर यांच्या अध्यक्षतेखाली स्थायी समितीची स्थापना करण्यात आली आहे. या समितीमध्ये पोलीस अधीक्षक जी. श्रीधर, 15-हिंगोली लोकसभा मतदार संघातील सर्व सहाय्यक निवडणूक निर्णय अधिकारी तथा उपविभागीय अधिकारी, भारतीय जनता पार्टीचे जिल्हाध्यक्ष फुलाजी शिंदे, बहुजन समाज पार्टीचे जिल्हाध्यक्ष प्रज्ञावंत मोरे, कम्युनिस्ट पार्टी ऑफ इंडियाचे जिल्हाध्यक्ष आर. आर. कोरडे, कम्युनिस्ट पार्टी ऑफ इंडिया (मार्क्सवादी)चे जिल्हाध्यक्ष अंकुशराव बुधवंत, भारतीय राष्ट्रीय काँग्रेस पार्टीचे जिल्हाध्यक्ष दिलीप देसाई, राष्ट्रवादी काँग्रेस पार्टीचे जिल्हाध्यक्ष बी. डी. बांगर, महाराष्ट्र नवनिर्माण सेनेचे जिल्हाध्यक्ष प्रमोद ऊर्फ बंडू कुटे, उध्दव बाळासाहेब ठाकरे (शिवसेना)चे जिल्हाध्यक्ष अजय सावंत, बाळासाहेबांची शिवसेनेचे जिल्हाध्यक्ष संतोष बांगर, आम आदमी पार्टीचे जिल्हाध्यक्ष गोपाल पांडूरंग ढोणे व 15-हिंगोली लोकसभा मतदारसंघासाठी निवडणूक लढविणारे सर्व उमेदवार या समितीचे सदस्य असणार आहेत. तर उपजिल्हा निवडणूक अधिकारी रामेश्वर रोडगे हे या समितीचे सदस्य सचिव असणार आहेत. उपरोक्त समितीमार्फत निवडणुका या निर्भिड व निष्पक्ष वातावरणात पार पडतील तसेच आदर्श आचार संहितेचे उल्लंघन होणार नाही आणि सर्व उमेदवारांमध्ये सहकार्याची भावना राहील, याबाबत वेळोवेळी आढावा घेण्यात येणार असल्याचे समितीचे अध्यक्ष तथा 15-हिंगोली लोकसभा मतदार संघाचे निवडणूक निर्णय अधिकारी जितेंद्र पापळकर यांनी आदेशात नमूद केले आहे. *****

सहायक निवडणूक निर्णय अधिकाऱ्यांकडून मद्यपी उपअभियंत्यावर कारवाई

हिंगोली (जिमाका), दि. 18 : भारत निवडणूक आयोगाच्या निर्देशानुसार 15-हिंगोली लोकसभा सार्वत्रिक निवडणूक 2024 अंतर्गंत 82-उमरखेड विधानसभा मतदारसंघ सहाय्यक निवडणूक निर्णय अधिकारी तथा उपविभागीय डॉ. सखाराम मुळे यांनी आज निवडणूक कर्तव्यावर असताना उपअभियंता माधव उघडे याने मद्यप्राशन करून निवडणूक कामात व्यत्यय आणल्यामुळे त्याच्याविरोधात कारवाई करण्यात आली आहे. यावेळी तहसीलदार आर. यु. सुरडकर उपस्थित होते. उप अभियंता माधव गोविंद उघडे सिलिंग मशीनचे काम चालू आहे. आज शुक्रवार (दि. 18) रोजी लोकसभा सार्वत्रिक निवडणूक- 2024 च्या अनुषंगाने ईव्हीएम व व्हीव्हीपॅटचे काम सुरू होते. या अधिकाऱ्याची टेबल क्रमांक 27 व नियुक्ती करण्यात आली होती. ईव्हीएमबाबत काम सुरु असताना तो मद्यपान करून येत निवडणूक कामात व्यत्यय आणला. तसेच त्याने टेबलवरील ईव्हीएम व सिलिंग व्यवस्थित व अचूक केली नाही. त्याला या कामात सुधारणा करून दुरुस्ती करण्यास सांगितले असता, त्याने नकार देत दिला. त्यामुळे निवडणूक कर्तव्यावर असताना मद्यप्राशन करून येणे व राष्ट्रीय कर्तव्यात कसूर व निष्काळजीपणा केल्याबाबत सहाय्यक निवडणूक निर्णय अधिकारी डॉ. मुळे यांनी तात्काळ दखल घेतली. नायब तहसीलदार व्ही. व्ही. पवार यांनी सदरील मद्यधुंद अधिकाऱ्याविरोधात लोकप्रतिनिधी १९५१ महाराष्ट्र दारूबंदी अधिनियम 1949 अन्वये तात्काळ फिर्याद देण्यात आली. सदर व्यक्तीला उत्तरवार ग्रामीण रुग्णालय, उमरखेड येथे रक्ताचे नमुने घेत तपासणीसाठी अमरावती येथे पाठविण्यात आले. *****

ईव्हीएम व व्हीव्हीपॅट सीलबंद करण्याचे काम आजपासून सुरू

हिंगोली (जिमाका), दि. 18 : भारत निवडणूक आयोगाच्या निर्देशानुसार 15-हिंगोली लोकसभा सार्वत्रिक निवडणूक 2024 अंतर्गंत 82-उमरखेड विधानसभा मतदारसंघ सहाय्यक निवडणूक निर्णय अधिकारी तथा उपविभागीय डॉ. सखाराम मुळे व तहसीलदार आर. यु. सुरडकर, सिद्धेश्वर वरणगावकर यांच्या देखरेखीमध्ये कडक सुरक्षा व्यवस्थेत व व्हीव्हीपॅट सीलबंद करण्याचे काम सुरू आहे. ईव्हीएम व व्हीव्हीपॅट सीलबंद करण्याचे काम आजपासून सुरू झाले आहे. या कामाकडे उपविभागीय अधिकारी तथा सहाय्यक निवडणूक निर्णय अधिकारी डॉ. सखाराम मुळे यांनी लक्ष घातले असून, संपूर्ण प्रक्रिया व्यवस्थित पूर्ण होण्याबाबत दक्षता घेत आहेत. *****

निवडणुकीचे पोस्टर्स, पॉम्पलेट प्रकाशित करताना मुद्रकांनी आदर्श आचारसंहितेचे पालन करावे

हिंगोली (जिमाका), दि. 18 : लोकसभा सार्वत्रिक निवडणूक 2024 च्या अनुषंगाने दि. 16 मार्च, 2024 पासून आदर्श आचारसंहिता लागू झाली आहे. लोकप्रतिनिधीत्व अधिनियम 1951 आणि आदर्श आचार संहितेच्या अनुषंगाने प्रिंट माध्यमामध्ये प्रकाशकाद्वारे प्रकाशित केलेली सामग्री आदर्श आचारसंहिता किंवा वैधानिक योजनेच्या चौकटीनुसार अयोग्य असल्याचे आढळून आल्यास त्याची जबाबदारी निश्चितीसाठी प्रकाशकाची माहिती प्रकाशित सामग्रीच्या मुख्य पृष्ठावर उघड करणे आवश्यक आहे. निवडणुकीचे पोस्टर्स, पॉम्पलेट्सच्या मुख्य पृष्ठावर मुद्रक व प्रकाशकाचे नाव, पत्ता मुद्रीत करणे आवश्यक आहे. प्रकाशक व मुद्रकाचे नाव व पत्ता न टाकता मुद्रण किंवा प्रकाशन करण्यास स्पष्टपणे मनाई केली आहे. आयोगाच्या वरील सूचनांचे काटेकोरपणे पालन होण्यासाठी सर्व महानगर पालिका, नगर पालिका अधिकाऱ्यांच्या किंवा होर्डींग, पोस्टर्स, बॅनर्स इत्यादीसाठी जबाबदार असलेल्या अशा प्राधिकरणांच्या निदर्शनास आणून देण्यात यावेत. हिंगोली जिल्ह्यातील हिंद प्रिंटींग प्रेस, विकास प्रिंटर्स, सुरभी ऑफसेट, माऊली ऑफसेट, गुरु ग्राफिक्स यांच्यासह लोकसभा मतदारसंघातील इतर सर्व मुद्रकांनी भारत निवडणूक आयोगाच्या निर्देशानुसार निवडणुकीच्या पोस्टर्स, पॉम्पलेटसच्या मुख्य पृष्ठावर मुद्रक व प्रकाशकाचे नाव, पत्ता मुद्रीत करूनच प्रकाशित करावेत. तसेच मुद्रीत केलेल्या पोस्टर्स, पॉम्पलेटच्या प्रत्येकी दोन प्रती जिल्हास्तरीय माध्यम व सनियंत्रण समितीला सादर करावेत, असे निर्देश जिल्हाधिकारी तथा जिल्हा निवडणूक निर्णय अधिकारी, हिंगोली दिले आहेत. ******