स्वयंसेवी व शासकीय संस्थांनी त्रूटीची पूर्तता 3 जुलै पर्यंत करण्याचे आवाहन

स्वयंसेवी व शासकीय संस्थांनी त्रूटीची पूर्तता  3 जुलै पर्यंत करण्याचे आवाहन

हिंगोली, दि.29 : बाल न्याय (मुलांची काळजी व संरक्षण) अधिनियम 2015 आणि महाराष्ट्र राज्य बाल न्याय (मुलांची काळजी व संरक्षण) नियम 2018 अंतर्गत कलम 41(1) अंतर्गत विधी संघर्षग्रस्त आणि काळजी व संरक्षणाची गरज असलेल्या बालकासाठी कार्यरत व इच्छुक असणाऱ्या राज्यातील सर्व स्वयंसेवी व शासकीय संस्थांना नोंदणी करणे बंधनकारक आहे.

त्यानुसार राज्यातून दिनांक 20 मे 2018 पर्यंत ऑनलाईन / ऑफलाईन 893 संस्थेनी अर्ज सादर केले होते. त्यापैकी 131 संस्थांना दिनांक 8 मार्च 2019 रोजीच्या शासन निर्णयान्वये मान्यता देण्यात आलेली आहे. उर्वरित संस्थेच्या प्रस्तावामध्ये आढळून आलेल्या त्रुटीबाबत संबंधित संस्थेना अवगत करण्यात आलेले आहे. ऑनलाईन / ऑफलाईन सादर केलेल्या प्रस्तावापैकी ज्या संस्थांना प्रस्तावामध्ये 10 टक्के पेक्षा कमी त्रुटी आहेत अशा संस्थांनी त्रुटीची पूर्तता संबंधित जिल्हा महिला व बालविकास अधिकारी कार्यालयाकडे दिनांक 3 जुलै 2019 पर्यंत सादर करावेत, 3 जुलै नंतर आलेले प्रस्ताव स्विकारले जाणार नाहीत, असे जिल्हा महिला व बाल विकास अधिकारी , हिंगोली यांनी कळविले आहे.

00000

राज्य ग्राहक कल्याण सल्लागार समितीचे अध्यक्ष (मंत्रीस्तरीय) तथा राज्य अन्न आयोगाचे अध्यक्ष अरुण देशपांडे यांचा जिल्हा दौरा

राज्य ग्राहक कल्याण सल्लागार समितीचे अध्यक्ष (मंत्रीस्तरीय) 

तथा राज्य अन्न आयोगाचे अध्यक्ष अरुण देशपांडे यांचा जिल्हा दौरा

हिंगोली, दि.27 : अन्न, नागरी पुरवठा व ग्राहक संरक्षण विभागाअंतर्गत कार्यरत राज्य ग्राहक कल्याण सल्लागार समितीचे अध्यक्ष (मंत्रीस्तरीय)  तथा राज्य अन्न आयोगाचे अध्यक्ष अरुण देशपांडे हे जिल्ह्याच्या दौऱ्यावर येत असून त्यांचा जिल्हा दौरा कार्यक्रम पुढीलप्रमाणे आहे.

सोमवार दिनांक 1 जुलै 2019 रोजी सकाळी 10.30 वाजता शासकीय विश्रामगृह येथे आगमन , सकाळी 10.30 ते दुपारी 12.30 वाजेदरम्यान (अन्न आयोगासंबंधी बैठक) जिल्हाधिकारी कार्यालय येथे जिल्हा परिषदेचे शिक्षणाधिकारी (प्राथमिक) यांच्या समवेत शालेय पोषण आहार, महिला व बाल विकास (आय सी डी एस) चे उप मुख्य कार्यकारी अधिकारी , प्रकल्प अधिकारी, अप्पर जिल्हाधिकारी  तथा जिल्हा तक्रार निवारण अधिकारी व श्री. अनभोरे  सचिव यांच्या समवेत बैठक व चर्चा, दुपारी 2.00 ते 5.00 वाजे दरम्यान (ग्राहक कल्याण सल्लागार समितीसंबंधी बैठक) जिल्हाधिकारी कार्यालय येथे अध्यक्ष यांचे समवेत जिल्हा ग्राहक संरक्षण परिषदेचे सर्व अशासकीय/ शासकीय  सदस्य, (वजन मापे, अन्न औषध प्रशासन, आरोग्य विभाग, कृषी विभागाचे अधिकारी , जिल्हा परिषदेतील आरोग्य, स्वच्छता, शिक्षण व बांधकाम विभागाचे सक्षम अधिकारी तसेच पोलिस, आरटीओ, एस.टी., टेलीफोन विभागाचे अधिकारी आदी)  जिल्हा पुरवठा अधिकारी व राज्य ग्राहक कल्याण सल्लागार समितीचे सदस्य संजय जोशी यांचे समवेत बैठक व चर्चा.

सायंकाळी 5.00 वाजता जिल्हाधिकारी कार्यालय येथे पत्रकार परिषद, सायंकाळी 7.00 वाजता शासकीय विश्रामगृह येथे मुक्काम.

मंगळवार, दिनांक 2 जुलै 2019 रोजी सकाळी 10.00 ते 5.00 वाजे दरम्यान जिल्हाधिकारी कार्यालय येथे अध्यक्ष व सचिव यांचे समवेत अप्पर जिल्हाधिकारी तथा जिल्हा तक्रार निवारण अधिकारी, जिल्हा परिषदेचे शिक्षणाधिकारी, जिल्हा पुरवठा अधिकारी यांचे समवेत बैठक व चर्चा . सायंकाळी 5.00 वाजता हिंगोली ग्राहक पंचायत आयोजित बैठकीस उपस्थिती, सायंकाळी 7.00 वाजता शासकीय विश्रामगृह येथे मुक्काम.

बुधवार, दिनांक 3 जुलै 2019 रोजी सकाळी 11.00 ते सायंकाळी 4.00 वाजेदरम्यान येथील ग्राहक चळवळीतील कार्यकर्त्यांसोबत चर्चासत्र व बैठक, सायंकाळी 7.00 वाजता वाहनाने मुंबईकडे प्रयाण .

00000

जिल्हाधिकारी कार्यालयात राजर्षी छत्रपती शाहू महाराज यांना अभिवादन

जिल्हाधिकारी कार्यालयात राजर्षी छत्रपती शाहू महाराज यांना अभिवादन

        हिंगोली,दि.26: जिल्हाधिकारी कार्यालयात राजर्षी छत्रपती शाहु महाराज यांच्या जयंतीनिमित्त त्यांच्या प्रतिमेस जिल्हाधिकरी रुचेश जयवंशी यांनी पुष्पहार अर्पण करून अभिवादन केले.

यावेळी  निवासी उपजिल्हाधिकारी चंद्रकांत सुर्यवंशी, जिल्हा नियोजन अधिकारी किरण गिरगावकर, विभागीय वन अधिकारी केशव वाबळे, नायब तहसिलदार आर. व्ही. मिटकरी यांच्यासह मध्यवर्ती प्रशासकीय इमारतीतील कार्यालय प्रमुख व कर्मचारी यांनीही राजर्षी छत्रपती शाहु महाराज यांच्या प्रतिमेस पुष्प अर्पण करून अभिवादन केले.

*****

अशासकीय कल्याण संघटक या पदाकरिता 30 जून पर्यंत अर्ज करण्याचे आवाहन

अशासकीय कल्याण संघटक या पदाकरिता 30 जून पर्यंत

अर्ज करण्याचे आवाहन  

        हिंगोली, दि.26: माजी नायब सुबेदार यांच्यासाठी अशासकीय कल्याण संघटक हे पद येथील सैनिक कल्याण कक्षाकडून भरण्यात येणार असून या पदाकरिता दिनांक 30 जून 2019 पर्यंत जिल्हा सैनिक कल्याण कक्ष , हिंगोली यांच्याशी संपर्क साधावा असे आवाहन जिल्हा सैनिक कल्याण अधिकारी, हिंगोली यांनी केले आहे.

00000

अभियांत्रिकी पदविका अभ्यासक्रमाच्या प्रवेशास मुदतवाढ

अभियांत्रिकी पदविका अभ्यासक्रमाच्या प्रवेशास मुदतवाढ

हिंगोली,दि. 25 : शैक्षणिक सत्र 2019-20 करिता प्रथम वर्ष व थेट द्वितीय वर्ष अभियांत्रिकी पदविका अभ्यासक्रमाची प्रवेश प्रक्रीया अर्ज भरण्याच्या अंतिम तारखेस पालक आणि विद्यार्थ्यांच्या मागणीवरुन मुदत वाढ देऊन अनुक्रमे 26 जून व 28 जून करण्यात  आली आहे. या अभ्यासक्रमाच्या प्रवेशासाठी विद्यार्थी  व पालकांनी आवश्यक कागदपत्रांसह प्रवेश अर्ज  भरुन अनुक्रमे 26 व 28 जून  रोजी संध्याकाळी 5.00 वाजेपर्यंत शासकीय तंत्रनिकेतन हिंगोली येथील अर्ज स्विकृती केंद्रावर खात्री करुन घ्यावी, असे आवाहन शासकीय तंत्रनिकेतनचे प्राचार्य डॉ. आर. के. पाटील यांनी केले आहे.

00000

कोषागार कार्यालयाच्या पत्त्यात बदल

कोषागार कार्यालयाच्या पत्त्यात बदल

हिंगोली,दि. 25 : येथील कोषागाराच्या स्थलांतरणामुळे पत्यात बदल झालेला आहे – जिल्हा कोषागार अधिकारी, हिंगोली जिल्हाधिकारी कार्यालयाच्या पाठीमागे, हिंगोली ता. जि. हिंगोली पिन कोड-431513, दूरध्वनी क्रमांक 02456-221440 , ई- मेल to.hingoli@zillamahakosh.in तरी यापुढे या कार्यालयाशी पत्रव्यवहार करताना उपरोक्त नमूद सुधारीत पत्त्यावर पत्रव्यवहार करण्यात यावा असे जिल्हा कोषागार अधिकारी, हिंगोली यांनी कळविले आहे.

0000

वसमत तालुक्यातील मौजे हट्टायेथील विहिरीतून येणाऱ्या पांढऱ्या धुरामुळे नागरीकांनी भयभीत न होण्याचे प्रशासनाचे आवाहन.

वसमत तालुक्यातील मौजे हट्टायेथील विहिरीतून येणाऱ्या पांढऱ्या धुरामुळे

नागरीकांनी भयभीत न होण्याचे प्रशासनाचे आवाहन.

        हिंगोली, दि.24 : वसमत तालुक्यातील हट्टा येथील जामा मस्जिद जवळील विहिरीतून दि.२३ जून २०१९ रोजी दुपार पासून पांढरा धूर येत असल्याची माहिती नागरिकांनी तहसील प्रशासनास दिली असता. प्रशासना मार्फत महसूल विभागातील अधिकारी/ कर्मचारी, भू-जल सर्वेक्षण विभागातील भूवैज्ञानिक यांनी गावात जाऊन माहिती घेतली. भूवैज्ञानिक यांनी घेतलेल्या माहितीनुसार हट्टा गावातील जामा मस्जिद जवळील विहिरीतून धूर येत असल्याचे दिसून आले. याशिवाय गावातील इतर कोणत्याही विहिरीतून असा धूर येत नसल्याची माहिती मिळाली. सदर धूर कोणत्या कारणामुळे येत आहे याबाबत प्रशासन माहिती घेत असून सद्य:स्थितीत नागरिकांनी भयभीत होण्याचे काही कारण नसल्याचे यावेळी सांगण्यात आले. सदर विहिरीवर प्रशासनाचीन जर असून आज दि. २४ जून रोजी घेतलेल्या माहिती नुसार सदर विहिरीत असलेला पांढरा धूर नष्ट झाल्याचे दिसून आले. त्यामुळे नागरिकांनी भयभीत न होता कोणत्याही अफवेवर विश्वास ठेऊ नये असे प्रशासनामार्फत आवाहन करण्यात आले आहे.

000000

बाल कामगार प्रतिबंध मोहिम व ऑपरेशन मुस्कान जनजागृती करण्यास प्रशासनास यश

बाल कामगार प्रतिबंध मोहिम व ऑपरेशन मुस्कान जनजागृती करण्यास  प्रशासनास यश

हिंगोली,दि. 24 : बचपन बचाओ आंदोलन व महाराष्ट्र शासन यांच्या संयुक्त विद्यमाने बाल मजुरी निर्मुलनासाठी दि.01 ते 30 जुन या कालावधीत state action month आयोजित करण्यात आले आहे.त्या अनुषंगाने जिल्हा बाल संरक्षण कक्ष,बाल कल्याण समिती,बालकामगार विभाग व पोलिस प्रशासन यांच्या संयुक्तरित्या राबविण्यात आलेल्या मोहिमेअंतर्गत बालकामगार प्रतिबंध मोहिम व ऑपरेशन मुस्कान राबविण्यात आले

  हिंगोली शहरातील सिध्दार्थ नगर, मार्केट कमिटी,रामलीला मैदान,मस्तानशहा नगर,ईदगाह रोड इत्यादी परिसरात शोध घेतला असता (हॉटेल,बेकरी,भंगार दुकान,ईलेक्टॉनिक दुकान,पान टपरी ई.) बाल कामगार आढळुन आले,

         कळमनुरी व औंढा ना. शहरातील नांदेड रोड ,नवीन बसस्थानक, लमान देव, जुने बसस्थानक, मंदिर परिसर इत्यादी परिसरात शोध घेतला असता (मोटार सर्व्हिसिंग सेंटर,हॉटेल,पान टपरी ,ईलेक्ट्रॉनिक दुकान, फळ दुकान, न्हावी दुकान , मंदिर परिसर इ.) इत्यादी ठिकाणी  बाल कामगार आढळून आले, .

          वसमत शहरातील कौठा रोड ,आसेगाव फाटा,नांदेड रोड , भाजी मंडी, मोंढा, बसस्थानक ईत्यादी परिसरात शोध घेतला असता (विट भट्टी , मोटार गॅरेज, हॉटेल,ईमारत बांधकाम इ. )  बाल कामगार आढळुन आले व त्या बाल कामगारांना बाल कल्याण समिती समोर हजर करण्यात आले व बाल कल्याण समिती ने बाल कामगार, बाल कामगारांच्या पालकाना / दुकान मालकांचे बाल कामगार अधिनियमानुसार समुपदेशन करून बालकांना त्यांच्या पालक / दुकान मालक यांच्या स्वाधीन करण्यात आले.

         तसेच हिंगोली ,कळमनुरी,औंढा ना.,शहरातील लोकांचा मोहीम राबवित असतांना चांगला प्रतिसाद मिळाला व बाल कायद्याबद्दल माहिती झाली,तसेच प्रत्येक तालुक्यातील वसमत शहर वगळता स्थानिक लोकांनी मोहीम राबविण्यासाठी चांगलीच मदत केली.त्यामुळे लोकांमध्ये जणजागृती झाल्याचे दिसुन आले.

            एकूणच बाल कामगार प्रतिबंध मोहिम व ऑपरेशन मुस्कान राबवित असतांना बाल कामगाराची आर्थिक स्थिती फारच बिकट व हालाकीची दिसुन आली व बहुतेक बालकांचे पालक  हयात नाहीत  त्यामुळे बाल मजुरी करून उदरनिर्वाह करतात, तसेच बालकांचे पालक शासनाच्या योजनेचा लाभ घेण्यास तयार नाहीत असे दिसुन आले.

त्यावेळी या  मेाहिमेदरम्यान मिळणाऱ्या बालकामगारांना येथील जिल्हा महिला व बाल विकास अधिकारी व जिल्हा बाल संरक्षण कक्षाने त्या बालकांचे समुपदेशन करून त्यांना बाल कल्याण समिती समोर हजर करून त्याच्या पालकांकडून हमीपत्र लिहुन घेण्यात आले.

संबधित कार्यादरम्यान बालकांना निरिक्षण गृहात पाठवून त्याच्या शिक्षणाची व्यवस्था केली. मोहिमेअतंर्गत जिल्हा महिला व बालविकास अधिकारी व जिल्हा बाल संरक्षण कक्ष, बाल कल्याण समिती पोलीस विभागातील अधिकारी व कर्मचारी यांच्या प्रयत्नातुन ही मोहिम यशस्वीरित्या राबवुन हिंगोली , वसमत,औंढा(ना),कळमनुरी या ठिकाणी बाल कामगार (बालमजुरी) व ऑपरेशन मुस्कान बाबत जनजागृती करण्यात  आली, असे  जिल्हा बाल कल्याण कक्ष, हिंगोली यांच्याकडून एका प्रसिध्दी पत्रकाद्वारे कळविण्यात आले आहे.

000000

जिल्ह्यासाठी 985 क्विंटल साखरेचे नियतन मंजूर

 जिल्ह्यासाठी 985 क्विंटल साखरेचे नियतन मंजूर

हिंगोली, दि. 21 :-सार्वजनिक वितरण व्‍यवस्‍थेअंतर्गत हिंगोली जिल्‍हयातील अंत्‍योदय शिधापत्रिकाधारकांसाठी शासनाने जुलै, ऑगस्ट व सप्टेंबर 2019 या तीन महिन्यांसाठी नियमित नियतन साखर प्रति शिधापत्रिका एक किलो याप्रमाणे मंजूर केले आहे. या महिन्‍यात जिल्‍ह्यासाठी  985  क्विंटलचे नियतन शासनाकडून प्राप्‍त झाले आहे. या नियतनाची उचल करुन प्रत्‍यक्ष शिधापत्रिकाधारकांस संबंधीत स्‍वस्‍त धान्‍य दुकानामार्फत वितरण करण्‍यात येणार आहे.  

तालुका निहाय नियतन पुढील प्रमाणे देण्‍यात आले आहे.  हिंगोली- 261 , औंढा ना.-129, सेनगाव-207, कळमनुरी-208, वसमत-180 , याची सर्व अंत्‍योदय शिधापत्रिकाधारकांनी स्‍वस्‍त धान्‍य दुकानातून साखरेची उचल करावी, असे आवाहन जिल्हा पुरवठा अधिकारी , हिंगोली यांनी  केले आहे.

0000000

प्रलंबित शिष्यवृत्ती अर्जाची माहिती 30 जून पर्यंत सादर करण्याचे आवाहन

प्रलंबित शिष्यवृत्ती अर्जाची माहिती 30 जून पर्यंत

सादर करण्याचे आवाहन

हिंगोली, दि.20 : जिल्ह्यातील सर्व मुख्याध्यापक / प्राचार्य यांनी  त्यांच्या महाविद्यालयाकडे सन 2011-12 ते 2016-17 या कालावधीत महा ई-स्कॉल प्रणालीवर नोंद झालेले परंतु आज पर्यंत प्रलंबित अर्ज तसेच सन 2017-18 मध्ये ऑफलाईनद्वारे प्राप्त झालेले अर्ज परंतु आज पर्यंत प्रलंबित शिष्यवृत्ती अर्जाची माहिती दिनांक 30 जून 2019 पर्यंत सहाय्यक आयुक्त, समाज कल्याण व सामाजिक न्याय विभागाकडे सादर करण्यात यावी. सदर मुदतीनंतर सन 2011-12 ते 2016-17 या कालावधीतील प्रलंबित अर्जाबाबत कोणताही विचार करण्यात येणार नाही.

विहीत मुदतीत माहिती सादर न केल्यास विद्यार्थी शिष्यवृत्तीपासुन वंचित राहू नयेत, असे आवाहन सहाय्यक आयुक्त, समाज कल्याण, हिंगोली यांनी केले आहे.

00000

राजर्षी शाहू महाराज गुणवत्ता पुरस्कारासाठीची माहिती 24 जून पर्यंत सादर करण्याचे आवाहन

राजर्षी शाहू महाराज गुणवत्ता पुरस्कारासाठीची माहिती

24 जून पर्यंत सादर करण्याचे आवाहन

हिंगोली, दि.20 : जिल्ह्यातील सर्व मुख्याध्यापक / प्राचार्य यांनी समाज कल्याण विभागामार्फत दरवर्षी दि. 26 जुन रोजी राजर्षी शाहू महाराज यांचा जन्म दिवस सामाजिक न्याय दिन म्हणुन साजरा केला जातो. या दिवशी इयत्ता 10 वी आणि  12 वी च्या परीक्षेत शाळेमधुन किंवा कनिष्ठ महाविद्यालयामधुन प्रथम क्रमांकाने उत्तीर्ण होणाऱ्या अनुसुचित जाती, विमुक्त जाती भटक्या जमाती किंवा विशेष मागास प्रवर्गातील (SC, VJNT, SBC प्रवर्ग) विद्यार्थ्यांना राजर्षी शाहू महाराज गुणवत्ता पुरस्कार या योजनेअंतर्गत प्रमाणपत्र, स्मृती चिन्ह व पाच हजार रुपये प्रोत्साहनपर पुरस्कार दिला जातो.

या पुरस्कारासाठी पात्र विद्यार्थ्यांच्या प्रस्तावासोबत -मुख्याध्यापक / प्राचार्य यांचे पत्र,विद्यार्थ्यांच्या गुणपत्रिकेची छायांकित प्रत,विद्यार्थ्यांच्या जातीच्या दाखल्याची छायांकित प्रत,शाळा सोडल्याचा दाखल्याची छायांकित प्रत. (टी.सी.),विद्यार्थ्यांचे नावाचे आधारलिंक, बँक पासबुकची छायांकित प्रत,पात्र विद्यार्थ्यांचे नाव रेखांकित करुन इयत्ता 10 वी किंवा 12 वी च्या बोर्डाचा विद्यालय किंवा कनिष्ठ महाविद्यालयाच्या संपुर्ण निकालाची छायांकित प्रत इत्यादी कागदपत्रे आवश्यक आहेत.

तरी जिल्ह्यातील सर्व मुख्याध्यापक / प्राचार्य यांनी उपरोक्त योजनेसाठी पात्र असलेल्या विद्यार्थ्यांचे प्रस्ताव वरील आवश्यक कागदपत्रांसह सहाय्यक आयुक्त, समाज कल्याण,हिंगेाली या कार्यालयात सोमवार  दिनांक 24 जून 2019 रोजी दुपारी 4.00 पर्यंत सादर करावेत, पात्र विद्यार्थी  या लाभापासून वंचित राहू नयेत, असे, असे आवाहन सहाय्यक आयुक्त, समाज कल्याण,हिंगेाली यांनी केले आहे.

00000

अपंग, मुकबधीर, मतिमंद, अंध प्रौढ मुला मुलींनी 5 जुलै पर्यंत विविध प्रशिक्षणासाठी अर्ज करण्याचे आवाहन

अपंग, मुकबधीर, मतिमंद, अंध प्रौढ मुला मुलींनी

5 जुलै  पर्यंत विविध प्रशिक्षणासाठी अर्ज करण्याचे आवाहन

           हिंगोली,दि.17: अपंग कल्याण आयुक्तालय, पुणेमार्फत  शासनमान्यता प्राप्त तुळजा भवानी अपंग औद्योगिक  प्रशिक्षण केंद्र, देगलूर या संस्थेत म.रा. व्यवसाय शिक्षण व परीक्षा मंडळ मुंबई  मार्फत  मान्यताप्राप्त अभ्यासक्रमासाठी 18 ते 40 वयोगटातील अपंग, मुकबधीर, मतिमंद, अंध प्रौढ मुला-मुलींना प्रवेश देण्यात येत आहे, सदरील प्रशिक्षण केंद्रात प्रौढ  अस्थिव्यंगांसाठी शिवण व कर्तनकला व सौंदर्यशास्त्र, प्रौढ मुकबधीरांसाठी कॉम्प्युटर टायपिंग, डी.टी.पी., टॅली, नेटवर्कींग, प्रौढ अंधांसाठी फिजीओथेरपी प्रशिक्षण, योगा व मसाज प्रशिक्षण इत्यादी अभ्यासक्रमांना प्रवेश देण्यात येत आहे. प्रवेशितांची निवासाची व वैद्यकीय  औषधोपचाराची व प्रशिक्षण साहित्याची विनामुल्य सोय केली आहे.

            तरी इच्छुकांनी  अपंग, मुकबधीर, मतिमंद, अंध प्रौढ मुला मुलींनी किंवा पालकांनी दिनांक 5 जुलै 2019 पर्यंत प्राचार्य , तुळजाभवानी अपंग औद्योगिक प्रशिक्षण केंद्र, शिवनेरी नगर समोर देगलूर, ता. देगलूर जि. नांदेड येथे पत्रव्यवहार करावा  किंवा समक्ष भेटावे (मो. 9960900369, 9403207100, 9503078767) असे कर्मशाळा अधिक्षक, तुळजाभवानी अपंग प्रशिक्षण केंद्र, देगलूर यांनी कळविले आहे.

0000000

क्षयरोग रुग्णांची माहिती निक्षय या संकेतस्थळावर नोंद करण्याचे आवाहन

क्षयरोग रुग्णांची माहिती निक्षय या संकेतस्थळावर नोंद करण्याचे आवाहन

           हिंगोली,दि.17:  क्षयरोग रुग्णांची माहिती निक्षय https://nikshay.in/ या संकेतस्थळावर नोंद करावी म्हणजे क्षयरुग्णांना व खाजगी व्यावसायिकांना वरील सगळ्या सुविधांचा लाभ घेता येईल. दिनांक 16 मार्च 2018 रोजीच्या भारत सरकारच्या राजपत्रातील अधिसूचनेनुसार क्षयरोग हा एक नोटीफायबल आजार असून त्याविषयी सर्व खाजगी दवाखाने, सर्व खाजगी वैद्यकीय व्यावसायिक, वैद्यकीय प्रयोगशाळा,सर्व औषध निर्माते, अशासकीय संस्थांमार्फत चालविली जाणारी रुग्णालये व दवाखाने, सर्व सार्वजनिक दवाखाने, रुग्णालये, वैद्यकीय अधिकारी यांनी  शासनास कळविणे बंधनकारक  असल्याचे घोषित केलेले आहे. सर्व सार्वजनिक तसेच खाजगी  रुग्णालये, वैद्यकीय व्यावसायिक  यांनी त्यांच्याकडे निदान झालेले / उपचार घेणाऱ्या क्षयरुग्णांची माहिती स्थानिक आरोग्य अधिककाऱ्यांना कळविणे बंधनकारक आहे. दिनांक 16 मार्च 2018 रोजीच्या क्षयरोग अधिसूचनेचे आदेश जारी करण्यात आलेले आहेत.

          क्षयरुग्णांची नोंद न केल्यास संबंधित सर्व सार्वजनिक व खाजगी रुग्णालयांना व वैद्यकीय व्यावसायिकांना भारतीय दंड संहिता 1860 च्या 45 कलम 269 आणि 270 च्या अंतर्गत शिक्षा होऊ शकते. औषध विक्रेत्यांसाठी आरोग्य व कुटुंबकल्याण मंत्रालय, नवी दिल्ली  दिनांक 30 ऑगस्ट 2013 च्या परिपत्रकाप्रमाणे औषधे व प्रसाधने कायदा 1945 या मध्ये सुधारणा करुन  क्षयरोगावरील औषधांचे विक्रीसाठी विहित नमुन्यामध्ये क्षयरुग्णांची माहिती ठेवणे बंधनकारक आहे.

          तसेच क्षयरुग्णांना व इतर सर्वांना क्षयरोग व क्षयरोग संदर्भातील सोयी सुविधा यांची माहिती देण्यासाठी सुधारीत राष्ट्रीय क्षयरोग नियंत्रण कार्यक्रमाअंतर्गत क्षयरोग हेल्पलाईन सुरु करण्यात आला असुन त्याचा क्रमांक 1800116666 असा आहे, असे जिल्हा क्षयरोग अधिकारी, हिंगोली यांनी कळविले आहे.

00000

दिनांक 20 जून पूर्वीच देयके कोषागारात सादर करण्याचे आवाहन

दिनांक 20 जून पूर्वीच देयके कोषागारात सादर करण्याचे आवाहन

                                                                                  

           हिंगोली,दि.17:  येथील कोषागार कार्यालय हे दिनांक 20 ते 25 जून 2019 या कालावधीत कोषागाराच्या नवीन इमारतीमध्ये स्थलांतरीत करावयाचे असून सदर वेळी आहरण व संवितरण अधिकारी यांचेकडील देयकांची स्विकृती व देयके पारीत करण्याकामीची संगणकीय चाचणी घेतल्यानंतरच कोषागाराचे कामकाज कार्यान्वित करण्यात येणार असल्याने उक्त नमूद कालावधीत देयके स्विकृती व देयके पारीत करणे इत्यादी कामकाज बंद राहणार आहे. सर्व आहरण व संवितरण अधिकारी यांनी विविध प्रकारची देयके दिनांक 20 जून पूर्वीच कोषागारात सादर करण्याचे आवाहन जिल्हा कोषागार अधिकारी, हिंगोली यांनी केले आहे.

000000

नोंदणीकृत बांधकाम कामगारांना विविध कल्याणकारी योजनेअंतर्गत अत्यावश्यक वस्तु व सुरक्षा संचाचे वितरण

नोंदणीकृत बांधकाम कामगारांना विविध कल्याणकारी योजनेअंतर्गत

अत्यावश्यक वस्तु व सुरक्षा संचाचे वितरण

हिंगोली, दि.13: इमारत व इतर बांधकाम कामगार कल्याणकारी मंडळ, मुंबई अंतर्गत सरकारी कामगार अधिकारी यांचे कार्यालय , हिंगोली मार्फत नोंदणीकृत बांधकाम कामगारांना विविध कल्याणकारी योजनेअंतर्गत अत्यावश्यक वस्तु व सुरक्षा संचाचे वितरण जिल्हा सरकारी कामगार अधिकारी तात्याराव कराड यांच्या हस्ते करण्यात आले .

तरी जास्तीत जास्त नोंदणीकृत बांधकाम कामगारांनी या योजनेचा लाभ घ्यावा असे आवाहन जिल्हा सरकारी कामगार अधिकारी श्री. कराड यांनी केले आहे.

00000

महिला लोकशाही दिनाचे 17 जून रोजी आयोजन

महिला लोकशाही दिनाचे 17 जून  रोजी आयोजन

        हिंगोली, दि.13: राज्यघटनेने प्रत्येक नागरिकाला समान हक्क व समान संधी असा मुलभूत हक्क दिलेला आहे. त्याअंतर्गत समस्याग्रस्त व पिडित महिलांना त्यांचे प्रश्न मांडण्यासाठी व्यासपीठ मिळावे. तसेच त्यांच्या हक्कांचे संरक्षण होऊन न्याय मिळावा यादृष्टीने महिलांच्या तक्रारी यांची शासकीय यंत्रणेकडून होण्यासाठी व समाजातील पिडित महिलांना  सुलभ मार्गदर्शनाची सुविधा उपलब्ध व्हावी  यासाठी  एक प्रभावी उपाययोजना म्हणून जिल्हास्तरावर जिल्हाधिकारी यांच्या अध्यक्षतेखाली त्यांच्या दालनात दिनांक 17 जून 2019 रोजी सकाळी 11.00 वाजता महिला लोकशाही  दिन होणार आहे. ज्या महिलांना तक्रारी करावयाच्या असतील त्यांनी जिल्हा महिला व बालविकास अधिकारी  कार्यालयात  मध्यवर्ती प्रशासकीय इमारत हिंगोली यांच्या कार्यालयात तक्रारी सादर कराव्यात असे आवाहन जिल्हा महिला व बालविकास अधिकारी व्हि.जी. शिंदे यांनी केले आहे.

00000

पशुसंवर्धन व दुग्धव्यवसाय विकास बाबत प्रशिक्षणासाठी नोंदणी करण्याचे आवाहन

पशुसंवर्धन व दुग्धव्यवसाय विकास बाबत प्रशिक्षणासाठी नोंदणी करण्याचे आवाहन

        हिंगोली, दि.13 : ग्रामीण भागातील बहुतांश माजी सैनिक हे शेतकरी कुटुंबातील असल्यामुळे पशुसंवर्धन आणि दुग्धव्यवसाय हा मूळ अथवा जोडधंदा म्हणून त्यांच्या स्वयंरोजगारासाठी उत्तम पर्याय आहे. त्या अनुषंगाने ग्रामीण भागातील माजी सैनिकांकरिता पशुंसंवर्धन, शेळीपालन, मत्स्यपालन, दुग्धव्यवसाय  इत्यादीबाबतचे प्रशिक्षण आयोजित करण्याबाबतचा प्रस्ताव संबंधित विभागाकडे प्रस्तावित आहे.

            तरी इच्छुक माजी सैनिकांनी दिनांक 18 जून 2019 पर्यंत सदर प्रशिक्षणाकरिता जिल्हा सैनिक कल्याण कक्ष, हिंगोली येथे नोंद करावी , असे आवाहन निवासी उपजिल्हाधिकारी तथा जिल्हा सैनिक कल्याण अधिकारी , हिंगोली यांनी केले आहे.

00000

जिल्हा सरकारी वकील व सरकारी अभियोक्ता तसेच सहायक सरकारी वकील व अतिरिक्त सरकारी अभियोक्ता यांच्या नव्याने नियुक्तीसाठी पात्र अर्जदारांची दिनांक 12 व 13 जून 2019 रोजी मुलाखत

जिल्हा सरकारी वकील  व सरकारी अभियोक्ता तसेच सहायक सरकारी वकील व अतिरिक्त सरकारी अभियोक्ता यांच्या नव्याने नियुक्तीसाठी पात्र अर्जदारांची दिनांक 12 व 13 जून 2019 रोजी मुलाखत

हिंगोली, दि.7: परभणी जिल्हा व सत्र न्यायालयात जिल्हा सरकारी वकील व सरकारी अभियोक्ता तसेच सहायक सरकारी वकील व अतिरिक्त सरकारी अभियोक्ता यांच्या नव्याने नियुक्तीसाठी नामिका पाठविण्यासाठी (पॅनल) तयार करण्यासाठी पात्र अर्जदारांकडून अर्ज मागविण्यात आले होते. एकूण 164 अर्ज प्राप्त झालेले आहेत. या उमेदवारांची मुलाखत दिनांक 12 व 13 जून 2019 या दिवशी जिल्हाधिकारी कार्यालय, परभणी येथे आयोजित करण्यात आली आहे. त्याबाबतचे मुलाखतपत्र या कार्यालयाद्वारे  निर्गमित करण्यात आले आहेत.

तसेच उमेदवारांना मुलाखतीसाठी नेमून दिलेल्या दिनांक व वेळेच्या तपशिलाची उमेदवारांची यादी  www.parbhani.nic.in  या संकेतस्थळावर प्रसिध्द करण्यात आली आहे. ज्या उमेदवारांना मुलाखत पत्र प्राप्त झाले नसेल त्यांनी सदर यादीसह दिनांक 10 जून 2019 रोजी पर्यंत मुलाखत पत्र प्राप्त करुन घेण्यासाठी जिल्हाधिकारी कार्यालयात संपर्क साधावा, असे अतिरिक्त जिल्हादंडाधिकारी, परभणी यांनी एका प्रसध्दी पत्रकाद्वारे कळविले आहे.

000000