महात्मा गांधी तंटामुक्त गाव मोहीम पत्रकारिता पुरस्कारासाठी प्रवेशिका पाठविण्याचे आवाहन

महात्मा गांधी तंटामुक्त गाव मोहीम

पत्रकारिता पुरस्कारासाठी प्रवेशिका पाठविण्याचे आवाहन

हिंगोली, दि.1: महात्मा गांधी तंटामुक्त गाव मोहिमेतंर्गत मोहिमेला वस्तुनिष्ठ प्रसिध्दी देऊन,ही योजना जन सामान्यां पर्यंत प्रभावीपणे पोहोचविणाऱ्या  पत्रकारांसाठी  शासनाने जिल्हा,  विभाग व राज्यस्तरावर पुरस्कार देण्याची  योजना जाहीर केली आहे. हिंगोली जिल्ह्यातील पत्रकारांनी या पुरस्कारासाठी आपल्या प्रवेशिकातीन प्रतीत दि. 15 जून, 2019 पर्यंत पाठवाव्यात, असे आवाहन महात्मा गांधी तंटामुक्तगाव मोहिम पत्रकार पुरस्कार जिल्हास्तरीय समितीच्या   वतीने करण्यात आले आहे.

महात्मा गांधी तंटामुक्त गाव मोहीम पत्रकारिता पुरस्कारासाठी जिल्हास्तरीय प्रथम पुरस्कार रुपये 25 हजार, द्वितीय पुरस्कार रुपये 15 हजार आणि तृतीय पुरस्कार रुपये 10 हजार आहे. महात्मा गांधी तंटामुक्त गाव मोहिमेची दि. 2 मे,2018 ते दि.1 मे,2019 या कालावधीमध्ये प्रसिध्द केलेले लिखाण पुरस्कार पात्रतेकरिता मुल्यमापनासाठी ग्राह्य धरण्यात येईल. नमूद कालावधीत वृत्तपत्रे / नियतकालिके यामधून प्रसिध्द झालेले टीकात्मक लेख, वृत्ताकंन, बातम्या, अग्रलेख, फोटोफिचर्स अशा साहित्याचा विचार करण्यात येईल. पुरस्कारासाठी वृत्तपत्रांचे बातमीदार, स्तंभलेखक, मुक्तपत्रकार पात्र असतील. पारितोषिकांसाठी मराठी, हिंदी, इंग्रजी भाषेत प्रसिध्द केलेल्या साहित्याचा विचार करण्यात येईल. माहिती व जनसंपर्क महासंचालनालय, महाराष्ट्र राज्य, मुंबई यांच्यामार्फत प्रसिध्द करण्यात आलेल्या अ, ब, क वर्गवारीतील  वृत्तपत्रे / नियतकालिके यामधून प्रसिध्द झालेल्या साहित्याचाच या  पारितोषिकांसाठी विचार करण्यात येईल.

एका वर्तमानपत्राच्या प्रत्येक आवृत्तीतील एकाच पत्रकाराचा अर्ज संपादकामार्फत स्वीकारण्यात येईल. जिल्ह्यातून प्रथम क्रमांक मिळविलेल्या पत्रकारांचे विभागीय स्तरावरील पुरस्कारासाठी आपोआप नामनिर्देशन होईल तर विभागातून प्रथम क्रमांक मिळविलेल्या पत्रकारांचे राज्य स्तरावरील पुरस्कारासाठी आपोआप नामनिर्देशन  होईल.

हिंगोली जिल्ह्यातील पत्रकारांनी आपल्या प्रवेशिका तीन प्रतीत जिल्हा माहिती अधिकारी तथा सदस्य सचिव, महात्मा गांधी तंटामुक्त गाव मोहीम पत्रकार पुरस्कार जिल्हास्तरीय समिती, प्रशासकीय इमारत, एस-6, हिंगोली-431513 (दूरध्वनी क्र. 02456 -222635) यांच्याकडे शुक्रवार दि. 15 जून, 2019 पर्यंत सादर कराव्यात.

 ****