निवृत्तीवेतनधारकांसाठी 6 ऑक्टोबर रोजी
महा-उपलब्धी मोबाईल अॅपबाबत कार्यशाळेचे आयोजन
हिंगोली, दि. 30 सप्टेंबर (जिमाका): राज्य शासकीय निवृत्तीवेतनधारक व कुटुंब निवृत्तीवेतनधारकांना निवृत्तीवेतन विषयक सेवा जलद, सुलभ आणि पारदर्शक पद्धतीने उपलब्ध करून देण्यासाठी वित्त विभागामार्फत ‘Maha-uplabdhi (महा-उपलब्धी)’ हे मोबाईल अॅप सुरू करण्यात आले आहे.
शासन निर्णय, दि. १९ जून २०२६ अन्वये सुरू करण्यात आलेल्या या मोबाईल अॅपच्या वापराबाबत निवृत्तीवेतनधारक व कुटुंब निवृत्तीवेतनधारकांना माहिती देण्यासाठी मंगळवार, दि. ६ ऑक्टोबर २०२६ रोजी सकाळी ११ वाजता जिल्हा कोषागार कार्यालय, हिंगोली येथे कार्यशाळेचे आयोजन करण्यात आले आहे.
या कार्यशाळेस प्रधान सचिव (लेखा व कोषागारे), वित्त विभाग, मंत्रालय, मुंबई हे ऑनलाइन माध्यमातून उपस्थित राहून निवृत्तीवेतनधारक व कुटुंब निवृत्तीवेतनधारकांना मार्गदर्शन करणार आहेत. तसेच Maha-uplabdhi मोबाईल अॅपचा वापर, त्यातील विविध सुविधा आणि निवृत्तीवेतन विषयक सेवांचा लाभ घेण्याच्या पद्धतीबाबत माहिती देण्यात येणार आहे.
हिंगोली जिल्ह्यातील सर्व राज्य शासकीय निवृत्तीवेतनधारक व कुटुंब निवृत्तीवेतनधारकांनी सदर कार्यशाळेस उपस्थित राहून Maha-uplabdhi मोबाईल अॅपबाबत माहिती घ्यावी, असे आवाहन जिल्हा कोषागार अधिकारी मनजीत गोरेगावकर यांनी केले आहे.
No comments:
Post a Comment