सेवा संकल्प अभियानांतर्गत सेनगाव तालुक्यातील बाभुळगाव येथे भटके विमुक्त विशेष शिबिर संपन्न; शिबिरात विविध प्रमाणपत्रांचे वाटप

 सेवा संकल्प अभियानांतर्गत सेनगाव तालुक्यातील बाभुळगाव येथे भटके विमुक्त विशेष शिबिर संपन्न

शिबिरात विविध प्रमाणपत्रांचे वाटप

        हिंगोली, दि. ३० (जिमाका) : जिल्ह्यात सेवा संकल्प अभियानांतर्गत विविध उपक्रम राबविण्यात येत आहेत. त्याअनुषंगाने विमुक्त जाती व भटक्या जमाती प्रवर्गातील नागरिकांना शासनाच्या विविध योजना व सेवांचा लाभ सुलभतेने मिळावा, या उद्देशाने सेनगाव तालुक्यातील मौजे बाभुळगाव येथे मंगळवार, दि. २९ सप्टेंबर रोजी भटके विमुक्त विशेष शिबिराचे आयोजन करण्यात आले.

        विमुक्त जाती व भटक्या जमाती प्रवर्गातील नागरिकांची भटक्या जीवनशैली लक्षात घेता, त्यांना आवश्यक असलेली शासकीय कागदपत्रे व प्रमाणपत्रे एकाच ठिकाणी उपलब्ध करून देण्यासाठी शिबिरात विविध सेवांची सुविधा देण्यात आली. नागरिकांनी शिबिरास उत्स्फूर्त प्रतिसाद देत आवश्यक प्रमाणपत्रे व योजनांचा लाभ घेतला.

        शिबिरामध्ये ५ लाभार्थ्यांना आधार कार्ड, १४ लाभार्थ्यांना शिधापत्रिका, २९ लाभार्थ्यांना जात प्रमाणपत्र, २४ लाभार्थ्यांना उत्पन्नाचा दाखला, १७ लाभार्थ्यांना नॉन क्रिमीलेयर प्रमाणपत्र, ३१ लाभार्थ्यांना रहिवासी/अधिवास दाखला, तसेच १२ लाभार्थ्यांना संजय गांधी निराधार योजना/श्रावणबाळ सेवा राज्य निवृत्तीवेतन योजनेचा लाभ उपलब्ध करून देण्यात आला अशी माहिती तहसीलदार सेनगाव यांनी दिली.

        विमुक्त जाती व भटक्या जमाती प्रवर्गातील नागरिकांना शासनाच्या विविध योजना व सेवांचा लाभ मिळवून देण्यासाठी प्रशासनामार्फत अशा विशेष शिबिरांचे आयोजन करून आवश्यक कार्यवाही करण्यात येत आहे.