औंढा नागनाथ मंदिर परिसरातील विकासकामांना गती जिल्हाधिकारी राहुल गुप्ता यांच्याकडून पाहणी; संबंधित अधिकाऱ्यांना आवश्यक सूचना

 औंढा नागनाथ मंदिर परिसरातील विकासकामांना गती

जिल्हाधिकारी राहुल गुप्ता यांच्याकडून पाहणी; संबंधित अधिकाऱ्यांना आवश्यक सूचना

हिंगोली, दि. २९ (जिमाका) : औंढा नागनाथ येथील मंदिर व परिसरातील विकासकामांची जिल्हाधिकारी राहुल गुप्ता यांनी आज पाहणी केली. परिसरातील पाणी निचरा, भूमिअभिलेख, टोपोग्राफिकल सर्वेक्षण आणि विकासकामांच्या नियोजनाबाबत त्यांनी संबंधित अधिकाऱ्यांना आवश्यक सूचना दिल्या.

मंदिर परिसराची भूमिअभिलेख विभागाने मोजणी करून नकाशावर जीओ-कॉरडीनेट व जमिनीचे तलांक नमूद करावेत. हा नकाशा सातबारा उताऱ्याशी एकत्रित करून कामे तातडीने पूर्ण करावीत, असे निर्देश जिल्हाधिकारी गुप्ता यांनी संबंधीत विभागाला दिले.

परिसरातील पाण्याचा योग्य निचरा होण्यासाठी जमिनीची पातळी सुधारण्यासह ड्रेनेजची पुनर्बांधणी, नाल्याचे खोलीकरण व रुंदीकरण करण्याच्या सूचना दिल्या. या कामांसाठी सविस्तर प्रस्ताव तयार करून जिल्हा नियोजन समितीकडे सादर करण्याचे निर्देशही त्यांनी दिले.

मंदिर परिसराच्या सुमारे ५०० मीटरपर्यंतच्या भागाचे टोपोग्राफिकल सर्वेक्षण करून पाणी निचरा व व्यवस्थापनाचे नियोजन करावे. विकासकामांचा नियमित आढावा घेण्यासाठी सॉफ्टवेअर आधारित प्रणालीचा वापर करण्याच्या सूचनाही जिल्हाधिकाऱ्यांनी दिल्या.

यावेळी सार्वजनिक बांधकाम विभागाचे कार्यकारी अभियंता सुरेश जोशी, पुरातत्त्व विभागाचे सहाय्यक संचालक अमोल गोटे, तहसीलदार हरीश गाडे, पुणे येथील वास्तुविशारद तेजस्विनी आफळे यांच्यासह संबंधित विभागांचे अधिकारी उपस्थित होते.