शेतकऱ्यांनी एक रुपयात पिक विमा योजनेत सहभागी व्हावे - जिल्हाधिकारी जितेंद्र पापळकर

हिंगोली, दि. 02 (जिमाका) : खरीप 2024 हंगामात पेरण्या सुरु झाल्या असून, जिल्ह्यातील शेतकऱ्यांनी ज्वारी, तूर, मूग, उडीद, सोयाबीन आणि कापूस या पिकांसाठी एक रुपयात प्रधानमंत्री विमा योजनेत सहभागी होऊन पिकांना विम्याचे संरक्षण करून घेण्याचे आवाहन जिल्हाधिकारी जितेंद्र पापळकर यांनी केले आहे. प्रधानमंत्री पिक विमा योजनेत शेतकऱ्यांना एक रुपया विमा हप्ता भरून सहभागी करून घेण्याचा निर्णय महाराष्ट्र शासनाने 2023 मध्ये घेतला आहे. योजने अंतर्गत हिंगोली जिल्ह्यातील 5 लाख 12 हजार 439 शेतकऱ्यांनी खरीप हंगाम 2023 मध्ये सहभाग नोंदविला होता. विविध नैसर्गिक आपत्तींमुळे पिकाच्या होणाऱ्या नुकसानीपासून शेतकऱ्यास आर्थिक स्थैर्य अबाधित राखण्याच्या दृष्टिकोनातून योजना राबविण्यात येत आहे. या योजनेत सहभागी होण्यासाठी केंद्र शासनाचे पिक विमा पोर्टल (www.pmfby.gov.in) सुरु करण्यात आले आहे. शेतकऱ्यांनी फक्त एक रुपया भरून आपल्या पिकांना पिक विम्याचे संरक्षण घ्यावे, असे आवाहन केले आहे. विमा अर्ज भरण्यासाठी प्रति शेतकरी सीएससी केंद्रास 40 रुपये मानधन केंद्र शासनाने निर्धारित करून दिले आहे. ते संबंधित विमा कंपनीमार्फत सीएससी केंद्रास दिले जाते. त्यामुळे शेतकऱ्यांनी प्रति अर्ज एक रुपया प्रमाणे रक्कम सीएससी केंद्र चालकांना देऊन अर्ज करावा. केंद्रचालकांनी अतिरिक्त रक्कमेची मागणी केल्यास शेतकऱ्यांनी तालुका कृषि अधिकारी यांच्याकडे संपर्क केल्यास केंद्रचालकावर कायदेशीर कारवाई करता येईल. कोणत्याही सीएससी केंद्र चालकाने अथवा शेतकऱ्याने शासकीय जमीन, शासकीय गायरान, मंदिर, देवस्थान, संस्थान जमीन अथवा दुसऱ्या शेतकऱ्याचा परस्पर पिक विमा उतरवू नये, अशा तक्रारी प्राप्त झाल्यास संबंधितांवर फौजदारी गुन्हा दाखल करण्यात येणार असल्याचे जिल्हाधिकारी यांनी प्रसिद्धीपत्रकाद्वारे कळविले आहे. शेतकऱ्यांनी विमा काढताना ही काळजी घ्यावी अर्ज करण्यासाठी आधार क्रमांक आवश्यक आहे. पिक विम्यातील अर्ज हा आधार वरील नावाप्रमाणेच असावा. पिक विम्यातील नुकसान भरपाई ही केंद्र शासनाच्या विमा पोर्टल द्वारे आधार संलग्न बँक खात्यामध्ये करण्यात येते. यासाठी आपले बँक खाते आधार संलग्न पेमेंट मिळण्यासाठी अधिकृत असणे आवश्यक आहे. याकरिता आपला बँक मॅनेजर माहिती देऊ शकतो. आधार कार्ड वरील नाव व बँक खात्यावरील नाव सारखे असावे. विमा योजनेत सहभागी होण्यासाठी शेतकऱ्याने हे करावे अधिसूचित क्षेत्रातील अधिसूचित पिकासाठी पिक कर्ज घेतलेल्या शेतकऱ्यांना विमा योजनेत सहभाग बंधनकारक नाही. त्यासाठी अंतिम दिनांकाच्या 7 दिवस अगोदर कर्ज घेतलेल्या बँकेमध्ये अर्ज देणे आवश्यक (अनिवार्य) आहे. इतर बिगर कर्जदार शेतकऱ्यांनी आपला सातबाराचा उतारा, बँक पासबुक, आधारकार्ड, पिकपेराचे स्वयं घोषणापत्र व आवश्यक ठिकाणी नोंदणीकृत भाडेपत्रक-कारारनामा अपलोड करावा. योजनेत सहभागी होण्यासाठी आपण प्राधिकृत बँक, कॉमन सर्विस सेंटर अथवा www.pmfby.gov.in या पोर्टलचे सहाय्य घेता येईल. योजनेत सहभागासाठी अंतिम मुदत दि.15 जुलै 2024 आहे. परंतु, सर्व शेतकऱ्यांनी अंतिम दिनांकाची वाट न पाहता आपल्या पिकाचा पिक विमा उतरवून घ्यावा. मिळण्यासाठी अधिकृत असणे आवश्यक आहे. याकरिता बँक व्यवस्थापक माहिती देऊ शकतो. योजनेच्या अधिक माहितीसाठी केंद्र शासनाचे कृषि रक्षक पोर्टल हेल्पलाईन 14447 संबंधित विमा कंपनी, स्थानिक कृषि विभाग कार्यालयाशी संपर्क साधण्याचे आवाहन जिल्हाधिकारी जितेंद्र पापळकर यांनी केले आहे. *****

जिल्हास्तरीय अतिसार प्रतिबंध मोहीम सुरू

हिंगोली, दि.२ (जिमाका): स्वच्छ भारत मिशन ग्रामीण अंतर्गत मुख्य कार्यकारी अधिकारी अनुप शेंगुलवार यांच्या अध्यक्षतेखाली जिल्हास्तरीय अतिसार प्रतिबंध मोहिमेस प्रारंभ झाला. दिनांक 1 जुलै 2024 ते 31 ऑगस्ट 2024 या कालावधीत राबविण्याच्या सूचना देण्यात आल्या असून, ऑनलाईन प्रणालीद्वारे जिल्हास्तरीय बैठक आयोजित करण्यात आला. यात प्रामुख्याने शाळा अंगणवाडी, प्राथमिक आरोग्य केंद्र व सार्वजनिक कार्यालय इत्यादी ठिकाणी पिण्याचे पाणी व स्वच्छतेबाबत चर्चा करण्यात आली. तसेच शुद्ध पाणी निर्जंतुकीकरणाचा वापर करून जनजागृती आजारास रोखणे, पाणी तपासणी अधिक गुणवत्ता पूर्ण करून दूषित पाणी स्त्रोतावर नियोजित वेळेत प्रतिबंधात्मक उपाययोजना करणे, अंगणवाडी, प्राथमिक आरोग्य केंद्र व सरकारी कार्यालयातील क्षेत्रीय तपासणी संचाद्वारे एफ. टी.के (ftk)पाणी गुणवत्ता तपासणी करणे तसेच ग्रामपंचायतीमधील इतर सर्व संस्थांमध्ये पाणी तपासण्याचे प्रात्यक्षिक देऊन तेथील विद्यार्थ्यांना व नागरिकांना पाणी तपासणीच्या स्वच्छतेचा संबंधित माहिती देण्याबाबत यावेळी चर्चा करण्यात आली. तसेच जल स्त्रोतांचा परिसर स्वच्छ ठेवण्याबाबत निर्देश देण्यात आले आहेत. पाण्याचे व्यवस्थापन, स्वच्छता जागरूकता कार्यक्रम, तसेच गावातील नळ जोडणी, पाणी गळती जागा शोधून त्याची दुरुस्तीबाबत पाहणी करणे, छतावरील पाणी संकलन, कचऱ्याचे वर्गीकरण, शौचालयाच्या वापरासाठी विशेष उपक्रम, स्वच्छता जागरूकता कार्यक्रमाबाबत चर्चा करण्यात आली. ही मोहीम यशस्वीपणे राबविण्याचे आवाहन केले आहे. मोहिमेचा अहवाल सादर करणे, याप्रसंगी शिक्षण विभाग आरोग्य विभाग, महिला बालकल्याण विभाग ग्रामीण पाणीपुरवठा विभाग, ग्रामपंचायत विभाग, जिल्हा पाणी व स्वच्छता मिशन विभाग, सर्व विभाग प्रमुख व कर्मचारी उपस्थित होते. तसेच पाणी व स्वच्छता मिशन कक्षाचे प्रकल्प संचालक संजय कुलकर्णी यांनी अतिसार प्रतिबंध मोहिमेत करावयाच्या उपक्रमाची माहिती दिली. अतिसार प्रतिबंध मोहिमेचे जिल्हास्तरीय सनियंत्रण महेश थोरकर करणार आहे. *****

कंत्राटी तत्त्वावर डाटा एंट्री ऑपरेटरच्या दोन जागांसाठी गुरुवारी मुलाखत

हिंगोली (जिमाका), दि.01:अनुसूचित उपयोजनेंतर्गंत वार्षिक अनुसूचित जाती घटक कार्यक्रम प्रभावीपणे राबविण्यासाठी समाज कल्याण विभागामध्ये दोन डाटा एंट्री ऑपरेटर (कंत्राटी)च्या गुरुवारी (दि. 4) रोजी मुलाखतीचे आयोजन करण्यात आले असल्याचे समाज कल्याण विभागाचे सहायक आयुक्त यादव गायकवाड यांनी प्रसिद्धीपत्रकाद्वारे कळविले आहे. हिंगोली येथील समाज कल्याण कार्यालयामध्ये डाटा एंट्री करण्यासाठी ऑपरेटर (कंत्राटी) पदाची आवश्यकता असून, कार्यालयीन कामकाज करण्यासाठी केवळ मुलाखत तसेच संगणकावर टंकलेखन चाचणी घेऊन निव्वळ तात्पुरत्या स्वरुपात डाटा एंट्री ऑपरेटर (कंत्राटी) पद तीन महिन्यासाठी भरावयाचे आहे. तरी कोणत्याही शाखेतील पदवीधर, संगणकाचे ज्ञान, एमएस-सीआयटी, टंकलेखन मराठी - 30 श.प्र.मी. आणि इंग्रजी- 40 श.प्र.मी. इ अटी/पात्रता पात्र असलेल्या इच्छूक उमेदवारांनी सहाय्यक आयुक्त, समाज कल्याण कार्यालय, हिंगोली येथे गुरुवार, दि. 4 जुलै रोजी सकाळी 11 वाजता आवश्यक त्या मूळ कागदपत्रांसह उपस्थित राहण्याचे आवाहन समाज कल्याण विभागाचे सहायक आयुक्त श्री. गायकवाड यांनी केले आहे. *****

माजी मुख्यमंत्री वसंतराव नाईक यांना जयंतीनिमित्त अभिवादन

हिंगोली (जिमाका), दि.01: हरित क्रांतिचे प्रणेते, माजी मुख्यमंत्री स्व. वसंतराव नाईक यांना आज जयंतीनिमित्त जिल्हाधिकारी कार्यालयात त्यांच्या प्रतिमेस उपजिल्हाधिकारी समाधान घुटुकडे यांनी पुष्पहार अर्पण करून अभिवादन करण्यात आले. नायब तहसीलदार डी. एस. जोशी यांच्यासह जिल्हाधिकारी कार्यालयातील अधिकारी –कर्मचारी यावेळी उपस्थित होते. *****

ज्येष्ठ साहित्यिक, कलावंतांनी मानधन सन्मान योजनेसाठी आधार प्रमाणिकरण करून घेण्याचे आवाहन

हिंगोली (जिमाका), दि.01: राजर्षी शाहू महाराज ज्येष्ठ साहित्यिक व कलावंतांना मानधन सन्मान योजनेमध्ये लाभार्थ्यांचे आधार प्रमाणीकीकरण (व्हेरीफिकेशन) करून घेणे आणि उर्वरीत लाभार्थ्यांना आधार कार्ड उपलब्ध करून घेण्याचे आवाहन जिल्हा समाज कल्याण अधिकारी राजू एडके यांनी केले आहे. राज्यातील मान्यवर वृध्द साहित्यिक व कलावंतांना मानधन योजना सन 1954-55पासून संपूर्ण राज्यात सांस्कृतिक कार्य संचालनालयामार्फत राबविली जाते. सद्यस्थितीत कलावंतांना ऑनलाईन पद्धतीने 5 हजार रुपये मानधन अदा करण्यात येते. ही योजना प्रत्यक्ष लाभहस्तांतरण (डीबीटी)मार्फत राबविण्यासाठी जुन्या लाभार्थ्यांची परिपूर्ण माहिती उदा. आधार कार्ड, जन्म दिनांक (आधार कार्डवर नमूद असलेला), मोबाईल नंबर आवश्यक आहे. त्यासाठी संचालनालय स्तरावर माहिती संकलित करण्याचे काम सुरू आहे. त्यामुळे जिल्ह्यातील सर्व ज्येष्ठ साहित्यिक व कलावंतांचे मानधन देण्यासाठी त्यांचे पडताळणी क्रमांक आवश्यक आहेत. त्यासाठी शासनाने https://mahakalasanman.org/AadharVerification.aspx ही लिंक तयार केली असून या लिंकवर क्लिक करून आपले आधार क्रमांक व इतर माहिती स्वतःच्या मोबाईल वरून किंवा कॉमन सर्व्हिस सेंटर, आपले सरकार सेवा केंद्र व महा ई सेवा केंद्र येथून पडताळणी करू शकतात, असे आवाहन प्रशासनाकडून करण्यात आले आहे. ****

मतदार यादीचा विशेष संक्षिप्त पुनरीक्षण कार्यक्रम जाहीर

• बीएलओ घरोघरी भेटी देवून करणार पडताळणी • 25 जुलै रोजी प्रसिद्ध होणार एकत्रिकृत प्रारूप मतदार यादी • 25 जुलै ते 9 ऑगस्टपर्यंत मतदार यादीत नाव नोंदविता येणार • मतदार यादीची अंतिम प्रसिद्धी 20 ऑगस्टला होणार हिंगोली (जिमाका), दि. 01 : भारत निवडणूक आयोगाने 1 जुलै 2024 या अर्हता दिनाकांवर आधारित छायाचित्र मतदार यादीचा (दुसरा) विशेष संक्षिप्त पुनरीक्षण कार्यक्रम जाहीर केला आहे. त्यानुसार 25 जून 2024 ते 24 जुलै 2024 या कालावधीत मतदान केंद्रस्तरीय अधिकारी (बीएलओ) यांच्याद्वारे घरोघरी भेटी देवून तपासणी, पडताळणी, योग्य प्रकारे फोटो तसेच मतदान केंद्राचे सुसूत्रीकरण व प्रमाणिकरण करण्यात येणार असल्याचे उपविभागीय अधिकारी तथा मतदार नोंदणी अधिकारी डॉ.सचिन खल्लाळ यांनी केले आहे. मतदार यादी विशेष संक्षिप्त पुनरीक्षण कार्यक्रमानुसार एकत्रिकृत प्रारूप मतदार यादी गुरुवार, दि. 25 जुलै 2024 रोजी प्रसिद्ध केली जाईल. तसेच गुरुवार, दि. 25 जुलै ते शुक्रवार, दि. 9 ऑगस्ट 2024 या कालावधीत दावे व हरकती स्वीकारल्या जाणार आहेत. या काळातील शनिवार, रविवारी दावे व हरकती स्वीकारण्यासाठी विशेष मोहीम राबवली जाणार आहे. दावे व हरकती निकाली काढण्याची मुदत सोमवार, दि. 19 ऑगस्ट 2024 पर्यंत राहणार असून मंगळवार, दि. 20 ऑगस्ट 2024 रोजी मतदार यादीची अंतिम प्रसिद्धी केली जाणार आहे. त्यानुसार सर्व तहसीलदार तथा सहाय्यक मतदार नोंदणी अधिकारी यांच्या स्तरावरुन दि. 25 जून, 2024 ते दि. 4 जुलै, 2024 या कालावधी दरम्यान मतदान केंद्रस्तरीय अधिकारी यांच्याद्वारे घरोघरी भेटी देऊन तपासणी, पडताळणी करणे, तसेच दि. 10 जुलै, 2024 ते दि. 12 जुलै, 2024 या कालावधीत मतदान केंद्राचे सुसूत्रीकरण व प्रमाणिकरण करुन प्रस्ताव सादर करण्यात येणार आहे. दि. 1 जुलै, 2024 या अर्हता दिनांकावर आधारित प्रारुप मतदार यादी दि. 25 जुलै, 2024 रोजी प्रसिध्द करण्यात येणार आहे. या कामी यादीत नवीन नाव नोंदणीसाठी नमुना नं. 6, मतदार यादीतील नोंदी दुरुस्तीसाठी नमुना नं. 8 आणि त्याच विधानसभा मतदारसंघात नाव स्थलांतरीत मधील दावे आणि मतदार यादीतून नाव वगळण्यासाठी नमुना नं. 7 मधील दावे व हरकती सर्व संबंधित मतदान केंद्रस्तरीय अधिकारी, तहसीलदार तथा सहाय्यक मतदार नोंदणी अधिकारी यांच्या कार्यालयातील मतदार मदत कक्ष (VHC) मार्फत स्वीकारण्यात येतील. भारत निवडणूक आयोगाची मान्यता प्राप्त असलेल्या राजकीय पक्षांनी प्रत्येक मतदान केंद्रासाठी एक याप्रमाणे मतदान केंद्रस्तरीय अभिकर्त्यांच्या नेमणुका करुन त्यांची विहित नमुन्यातील यादी संबंधित मतदान केंद्रस्तरीय अधिकारी, तहसीलदार तथा सहाय्यक मतदार नोंदणी अधिकारी यांना उपलब्ध करुन द्यावी. मतदार केंद्रस्तरीय अधिकारी यांच्या मदतीने मतदार याद्या अधिक अचूक व परिपूर्ण करण्यासाठी सहकार्य करावे, असे आवाहन उपविभागीय अधिकारी तथा मतदार नोंदणी अधिकारी डॉ. सचिन खल्लाळ, सहाय्यक मतदार नोंदणी अधिकारी श्रीमती शारदा दळवी यांनी केले आहे. ******

आयटीआय प्रवेशासाठी 3 जुलैपर्यंत मुदतवाढ

हिंगोली, (जिमाका) दि. ०१: यावर्षी औद्योगिक प्रशिक्षण संस्था, वसमत येथे प्रवेश प्रक्रियेतील ऑनलाईन अर्ज भरून नजीकच्या औद्योगिक प्रशिक्षण संस्थेमध्ये भरलेला फॉर्म दुरुस्त करणे व प्रवेश शुल्क जमा करण्याचा ३० जून 2024 हा अंतिम दिनांक होता. त्यात 3 जुलै 2024 पर्यंत मुदतवाढ करण्यात आली आहे. तसेच सुट्टीच्या दिवशीसुद्धा सर्व आयटीआय चालू असून प्रवेश अर्ज कन्फर्म करण्याचे काम चालू आहे. तरी जास्तीत जास्त विद्यार्थ्यांनी आयटीआयला फॉर्म भरून अर्ज भरण्याचे आवाहन शासकीय औद्योगिक प्रशिक्षण संस्था प्राचार्य एस. एल. कोंडावार यांनी केले आहे. कमी वेळेत कमी खर्चात खात्रीशीर झटपट नोकरी किंवा स्वयंरोजगार उपलब्ध करून देणारे शिक्षण म्हणून आयटीआयकडे पाहिले जाते. यावर्षी 2.5 लाख विद्यार्थ्यांनी प्रवेश अर्ज भरलेले आहेत. दिवसेंदिवस औद्योगिक प्रशिक्षण संस्थेमध्ये प्रवेश घेण्यात वाढ होत असून इलेक्ट्रिशियन, वायरमन आदि अभ्यासक्रमाला 20 प्रवेश क्षमता असून, एका तुकडीसाठी 280 अर्ज प्राप्त झाले आहेत. 000000