जिल्हा माहिती कार्यालयातील रद्दी विक्रीसाठी उपलब्ध

जिल्हा माहिती कार्यालयातील रद्दी विक्रीसाठी उपलब्ध

            हिंगोली, दि.26: जिल्हा माहिती कार्यालय, हिंगोली येथील वृत्तपत्रांची रद्दी विक्री व जुने लोकराज्य मासिकांची विक्री करण्यात येणार आहे. ज्यांना रद्दी घ्यावयाची असेल त्यांना कार्यालयीन वेळेत रद्दी पाहावयास मिळेल. ज्यांना रद्दी विकत घ्यावयाची  आहे, अशा नोंदणीकृत रद्दी खरेदीदारांनी त्यांचे लिफाफा बंद दरपत्रक जिल्हा माहिती अधिकारी, जिल्हा माहिती कार्यालय, मध्यवर्ती प्रशासकीय इमारत, दुसरा मजला, एस-6, हिंगोली या पत्यावर दि. 5 मार्च 2019 रोजीच्या सायंकाळी 5.00 वाजेपर्यंत कार्यालयीन कामकाजाच्या दिवशी दाखल करावीत. या संदर्भातील अटी व शर्ती कार्यालयीन वेळेत कार्यालयीन कामाच्या दिवशी पाहता येतील . 

            रद्दी विक्रीचे दरपत्रक मंजूर करणे अथवा रद्द करणे हे सर्व अधिकार जिल्हा माहिती अधिकारी, हिंगोली यांना राहतील .

00000

‘पंतप्रधान किसान सन्मान निधी’ योजनेचा पात्र लाभार्थ्यांनी लाभ घ्यावा - जिल्हाधिकारी रुचेश जयवंशी

‘पंतप्रधान किसान सन्मान निधी’ योजनेचा पात्र लाभार्थ्यांनी लाभ घ्यावा

             - जिल्हाधिकारी रुचेश जयवंशी

हिंगोली दि.24 :- शेतकरी कुटुंबांना आत्मसन्मानाने जगण्यासाठी पंतप्रधान किसान सन्मान निधी योजना अत्यंत महत्वाची असून जिल्ह्यातील पात्र लाभार्थ्यांनी या योजनेचा लाभ घेण्याचे आवाहन जिल्हाधिकारी रुचेश जयवंशी यांनी केले.

पात्र शेतकरी बांधवाना थेट आर्थिक मदत देणारी प्रधानमंत्री किसान सन्मान निधी ही महत्वाची योजना असून या योजनेतंर्गत लाभार्थी शेतकऱ्याला वर्षाला सहा हजार रुपये तीन हप्त्यात दिले जाणार आहे. या  योजनेचा शुभारंभ प्रधानमंत्री नरेंद्र मोदी यांच्या हस्ते उत्तर प्रदेशातील गोरखपूर येथे करण्यात आला. या योजनेचा जिल्हास्तरीय लोकार्पण सोहळा येथील जिल्हाधिकारी कार्यालय जिल्हा नियोजन समिती सभागृहात मान्यवरांच्या उपस्थित करण्यात आला. त्याप्रसंगी जिल्हाधिकारी श्री. जयवंशी बोलत होते.

यावेळी अप्पर जिल्हाधिकारी जगदिश मिनीयार, निवासी उपजिल्हाधिकारी खुदाबक्ष तडवी, उपविभागीय अधिकारी अतुल चोरमारे, कृषि उपसंचालक एस. व्ही. लाडके, जिल्हा अधिक्षक कृषि अधिकारी विजय लोखंडे, उपविभागीय कृषि अधिकारी बळीराम कच्छवे, तहसिलदार गजानन शिंदे, तालुका कृषि अधिकारी श्री. सतिश सावंत व शेतकरी बांधवांची मोठ्या प्रमाणावर  प्रमुख उपस्थिती होती.

जिल्हाधिकारी श्री. जयवंशी म्हणाले, केंद्र शासनाने शेतकऱ्यांसाठी ‘प्रधानमंत्री किसान सन्मान निधी’ योजना घोषित केली आहे, त्या योजनेंतर्गत हिंगोली जिल्ह्यात 1 लक्ष 33 हजार 267 पात्र लाभार्थ्यी संख्या असून त्यातील एकूण 1 लक्ष 17 हजार 334 पात्र लाभार्थ्यांची नावे सदर योजनेच्या वेबसाईटवर ऑनलाईन अपलोड करण्यात आली आहेत. तसेच उर्वरीत लाभार्थ्यांची नावे लवकरच अपलोड करण्यात येतील. या योजनेंतर्गत मिळणा-या राशीतून शेतकरी शेतीसाठी लागणारी खते, बिया, औजारे इत्यादी खरेदी करु शकतील. या योजनेंतर्गत पात्र लाभार्थ्यांना कोणत्याही प्रकारच्या अडचणीचे निराकरण करण्यास प्रशासन तयार असल्याचेही त्यांनी सांगितले.

 उत्तर प्रदेशातील गोरखपुर येथे प्रधानमंत्री नरेंद्र मोदी यांनी ‘प्रधानमंत्री किसान सन्मान निधी योजनेचा राष्ट्रव्यापी शुभारंभ केला. त्या सोहळ्याचे थेट प्रक्षेपण जिल्हा नियोजन समिती, सभागृह येथे करण्यात आले. मान्यवरांच्या हस्ते जिल्ह्यातील 10 लाभार्थ्यांचा शाल, श्रीफळ देवून सत्कार करण्यात आला.    

प्रास्ताविकात उपविभागीय कृषी अधिकारी बळीराम कच्छवे यांनी या योजनेसाठी लागणारी लाभार्थींची पात्रता, स्थापन केलेल्या समित्या, पात्र यादी इत्यादी विषयी पॉवर पॉईंट प्रझेन्टेशनद्वारे सविस्तर माहिती सादर केली.

00000

रविवारी प्रधानमंत्री किसान सन्मान निधी योजनेचा शुभारंभ

रविवारी प्रधानमंत्री किसान सन्मान निधी योजनेचा शुभारंभ

·   पात्र लाभार्थ्यांच्या खात्यावर जमा होणार 2 हजार रूपयांचा पहिला हप्ता

·   उत्तर प्रदेशातील गोरखपूर येथे होणार योजनेचा शुभारंभ

हिंगोली,दि.22: केंद्र शासनाने शेतकऱ्यांसाठी ‘प्रधानमंत्री किसान सन्मान निधी’ योजना घोषित केली आहे. पात्र शेतकरी बांधवाना थेट आर्थिक मदत देणारी ही महत्वाची योजना आहे. या योजनेतंर्गत लाभार्थी शेतकऱ्याला वर्षाला सहा हजार रुपये तीन हप्त्यात दिले जाणार आहे. या प्रधानमंत्री किसान सन्मान निधी योजनेचा शुभारंभ प्रधानमंत्री नरेंद्र मोदी यांच्या हस्ते उत्तर प्रदेशातील गोरखपूर येथे रविवार, दिनांक 24 फेब्रूवारी रोजी होणार आहे. यावेळी प्रधानमंत्री यांच्या हस्ते लाभार्थ्यांच्या खात्यावर या योजनेतंर्गत 2 हजार रुपयांचा पहिला हप्ता ऑनलाईन पध्दतीने जमा करण्यात येणार आहे. जस-जशा शेतकरी लाभार्थ्यांच्या याद्या शासनास प्राप्त होतील, त्यानुसार शेतकरी लाभार्थ्यांच्या खात्यावर रक्कम जमा केली जाणार आहे.

            या शुभारंभ कार्यक्रमा प्रसंगी उत्तर प्रदेशातील गोरखपूर येथे सकाळी 10:30 वाजता प्रधानमंत्री किसान सन्मान निधी योजनेची माहिती देण्यात येणार असून, यावेळी उपस्थित मान्यवरांची भाषणे होणार आहेत. यानंतर सकाळी 11:00 वाजता ‘मन की बात’ या कार्यक्रमाचे प्रसारण होणार आहे. यानंतर सकाळी 11:30 वाजता प्रधानमंत्री नरेंद्र मोदी यांच्या हस्ते प्रधानमंत्री किसान सन्मान निधी योजनेचा शुभारंभ कार्यक्रमाचे प्रसारण करण्यात येणार आहे. यावेळी प्रातिनिधीक स्वरुपात काही शेतकरी लाभार्थ्यांचा सत्कार करण्यात येणार आहे.

सदर कार्यक्रमाच्या धर्तीवर राज्याने राज्यस्तर, जिल्हास्तर व गटस्तर आणि कृषि विज्ञान केंद्रामध्ये उद्घाटन होणार असून, रविवार 24 फेब्रूवारी रोजी सकाळी 10:30 वाजता येथील जिल्हाधिकारी कार्यालयातील डी.पी.सी. सभागृहात ‘प्रधानमंत्री किसान सन्मान निधी’ योजनेचा जिल्हास्तरीय कार्यक्रमाचे आयोजन करण्यात येणार आहे. या महत्वपूर्ण योजनेच्या शुभारंभ कार्यक्रमास जिल्ह्यातील संसद सदस्य, आमदार तसेच लोकप्रतिनीधी, शेतकरी बांधव, शेतकरी उत्पादक संस्था, पत्रकार यांनी जास्तीत-जास्त संख्येने उपस्थित रहावे, असे आवाहन जिल्हाधिकारी रुचेश जयवंशी यांनी केले आहे.

****

विशेष मतदार नोंदणी मोहिमेचे आयोजन · 23 व 24 फेब्रूवारी रोजी करता येणार मतदार नोंदणी

विशेष मतदार नोंदणी मोहिमेचे आयोजन

·   23 व 24 फेब्रूवारी रोजी करता येणार मतदार नोंदणी

हिंगोली,दि.21: आगामी लोकसभा सार्वत्रिक निवडणूक-2019 विचारात घेऊन हिंगोली जिल्ह्यात 01 जानेवारी 2019 या अर्हता दिनांकावर आधारीत नुकत्याच पार पडलेल्या छायाचित्र मतदार याद्यांचा विशेष संक्षिप्त पुनरिक्षण कार्यक्रमा अंतर्गत मतदार म्हणून नोंदणी झालेली नाही अशा वंचित मतदारांना मतदार नोंदणीसाठी आणखी एक संधी मिळावी म्हणून भारत निवडणूक आयोगाच्या निर्देशानुसार दि.23 (शनिवार) व 24 (रविवार) फेब्रुवारी, 2019 या दिवशी विशेष मतदार नोंदणी मोहिमेचे आयोजन करण्यात आले आहे. या दोन्ही दिवशी मतदान केंद्रस्तरीय अधिकारी (BLO) सर्व मतदान केंद्रावर नमुना नं. 6, 7, 8 व 8अ चे अर्ज स्विकारणार आहेत. दि.01 जानेवारी, 2019 रोजी ज्या व्यक्तींच्या वयाची 18 वर्षे पूर्ण होत आहेत, अशा युवा मतदारांना या कार्यक्रमामध्ये मतदार नोंदणी करता येणार आहे.

जिल्ह्यातील सर्व नागरिकांना आवाहन करण्यात येते की, दि.23 (शनिवार) व 24 (रविवार) फेब्रुवारी, 2019 या विशेष मोहिमेच्या दिवशी मतदार नोंदणीसाठी नमुना नं. 6, मतदार यादीतील नाव वगळणेसाठी नमुना नं. 7, मतदार यादीतील तपशिलामधील दुरुस्तीसाठी नमुना नं. 8 व मतदारसंघामध्ये स्थलांतर झाले असल्यास नमुना नं. 8 अ चे अर्ज दाखल करावेत. तसेच जिल्ह्यातील सर्व पात्र युवा मतदारांनी आपली मतदार नोंदणी करावी, असे आवाहन जिल्हाधिकारी व जिल्हा निवडणूक अधिकारी रुचेश जयवंशी यांनी केले आहे.

****

अल्पसंख्याक समाज विकासाच्या योजना प्रभावीपणे राबवाव्यात - ज. मो. अभ्यंकर

अल्पसंख्याक समाज विकासाच्या योजना प्रभावीपणे राबवाव्यात

              - ज. मो. अभ्यंकर

            हिंगोली,दि.19: केंद्र व राज्य शासनामार्फत अल्पसंख्याक समाजाच्या विकासाकरीता विविध कल्याणकारी योजना आहेत. या योजनांचा लाभ प्रत्येक पात्र व्यक्तीला मिळावा याकरीता सर्व संबंधित विभागांनी सदर योजना प्रभावीपणे राबविण्याच्या सूचना महाराष्ट्र राज्य अल्पसंख्याक आयोगाचे उपाध्यक्ष ज. मो. अभ्यंकर यांनी दिल्या.

येथील जिल्हा नियोजन समिती सभागृहात  आयोजित आढावा बैठकीत ते बोलत होते. यावेळी जिल्हाधिकारी रुचेश जयवंशी, जिल्हा ग्रामीण विकास यंत्रणेचे प्रकल्प संचालक प्रविणकुमार घुले, शिक्षणाधिकारी (प्राथ./माध्य.) संदीपकुमार सोनटक्के, समाज कल्याण सहाय्यक आयुक्त भाऊराव चव्हाण,जि.प.चे कार्यकारी अभियंता (बां) पी.एन.वायचळकर,यांची उपस्थिती होती.

यावेळी श्री. अभ्यंकर म्हणाले की, अल्पसंख्याक समाजाच्याप्रधानमंत्री  15 कलमी कार्यक्रमासोबतच्या अल्पसंख्याक कल्याणाच्या विविध योजना प्रभावीपणे राबवाव्यात. अल्पसख्यांक आयोगाचे कामकाज ठराविक समाजापुरते मर्यादीत न ठेवता अल्पसंख्यांकातील सर्व समाजघटकांपर्यंत पोहचले पाहिजे. या योजनापासून कोणताही समाजघटक वंचित राहता कामा नये.

अल्पसख्यांक संस्थांना पायाभूत सुविधा उपलब्ध होण्यासाठी जिल्हा नियोजन समितीकडे प्रलंबित प्रस्ताव तातडीने निर्गमीत करावेत. शहरातील ऊर्दु शाळांचे स्ट्रक्चरल ऑडीट करून लवकरात लवकर आवश्यक त्या उपाययोजना कराव्यात. तसेच शिक्षकांसह विद्यार्थ्यांच्या गुणवत्ता वाढीसाठी विशेष प्रयत्न करावेत. अल्पसंख्यांक समाजाच्या योजना वंचित घटकापर्यंत पोहचण्यासाठी अल्पसंख्यांक कल्याण समिती स्थापन करण्याची सुचनाही त्यांनी दिली. तसेच प्रधानमंत्री आवास योजना आणि शिष्यवृत्ती  योजनाबरोबरच श्री. अभ्यंकर यांनी अल्पसख्यांक समाजासाठी शासनामार्फत राबविण्यात येणाऱ्या कल्याणकारी योजनांचा विभाग निहाय आढावा घेतला. जिल्ह्यातील अल्पसंख्याक शिक्षक, शिक्षकेत्तर कर्मचारी व संस्थाचालक यांच्या समस्याही त्यांनी जाणून घेतल्या. त्या तात्काळ मार्गी लावाव्यात अशा सूचनाही त्यांनी यावेळी दिल्या.

प्रारंभी जिल्हा नियोजन अधिकारी विनोद कुलकर्णी यांनी प्रास्ताविकेत जिल्ह्यातील अल्पसंख्यांक समाजाच्या विविध राबविलेल्या कल्याणकारी योजनांची सविस्तर माहिती दिली.

****

जिल्हाधिकारी कार्यालयात छत्रपती शिवाजी महाराज व संत रविदास महाराज यांना अभिवादन

        हिंगोली,दि.19: छत्रपती शिवाजी महाराज व  संत रविदास महाराज यांच्या जयंतीनिमित्त त्यांच्या प्रतिमेस जिल्हाधिकारी रुचेश जयवंशी यांनी पुष्पहार अर्पण करून अभिवादन केले.

            येथील जिल्हाधिकारी कार्यालयातील सभागृहात उपजिल्हाधिकारी (रोहयो)  खुदाबक्ष तडवी, उपजिल्हा निवडणूक अधिकारी भाऊसाहेब जाधव, जिल्हा नियोजन अधिकारी विनोद कुलकर्णी, यांच्यासह विविध विभागाचे विभाग प्रमुख व कर्मचारी यांनी ही यावेळी छत्रपती शिवाजी महाराज व  संत रविदास महाराज यांच्या प्रतिमेस पुष्प अर्पण करुन अभिवादन केले.

*****

गंगाखेड आणि हिंगोली येथे कापूस खरेदी केंद्र सुरु

गंगाखेड आणि हिंगोली येथे कापूस खरेदी केंद्र सुरु

        हिंगोली, दि.18: हंगाम 2018-19 मध्ये कापूस पणन महासंघाची नियुक्ती सीसीआयचे सब एजंट म्हणून राज्याचे मर्यादेत हमी दराने कापूस खरेदी करीता झालेली आहे. विभागामध्ये हमी दराने कापूस खरेदी करणे करीता परभणी विभागात गंगाखेड, जि.परभणी आणि हिंगोली, जि. हिंगोली ही केंद्र सुरु करण्यात आलेली आहेत.

          कापूस पणन महासंघाद्वारे संगणकीय कार्यप्रणाली विकसित केलेली असून सदर कार्यप्रणालीद्वारे शेतकऱ्यांनी विक्री केलेल्या कापसाची रक्कम थेट त्यांच्या आधार कार्डशी  संलग्न असलेल्या बँक खात्यांत जमा होणार आहे. तरी सर्व शेतकऱ्यांनी कापूस विक्री करतेवेळी  7/12 उतारा, आधारकार्ड आणि बँक पासबुक च्या पहिल्या पानाची छायांकित प्रत सोबत आणावे, असे आवाहन विभागीय व्यवस्थापक, परभणी यांनी केले आहे.

00000

माहिती व जनसंपर्क महासंचालनालयात उमेदवारीची संधी

माहिती व जनसंपर्क महासंचालनालयात उमेदवारीची संधी

हिंगोली, दि.16 : जनसंवाद क्षेत्रात काम करू इच्छिणाऱ्या युवक-युवतींसाठी टाटा ट्रस्टस्‌च्या सहकार्याने माहिती व जनसंपर्क महासंचालनालयात आंतर्वासिता (इंटर्नशिप) उपक्रमाची संधी उपलब्ध करून देण्यात येत आहे. यात १० उमेदवार ११महिन्यासाठी मानधन तत्वावर काम करतील.या उमेदवारांची निवड मुलाखत घेऊन होईल. इच्छुक उमेदवार maharecruitment.mahaonline.gov.in या संकेतस्थळावर २८ फेब्रुवारी २०१९ पर्यंत ऑनलाईन अर्ज करु शकतात (अर्जाचे शुल्क लागू).या उपक्रमात निवडण्यात आलेल्या उमेदवारांना प्रती महिना रू २५ हजार (आयकर आणि अंशदायी भविष्य निर्वाह निधी वजा जाता अंदाज सुमारे २२ हजार रू.)  मानधन देण्यात येईल. त्याचप्रमाणे या कार्यक्रमात सहभागी झाल्याबद्दल प्रमाणपत्र देण्यात येईल.या कार्यक्रमांतर्गत माहिती व जनसंपर्क महासंचालनालयामार्फत खलील पदांसाठी अर्ज मागविण्यात येत आहेत.

संहिता लेखक (एकूण पदे - ५ ) मराठी (३), हिंदी (१) आणि इंग्रजी (१) (सर्व पदे मुंबई कार्यालयासाठी) (पात्रता-जनसंवादातील पदवी, अनुभवास प्राधान्य.)

सोशल मीडियासाठी संहिता लेखक - (एकूण पदे -१ )( पात्रता- कोणतीही पदवी, सोशल मीडियाशी संबंधित लघु अभ्यासक्रम केला असल्यास अथवा सोशल मीडिया क्षेत्रातील अनुभव असल्यास अथवा जनसंवादातील पदवी असलेल्या आणि सोशल मीडिया क्षेत्रात काम करू इच्छिणाऱ्या उमेदवारास प्राधान्य.)

ग्राफिक डिझाईनर - (एकूण पदे - २)( पात्रता- फाईन / ॲप्लाईड आर्टमधील पदवी, अनुभवास प्राधान्य.)

व्हिडिओ ॲनिमेटर -(एकूण पदे - २) ( पात्रता- ॲनिमेशन विषयातील पदवी, अनुभवास प्राधान्य.)

अर्जदाराने पुढील बाबींची पूर्तता करणे आवश्यक आहे -अर्जदाराने आवश्यक पदवी किमान ५० टक्के गुणांसह अथवा बी ग्रेडसह प्राप्त केलेली असावी,एमएस ऑफिस तसेच ज्या विषयात काम करण्यासाठी अर्ज केला आहे त्या विषयातील संगणकप्रणालीची माहिती असणे आवश्यक,३१ डिसेंबर २०१८ रोजी अर्जदाराचे वय ३० वर्षापेक्षा जास्त नसावे,संबंधित क्षेत्रातील अनुभव असणाऱ्या तसेच शासन किंवा शासनाशी संबंधित प्रकल्प किंवा योजनेतील अनुभव असणाऱ्या उमेदवारांना प्राधान्य देण्यात येईल,उमेदवाराकडे स्वतःचा अत्याधुनिक स्वरुपाचा लॅपटॉप असणे आवश्यक आहे,हा कार्यक्रम म्हणजे शासकीय सेवा नसेल. त्यामुळे शासकीय कर्मचाऱ्यांना मिळणारे कोणतेही लाभ उमेदवारांना देण्यात येणार नाही

०००००

महिला लोकशाही दिनाचे 18 फेब्रुवारी रोजी आयोजन

महिला लोकशाही दिनाचे 18 फेब्रुवारी रोजी आयोजन

        हिंगोली, दि.16: राज्यघटनेने प्रत्येक नागरिकाला समान हक्क व समान संधी असा मुलभूत हक्क दिलेला आहे. त्याअंतर्गत समस्याग्रस्त व पिडित महिलांना त्यांचे प्रश्न मांडण्यासाठी व्यासपीठ मिळावे. तसेच त्यांच्या हक्कांचे संरक्षण होऊन न्याय मिळावा यादृष्टीने महिलांच्या तक्रारी यांची शासकीय यंत्रणेकडून होण्यासाठी व समाजातील पिडित महिलांना  सुलभ मार्गदर्शनाची सुविधा उपलब्ध व्हावी  यासाठी  एक प्रभावी उपाययोजना म्हणून जिल्हास्तरावर जिल्हाधिकारी यांच्या अध्यक्षतेखाली त्यांच्या दालनात दिनांक 18 फेब्रुवारी 2019 रोजी सकाळी 11.00 वाजता महिला लोकशाही  दिन होणार आहे. ज्या महिलांना तक्रारी करावयाच्या असतील त्यांनी जिल्हा महिला व बालविकास अधिकारी  कार्यालयात  मध्यवर्ती प्रशासकीय इमारत हिंगोली यांच्या कार्यालयात तक्रारी सादर कराव्यात असे आवाहन जिल्हा महिला व बालविकास अधिकारी व्हि.जी. शिंदे यांनी केले आहे.

00000

जलसमृध्दी यंत्रसामुग्री व्याज अर्थ सहाय्य योजनेअंतर्गत लाभार्थ्यांना यंत्रसामुग्री खरेदी करण्याचे आवाहन

जलसमृध्दी यंत्रसामुग्री व्याज अर्थ सहाय्य योजनेअंतर्गत लाभार्थ्यांना

यंत्रसामुग्री खरेदी करण्याचे आवाहन

        हिंगोली,दि.15:  महाराष्ट्र शासन मृद व जलसंधारण विभाग शासन निर्णय दिनांक 29 ऑक्टोबर 2018 अन्वये हिंगोली जिल्ह्यातील 149 पात्र अर्जदारांपैकी या पूर्वी पात्र व अपात्र ठरलेल्या 16 अर्जदार व एकाच नावाचे दोन अर्ज प्राप्त झालेले व लाभार्थी  गटा व्यतीरिक्त इतर गटाची प्राप्त अर्ज एकूण 9 असे एकूण 25 अर्जदार कमी होऊन एकूण 124 अर्जदारांची सोडत दिनांक 14 जानेवारी 2019 रोजी काढण्यात आली. सदरील सोडतीमध्ये उर्वरीत लक्षांकाबाबत 43 भाग्यवान अर्जदार निश्चित करण्यात आले होते. त्यापैकी 7 अर्जदारांनी दिनांक 13 फेब्रुवारी 2019 पर्यंत मशीन खरेदी केल्याचे पुरावे या कार्यालयास सादर केले आहे.

            दिनांक 14 जानेवारी 2019 रोजी उर्वरीत 81 अर्जदारांची प्रतिक्षाधीन यादी सोडतीद्वारे निश्चित करण्यात आली होती. करिता 81 प्रतिक्षाधीन यादीपैकी 50 लक्षांकाची पूर्तता करण्यासाठी उर्वरित 36 अर्जदारांची यादी या कार्यालयाच्या नोटीस बोर्डावर प्रसिध्द करण्यात आली आहे. आज रोजी पर्यंत एकूण 50 लक्षांका पैकी 14 लाभार्थ्यांनी मशिन खरेदी केले आहेत. दिनांक 29 ऑक्टोबर 2018 च्या शासन निर्णयात दिलेल्या अटीनुसार भाग्यवान 36 अर्जदारांना दिनांक 14 फेब्रुवारी 2019 पासून महिन्याच्या आत म्हणजेच दिनांक 13 मार्च 2019 पर्यंत मशिन खरेदी  केल्याबाबतचे दस्ताऐवजाच्या प्रति जिल्हा उपनिबंधक, सहकारी संस्था, हिंगोली या कार्यालयास सादर करण्यात यावे. सदरील 36 अर्जदारांपैकी एक महिन्याच्या आत मशिन खरेदी न केल्यास अर्जदारांची मान्यता रद्द  समजण्यात येऊन व उर्वरीत प्रतिक्षाधीन यादीतील लाभार्थ्यांना अनुक्रमानुसार संधी देण्यात येईल, असे आवाहन जिल्हा उपनिबंधक, सहकारी संस्था, हिंगोली यांनी केले  आहे.

000000

अल्पसंख्यांक आयोगाचे उपाध्यक्ष ज. मो. अभ्यंकर हिंगोली जिल्ह्याच्या दौऱ्यावर

अल्पसंख्यांक आयोगाचे उपाध्यक्ष ज. मो. अभ्यंकर

हिंगोली जिल्ह्याच्या दौऱ्यावर

        हिंगोली,दि.15:  राज्य अल्पसंख्यांक आयोगाचे उपाध्यक्ष ज. मो. अभ्यंकर (राज्यमंत्री दर्जा) हे दि. 19 फेब्रुवारी, 2019 रोजी जिल्ह्याच्या दौऱ्यावर येत आहेत. त्यांचा जिल्हा दौरा कार्यक्रम पुढीलप्रमाणे आहे.

            मंगळवार, दिनांक 19 फेब्रुवारी, 2019 रोजी दुपारी 2.30 वाजता शासकीय विश्रामगृह हिंगोली येथे आगमन, दुपारी 2.30 ते 3.30 वाजता अल्पसंख्यांक समाजाच्या व्यक्तींच्या भेटी, दुपारी 3.30 ते 4.30 वाजता अल्पसंख्यांक समाजाच्या शिक्षक, शिक्षकेत्तर कर्मचारी व संस्थाचालक यांचे सोबत बैठक, सायंकाळी 4.30 ते 5.30 वाजता निवासी उपजिल्हाधिकारी, शिक्षणाधिकारी प्राथमिक, माध्यमिक, निरंतर, प्रकल्प संचालक (जिल्हा ग्रामीण विकास यंत्रणा), सहाय्यक आयुक्त सामाजिक न्याय व विशेष सहाय्य यांच्या आढावा बैठकीस उपस्थिती, तसेच सायंकाळी 5.30 वाजता हिंगोली येथून परभणीकडे प्रयाण करतील.

****

ऑनलाईन शिष्यवृत्ती अदायगीची प्रक्रीयेकरिता अर्जातील त्रूटींची पूर्तता करण्याचे आवाहन - सहाय्यक आयुक्त समाज कल्याण

ऑनलाईन शिष्यवृत्ती अदायगीची प्रक्रीयेकरिता

अर्जातील त्रूटींची पूर्तता करण्याचे आवाहन

                                                        - सहाय्यक आयुक्त समाज कल्याण

हिंगोली,दि.15: सन 2018-19 या शैक्षणिक वर्षापासुन महाराष्ट्र शासनाच्या सर्व प्रकाराच्या शिष्यवृत्तीसाठी डीबीटी पोर्टल 1 ऑक्टोबर, 2018 पासुन नव्याने कार्यान्वीत झालेली आहे. https://mahadbt.mahait.gov.in या संकेतस्थळाचा वापर करुन अनुसूचित जाती विजाभज, इमाव व विमाप्र प्रवर्गातील विद्यार्थ्यांकरीता सामाजिक न्याय विभाग व विजाभज, इमाव व विमाप्र कल्याण विभाग महाराष्ट्र शासन यांच्यामार्फत राबविण्यात येणाऱ्या विविध शिष्यवृत्ती/फ्रिशिप योजनेकरीता ऑनलाईन अर्ज नोंदणीकृत केलेले आहे. सदर अर्ज संबंधीत महाविद्यालयाकडुन तपासुन व पडताळणी करुन सहाय्यक आयुक्त, समाज कल्याण हिंगोली  यांचेकडे मान्यतेस्तव सादर करण्यात येत आहेत. महाविद्यालयाकडुन प्राप्त झालेल्या अर्जावर सहाय्यक आयुक्त, समाज कल्याण हिंगोली यांच्याकडुन ऑनलाईन मान्यता देण्यात येत आहे.

सद्य:स्थितीत महाविद्यालय स्तरावर अद्यापही सुमारे 15 टक्के अर्ज प्रलंबित असल्याचे निदर्शनास आले आहे. संबंधीत महाविद्यालयानी त्यांच्या स्तरावरील प्रलंबित अर्ज संबंधित सहायक आयुक्त, समाज कल्याण यांच्याकडे फॉरवर्ड करुन तात्काळ निकाली काढावेत.

तसेच नोंदणीकृत अर्जांपैकी सुमारे 20 टक्के अर्ज विद्यार्थ्यांनी अथवा महाविद्यालयाने अर्ज मंजूर होण्यापूर्वी  त्यांच्या स्तरावरुन अर्ज रद्द केलेले आहेत. सदर रद्द केलेल्या अर्जांपैकी पात्र असलेल्या अर्जांची  त्वरीत त्रुटी पूर्तता करुन असे अर्ज विद्यार्थ्यांनी पुन:श्च ऑनालाईन सादर करावेत. तसेच महाविद्यालयांनी सदर अर्ज संबंधित लॉग इन वरुन मान्य करुन पुढील कार्यवाहीस्तव सहायक आयुक्त समाज कल्याण यांचेकडे ऑनलाईन फॉरवर्ड करावेत.

सदर पोर्टलवर मान्य झालेल्या अर्जाची अदायगीची प्रक्रिया यशस्वी होण्याकरीता विद्यार्थ्यांच्या लॉग इन मधुन रिडम्शन प्रक्रिया करणे अत्यावश्यक आहे. सदर ऑनलाईन प्रक्रीया पूर्ण न केल्यास मान्य झालेली विद्यार्थी  व महाविद्यालयाची शिष्यवृत्तीची रक्कम वितरीत होणार नाही याची सर्व विद्यार्थ्यांनी व पालकांनी नोंद घ्यावी,  रिडम्शन व्हाऊचर जनरेट झाले असून देखील रिडम्शन प्रक्रीया न केलेल्या विद्यार्थ्यांवर महाविद्यालयाने त्यांच्या स्तरावर योग्य ती कारवाई करावी. विद्यार्थ्यांचे बँक खाते क्रमांक प्रणालीमध्ये अचूक नोंदणीकृत असणे आवश्यक आहे. नोंदणीकृत केलेले बँक खाते क्रमांक आपल्या आधार क्रमांकाशी संलग्न असणे आवश्यक आहे. अदायगीच्या प्रक्रीयेमध्ये प्रत्येक स्तरावर एस.एम.एस. येणेस्तव मोबाईल क्रमांक हा आधार तसेच नोंदणीकृत बँक खात्याशी संलग्न असून तो अद्ययावत असणे आवश्यक आहे.  या सर्व सूचनांचे पालन न केल्यास व शिष्यवृत्तीची रक्कम विद्यार्थ्यांच्या व महाविद्यालयाच्या बँक खात्यावर न जमा झाल्यास त्याची जबाबदारी सर्वस्वी संबंधित महाविद्यालयाचे प्राचार्य तसेच विद्यार्थ्यांची असेल व याबाबत सामाजिक न्याय विभागाची जबाबदारी राहणार नाही याची सर्व प्राचार्य व विद्यार्थ्यांनी नोंद घ्यावी, तसेच महाविद्यालयातील/विद्यार्थी प्रतिनिधी (UR,GS,SR) यांना उपरोक्त सूचना विविध माध्यमातुन विद्यार्थ्यांना तात्काळ कळवाव्यात, असे आवाहन भाऊराव चव्हाण, सहाय्यक आयुक्त, समाज कल्याण, हिंगोली यांनी  केले आहे.

****

अनुसूचित जमातीतील शेतकरी व सुशिक्षित बेरोजगारांना केंद्रवर्ती अर्थसंकल्पावर आधारीत योजनेच्या लाभासाठी अर्ज करण्याचे आवाहन

अनुसूचित जमातीतील शेतकरी व सुशिक्षित बेरोजगारांना

केंद्रवर्ती अर्थसंकल्पावर आधारीत योजनेच्या लाभासाठी अर्ज करण्याचे आवाहन

        हिंगोली, दि.15: केंद्रवर्ती अर्थसंकल्प योजना सन 2018-19 अंतर्गत अनुसूचित जमातीच्या (आदिवासी) शेतकरी तसेच सुशिक्षित बेरोजगार युवक, युवतींना योजनेचा लाभ देण्यासाठी लाभार्थ्यांकडून आवेदन अर्ज मागविण्यात येत आहेत. विहित नमुन्यातील अर्ज एकात्मिक आदिवासी विकास प्रकल्प, कळमनुरी या कार्यालयात उपलब्ध आहेत. या योजनेचा लाभ घेवू इच्छिणाऱ्या लाभार्थ्यांनी प्रकल्प अधिकारी एकात्मिक आदिवासी विकास प्रकल्प, कळमनुरी यांचे नावे परिपूर्ण कागदपत्रांसह आपला आवेदन अर्ज 28 फेब्रुवारी पर्यंत कार्यालयीन वेळेत सादर करावेत.

विहित मुदतीनंतर आलेले व परिपूर्ण नसलेले आवेदन अर्ज स्विकारले जाणार नाहीत. तसेच सदर योजनांमध्ये पूर्णत:/अंशत: बदल करण्याचा निणर्य प्रकल्प अधिकारी यांनी राखून ठेवलेला असून, इच्छूक लाभार्थ्यांनी आपले अर्ज वेळेत सादर करण्याचे आवाहन प्रकल्प अधिकारी, एकात्मिक आदिवासी विकास प्रकल्प, कळमनुरी यांनी केले आहे.

****

जिल्हाधिकारी कार्यालयात संत सेवालाल यांना अभिवादन

जिल्हाधिकारी कार्यालयात संत सेवालाल यांना अभिवादन

        हिंगोली,दि.15: बंजारा समाजातील समाज सुधारक तथा आदर्श गुरु संत सेवालाल यांच्या जयंतीनिमित्त आज त्यांच्या प्रतिमेस अप्पर जिल्हाधिकारी जगदिश मिणियार यांनी पुष्पहार अर्पण करून अभिवादन केले.

            येथील जिल्हाधिकारी कार्यालयातील सभागृहात उपजिल्हाधिकारी (रोहयो)  खुदाबक्ष तडवी, जिल्हा माहिती अधिकारी अरुण सुर्यवंशी, नायब तहसिलदार श्री. गळगे, श्री. मिटकरी यांच्यासह विविध विभागाचे विभाग प्रमुख व कर्मचारी यांनी ही यावेळी संत सेवालाल यांच्या प्रतिमेस पुष्प अर्पण करुन अभिवादन केले.

****

महाराष्ट्र लोकसेवा आयोगाची राज्य सेवा परिक्षा 17 फेब्रुवारी रोजी

महाराष्ट्र लोकसेवा आयोगाची राज्य सेवा परिक्षा 17 फेब्रुवारी रोजी

* जिल्ह्यातील 12 उपकेंद्रावर होणार परीक्षा.

* परिक्षा उपकेंद्रावर फौजदारी प्रक्रीया संहिता 1973 चे कलम 144 लागू.

                                                                                  

           हिंगोली,दि.14: महाराष्ट्र लोकसेवा आयोगामार्फत राज्‍य सेवा परीक्षा 17 फेब्रुवारी  रोजी सकाळी 10.00 ते 12.00 आणि दुपारी 3.00 ते 5.00 या वेळेत हिंगोली मुख्यालयातील 12 उपकेंद्रावर घेण्यात येणार आहे.

            सदर परीक्षा सुरळीत पार पाडण्याच्या दृष्टीकोनातून परीक्षेत बसणाऱ्या उमेदवारांनी परीक्षा केंद्रावर डीजीटल डायरी, कॅलक्युलेटर, पुस्तके, पेपर्स, पेजर मायक्रोफोन, मोबाईल फोन कॅमेरा अंतर्भुत असलेली कोणत्याही प्रकारची साधने, सिमकार्ड, दुरसंचार साधने म्हणून वापरण्या योग्य कोणतीही वस्तु, बॅग्ज अथवा शासनाने बंदी घातलेल्या इतर कोणत्याही साहित्यासह परीक्षा केंद्राच्या परिसरात तसेच परीक्षा कक्षात आणण्यास अथवा स्वत:जवळ बाळगण्यात सक्त मनाई करण्यात आलेली आहे. तसेच सदर परीक्षा सुरळीत पार पाडण्याच्या दृष्टीकोणातून परीक्षा केंद्रावर कायदा व सुव्यवस्थेची परीस्थिती हाताळण्यासाठी परीक्षा केंद्रावर फौजदारी प्रक्रीया संहिता 1973 चे कलम 144 लागू करण्यात येणार आहे, असे जिल्हादंडाधिकारी रुचेश जयवंशी यांनी कळविले आहे.

****

महिला व बाल कल्याण क्षेत्रातील कार्यासाठी जमनालाल बजाज फाऊंडेशन पुरस्कार-2019 प्रस्ताव करण्याचे आवाहन

महिला व बाल कल्याण क्षेत्रातील कार्यासाठी जमनालाल

बजाज फाऊंडेशन पुरस्कार-2019 प्रस्ताव करण्याचे आवाहन

हिंगोली, दि.12: महिला विकास व बाल कल्याणाच्या दिशेने विशेष कार्य करणारी अथवा गांधीवादी रचनात्मक कार्य करणारी महिला करणाऱ्या महिलाना दरवर्षी देण्यात येणाऱ्या पुरस्काराचे स्वरुप रु. 10 लाख स्मृती चिन्ह, प्रशस्तीपत्र हे असून, त्या अनुषंगाने प्रस्ताव मागविण्यात येत आहेत. हे प्रस्ताव जाहिरात प्रसिध्दीपासून येत्या सात दिवसात जिल्हा महिला व बाल विकास अधिकारी कार्याल, हिंगोली येथे दाखल करावेत. तसेच संबंधित प्रस्ताव दाखल करण्याकरिता www.jamnalalbajajawards.org या संकेतस्थळावरील निकष, अटी व शर्ती बघुन ऑनलाईन प्रस्ताव दाखल करण्यासाठी  http://jamnalalbajajawards.org/nomination-forms या संकेतस्थळावर प्रस्ताव दाखल करावेत. परिपूर्ण प्रस्तावासाठी संबंधित महिलांनी खालीलप्रमाणे महिला व बालकांच्या क्षेत्रातील कार्य केलेले असणे आवश्यक आहे.

महिला तसेच बालकांच्या शिक्षण, व्यवसाय प्रशिक्षण, रोजगार तसेच पुनर्वसन, निरक्षरता निवारणासाठीचे कार्य, महिला तसेच बालकांच्यासाठी नि:शुल्क किंवा कमी खर्चात आरोग्य सेवा, प्रसुतीपूर्व तसेच प्रसुतीनंतरच्या सोयी सुविधा, चांगल्या आरोग्यासाठी आरोग्यविषयक शास्त्रीय माहिती देणे, बालकांसाठी योग्य आहार उपलब्ध करुन देण्यासंबंधित कार्य, आपत्तीमध्ये अडकलेल्या बालकांचे पुनवर्सन, झोपडपट्टी च्या भागात सुधार, आपत्तीग्रस्त महिलांसाठी नि:शुल्क्‍ किंवा कमी खर्चात न्यायविषयक सहाय्य, महिलांना त्यांचया अधिकारांचे तसेच अधिकारांशी संबंधित कायद्यांची माहिती करुन देणे, महिलांचा स्तर सामाजिक स्तर उंचावणे या दिशेने केलेले कार्य, मानसिक, बौध्दिक तसेच शारिरीक स्वरुपातील दुर्बल अविकसित व अपंग बालकाची देखभाल शिक्षण पुनर्वसन याबाबतचे कार्य, कुटूंब नियोजन आणि शिक्षण, वैज्ञानिक शोधकार्यात सदर कार्यामध्ये त्यांचा सहभाग तसेच कार्य केलेले आसावे.

या पुरस्कारासाठी नामांकित महिलांचे मुल्यांकन करताना त्यांच्या कार्याचा एकूण परिणाम किंवा प्रभाव क्षेत्र तसेच ते कार्य करताना महिला आणि बालकांना मिळालेला विशिष्ट लाभांचा प्रभाव बघितला जाईल. तसेच मानसिक, शारिरीक, लैंगिक शोषणापासून पिडीत, अत्याचारग्रस्त, परितक्त्या, शोषित व आजारी महिला, विधवा यांची मदत विशेष करुन ग्रामीण भागातील महिला, उपेक्षित, निष्काशित, निराश्रित, शोषित तसेच अनाथ (विशेष करुन ग्रामीण भागातील) बालकांची मदत केली आहे काय ? तसेच विधीसंघर्ष ग्रस्त बालकांच्यात सुधारणा घडवून आणण्यासाठी काय प्रयत्न केलेल्या माहिलांनी या पुरस्कारकरीता आपले प्रस्ताव जाहिरात प्रसिध्दीपासून येत्या सात दिवसात जिल्हा महिला व बाल विकास अधिकारी कार्याल, हिंगोली येथे दाखल करावेत असे आवाहन केले आहे.

****

अटल आरोग्य महाशिबिर ; 1 लाख रुग्णांची तपासणी

हिंगोली,दि.10: अटल आरोग्य  महाशिबिरातंर्गत नोंदणी झालेल्या विविध आजारांच्या सुमारे 1 लाख रूग्णांनी प्रत्यक्ष उपस्थिती राहून तपासणी करून घेतल्याची माहिती शिबिर संयोजन समितीचे समन्वयक रामेश्वर नाईक यांनी दिली. मुख्यमंत्री देवेंद्र फडणवीस यांच्या संकल्पनेतून व राज्याचे वैद्यकीय शिक्षण तसेच जलसंपदा मंत्री  गिरीष महाजन यांच्या मार्गदर्शनाखाली भव्य विनामूल्य ‘अटल आरोग्य  महाशिबीर’ रविवारी  10 फेब्रूवारी रोजी येथील रेल्वे स्टेशन परिसरातील 25 हेक्टरच्या भव्य मैदानात पार पडले. 

यावेळी आरोग्य महाशिबिरास येणारा प्रत्येक रुग्ण व नागरिकांची संपूर्ण आरोग्य तपासणी करण्याची व्यवस्था करण्यात आली होती. येणारा प्रत्येक रुग्ण समाधानाने परत जाईल याची संपूर्ण जबाबदारी घेण्यात आली होती. या शिबीरासाठी 65 हजार रुग्णांची पूर्वतपासणी करण्यात आली होती. त्या सर्व रुग्णांची राज्यातील नामांकित डॉक्टरांमार्फत शिबिरात तपासणी झाल्यानंतर नागपूर येथेच सर्व शस्त्रक्रिया पूर्ण करण्याचे नियोजन करण्यात आले आहे.

आरोग्य शिबिरासाठी येणाऱ्या गरीब व गरजू सर्व रुग्णांना नि:शुल्क भोजन व पिण्याच्या पाण्याची सुविधा करण्यात आली होती. सर्व रुग्णांना औषध व आवश्यक साहित्य देखील यावेळी पूरविण्यात आले. आरोग्य शिबिरामध्ये प्रारंभी रुग्णांची नोंदणी झाल्यानंतर त्यांची तज्ज्ञ डॉक्टर्समार्फत तपासणी करण्यात आली. त्यानंतर आवश्यकतेनुसार औषध, एमआरआय, सीटीस्कॅन, रक्ताच्या तपासण्या, शस्त्रक्रिया व आवश्यकतेनूसार यंत्रांची देखील उपलब्धता यावेळी शिबीरात करण्यात आली. संपूर्ण शिबिरामध्ये विविध पॅथीचे सुमारे दीड हजार डॉक्टर्स आणि 29 ओपीडींमार्फत रुग्णांची तपासणी करण्यात आली. यावेळी दंतचिकित्सा व शस्त्रक्रियेसाठी चार मोबाइल व्हॅन देखील उपलब्ध करण्यात आल्या होत्या.  तपासणीशिवाय एकही रुग्ण येथून परत जाणार नाही. यांची संपूर्ण खबरदारी घेण्यात आली होती. स्वतंत्र व्यवस्था करुन येथे येणाऱ्या प्रत्येक रुग्णांना मार्गदर्शनही यावेळी करण्यात आले.

यावेळी शिबिरात आलेल्या रुग्णांची नामाकिंत डॉक्टरांमार्फत तपासणी करुन सर्व प्रकारच्या आरोग्य सेवा देण्यात आल्या. तसेच सुमारे सव्वा कोटी रुपयांची औषधी याठिकाणी वितरण केली. याशिवाय रुग्ण व नातेवाईक यांच्यासाठी जेवण, चहा, पाणी याची ही व्यवस्था करण्यात आली होती. या आरोग्य शिबीरात ज्यांच्यावर उपचार करणे शक्य नाही, अशा रुग्णांना नागपूर, नांदेड, औरंगाबाद, पुणे, मुंबई येथे नेवून त्यांच्यावर अत्याधूनिक  पध्दतीचे उपचार केले जाणार आहेत. महात्मा ज्योतीबा फुले आरोग्य योजना, मुख्यमंत्री सहाय्यता निधी तसेच समाजातील दानशुर व्यक्ती यांच्या माध्यमातून गरजू रुग्णांवर उपचार करण्यात येणार आहेत.

या महाआरोग्य शिबीराचे यशस्वी आयोजन करण्यासाठी आमदार तान्हाजी मुटकुळे, रामेश्वरजी नाईक, संदीप जाधव, गजानन घुगे, शिवाजी जाधव, जिल्हाधिकारी रूचेश जयवंशी, जिल्हा परिषदेचे मुख्य कार्यकारी अधिकारी एच.पी. तुम्मोड, उपजिल्हाधिकारी खुदाबक्ष तडवी, उपविभागीय अधिकारी अतुल चोरमारे, जिपचे उपमुख्य कार्यकारी अधिकारी नितीन दाताळ, तहसीलदार गजानन शिंदे, हिंगोली नगर परिषदेचे मुख्याधीकारी रामदास पाटील, उप प्रादेशिक परिवहन अधिकारी अशोक पवार यांच्यासह विविध विभागातील अधिकारी-कर्मचारी, वैद्यकीय शिक्षण व आरोग्य विभाग, विविध खासगी दवाखाने, वैद्यकीय महाविद्यालय, आरोग्य क्षेत्रात काम करणाऱ्या विविध संघटना, वैद्यकीय संघटना, सामाजिक संघटना आदींनी यशस्वी नियोजनासाठी सहकार्य केले.

****

वैद्यकीय शिक्षणमंत्री गिरीष महाजन यांचा हिंगोली जिल्हा दौरा

 वैद्यकीय शिक्षणमंत्री गिरीष महाजन यांचा हिंगोली जिल्हा दौरा

हिंगोली दि. 09 : राज्याचे वैद्यकीय शिक्षण, जलसंपदा व लाभक्षेत्र विकास मंत्री श्री. गिरीष महाजन हे दि. 10 फेब्रुवारी, 2019 रोजी हिंगोली जिल्हा दौऱ्यावर येत असून त्यांचा दौरा कार्यक्रम पुढील प्रमाणे राहील.

श्री. महाजन यांचे रविवार,  दि. 10 फेब्रुवारी, 2019 रोजी सकाळी 10.20 वाजता अटल मैदान, हिंगोली रेल्वे स्टेशन जवळ हिंगोली येथे आगमन व अटल महाआरोग्य शिबीरास उपस्थिती. सकाळी 11.00 वाजता हिंगोली येथून शासकीय वाहनाने नांदेड एअरपोर्ट कडे प्रयाण.

*****

हिंगोली येथे आज भव्य अटल महाआरोग्य शिबीराचे आयोजन

हिंगोली येथे आज भव्य अटल महाआरोग्य शिबीराचे आयोजन

हिंगोली,दि.09: शहरातील रेल्वे स्टेशन परिसरातील अटल मैदानावर आज जलसंपदा व वैद्यकीय शिक्षण मंत्री गिरीश महाजन यांच्या मार्गदर्शनाखाली विनामुल्य सकाळी आठ ते चार या वेळेत महाआरोग्य शिबिराचे आयोजन करण्यात आले आहे.  वैद्यकीय शिक्षण मंत्री गिरीष महाजन, पालकमंत्री दिलीप कांबळे, आमदार तान्हाजी मुटकुळे यांच्या उपस्थितीत सकाळी 10:30 वाजता या शिबिराचे उद्घाटन होणार आहे.

रेल्वे स्टेशन परिसरातील 25 हेक्टर जागेवर या अटल महाआरोग्य शिबिराचे आयोजन करण्यात आले आहे. लोकसहभागातून होऊ घातलेले या शिबिरात महाराष्ट्रातील नामाकिंत तज्‍ज्ञ डॉक्टरांकडून रुग्णांची तपासणी करण्यात येणार असून, जवळपास दिड हजार डॉक्टर याठिकाणी आरोग्यसेवा देणार आहे. यात ॲलोपॅथी, होमिओपॅथी, आयुर्वेद, युनानी आदी पद्धती या ठिकाणी रुग्णांना मिळणार आहेत. 19 प्रकारच्या विविध आजारांची यावेळी तपासणी होणार आहे. याठिकाणी 100 बाह्यरुग्ण विभाग ज्यामध्ये प्रामुख्याने हृद्य रोग, कर्करोग, नेत्र, त्वचारोग, कान नाक घसा, जनरल मेडिसिन, जनरल सर्जरी, स्त्रीरोग, बालरोग, अस्थिरोग लठ्ठपणा, वृद्ध विकार, मूत्ररोग, आदी बाबींचा समावेश या शिबिरांमध्ये आहे.

रुग्णांना सेवा देण्यासाठी सुमारे दिड हजार पॅरामेडिकलचा स्टाफ , सात हजार स्वयंसेवक कार्यकर्ते, विद्यार्थी व समाजसेवी संस्था याठिकाणी आपल्या सेवा देणार आहेत. रुग्णांची तपासणी करण्यात आल्यानंतर ज्यांना उपचार शक्य असतील अशा रुग्णांना तात्काळ निशुल्क औषधे  देण्यात येणार असून, त्याकरीता सुमारे दीड कोटी रुपयांची औषधी या ठिकाणी उपलब्ध करून देण्यात आली आहे. तपासणी करण्यात आलेल्या रुग्णांना तात्काळ उपचार शक्य नसल्यास  दिनांक 13 तारखेला पहिल्या टप्प्यात तालुकास्तरावर त्यांना उपचार देण्यात येणार आहेत तेथे ही  शक्य नसेल तर जिल्हास्तरावर आणि त्या ठिकाणी ही शक्य नसेल तर औरंगाबाद, नागपूर, पुणे, नांदेड, मुंबई येथे रुग्णांना नेवून त्यांना मोफत उपचार देण्यात येतील अशी माहिती शिबिर संयोजन समितीचे समन्वयक रामेश्वर नाईक यांनी दिली.

हिंगोली जिल्ह्यातील पाच तालुक्यातील सर्व शासकीय प्राथमिक आरोग्य केंद्र, ग्रामीण रुग्णालय पूर्वतपासणी सप्ताह दरम्यान आज पर्यंत सुमारे 65 हजार 367 रुग्णांची पूर्व तपासणी करण्यात आली असून, प्रत्यक्ष्‍ शिबिरात एक ते सव्वा लाख रुग्ण येण्याची शक्यता आहे. त्यानुसार सर्व नियोजन करण्यात आले असून, या शिबीरात सुमारे दीड हजार डॉक्टरांच्या माध्यमातून रुग्णांची तपासणी या ठिकाणी होणार आहे. तसेच ऐनवेळी  येणाऱ्या  रुग्णांची देखील  तपासणी करण्यात येणार आहे. तपासणीकरिता येणाऱ्या रुग्णांसाठी नाष्टा, चहापाणी तसेच दुपारी जेवणाची व्यवस्था विविध सेवी संस्था यांच्या माध्यमातून करण्यात आलेली आहे. 25 हेक्टर जागेत शिबिर मंडप, 10 रुग्णवाहिका, वाहतूक व्यवस्था चार अग्निशामक वाहन, 10 पाणी पिण्याचे टँकर्स, मोबाईल टॉयलेट्स, डस्टबिन आदींची व्यवस्था याठिकाणी करण्यात आली आहे.

अतिशय सुसज्ज व नियोजनपूर्वक असे हे भव्य महाआरोग्य शिबिर संपन्न होत असून, या महाआरोग्य शिबिराचा गरजू रुग्णांनी आवश्य लाभ घ्यावा असे आवाहन जिल्हा प्रशासनामार्फत करण्यात येत आहे.

                                                *****