एचएचटी सीईटी परीक्षा 10 मे रोजी जिल्ह्यातील 15 उपकेंद्रांवर 3,569 परीक्षार्थी देणार परीक्षा परीक्षा केंद्रावर 1973 चे कलम 144 लागू

एचएचटी सीईटी परीक्षा 10 मे रोजी

·   जिल्ह्यातील 15 उपकेंद्रांवर 3,569 परीक्षार्थी  देणार परीक्षा

·   परीक्षा केंद्रावर 1973 चे कलम 144 लागू

        हिंगोली, दि.27: महाराष्ट्र शासनामार्फत राज्यात एकाच वेळेस अभियांत्रिकी व तंत्रज्ञान, औषधनिर्माण शास्त्र (फार्मसी)  व फार्म डी. तसेच कृषी विज्ञान व कृषी अभियांत्रिकी व तंत्रज्ञान या पदवी अभ्यासक्रमाच्या प्रवेशासाठी (MHT-CET परीक्षा  2018) दिनांक 10 मे, 2018 रोजी सकाळी 09.00 ते सांय. 05.00 पर्यंत या वेळेत हिंगोली जिल्हा मुख्यालयी 15 उपकेंद्रावर घेण्यात येणार आहे. या परीक्षेसाठी एकूण 15 उपकेंद्रांवर जिल्ह्यातील एकूण 3,569 परीक्षार्थी  परीक्षा देणार आहेत. सदर परीक्षा सुरळीत पार पाडण्याच्या दृष्टीकोणातून परीक्षेत बसण्याच्या उमेदवारांनी परीक्षा केंद्रावर डिजिटल डायरी, कॅलक्युलेटर, पुस्तके, पेजर मायक्रोफोन, मोबाईल फोन कॅमेरा अंतर्भूत असलेली कोणत्याही प्रकारची साधने, सिमकार्ड, दूरसंचार साधने म्हणून वापरण्या योग्य कोणतीही वस्तू, बॅग्ज अथवा शासनाने बंदी घातलेल्या इतर कोणत्याही साहित्यासह परीक्षा केंद्राच्या परीसरात तसेच परीक्षा कक्षात आणण्यास  अथवा स्वत:जवळ बाळगण्यास सक्त मनाई करण्यात आलेली आहे. तसेच सदर परीक्षा सुरळीत पार पाडण्याच्या दृष्टीकोनातून परीक्षा केंद्रावरील कायदा व सुव्यस्थेची परिस्थिती  हाताळण्यासाठी परीक्षा केंद्रावर फौजदारी प्रक्रिया संहिता 1973 चे कलम 144 लागू करण्यात येणार आहे. तसेच परीक्षा केंद्रावर चोख पोलीस बंदोबस्त ठेवण्यात येणार असून, परीक्षा केंद्रावर मुख्य प्रवेशद्वारावर पोलीस यंत्रणेमार्फत तपासणी करण्यात येणार आहे.

                सदर परीक्षेच्या दरम्यान परीक्षा कक्षात उमेदवारांकडे मोबाईल फोन/दूरसंचार साधनासह शासनामार्फत बंदी घातलेले इतर कोणतेही साहित्य आढळून आल्यास तसेच कॉपीचा/गैरप्रकाराचा प्रयत्न करत असल्याचे निदर्शनास आल्यास त्या उमेदवाराविरुध्द  फौजदारी स्वरुपाचा गुन्हा दाखल करण्यात येईल. याची सर्व संबंधित परीक्षार्थीनी नोंद घ्यावी .

                तसेच सदर परीक्षेची पूर्व तयारी बाबतचे पहिले प्रशिक्षण दिनांक 26 एप्रिल, 2018 रोजी घेण्यात आले आहे. सदर प्रशिक्षणास उपकेंद्र प्रमुख 04, पर्यवेक्षक 23, समवेक्षक 37 हे गैरहजर असल्यामुळे त्यांना कारणे दाखवा नोटीस बजावण्यात आल्या आहेत. तसेच उपरोक्त गैरहजर उपकेंद्र प्रमुख/ पर्यवेक्षक/ समवेक्षक दुसऱ्या प्रशिक्षणास हजर न झाल्यास त्यांच्याविरुध्द प्रशासकीय कार्यवाही करण्यात  येणार आहे, असे जिल्हाधिकारी अनिल भंडारी यांनी कळविले आहे .

0000