राज्य सेवा पूर्व परीक्षा केंद्रावर 144 कलम लागू

            हिंगोली (जिमाका), दि. 12 : महाराष्ट्र लोकसेवा आयोगामार्फत राज्य सेवा पूर्व परीक्षा-2022 हिंगोली  जिल्ह्याच्या ठिकाणी दि. 21 ऑगस्ट, 2022 रोजी सकाळी 10 ते 12 आणि दुपारी 3 ते 5 यावेळेत दोन सत्रात घेण्यात येणार आहे.

ही परीक्षा हिंगोली येथील अकोला रोडवरील आदर्श महाविद्यालय भाग-अ व भाग-ब, शास्त्रीनगर येथील सेक्रेट हार्ट इंग्लीश स्कूल, सरजुदेवी भिकुलाल भारुका आर्य कन्या विद्यालय या परीक्षा केंद्रावर दोन सत्रात आयोजित करण्यात आली आहे. या चार केंद्रावर 960 परीक्षार्थी परीक्षा देणार आहेत.

या परीक्षा केंद्र परिसरात दि. 21 ऑगस्ट, 2022 रोजी फौजदारी प्रक्रिया संहिता 1973 चे कलम 144 लागू करण्यात आले आहे. तसेच परीक्षा केंद्रावर सकाळी 9.00 ते सांय. 6.00 या कालावधीमध्ये खालीलप्रमाणे निर्बंध असतील.

परीक्षा उपकेंद्राच्या इमारती व परिसरामध्ये परीक्षेच्या शांतता पूर्ण आयोजनासाठी प्राधिकृत व्यक्तीशिवाय इतर कोणत्याही व्यक्तीस प्रवेश करता येणार नाही. परीक्षा उपकेंद्राच्या 200 मीटर परिसरात फोन, झेरॉक्स मशीन, टेलीफोन बूथ चालू ठेवण्यास निर्बंध, हा आदेश परिक्षेसाठी नियुक्त केलेले अधिकारी, कर्मचारी तसेच परीक्षेसाठी येणारे विद्यार्थी यांना परीक्षा केंद्रात प्रवेशासाठी लागू राहणार नाही. हा आदेश शासकीय कर्तव्यावरील अधिकारी-कर्मचारी आणि पोलीस अधीक्षक यांनी बंदोबस्त कामी नेमणूक केलेल्या पोलीस कर्मचारी यांना परवानगी दिलेली आहे, अशा व्यक्तींना लागू राहणार नाही. परीक्षार्थी यांना परीक्षा केंद्रात डिजिटल डायरी, पेजर, मायक्रोफोन, मोबाईल, गणकयंत्र इत्यादी घेऊन जाण्यावर बंदी असेल.

या नियमांचे उल्लघन केल्यास संबंधितास नोटीस बजावून त्यांचे म्हणणे ऐकून घेण्यास पुरेसा अवधी नसल्याने आणीबाणीचे प्रसंगी फौजदारी प्रक्रीया संहिता 1973 चे कलम 144(2) अन्वये एकतर्फी आदेश निर्गमित करण्यात येतील, असे जिल्हादंडाधिकारी, हिंगोली यांनी प्रसिध्दी पत्रकान्वये कळविले आहे. 

*****