आंतराष्ट्रीय क्रीडा विद्यापीठाचे बोधचिन्ह ठरविण्यासाठी स्पर्धेचे आयोजन

 

 

हिंगोली, (जिमाका) दि. 30 : क्रीडा क्षेत्रातील कामगिरी उंचावणे व दर्जेदार खेळाडू, क्रीडा संधी निर्माण करण्यासाठी राज्यात आंतरराष्ट्रीय क्रीडा विद्यापीठ महाराष्ट्र स्थापन करण्यात आले आहे. या क्रीडा विद्यापिठाचे बोधचिन्ह ठरविण्यासाठी स्पर्धेचे आयोजन करण्यात आले आहे.

राज्याची क्रीडा विषयक कामगिरी उंचावणे, क्रीडा क्षेत्रात आंतरराष्ट्रीय स्तरावर उपलब्ध असलेली प्रशिक्षणाचे क्षेत्र विचारात घेऊन नोकरीच्या संधी उपलब्ध व्हाव्यात व तरुण वर्गास क्रीडा क्षेत्रात येण्यास प्रोत्साहन मिळावे यासाठी राज्यात दर्जेदार मार्गदर्शन व खेळाडूंना तंत्रशुध्द प्रशिक्षण मिळणार आहे. या आंतरराष्ट्रीय दर्जाच्या क्रीडा विद्यापीठाचे बोधचिन्ह (लोगो) ठरविण्यासाठी स्पर्धा आयोजित करण्यात  आली आहे. या स्पर्धेचे नियम, अटी व पुरस्काराची माहिती क्रीडा व युवक सेवा संचालनालयाच्या sports.maharashtra.gov.in या संकेतस्थळावर उपलब्ध आहे.

या स्पर्धेत भारतातील कोणीही नागरिक भाग घेऊ शकतात. तसेच या स्पर्धेसाठी आपले बोधचिन्ह (लोगो) तयार करुन सादर करण्याचा अंतिम दिनांक 10 ऑगस्ट, 2021 असा राहील. या स्पर्धेतील प्रथम, द्वितीय व तृतीय क्रमांकाच्या विजेत्यांना अनुक्रमे 50 हजार रुपये, 30 हजार रुपये व 20 हजार रुपये पारितोषिक प्रदान करण्यात येणार आहे.

हिंगोली जिल्ह्यातील नागरिकांनी या स्पर्धेमध्ये सहभागी व्हावे. तसेच महाविद्यालयीन युवक युवतींनीही सहभागी होऊन तयार केलेला लोगो isumaharashtra@gmail.com या ई-मेल पत्यावर पाठवावे, असे आवाहन जिल्हा क्रीडा अधिकारी, हिंगोली यांनी केले आहे .

*****