नवरात्र उत्सव दोन दिवस, दिवाळी लक्ष्मीपूजन, ख्रिसमस व 31 डिसेंबर या पाच दिवसासाठी ध्वनीची विहित मर्यादा राखून वेळेची सवलत जाहीर

 

             हिंगोली (जिमाका), दि. 11 : ध्वनी प्रदुषण (नियमन व नियंत्रण) सुधारित नियम 2017 च्या नियम 5 (3) व त्यासोबत दिलेल्या स्पष्टीकरणात्मक टिपणीनुसार ध्वनीक्षेपक व  ध्वनीवर्धक इत्यादीच्या वापराबाबत श्रोतगृहे, सभागृहे, सामुहिक सभागृहे आणि मेजवानी कक्ष यासारख्या बंद जागांखेरीज इतर ठिकाणी जिल्ह्याच्या निवडीनुसार वर्षामध्ये 15 दिवस निश्चित करुन सकाळी 6.00 वाजल्यापासून  ते रात्रीचे 12.00 वाजेपर्यंत सूट जाहीर करण्यासाठी  संबंधित जिल्ह्याचे जिल्हाधिकारी यांना राज्य शासनाने प्राधिकृत केले आहे.

            तसेच सन 2021 या वर्षासाठी राज्य शासनाने निश्चित केलेल्या 15 दिवसांपैकी 5 दिवसांची सूट राज्यभर उपयोगात आलेली असल्याने  सर्व संबंधित जिल्हाधिकाऱ्यांनी आगामी उत्सव कालावधी लक्षात घेता सन 2021 साठी उरलेले 10 दिवस घोषित करण्याबाबत सूचित केले आहे.

            त्यामुळे जिल्हादंडाधिकारी जितेंद्र पापळकर यांनी आगामी उत्सव कालावधी लक्षात घेता अष्टमी व नवमी हे  नवरात्री उत्सव दोन दिवस (दि. 14 ऑक्टोबर, 2021 व 15 ऑक्टोबर, 2021),  दिवाळी  लक्ष्मीपूजन एक दिवस (दि. 4 नोव्हेंबर, 2021), ख्रिसमस एक दिवस (25 डिसेंबर, 2021) व  31 डिसेंबर एक दिवस (31 डिसेंबर, 2021) अशा उरलेल्या एकूण 5 दिवसासाठी फक्त ध्वनीची विहित मर्यादा राखून सकाळी 6.00 वाजल्यापासून रात्री 12.00 वाजेपर्यंत वेळेची सवलत हिंगोली जिल्ह्यासाठी निश्चित करुन जाहीर केले आहेत.

            या आदेशाची अंमलबजावणी या जिल्ह्याच्या हद्दीपुरती मर्यादित राहील, असेही आदेशात नमूद केले आहे. 

****