ग्राम बाल संरक्षण समिती मुलांच्या सुरक्षेसाठी एक प्रभावी यंत्रणा

- जिल्हाधिकारी जितेंद्र पापळकर

            हिंगोली, (जिमाका) दि. 21 : लहान बालके किंवा निराधार मुले यासाठी ग्राम बाल संरक्षण समिती कार्यरत असून मुलांच्या सुरक्षेच्या व विकासाच्या दृष्टीने काम करणारी एक प्रभावी यंत्रणा आहे, असे प्रतिपादन जिल्हाधिकारी जितेंद्र पापाळकर यांनी केले.

            येथील जिल्हा परिषदेच्या षटकोनी सभागृहात आज हिंगोली तालुक्यातील जिल्हा बाल संरक्षण कक्षाकडून ग्राम बाल संरक्षण समिती मधील सदस्य सचिव असलेल्या अंगणवाडी सेविका व सदस्य असलेल्या पोलीस पाटील यांच्यासाठी कार्यशाळा आयोजित करण्यात आली होती. या कार्यशाळेचे उद्घाटन जिल्हाधिकारी जितेंद्र पापळकर यांच्या हस्ते करण्यात आले. त्यावेळी ते बोलत होते. या कार्यशाळेस जिल्हा परिषदेचे मुख्य कार्यकारी अधिकारी संजय दैने, जिल्हा परिषदेच्या महिला व बाल कल्याण विभागाचे जिल्हा कार्यक्रम अधिकारी गणेश वाघ, जिल्हा महिला बालविकास अधिकारी विठ्ठल शिंदे यांची उपस्थिती होती.

लहान बालके किंवा निराधार मुले यासाठी बाल संरक्षण समिती कार्यरत असुन मुलांच्या सुरक्षेच्या व विकासाच्या दृष्टीने काम करणारी एक प्रभावी यंत्रणा आहे, असे सांगून जिल्ह्यातील बालविवाह स्थिती व कार्यरत यंत्रणा यांची जबाबदारी याबद्दल जिल्हाधिकारी श्री. पापळकर यांनी मार्गदर्शन केले.

यावेळी जिल्हा परिषदेचे मुख्य कार्यकारी अधिकारी संजय दैने यांनी बाल न्याय ( मुलांची काळजी व संरक्षण अधिनियम 2015 अन्वये बालकाच्या संरक्षणासाठी जिल्ह्यात वेगवेगळ्या यंत्रणा कार्यरत आहेत अशा यंत्रणांची क्षमता बांधणी जिल्हा बाल संरक्षण कक्ष यांच्याकडून चालू असून त्या अनुषंगाने ग्राम बाल संरक्षण समितीची कार्यशाळा येथील जिल्हा परिषदेच्या षटकोनी सभागृहात पार पडत आहे. या कार्यशाळेत बालकांचे संरक्षणाबाबत विविध विषयावर उपस्थितांना मार्गदर्शन करण्यात येत आहे. ग्राम बाल संरक्षण समितीच्या माध्यमातून बालकांचे हक्क व संरक्षण होणार असून बालकांच्या अधिकारांचे संरक्षण करण्यासाठी ग्राम बाल संरक्षण समिती व  अंगणवाडी सेविका, पोलीस पाटील यांची महत्वाची भूमिका असल्याचे सांगितले.

कार्यक्रमाच्या प्रास्ताविकात माया सूर्यवंशी यांनी उपस्थितांना ग्राम बाल संरक्षण समितीचे महत्त्व सांगितले.

या कार्यशाळेत  बालकांचे अधिकार, बालकांविषयी असणारे कायदे व यंत्रणा, लैंगिक अत्याचार, बाल न्याय मुलांची काळजी व संरक्षण अधिनियम 2015 , दत्तक विधान प्रक्रिया, बालविवाह अधिनियम 2006 आदी विषयावर सविस्तर माहिती देण्यात आली.

या प्रशिक्षणा दरम्यान जिल्हा बाल संरक्षण अधिकारी सरस्वती कोरडे यांनी  ग्राम बाल संरक्षण समितीचे महत्व व कामकाज या बाबत माहिती दिली. बाल विवाह बद्दलची माहिती  समुपदेशक सचिन पठाडे यांनी दिली. बाल संरक्षण विषयक यंत्रणेची माहिती बाल संरक्षण अधिकारी संस्थाबाह्य जरीब पठाण यांनी  दिली. बाल लैंगिक या विषयीची माहिती कायदा व परिविक्षा अधिकारी ॲड. अनुराधा पंडीत यांनी दिली. तर बालकांचे हक्क व अधिकार याविषयीची माहिती सामाजिक कार्यकर्ता रेश्मा पठाण यांनी दिली.

            ग्राम बाल संरक्षण समिती कामकाज विषयक चित्रफितीचे प्रदर्शन सामाजिक कार्यकर्ता रामप्रसाद मुडे, डाटा एंट्री ऑपरेटर राहूल सिरसाट व बाह्य क्षेत्रकार्य कार्यकर्ता अनिरुध्द घनसावंत यांनी केले.

या प्रशिक्षणास अंगणवाडी सेविका, पोलिस पाटील यांच्यासह परिविक्षा अधिकारी सुनिल वाठोरे, निलेश कोटलवार उपस्थित होते.

*****