जिल्हा वार्षिक योजना छाननी समितीची बैठक संपन्न

जिल्हा वार्षिक योजना छाननी समितीची बैठक संपन्न

हिंगोली,दि.5: जिल्हा वार्षिक योजना सन 2019-20 च्या प्रारुप आराखड्याची छाननी करण्यासाठी आमदार तान्हाजी मुटकूळे यांच्या अध्यक्षतेखाली जिल्हा नियोजन समितीच्या छाननी समितीची बैठक येथील जिल्हाधिकारी कार्यालयातील सभागृहात आज संपन्न झाली.  

यावेळी जिल्हाधिकारी रूचेश जयवंशी, जिल्हा नियोजन अधिकारी विनोद कुलकर्णी, समाज कल्याण सहायक आयुक्त भाऊराव चव्हाण, प्रकल्प अधिकारी विशाल राठोड यांच्यासह  सर्व विभागाच्या विभाग प्रमुखांची उपस्थिती होती.   

सर्व प्रशासकीय यंत्रणानी जिल्हा नियोजन समिती अंतर्गत प्रस्ताव सादर करतांना सर्वसामान्य जनतेचे हित व गरजा लक्षात घेऊनच प्रस्ताव सादर करावेत. तसेच उपलब्ध झालेल्या निधीचा विनियोग चांगल्या कामासाठी करुन सदर निधी वेळेत खर्च करावा. तसेच विहित वेळेतच  प्रस्ताव सादर करावेत, अशा सूचना आमदार मुटकुळे यांनी यावेळी दिल्या.

या बैठकीत सर्वसाधारण जिल्हा वार्षिक योजना व अनुसूचित जाती उपयोजना, अनुसूचित जमाती उपयोजना प्रारुप आराखडा 2019-20 ची छाननी संदर्भात तसेच अद्ययावत 2018-19 मध्ये खर्च झालेला निधी व 2019-20 मध्ये प्रस्तावित कामे यासंदर्भात आमदार तान्हाजी मुटकुळे यांनी आढावा घेतला.

यावेळी जलसंधारण, कृषी विभाग, नगर विकास, आरोग्य विभाग, वन विभाग, शालेय, पाणी पुरवठा, ग्रामीण पाणी पुरवठा, सार्वजनिक बांधकाम विभाग, आदी विभागाच्या योजनावर या बैठकीत चर्चा करण्यात आली. छाननी केलेला आरखडा आगामी जिल्हा नियोजन समितीची मंजूरीसाठी सादर करण्यात येणार आहे.

****