पेट्रोलपंप चालकांनी पंपावर येणाऱ्या चालकांचे

कोरोना लसीकरणाचे प्रमाणपत्र तपासूनच इंधनाची विक्री करावी

- जिल्हाधिकारी जितेंद्र पापळकर यांचे आदेश

 

हिंगोली, (जिमाका) दि. 25 : शासन व जिल्हास्तरावरुन कोरोनाचा प्रादुर्भाव रोखण्यासाठी विविध उपाययोजना करण्यात येत आहेत. तसेच सर्व नागरिकांनी तात्काळ कोरोना लसीकरण करुन घेण्याबाबत सूचना देण्यात आल्या आहेत, परंतु आजतागायत जिल्ह्यातील नागरिकांचे लसीकरण झाल्याचे प्रमाण फार कमी आहे. यामुळे कोरोनाचा प्रसार होण्याची शक्यता नाकारता येत नाही.

यासाठी प्रतिबंधात्मक उपाययोजना करणे आवश्यक असल्याने जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष जितेंद्र पापळकर यांनी जिल्ह्यातील पेट्रोलपंप चालकांनी आपल्या पंपावर येणाऱ्या चालकांना कोरोना लसीचा किमान एक डोस घेतल्याबाबतचे प्रमाणपत्र तपासून त्यांना इंधनाची विक्री करावी. तसेच लसीकरण न झालेल्या चालकांना तात्काळ जवळच्या लसीकरण केंद्रात जाऊन लसीकरण करुन घेण्याबाबत सूचित करावे. तसेच पेट्रोलपंप चालकांनी आपल्या पंपाबाहेर या आदेशानुसार लसीकरणाशिवाय इंधन विक्री नसल्याबाबत सूचना फलक लावण्यात यावा, असे आदेश निर्गमित केले आहेत.

या आदेशाची अंमलबजावणी करण्याची जबाबदारी मुख्य कार्यकारी अधिकारी जि.प.हिंगोली, पोलीस अधीक्षक हिंगोली, सर्व उपविभागीय अधिकारी, सर्व तहसीलदार, सर्व मुख्याधिकारी न.प.-न.पं, सर्व संबंधित अधिकारी, कर्मचारी, सर्व पेट्रोलपंप चालक यांची असेल.

आदेशाचे पालन न करणाऱ्या व्यक्ती, संस्था अथवा समूह हे भारतीय दंड संहिता 1860, साथरोग प्रतिबंधक कायदा 1897, फौजदारी प्रक्रिया संहिता 1973 व आपत्ती व्यवस्थापन अधिनियम 2005 मधील तरतुदी नुसार शिक्षेस पात्र राहतील.

                                                            *******