विद्यार्थ्यांनी जाती प्रमाणपत्र पडताळणीचे प्रस्ताव तात्काळ सादर करण्याचे आवाहन

 

हिंगोली, (जिमाका) दि. 06 : जिल्ह्यातील सन 2022-23 या शैक्षणिक वर्षात व्यवसायिक अभ्यासक्रमासाठी राज्य सामाईक प्रवेश परीक्षेच्या आरक्षित जागेवर प्रवेश घेऊ इच्छिणाऱ्या मागासवर्गीय विद्यार्थ्यांना जात वैधता प्रमाणपत्र सादर करणे अनिवार्य आहे.

जात प्रमाणपत्र पडताळणी नियमानुसार समितीकडे अर्ज केल्यानंतर सामान्यत: तीन महिन्याच्या आत वैधता प्रमाणपत्राबाबत समिती निर्णय घेते. वैधता प्रमाणपत्र देण्यासाठी समितीस पुरेसा अवधी मिळावा तसेच जात वैधता प्रमाणपत्राअभावी मागासवर्गीय विद्यार्थी व्यवसायिक अभ्यासक्रमास प्रवेश मिळण्यापासून वंचित राहू नये. यासाठी  ज्या मागासवर्गीय विद्यार्थ्यांनी अद्याप वैधता प्रमाणपत्र मिळण्यासाठी अर्ज सादर केलेला नाही, त्यांनी ज्या जिल्ह्यातून जातीचा दाखला प्राप्त केलेला आहे. त्या जिल्ह्याच्या जात प्रमाणपत्र पडताळणी समितीकडे वैधता प्रमाणपत्र मिळण्यासाठी त्वरित अर्ज सादर करण्यासाठी विशेष मोहिमेचे आयोजन करण्यात आले आहे.

विद्यार्थ्यांनी  जाती  प्रमाणपत्र पडताळणीचे प्रस्ताव तात्काळ सादर करावेत, असे आवाहन जिल्हा जात प्रमाणपत्र पडताळणी समितीचे संशोधन अधिकारी तथा सदस्य सचिव शिवानंद मिनगीरे यांनी केले आहे.

*****