हिंगोली व सेनगाव येथील दोन बाल विवाह बांबविण्यास जिल्हा बाल संरक्षण कक्षास यश

 

हिंगोली (जिमाका), दि. 25 :  जिल्ह्यात बाल विवाह समुळ नष्ट करण्यासाठी जिल्हाधिकारी जितेंद्र पापळकर यांच्या अध्यक्षतेखाली जिल्ह्यात बाल विवाह निमूर्लन समिती गठीत करण्यात आली आहे. जिल्हाधिकारी यांच्या मार्गदर्शनाखाली जिल्ह्यात विविध ठिकाणी बाल विवाह प्रतिबंधक अधिनियम 2006 ग्राम बाल संरक्षण समिती स्थापन करण्याविषयी जनजागृती करण्यात येत आहे. याच दरम्यान जिल्ह्यातील हिंगोली  व सेनगाव येथे अल्पवयीन मुलींचे बाल विवाह होणार असल्याबाबत गोपनीय माहिती मिळताच जिल्हा महिला व बाल विकास अधिकारी आर. आर. मगर यांच्या मार्गदर्शनाखाली व जिल्हा बाल संरक्षण अधिकारी सरस्वती कोरडे यांच्या नियोजनानुसार सेनगाव पोलीस स्टेशन, येथील पोलीस निरिक्षक रंजित भोईटे यांच्या सहकार्याने जिल्हा बाल संरक्षण कक्षातील बाल संरक्षण अधिकारी (संस्थात्मक) गणेश मोरे, समुपदेशक सचिन पठाडे, सामाजिक कार्यकर्ता रामप्रसाद मुडे, रेशमा पठाण यांनी घटनास्थळी भेट देवून उपस्थित सर्वांना बाल विवाह प्रतिबंधक अधिनियम, 2006 विषयी माहिती सांगण्यात आली. ज्यामध्ये मुलीचे वय 18 व मुलाचे वय 21 असावे आणि जर मुलाचे व मुलीचे वय यापेक्षा कमी असेल तर असे विवाह बेकायदेशीर ठरले जातात व अशा गुन्ह्यास एक लाख रुपये दंड व 02 वर्ष सक्त मजुरीची शिक्षा होवू शकते. तसेच बाल विवाहाची कारणे व दुष्परिणाम या विषयी सविस्तर मार्गदर्शन करुन सेनगाव येथे 01 व हिंगोली येथे 01 असे दोन बाल विवाह थांबविण्यात आले. बालिकेच्या आई-वडीलाकडून मुलीचे वय 18 वर्ष पूर्ण होईपर्यंत लग्न करणार नाही असा लेखी जबाब लिहून घेण्यात आला.

या वेळी हिंगोली येथील अंगणवाडी सेविका व मदतनीस तसेच सेनगाव तालुक्या मध्ये सेनगावचे बिट जमादार एस.पी. चव्हाण, नगरसेवक अमोल तिडके, माजी सभापती आप्पासाहेब देशमुख इ. उपस्थित होते. या दोन्ही वालिकांना पुढील कार्यवाहीसाठी मा. बाल कल्याण समिती, हिंगोली समोर हजर करण्यात आले.

*****