कळमनुरी तालुक्यातील डोंगरगाव पूल येथे ग्राम बाल संरक्षण समितीची बैठक संपन्न

 पोलीस प्रशासनाच्या सहकार्याने चालू विवाह थांबविण्यास जिल्हा बाल संरक्षण कक्षास यश

 

हिंगोली (जिमाका), दि. 25 :  जिल्ह्यात बाल विवाह समूळ नष्ट करण्यासाठी जिल्हाधिकारी जितेंद्र पापळकर यांच्या अध्यक्षतेखाली जिल्ह्यात बाल विवाह निमूर्लन समिती गठीत करण्यात आली आहे, जिल्हाधिकारी यांच्या मार्गदर्शनाखाली जिल्ह्यात विविध ठिकाणी बाल विवाह प्रतिबंधक अधिनियम 2006 नुसार ग्राम बाल संरक्षण समिती स्थापन करण्याविषयी जनजागृती करण्यात येत आहे. याच उद्देशाने कळमनुरी तालुक्यातील मौजे डोंगरगाव पूल येथे दि. 19 एप्रिल, 2023 रोजी जिल्हा महिला व बाल विकास अधिकारी आर. आर. मगर यांच्या मार्गदर्शनाखाली व जिल्हा बाल संरक्षण अधिकारी सरस्वती कोरडे यांच्या नियोजनानुसार ग्राम बाल संरक्षण समितीची बैठक घेण्यात आली. यावेळी सदर बैठकीस सर्व ग्राम बाल संरक्षण समिती अध्यक्ष व सदस्य उपस्थित होते.

या बैठकीत गावातील काळजी व संरक्षणाची गरज असलेल्या बालकांविषयी व ग्राम बाल संरक्षण समितीमध्ये नव्याने 20 ते 30 वयोगटातील युवक-युवतीची बाल मित्र म्हणून निवड करण्यात यावी याविषयी चर्चा करण्यात आली.

सदरील गावात चला जाणूया नदीला या अभियानाअंतर्गत जिल्हा बाल संरक्षण कक्षातील कायदा व परिविक्षा अधिकारी अॅड.अनुराधा पंडित यांनी उपस्थित सर्व गावकऱ्यांना बाल विवाह प्रतिबंध कायदा, 2006 विषयी मार्गदर्शन करण्यात आले. उपस्थित सर्वाकडून बाल विवाह प्रतिबंध प्रतिज्ञेची शपथ घेण्यात आली. याच दरम्यान एका 17 वर्षीय बालिकेचा बाल विवाह होणार असल्याबाबतची गोपनीय माहिती मिळताच आखाडा बाळापुर पोलीस स्टेशन येथील सहाय्यक पोलीस निरिक्षक पंढरीनाथ बोधनापोड यांच्या सहकार्याने घटनास्थळी भेट देण्यात आली. सदरील बालिकेच्या आई-वडीलांना बाल विवाह प्रतिबंधक अधिनियम, 2006 विषयी सविस्तर माहिती सांगण्यात आली. ज्यामध्ये मुलीचे वय 18 व मुलाचे वय 21 असावे आणि जर मुलाचे व मुलीचे वय यापेक्षा कमी असेल तर असे विवाह बेकायदेशीर ठरले जातात व अशा गुन्ह्यास एक लाख रुपये दंड व 02 वर्ष सक्त मजुरीची शिक्षा होवू शकते या विषयी अॅड. अनुराधा पंडित यांनी मार्गदर्शन करुन नियोजित बाल विवाह थांबविण्यात आला. बालीकेच्या आई-वडीलाकडून मुलींचे वय 18 वर्ष पुर्ण होई पर्यंत लग्न करणार नाही असा लेखी जबाब लिहून घेण्यात आला.

यावेळी गावातील सरपंच लक्ष्मीबाई घोडगे, उपसरपंच जी. एम. देशमुख, ग्रामसेवक तथा बाल विवाह प्रतिबंधक अधिकारी ए.डी. शिंदे, अंगणवाडी सेविका रत्नमाला घोडगे, मदतनीस शेषीकला घोडगे, बिट जमादार ए.एस. शेख इ. उपस्थित होते. पुढील कार्यवाहीसाठी सदरीलल बालिकेस मा. बाल कल्याण समिती, हिंगोली समोर हजर करण्यात आले.

 

******