जिल्हा तंबाखू नियंत्रण पथकाची

जिल्हाधिकारी  कार्यालयातील तंबाखू बहाद्दरांवर कार्यवाही

 

            हिंगोली (जिमाका), दि. 05 : जिल्हाधिकारी जितेंद्र पापळकर यांच्या आदेशानुसार  जिल्हाधिकारी कार्यालय, हिंगोली येथे  पोलीस अधीक्षक जी. श्रीधर व जिल्हा शल्यचिकित्सक डॉ. राजेंद्र सूर्यवंशी यांच्या मार्गदर्शनाखाली आज दि. 5 एप्रिल, 2023 रोजी जिल्हा तंबाखू नियंत्रण पथकाद्वारे जिल्हाधिकारी कार्यालयातील विविध विभागांमध्ये कर्तव्यावर असतांना तंबाखू युक्त पदार्थांचे सेवन करणाऱ्या कर्मचाऱ्यांवर धाडी टाकण्यात आल्या. त्यामुळे कर्मचाऱ्यांमध्ये एकच तारांबळ उडाली. तंबाखू विरोधी कायदा (कोटपा-2003) नुसार शासकीय कार्यालय कर्तव्यावर असतांना, सार्वजनिक ठिकाणी तसेच शैक्षणिक संस्थांच्या परिसरात तंबाखूयुक्त पदार्थांचे सेवन व विक्री करण्यास बंदी आहे.

त्यामुळे निवासी उपजिल्हाधिकारी चंद्रकांत सुर्यवंशी यांच्या सहकार्याने जिल्हाधिकारी कार्यालयातील मिलिंद वाकळे, औरंगाबाद येथील मराठवाडा ग्रामीण संस्थेचे अभिजित संघई व जिल्हा रुग्णालयातर्फे डॉ. मयूर निंबाळकर, कुलदीप केळकर, आनंद साळवे व इतर कर्मचारी यांच्या पथकाने  कार्यवाही केली. या कार्यवाहीत एकूण 16 लोकांकडून 2 हजार 120 रुपये दंड वसूल करण्यात आला.

यावेळी जिल्हाधिकारी जितेंद्र पापळकर यांनी तंबाखूमुक्त शाळा करण्यासाठी शिक्षण विभागाची मदत घ्यावी तसेच पोलिस विभागाच्या मदतीने जिल्हा अंतर्गत तंबाखू विरोधी कार्यवाही वाढवावी, अशा सूचना दिल्या.

कोटपा-2003 कायदा काय म्हणतो......

कलम 4 - सार्वजनिक ठिकाणी धुम्रपान बंदी आहे.

कलम 5 - तंबाखूयुक्त पदार्थ जाहिरात बंदी

कलम 6 - 'अ'  18 वर्षा खालील मुलांना तंबाखूयुक्त पदार्थ विकण्यास सक्त मनाई.

कलम 6 'ब'  शै. संस्थांच्या 100 मी. परिसरात तंबाखूयुक्त पदार्थ विक्री, सेवन बंदी

कलम 7 - कोणत्याही तंबाखूयुक्त पदार्थावर (पाकिटावर) कर्करोगविषयी चेतावणी पाकिटाच्या 85 टक्के भागावर असावी.

******