डोंगरकडाला ९३.५१ टक्के, तर फाळेगावला ९५.४१ टक्के गुण
हिंगोली, दि. १७ (जिमाका) : हिंगोली जिल्ह्यातील डोंगरकडा आणि फाळेगाव येथील प्राथमिक आरोग्य केंद्रांना राष्ट्रीय गुणवत्ता आश्वासन मानांकन (NQAS) प्राप्त झाले आहे. राष्ट्रीय स्तरावरील बाह्य मूल्यांकनात डोंगरकडा आरोग्य केंद्राला ९३.५१ टक्के, तर फाळेगाव आरोग्य केंद्राला ९५.४१ टक्के गुण मिळाले आहेत.
राष्ट्रीय आरोग्य प्रणाली संसाधन केंद्राने (NHSRC) १५ ऑक्टोबर २०२६ रोजी जारी केलेल्या पत्राद्वारे या मानांकनाची पुष्टी केली आहे. दोन्ही आरोग्य केंद्रांतील सहा विभागांचे मूल्यांकन करण्यात आले. निर्धारित गुणवत्ता निकष पूर्ण केल्यामुळे या केंद्रांना राष्ट्रीय गुणवत्ता प्रमाणपत्र प्रदान करण्यात आले आहे.
आरोग्य सेवांची गुणवत्ता, स्वच्छता आणि व्यवस्थापनाचा दर्जा उंचावण्यासाठी आरोग्य विभागाने केलेल्या प्रयत्नांना या यशामुळे मान्यता मिळाली आहे. या प्रक्रियेत जिल्हाधिकारी राहुल गुप्ता आणि जिल्हा परिषदेचे मुख्य कार्यकारी अधिकारी विवेक गायकवाड यांचे मार्गदर्शन व सहकार्य लाभले असल्याचे जिल्हा आरोग्य अधिकारी डॉ. कैलास शेळके यांनी सांगितले.
मानांकन प्राप्त आरोग्य केंद्रांनी मूल्यांकनात सुचविलेल्या सुधारणांवर कार्यवाही करून कृती आराखडा सादर करणे आवश्यक आहे. तसेच, आरोग्य सेवांचा दर्जा कायम राखण्यासाठी नियमित देखरेख आणि संनियंत्रण लेखापरीक्षण करण्यात येणार आहे.
या यशाबद्दल जिल्हाधिकारी राहुल गुप्ता आणि मुख्य कार्यकारी अधिकारी विवेक गायकवाड यांनी आरोग्य विभागातील सर्व अधिकारी, कर्मचारी यांचे अभिनंदन केले असल्याचेही डॉ. शेळके यांनी सांगितले.
No comments:
Post a Comment