सालेगाव शाळेत पुस्तकदान अभियानाला उत्स्फूर्त प्रतिसाद

प्रभात फेरीतून जनजागृती; शिक्षक राजकुमार उंडगे यांच्याकडून ६२ पुस्तकांचे दान

हिंगोली, दि. १७ (जिमाका) : जिल्हा परिषदेच्या ‘सेवा संकल्प अभियाना’अंतर्गत कळमनुरी तालुक्यातील सालेगाव येथील जिल्हा परिषद प्राथमिक शाळेत पुस्तकदान अभियान राबविण्यात आले. शाळेतील विद्यार्थ्यांमध्ये वाचनाची आवड निर्माण व्हावी, ग्रंथालय समृद्ध व्हावे आणि ज्ञानाचा प्रसार व्हावा, या उद्देशाने आयोजित या उपक्रमात गावकऱ्यांनीही उत्स्फूर्त सहभाग नोंदविला.

पुस्तकदानाचे महत्त्व ग्रामस्थांपर्यंत पोहोचविण्यासाठी शाळेच्या वतीने गावातून प्रभात फेरी काढण्यात आली. या फेरीद्वारे गावकऱ्यांना शाळेसाठी पुस्तके दान करण्याचे आवाहन करण्यात आले. या उपक्रमाला प्रतिसाद देत शाळेतील शिक्षक राजकुमार उंडगे यांनी शाळेला ६२ पुस्तके दान केली. तसेच इतर शिक्षक आणि ग्रामस्थांनीही पुस्तकदान करून या उपक्रमात योगदान दिले.

लोकसहभागातून शाळेचे ग्रंथालय अधिक समृद्ध करण्यासोबतच विद्यार्थ्यांमध्ये वाचनसंस्कृती रुजविण्यासाठी हा उपक्रम महत्त्वपूर्ण ठरणार आहे. पुस्तकदानाच्या माध्यमातून विद्यार्थ्यांना विविध विषयांवरील पुस्तके उपलब्ध होऊन त्यांच्या ज्ञानात भर पडण्यास मदत होणार आहे. ‘सेवा संकल्प अभियाना’च्या माध्यमातून शाळा आणि समाज यांच्यातील शैक्षणिक सहकार्य अधिक दृढ होत आहे.