जिल्हास्तरीय युवा महोत्सवाचे 5 डिसेंबर रोजी आयोजन

हिंगोली (जिमाका), दि. 29 : जिल्हा क्रीडा अधिकारी कार्यालय व नेहरू युवा केंद्र यांच्या संयुक्त विद्यमाने डॉ.शिवाजीराव देशमुख सभागृह, नगर परिषद, हिंगोली येथे दि. 5 डिसेंबर 2024 रोजी सकाळी 9:30 वाजता जिल्हास्तरीय युवा महोत्सव 2024-25 चे आयोजन करण्यात आले आहे. युवकांचा सर्वांगीण विकास करणे, संस्कृती व परंपरा जतन करणे, युवकांच्या अंगी असलेल्या सुप्त कला गुणांना वाव देणे व त्यांना एक खुले व्यासपीठ करण्याच्या हेतूने राष्ट्रीय एकात्मता वाढीस लावणे, युवकांना विज्ञान व तंत्रज्ञानाचे महत्व पटवून देणे, शिक्षण, उद्योग-व्यवसाय यासोबतच शेती या व्यवसायाशी युवकांची ओळख करुन देणे, सामाजिक विकासात विज्ञानाचे महत्व युवकांना पटवून देणे, हा युवा महोत्सवाचा मुख्य हेतू आहे. युवा महोत्सवात खालील कला प्रकारांचा समावेश असणार आहे. 1) संकल्पना आधारीत स्पर्धा : विज्ञान व तंत्रज्ञान यामधील नवसंकल्पना आधारित विज्ञान प्रदर्शन (सहभाग संख्या 5), 2) सांस्कृतिक कला प्रकार : समूह लोकनृत्य (सहभाग संख्या 10), लोकगीत (सहभाग संख्या 10), 3) कौशल्य विकास : कथा लेखन, चित्रकला स्पर्धा, वक्तृत्व स्पर्धा, कविता स्पर्धा. 4) युथ आयकॉन : जिल्ह्यातील युवक कल्याण क्षेत्रात तसेच युवांना प्रभावित करणारे कार्य केलेले 15 ते 29 वयोगटातील 5 युवक. जिल्हास्तर युवा महोत्सवामध्ये हिंगोली जिल्ह्यातील 15 ते 29 वयोगटातील युवक व युवती सहभाग घेऊ शकतात. त्यांचे वय 12 जानेवारी 2025 या दिनांकापर्यंत परिगणना करण्यात येईल. यात सहभागी होण्यासाठी जिल्ह्यातील कनिष्ठ व वरिष्ठ महाविद्यालय, संगीत अकादमी, महिला मंडळ, महिला बचत गट, युवकांसाठी कार्य करणाऱ्या स्वंयसेवी संस्था, नेहरू युवा केंद्र, राष्ट्रीय सेवा योजना (एनएसएस) इत्यादी संस्थेतील युवक व युवती यांना सहभागासाठी आमंत्रित करण्यात आले आहे. युवा महोत्सवामध्ये प्रत्येक कला प्रकारासाठी विजयी स्पर्धकांना आकर्षक रोख बक्षीस, स्मृतीचिन्ह देवून गौरविण्यात येणार आहे. तसेच जिल्हास्तरावर विजयी युवक-युवती स्पर्धकांना विभागीय युवा महोत्सवामध्ये सहभागी होण्याची संधी मिळणार आहे. जिल्ह्यातील 15 ते 29 वयोगटात असलेल्या 40 युवकांची नावे विभागस्तरावर होणाऱ्या स्पर्धेसाठी पाठविण्यात येणार आहेत. तसेच विभागस्तरावरून 40 युवकांची नावे राज्यस्तरावर होणाऱ्या स्पर्धेसाठी पाठविण्यात येणार असून राज्यस्तरावरून एकूण 40 युवकांना राष्ट्रीय युवा महोत्सवासाठी पाठविण्यात येणाऱ्या संघामध्ये प्रवेश देण्यात येणार आहे. तसेच राष्ट्रीय युवा महोत्सवामध्ये युवांच्या भारत निर्माणासाठी नवीन संकल्पना विचारात घेऊन युवांना राष्ट्र निर्माणामध्ये सहभागी करून, त्यांची दूरदृष्टी विचारात घेणे आवश्यक आहे. या अनुषंगाने राष्ट्रीय युवा महोत्सव अंतर्गत विकसित भारत यंग लिडर्स डायलॉग अंतर्गत खालील संकल्पना निश्चित करण्यात आलेल्या आहेत. टेक फॉर विकसित भारत, विकास भी विरासत भी, एम्पॉवरिंग युथ फॉर विकसित भारत, मेकिंग इंडिया फॉर विश्वगुरु, मेकिंग इंडिया दि स्टार्टअप कॅपिटल ऑफ दि वर्ल्ड, फिट इंडिया ए मीन्स टू विकसित भारत, मेकिंग इंडिया दि ग्लोबल मॅन्युफॅक्चरिंग पॉवरहाऊस, मेकिंग इंडिया एनर्जी एफिशियंट, बिल्डींग दि इन्फ्रास्ट्रक्चर फॉर दि फ्युचर, एम्पॉवरिंग वुमेन अँड इम्प्रुव्हिंग सोशल इंडिकेटर्स, यामध्ये सहभागासाठी खालील प्रमाणे टप्पे निश्चित केलेले आहेत. प्रथम टप्पा : विकसित भारत प्रश्नमंजुषेमध्ये वैयक्तिकरित्या युवांना सहभागी होता येईल. यासाठी प्रश्नमंजुषा स्पर्धा ही सामान्यज्ञान व भारताची कामगिरी या बाबींवर होणार आहे. ‘माय भारत’ पोर्टलवर शैक्षणिक संस्था व कॉलेज यांनी सहभाग नोंदवावा. ही स्पर्धा 5 डिसेंबर 2024 पर्यंत होणार आहे. जिल्ह्यातील जास्तीत जास्त युवांनी सहभाग घ्यावा. यामध्ये सहभागी होणाऱ्या युवकांना प्रमाणपत्र देण्यात येणार आहेत. द्वितीय टप्पा : विकसित भारत यावर निबंध लेखन स्पर्धा घेतली जाईल यामध्ये १ हजार शब्द मर्यादा राहील. प्रथम टप्यात सहभागी होवून निवड झालेल्या युवांचा यामध्ये सहभाग राहील. वर नमूद केलेल्या विषयावर निबंध लेखन करता येईल. यामधील सहभागासाठी प्रमाणपत्र देण्यात येईल. निबंध स्पर्धा ऑनलाईन पद्धतीने 8 ते 15 डिसेंबर 2024 या कालावधीत होणार आहे. तृतीय टप्पा : विकसित भारत पीपीटी चॅलेंजवर नमूद केलेल्या विषयांवर राष्ट्रीय स्तरावर स्पर्धा घेण्यात येणार आहे. यामध्ये प्रत्येक राज्यातून 4 युवांची निवड करण्यात येणार आहे. राज्यस्तरावरून यासाठी राज्याचा संघ निवड करण्यात येणार आहे. निबंध माय भारत पोर्टलवर अपलोड करावयाचे आहेत. चतुर्थ टप्पा : राष्ट्रीय युवा महोत्सवासाठी निवड झालेल्या युवांना प्रथम 11 जानेवारी 2025 रोजी सादरीकरण करावे लागेल. यामधून अंतिम फेरी साठी निवड झालेल्या युवांना माननीय पंतप्रधान महोदय यांच्यासमोर संकल्पनांचे सादरीकरण करावयाचे आहे. 12 जानेवारी 2025 रोजी सदर सादरीकरण होणार आहे. हिंगोली जिल्ह्यातील इच्छुक युवक व युवतींनी आपले प्रवेश अर्ज व ओळखपत्र विहित नमुन्यात दि. 4 डिसेंबर, 2024 रोजी सायंकाळी 5 वाजेपर्यंत जिल्हा क्रीडा अधिकारी कार्यालय, लिंबाळा मक्ता, हिंगोली येथे जमा करावेत. मुदतीनंतर येणारे व स्पर्धेच्या दिवशी वेळेवर येणारे प्रवेश अर्ज स्वीकारले जाणार नाहीत. अधिक माहितीसाठी जिल्हा क्रीडा अधिकारी कार्यालय, लिंबाळा मक्ता, हिंगोली येथे संपर्क साधावा, असे जिल्हा क्रीडा अधिकारी राजेश मारावार यांनी कळविले आहे. ******