जिल्हा हिवताप कार्यालयाकडून २६ गावात धूर फवारणी, साथरोग उद्भवणार नाही याची दक्षता घ्यावी -जिल्हाधिकारी अभिनव गोयल

हिंगोली (जिमाका), दि. ३० : हिंगोली जिल्ह्यात १ सप्टेंबरपासून सतत पाऊस पडत आहे. त्या अनुषंगाने प्रतिबंधात्मक उपाययोजना म्हणून गावामध्ये जलजन्य व कीटकजन्य आजाराची साथ पसरू नये. यासाठी दैनंदिन सर्वेक्षण करून वेळीच खबरदारी घेण्याच्या सूचना जिल्हाधिकारी अभिनव गोयल यांनी दिल्या आहेत. त्यानुषंगाने जिल्हा हिवताप अधिकारी डॉ. गणेश जोगदंड यांनी कर्मचाऱ्यांना सूचना दिल्या होत्या. डास आळी सर्वेक्षण करून डास आळी आढळून आलेल्या कंटेनरमध्ये डास आळी नाशक औषधे टाकून भांडी रिकामी करावीत. तसेच आठवड्यातून एक दिवस कोरडा दिवस म्हणून पाळण्यात यावा. डेंग्यू, मलेरिया चिकनगुनिया या आजाराबाबत आरोग्य शिक्षण देत जनजागृती करावी, अशा सूचना देण्यात आल्या होत्या. किटकजन्य आजार डेंग्यू, मलेरिया, चिकन गुनिया या आजाराचे तसेच तापाचे रुग्ण वाढू नयेत, यासाठी जिल्ह्यामध्ये गावपातळीवर आरोग्य कर्मचाऱ्यामार्फत सर्वेक्षण करून अबेटीग करण्यात येत आहे. जलद ताप सर्वेक्षण करून तापीच्या रुग्णांचे एकूण 205 रक्तजल नमुने तपासासाठी घेण्यात आले. तसेच धूर फवारणी जिल्हा हिवताप कार्यालय व ग्रामपंचायत कार्यालयामार्फत जिल्ह्यात करण्यात येत आहे. या महिन्यात आतापर्यंत एकूण 26 गावात धूर फवारणी करण्यात आली असल्याची माहिती जिल्हा आरोग्य अधिकारी डॉ. कैलास शेळके यांनी दिली आहे. *******

जिल्ह्यात सामुदायिक आरोग्य शिबिराचे आयोजन

हिंगोली(जिमाका), दि. 29 : जिल्ह्यात अनेक ठिकाणी सामुदायिक आरोग्य शिबिर घेण्यात येत असून प्राथमिक आरोग्य केंद्र भांडेगाव अंतर्गत उपकेंद्र भिरडा येथे सामुदायिक आरोग्य शिबिर घेण्यात आले होते. त्यामध्ये बाह्य रुग्ण तपासणी १८० इसीजी २२ व एनसीडी १६० रुग्णांची तपासणी करण्यात आली. या शिबिरास डॉ. तापडिया, डॉ. माधव मगर, डॉ. पठाण, वैद्यकीय अधिकारी डॉ. गट्टू, समुदायिक आरोग्य अधिकारी डॉ. अतुल पुरी, आरोग्य सेविका मोरे, आरोग्य सेवक सुरसे, गावातील सरपंच, उपसरपंच, पोलीस पाटील, तंटामुक्ती अध्यक्ष व दिनकर नेतने, किशोर बांगर, संदीप मस्के, गंगाधर मुदनर व आशाताई जाधव, अंगणवाडी सेविका व मदतनीस, इतर ग्रामस्थ मंडळी या सामुदायिक आरोग्य शिबिरास उपस्थित होते. *******

हिंगोली येथील लोकन्यायालयामध्ये 2 कोटी 35 लाख 48 हजार 175 रुपयांची 128 प्रकरणे निकाली

* अपंग पक्षकाराची बाजू समजून घेण्यासाठी न्यायाधीश उतरले पॅनलवरुन खाली हिंगोली (जिमाका), दि. 28 : येथील तालुका विधी सेवा समिती, सर्वोच्च न्यायालय तसेच मुंबई उच्च न्यायालय व परभणी जिल्हा न्यायालय तथा जिल्हा विधी सेवा प्राधिकरणच्या मार्गदर्शनाखाली हिंगोली न्यायालयामध्ये आज दि.28 सप्टेंबर, 2024 रोजी राष्ट्रीय लोकअदालतीचे आयोजन करण्यात आले होते. या लोकन्यायालयामध्ये प्रलंबित असलेली 1130 प्रकरणे तसेच विद्युत महावितरण कंपनी, विविध बँका, ग्रामपंचायत व नगरपालिका यांची वाद दाखलपूर्व 3090 प्रकरणे तडजोडीसाठी लोकअदालतीमध्ये ठेवण्यात आली होती. या लोकअदालतीमध्ये प्रलंबित 108 व वाद दाखलपूर्व 20 असे एकूण 128 प्रकरणे निकाली काढण्यात आली. या लोकन्यायालयात तडजोडी आधारे प्रलंबित व दाखलपूर्व प्रकरणात तब्बल 2 कोटी 35 लाख 48 हजार 175 रुपयांची प्रकरणे निकाली काढण्यात आले. या लोकन्यायालयासाठी हिंगोली येथे न्यायिक अधिकारी तसेच विधीज्ञ समाविष्ट असलेली पाच पॅनल तयार करण्यात आले होते. या लोकअदालतीमध्ये जिल्हा न्यायाधीश-1 तथा तालुका विधी सेवा समितीचे अध्यक्ष आर. व्ही. लोखंडे यांच्या मार्गदर्शनानुसार जिल्हा न्यायाधीश-1 आर. व्ही. लोखंडे, तदर्थ जिल्हा न्यायाधीश-1 पी. जी. देशमुख, सह दिवाणी न्यायाधीश वरिष्ठ स्तर श्रीमती व्ही. व्ही. सावरकर, दुसरे सह दिवाणी न्यायाधीश कनिष्ठ स्तर आय. जे. ठाकरे, तिसरे सह दिवाणी न्यायाधीश कनिष्ठ स्तर श्रीमती पी. आर. पमनानी यांनी पॅनल प्रमुख म्हणून काम केले. या लोकअदालतीला वकील संघाचे अध्यक्ष ॲड. शिवशंकर साबळे, सचिव ॲड. अजय वानखेडे, वकील संघाचे सर्व सभासद, न्यायालयीन व पोलीस कर्मचारी यांनी मोलाचे सहकार्य केले. *अपंग पक्षकाराची बाजू समजून घेण्यासाठी न्यायाधीश उतरले पॅनलवरुन खाली* या लोकन्यायालयामध्ये पुजा नागनाथराव पोतदार वय 22 वर्षे या तरूणीचा दि. 04 नोव्हेंबर, 2019 रोजी अकोला बायपास टी पॉईन्ट येथे झालेल्या स्कुटी व ट्रकच्या अपघातात तिचा एक पाय कायमचा गमावला होता. त्यामुळे तिला चालता येत नाही. वरील मजल्यावर पोहचणे शक्य होत नसल्याने हिंगोली जिल्हा न्यायालयामधील जिल्हा न्यायाधीश आर. व्ही. लोखंडे व तदर्थ जिल्हा न्यायाधीश पी.जी. देशमुख यांनी स्वतः पॅनलवरुन खाली उतरुन जिल्हा न्यायालयाच्या इमारती समोरील आवारात उभ्या असलेल्या वाहनामध्ये बसलेल्या पूजा नागनाथराव पोतदार या अपंग तरुणीच्या जवळ जाऊन त्यांची बाजू ऐकूण घेतली. तसेच त्या प्रकरणामधे 20 लाख नुकसान भरपाई रक्कमेवर तडजोड करुन प्रकरण निकाली काढण्यात आले. अर्जदार "पुजा नागनाथराव पोतदार" हिची बाजु ॲड. एस.बी.गडदे यांनी मांडली. *****

शौर्य दिनाचे सोमवारी आयोजन

हिंगोली(जिमाका),दि.२८ : भारतीय सैन्य दलाने पाकिस्तान हद्दीत घुसून सर्जीकल स्ट्राईकव्दारे दि. २९ सप्टेंबर, २०१६ रोजी दहशतवाद्यांचा खात्मा केला. भारतीय सैन्याची ही अभिमानास्पद कामगिरी राज्यातील जनतेपर्यंत पोहोचविण्यासाठी व माजी सैनिकांचा सन्मान करण्यासाठी दरवर्षी दि.२९ सप्टेंबर रोजी शौर्य दिन साजरा करण्यात येतो. आपल्या देशाच्या बहुमोल स्वातंत्र्याचे आणि सार्वभौमत्वाचे प्राणपणाने रक्षण करणारा, आपत्तीच्या काळात आपद्ग्रस्त देशबांधवांच्या मदतीलाही धावून जाणारा, उन्हातान्हाची, थंडीपावसाची वा कोणत्याही अडचणीची पर्वा न करता आपली कर्तव्ये चोखपणे बजावणारा देशाचा बहादूर सैनिक हा आपल्या सर्वाच्या आदराचा आणि अभिमानाचा विषय आहे. परकीय शक्तीपासून देशवासियांचे रक्षण करण्यासाठी व देशाचे स्वातंत्र्य राखून आपल्या पाठीशी भक्कमपणे अहोरात्र उभ्या राहणाऱ्या या सैनिकांचे आपल्यावर फार मोठे ऋण असते. या शौर्य दिनाच्या प्रसंगी सैनिकांप्रती असलेली आदराची भावना समाजातील सर्व लोकांपर्यंत पोहोचविण्यासाठी जिल्हा सैनिक कल्याण कक्ष, हिंगोली यांनी शौर्य दिनाचे औचित्य साधून कार्यक्रमाचे आयोजन करण्यात आले आहे. हा कार्यक्रम दि. २९ सप्टेंबर २०२४ रोजी रविवारची सुट्टी असल्यामुळे सोमवार, दि. ३० सप्टेंबर २०२४ रोजी सकाळी १०.३० वाजता जिल्हाधिकारी कार्यालय सभागृह, हिंगोली येथे आयोजित करण्यात आले आहे. हिंगोली जिल्ह्यातील सर्व माजी सैनिक, माजी सैनिकांच्या विधवा, शहीद जवांनाचे कुटुंबीय वीर माता, वीर पिता, वीर पत्नी या सर्वांनी शौर्य दिनाच्या कार्यक्रमास उपस्थित राहावेत, असे आवाहन निवासी उपजिल्हाधिकारी तथा सैनिक कल्याण अधिकारी, हिंगोली यांनी केले आहे. ******

जिल्ह्यातील प्रत्येक ग्रामपंचायतीमध्ये 3 जलमित्राची होणार कुशल प्रशिक्षण द्वारे नियुक्ती

हिंगोली (जिमाका), दि. 27 : जलजीवन मिशन अंतर्गत पाणीपुरवठा योजनेची देखभाल व दुरुस्ती करण्यासाठी आता जिल्ह्यातील प्रत्येक ग्रामपंचायतीमध्ये गवंडी, मेकॅनिकल, फिटर, इलेक्ट्रिशियन, पंप ऑपरेटर अशा तीन जलमित्राची नेमणूक करण्यात येणार असल्याची माहिती जिल्हा परिषदेचे मुख्य कार्यकारी अधिकारी नेहा भोसले यांनी दिली आहे. राज्य शिखर समितीच्या मान्यतेनुसार प्रत्येक ग्रामपंचायतीनुसार कौशल्य प्रशिक्षण देण्यात येणार आहे. बहु कौशल्य मॉडेलच्या अनुषंगाने निश्चित केलेल्या संख्यानुसार गवंडी, मेकॅनिकल, फिटर ईलेक्ट्रिशियन पंप ऑपरेटर या तीन ग्रामपंचायतीकडे कामाचा पूर्व अनुभव असलेला उमेदवार याला प्राधान्य देण्यात येणार आहे. ग्रामपंचायतीने गवंडी-3, मेकॅनिकल-3, इलेक्ट्रिशन पंप ऑपरेटर-3 या प्रत्येक पदासाठी जल मित्राचे गुणवत्ता यादीनुसार दिलेल्या नमुन्यात पत्र, पासपोर्ट फोटो, आधार कार्ड ग्रामपंचायत समितीकडून पूर्व चाचणी घेण्यात येणार आहे. त्यानुसार जलमित्राच्या तीन पदासाठी उमेदवार निवडला जाणार आहे. यासाठी इच्छुक उमेदवारांनी ग्रामपंचायत समितीशी संपर्क साधावा. तसेच सदरील जल मित्राचा अहवाल ग्रामपंचायतीने सर्व पंचायत समिती गट संसाधन केंद्र येथे दि.30 सप्टेंबर, 2024 पर्यंत सादर करावेत, असे आवाहन उपमुख्य कार्यकारी अधिकारी (पाणी व स्वच्छता) संजय कुलकर्णी यांनी केली आहे. तसेच पाणी पुरवठा योजनेच्या भविष्यातील देखभाल दुरुस्ती व शाश्वततेसाठी ग्रामपंचायत स्तरावर तांत्रिक अर्ध कुशल मनुष्यबळ यांना कुशल प्रशिक्षण देण्यात येणार आहे, असे मुख्य कार्यकारी अधिकारी यांनी सांगितले आहे. ******

लैंगिक छळाच्या तक्रारीची चौकशी व निराकरण करण्यासाठी अंतर्गत तक्रार निवारण समिती गठीत करावी

हिंगोली (जिमाका), दि. 27 : कामाच्या ठिकाणी महिलांचा लैंगिक छळ (प्रतिबंध, मनाई व निवारण) अधिनियम 2013 च्या कलम 4 (1) नुसार कार्यालयांतर्गत येणाऱ्या लैंगिक छळाच्या तक्रारीची सखोल चौकशी व त्याचे निराकरण करण्यासाठी ज्या आस्थापनामध्ये 10 किंवा 10 पेक्षा जास्त अधिकारी, कर्मचारी कार्यरत आहेत. अशा प्रत्येक नियोक्त्याने शासकीय, निमशासकीय कार्यालये, संघटना, महामंडळे, आस्थापना, संस्था, शाखा ज्याची शासनाने स्थापना केली असेल किंवा पूर्ण अथवा अशंत:, प्रत्यक्ष अथवा अप्रत्यक्ष निधी शासनामार्फत किंवा स्थानिक प्राधिकरणामार्फत किंवा शासकीय कंपनी किंवा खाजगी उपक्रम, संस्था, इंटरप्रायजेस, अशासकीय संघटना, सोसायटी, ट्रस्ट, उत्पादक, पुरवठा व विक्री यासह वाणिज्य, व्यावसायिक, शैक्षणिक, करमणूक, औद्योगिक, आरोग्य इत्यादी सेवा किंवा वित्तीय कामकाज पार पाडणारे युनिट किंवा सेवा पुरवठादार, रुग्णालये, सुश्रुषागृहे, क्रीडा संस्था, प्रेक्षागृहे, क्रीडा संकुले, एमआयडीसी, धर्मादाय आयुक्त, आरोग्य विभाग, कामगार कल्याण, शिक्षण विभाग, शासकीय, निमशासकीय व खाजगी शिक्षण संस्था, नगरपालिका, सहकार विभाग, बँकींग विभाग, सहकारी पतसंस्था, पतपेढी, शासकीय रुग्णालये, खाजगी रुग्णालये, शॉपींग मॉल, व्यापारी महामंडळ, मार्केट किमती, कोचिंग क्लासेस इत्यादी ठिकाणी किंवा अधिनियमात नमूद केलेल्या शासकीय व खाजगी क्षेत्रातील कार्यालयात अधिनियमातील कलम 4 (1) नुसार अंतर्गत तक्रार निवारण समिती गठीत करणे आवश्यक आहे. बदली किंवा अन्य कारणाने समितीमधील एखादे पद रिक्त झाल्यास, अधिनियमातील तरतुदीनुसार नव्याने अंतर्गत तक्रार निवारण समितीचे गठन करावे. अधिनियमातील कलम 26 नुसार जर एखाद्या मालकाने अंतर्गत तक्रार समिती स्थापन केली नाही, अधिनियमातील कलम 13, 14, 22 नुसार कारवाई केली नाही, या कायद्यातील व नियमातील विविध तरतुदीचे व जबाबदाऱ्यांचे पालन न केल्यास मालकाला 50 हजार रुपये दंड आकारण्यात येईल. तसेच हाच प्रकार पुन्हा केल्यास आस्थापनेचा परवाना रद्द, दुप्पट दंड अशी तरतूद आहे. ज्या आस्थापनेत 10 किंवा 10 पेक्षा अधिक अधिकारी, कर्मचारी कार्यरत असतील अशा सर्व आस्थापनांनी अधिनियमातील तरतुदीनुसार तात्काळ अंतर्गत तक्रार निवारण समिती स्थापन करावी. तसेच समिती स्थापन केल्याचा आदेश जिल्हा महिला व बालविकास अधिकारी कार्यालय, मध्यवर्ती प्रशासकीय इमारत, दुसरा मजला, एस-7, हिंगोली येथे व dwandcdoh@gmail.com या ई-मेलवर तात्काळ सादर करावे, असे आवाहन जिल्हा महिला व बालविकास अधिकारी , हिंगोली यांनी प्रसिध्दीपत्रकाद्वारे केले आहे. *****

वसंतराव नाईक महामंडळाच्या विविध योजनेचा लाभ घ्यावा

हिंगोली (जिमाका), दि. 27 : विमुक्त जाती, भटक्या जमाती व विशेष मागासवर्ग प्रवर्गाच्या आर्थिकदृष्ट्या दुर्बल घटकातील लोकांसाठी वसंतराव नाईक विमुक्त जाती व भटक्या जमाती विकास महामंडळाची उप कंपनी राजे उमाजी नाईक आर्थिक विकास महामंउळ, पैलवान कै. मारुती चव्हाण-वडार आर्थिक विकास महामंडळ यांच्यामार्फत वैयक्तीक कर्ज बँक व्याज परतावा योजना, गट कर्ज व्याज परतावा योजना ऑनलाईन राबवल्या जातात. या योजनांशी संबंधित सर्व माहिती महामंडळाच्या www.vjnt.in या संकेतस्थळावर प्रसिध्द करण्यात आली आहे. तसेच बीज भांडवल कर्ज योजना व थेट कर्ज योजना या दोन्ही योजना ऑफलाईन राबविण्यात येत असून थेट कर्ज योजनेची अर्ज विक्री (अर्ज विक्री किंमत 10 रुपये) जिल्हा कार्यालय, डॉ.बाबासाहेब आंबेडकर सामाजिक न्याय भवन, शासकीय रुग्णालयाजवळ, हिंगोली येथे सुरु आहे. कर्ज मागणी अर्ज फक्त अर्जदारासच विक्री करण्यात येणार असून त्यांच्याकडूनच अर्ज स्वीकारण्यात येणार आहे. त्यामुळे मध्यस्थामार्फत अर्ज विक्री व स्वीकृती होणार नाही याची नोंद घ्यावी. थेट कर्ज योजनेचा अर्ज घेताना आधार कार्ड, जातीचा दाखला व शिधा पत्रिका सोबत ठेवणे अनिवार्य आहे. तसेच ज्या अर्जदाराने व्यवसायाशी संबंधित प्रशिक्षण प्राप्त केले आहे त्यांना व विधवा, निराधार महिलांना प्राधान्य देण्यात येईल. हिंगोली जिल्ह्यातील विमुक्त जाती, भटक्या जमाती व विशेष मागास प्रवर्गातील आर्थिकदृष्ट्या दुर्बल घटकातील व्यक्तींनी महामंडळाच्या विविध योजनेचा लाभ घ्यावा, असे आवाहन वसंतराव नाईक विमुक्त जाती व भटक्या जमाती विकास महामंडळाच्या व्यवस्थापकांनी प्रसिध्दीपत्रकाद्वारे केले आहे. *******

दिपावलीनिमित्त तात्पुरते फटाके परवान्यासाठी अर्ज करावेत

हिंगोली (जिमाका), दि. 27 : जिल्ह्यात दिपावली-2024 संबंधाने तात्पुरते फटाके परवाना (मोकळ्या जागेत) मिळण्यासाठी दिनांक 27 ऑक्टोबर ते 10 नोव्हेंबर, 2024 या कालावधीत किरकोळ फटाके विक्रीचा व्यवसाय करु इच्छिणाऱ्यांना तात्पुरते फटाके परवाना मिळण्यासाठी जिल्हाधिकारी तथा जिल्हादंडाधिकारी, हिंगोली यांच्याकडे अर्ज करावेत. हा अर्ज स्फोटक अधिनियम 2008 मधील नियम 113 (फॉर्म नं. एई-5) मध्ये करणे आवश्यक आहे. अर्जासोबत अर्जदाराच्या पासपोर्ट साईज आकाराची तीन फोटो व संबंधित ग्रामपंचायत, नगर परिषद, तहसीलदार, पोलीस स्टेशन यांचे नाहरकत प्रमाणपत्र व अर्जदारांचे चारित्र्य प्रमाणपत्र, जागेच्या मालकीचा पुरावा व मालकाचे ना हरकत प्रमाणपत्र सोबत जोडणे आवश्यक राहील. खालील अटी व शर्तीच्या अधिन राहून तात्पुरते फटाके परवान्यासाठी दि. 28 सप्टेंबर ते 08 ऑक्टोबर, 2024 पर्यंत कार्यालयीन वेळेत अर्ज करावेत. त्याशिवाय अर्ज स्विकारले जाणार नाहीत. तात्पुरते फटाके ज्वलनशील नसलेल्या शेडमध्ये ठेवण्यात यावे व त्यामध्ये अनधिकृत व्यक्ती प्रवेश करणार नाही या दृष्टीने सुरक्षा व्यवस्था ठेवावी, फटाके विक्रीचे व साठवणुकीचे दुकाने एकमेकांपासून कमीत कमी तीन मीटर अंतरावर असावेत आणि सुरक्षित कामापासून 50 मीटर अंतरावर असावे, फटाके शेड हे एकमेकाच्या समोर नसावे, कोणत्याही प्रकारचे तेलाचे दिवे, गॅस दिवे, उघडे दिवे शेडमध्ये सुरक्षित अंतरामध्ये वापरु नये व विद्युत बल्ब वापरल्यास ते भिंतीला लावलेले असावेत. केवळ वायरने लोंबकाळत ठेवण्यात येऊ नये. विद्युत बल्बचे बटन प्रत्येक दुकानाच्या भिंतीवर लावलेले असावेत व मास्टर स्विच प्रत्येक रांगेमध्ये असावे. कोणत्याही प्रकारचे फटाके शेड पासून 50 मीटर आत फोडू नये. एका ठिकाणी 50 पेक्षा अधिक दुकांनाना परवानगी देण्यात येणार नाही. व्यवसाय कर अधिकारी यांचे ना-देय प्रमाणपत्राशिवाय अर्ज स्विकारला जाणार नाही. तात्पुरता फटाका परवान्याची सहाशे रुपये फीस चलनाद्वारे भरणा करणे आवश्यक राहील, असे जिल्हा दंडाधिकारी अभिनव गोयल यांनी कळविले आहे. ******

जिल्ह्यात शस्त्र व जमावबंदी आदेश लागू

हिंगोली (जिमाका), दि. 27 : ऑक्टोबर महिन्यात विविध सण-उत्सव, स्पर्धा आणि महापुरुषांच्या जयंती, सभा, बैठका, धरणे आंदोलनाच्या पार्श्वभूमीवर जिल्ह्यातील कायदा व सुव्यवस्था अबाधित राहण्याच्या दृष्टीने जिल्ह्यात शस्त्र व जमावबंदी आदेश लागू करण्याचे आदेश अतिरिक्त जिल्हादंडाधिकारी, हिंगोली यांनी दिले आहेत. दि. 2 ऑक्टोबर, 2024 रोजी महात्मा गांधी जयंती व लाल बहादूर शास्त्री जयंती, दि. 3 ऑक्टोबर रोजी घटस्थापना व नवरात्र सुरु होत आहे. तर दि. 12 ऑक्टोबर रोजी दशहरा महोत्सव आहे. तसेच सध्या चालू असलेल्या मराठा आरक्षण, धनगर समाज आरक्षण व इतर समाजाचे आरक्षण संबंधाने चालू असलेले आंदोलने व सध्या घडणाऱ्या राजकीय घडामोडी, नागरिक, विविध संघटना, पक्ष यांच्या मागण्यासंदर्भात मोर्चे, धरणे, आंदोलने, रास्ता रोको, उपोषणे करीत असतात. अशा विविध घटनांमुळे कायदा व सुव्यवस्थेचा प्रश्न निर्माण होण्याची शक्यता नाकारता येत नाही. असे विविध प्रश्न हाताळण्यासाठी तसेच कायदा व सुव्यवस्था आबाधित राखण्यासाठी संपूर्ण हिंगोली जिल्ह्यात दिनांक 27 सप्टेंबर, 2024 रोजी मध्यरात्रीपासून ते दिनांक 12 ऑक्टोबर, 2024 रोजी मध्यरात्रीपर्यंत मुंबई पोलीस अधिनियम 1951 चे कलम 37 (1)(3) अन्वये शस्त्र व जमावबंदी आदेश लागू करण्यात येत असल्याचे अतिरिक्त जिल्हादंडाधिकारी यांनी कळविले आहे. त्यानुसार शासकीय कर्तव्य पार पाडणाऱ्या कर्मचाऱ्या व्यतिरिक्त कोणतीही व्यक्ती सार्वजनिक ठिकाणी त्यांच्याजवळ शस्त्र, काठी, तलवार, बंदुका बाळगणार नाहीत. लाठ्या किंवा काठ्या, शारीरिक इजा होण्यास त्या कारणीभूत ठरतील, सहज हाताळता येतील अशा वस्तूजवळ बाळगणार नाहीत. कोणतेही क्षारक पदार्थ, स्फोटकद्रव्ये जवळ बाळगणार नाहीत. दगड, क्षेपणीक उपकरणे, किंवा सर्व प्रवर्तक द्रव्य गोळा करुन ठेवणार नाही, किंवा जवळ बाळगणार नाहीत. आवेशी भांडणे अंगविक्षेप, विटंबनात्मक नकला करणार नाही. सभ्यता, नितिमत्ता यास बाधा येईल किंवा अराजक माजेल, अशी चिन्हे निशाणी, घोषणा फलक किंवा अशी कोणतीही वस्तू जवळ बाळगणार नाही किंवा ठेवणार नाहीत. व्यक्ती किंवा समूहाच्या भावना जाणून बुजून दुखावतील, या उद्देशाने वाद्य वाजणार नाहीत किंवा असभ्य वर्तन करणार नाहीत. पाच किंवा पाचपेक्षा अधिक व्यक्तीं रस्त्यावर जमण्यास सक्त मनाई करण्यात आले आहे. हा आदेश कामावरील कोणतेही पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही, असे अतिरिक्त जिल्हादंडाधिकारी, हिंगोली यांनी प्रसिध्दी पत्रकाद्वारे कळविले आहे. ********

हिंगोली जिल्ह्यात आतापर्यंत सरासरी 890 मिमी पाऊस

हिंगोली (जिमाका), दि. 27 : जिल्ह्यात आतापर्यंत सरासरी 890.10 मि.मी. पाऊस झाला आहे. त्याची टक्केवारी 111.92 अशी आहे. जिल्ह्यात गेल्या 24 तासात सरासरी 9.20 मिलीमीटर पावसाची नोंद झाली असून, कळमनुरी तालुक्यात सर्वात जास्त 13.60 मि.मी. पाऊस झाला आहे. तर औंढा नागनाथ तालुक्यात सर्वात कमी 3.90 मि.मी. पाऊस पडला आहे. जिल्ह्यात आज सकाळपर्यंत नोंदला गेलेला तालुकानिहाय सरासरी पाऊस पुढीलप्रमाणे असून कंसातील आकडेवारी 1 जूनपासून आजपर्यंत झालेल्या पावसाची आहे. हिंगोली 4.60 (951.20), कळमनुरी 13.60 (950.20), वसमत 11 (844.60), औंढा नागनाथ 3.90 (853.80) आणि सेनगाव तालुक्यात 11.80 (837.90) मि. मी. पाऊस पडला आहे. सर्व आकडेवारी मिलीमीटर परिमाणात आहे. ******

जिल्हाधिकारी कार्यालयात जागतिक माहिती अधिकार दिवस साजर

ा हिंगोली (जिमाका), दि. 27 : येथील जिल्हाधिकारी कार्यालयाच्या सभागृहात जागतिक माहिती अधिकार दिवस साजरा करण्यात आला. यावेळी नायब तहसीलदार डी. एस. जोशी, सचिन जोशी, सहायक माहिती अधिकारी चंद्रकांत कारभारी, भास्कर पांडे, विजय घ्यार, आम्रपाली चोरमारे, कुसुम भिसे, मनकरना जाधव, वहिदा काझी, अलका कोकरे यांच्यासह जिल्हाधिकारी कार्यालयातील तसेच प्रशासकीय इमारतीतील विविध विभागाचे जन माहिती अधिकारी, अधिकारी, कर्मचारी उपस्थित होते. यावेळी आम्रपाली चोरमारे यांनी माहिती अधिकाराने पारदर्शकतेचे नवे पर्व सुरु केले आहे. या कायद्याच्या अंमलबजावणीतून पारदर्शकता व उत्तरदायित्व तसेच खुल्या शासन व्यवस्थेसाठीची बांधिलकी व्यक्त करण्यासाठी 28 सप्टेंबर हा दिवस माहिती अधिकार दिन म्हणून साजरा केला जात असल्याचे सांगून माहिती अधिकार कायद्याची थोडक्यात माहिती सांगितली . *****

महाज्योती’ देणार सावित्रीच्या लेकींना स्व-संरक्षणाचे धडे ! केंद्र सरकारच्या स्पोर्ट्स-फिटनेस सेक्टर स्कील कौन्सिल सोबत ‘महाज्योती’चा करार

हिंगोली (जिमाका), दि. 26 : देशात निर्भीडपणे सामाजिक, शैक्षणिक व सांस्कृतिक क्रांतीची ज्योत पेटविण्याचे मोलाचे कार्य क्रांतीसूर्य महात्मा जोतीराव फुले व ज्ञानज्योती सावित्रीआई फुले यांनी केले. त्यांच्या विचारांचा वारसा घेऊन आज राज्य शासनाच्या इतर मागास बहुजन कल्याण विभागाची स्वायत्त असलेली महात्मा ज्योतिबा फुले संशोधन व‎ प्रशिक्षण संस्था (महाज्योती) काम करीत आहे. महाविद्यालयीन शिक्षणासोबतच जीवनावश्यक कौशल्ये देखील अत्यावश्यक आहेत. त्यातून विद्यार्थ्यांच्या व्यक्तिमत्वाचा सर्वांगीण विकास होऊन त्यांना जीवनाच्या स्पर्धेत स्वावलंबी होण्यास मदत होते. त्यातील सुरक्षा व आरोग्य हा देखील महत्वाचा घटक आहे. त्याच अनुषंगाने महाज्योती संस्थेने महाविद्यालयात शिकणाऱ्या सावित्रीच्या लेकींना स्व-संरक्षण व योगाचे प्रशिक्षण देण्याचा नवा उपक्रम हाती घेतला आहे. महाज्योतीने केंद्र सरकारच्या स्पोर्ट्स-फिटनेस सेक्टर स्कील कौन्सिल सोबत याबाबत सामंजस्य करार केलेला आहे. या करारावर महाज्योतीचे व्यवस्थापकीय संचालक राजेश खवले व स्पोर्ट्स-फिटनेस सेक्टर स्कील कौन्सिलचे मुख्य कार्यकारी अधिकारी तहसीन झहीद यांनी स्वाक्षरी केली. याप्रसंगी महाज्योतीचे मुख्य लेखा व वित्त अधिकारी प्रशांत वावगे व प्रकल्प व्यवस्थापक कुणाल शिरसाठे उपस्थित होते. महाज्योती संस्थेमार्फत महाराष्ट्रातील इतर मागास वर्ग, विमुक्त जाती-भटक्या जमाती व विशेष मागास प्रवर्गातील विद्यार्थ्यांना केंद्र सरकारच्या विविध सेक्टर स्कील कौन्सिल मार्फत कौशल्य विकास प्रशिक्षण राबविण्यात येते. त्यातील स्पोर्ट्स-फिटनेस सेक्टर स्कील कौन्सिल मार्फत जीवनावश्यक कौशल्ये देण्याबाबत महाज्योतीने अभिनव पाऊल उचलले आहे. या प्रशिक्षणामुळे महाविद्यालयीन मुला-मुलींना स्पोर्ट्स-फिटनेस सेक्टर स्कील कौन्सिलच्या अनुभवी प्रशिक्षकांकडून प्रशिक्षण देण्यात येणार असून त्यात प्रात्यक्षिकांचा देखील सहभाग असणार आहे. प्रशिक्षणाअंती परीक्षा घेण्यात येणार असून उत्तीर्ण विद्यार्थ्यांना एनएसडीसी मान्यताप्राप्त प्रमाणपत्र देखील देण्यात येणार आहे. या प्रशिक्षणाचा विद्यार्थ्यांना स्व-संरक्षणासोबत स्वत:ला फिटनेस किंवा सेल्फ डिफेन्स कोच म्हणून व्यवसाय देखील सुरु करण्यासाठी मदत होणार आहे. प्रशिक्षणाचा लाभ घेण्याचे मंत्री अतुल सावेंचे आवाहन ‘महाज्योती’ मार्फत महाराष्ट्रातील इतर मागास वर्ग, विमुक्त जाती-भटक्या जमाती व विशेष मागास प्रवर्गातील विद्यार्थ्यांना कायम अभिनव प्रशिक्षण देणे व त्यातून त्यांचे जीवन कौशल्ये विकसित करण्यासाठी राबविण्यात येणाऱ्या या सेल्फ डिफेन्स प्रशिक्षणाचा लाभ जास्तीत जास्त विद्यार्थिनींनी घ्यावा, असे आवाहन महाज्योतीचे अध्यक्ष तथा इतर मागास बहुजन कल्याण विभागाचे मंत्री अतुल सावे यांनी केले आहे. प्रशिक्षणाचे वैशिष्टे : 1) मोफत 150 तासांचे प्रशिक्षण व प्रात्यक्षिक, 2) प्रशिक्षणासाठी मान्यताप्राप्त अनुभवी व दर्जेदार प्रशिक्षक, 3) प्रशिक्षणानंतर एन.एस.डी.सी.चे प्रमाणपत्र, 4) फिटनेस किंवा सेल्फ डिफेन्स कोच म्हणून व्यवसाय करण्याची संधी मिळणार आहे. *******

राष्ट्रीय लोकअदालतीचे शनिवारी आयोजन

हिंगोली (जिमाका), दि. 26 : येथील जिल्हा न्यायालयात व त्या अंतर्गत येणाऱ्या विविध न्यायालयात तालुका विधी सेवा समिती व वकील संघ यांच्या संयुक्त विद्यमाने शनिवार, दिनांक 28 सप्टेंबर, 2024 रोजी सकाळी 10.30 वाजता न्यायालय परिसरात राष्ट्रीय लोकअदालतीचे आयोजन करण्यात आले आहे. या लोकअदालतीमध्ये भूसंपादन व मोटार अपघात नुकसान भरपाई प्रकरणे, तडजोड युक्त फौजदारी प्रकरणे, दिवाणी प्रकरणे, वैवाहिक/ कौटुंबिक वाद प्रकरणे, पराक्रम्य अभिलेख अधिनियमचे कलम 138 खालील प्रकरणे, नगर परिषद, विद्युत महावितरण कंपनी, बँक व पतसंस्थांचे वादपूर्व प्रकरणे इत्यादी खटले तडजोडीसाठी ठेवण्यात आलेली आहेत. ही सर्व प्रकरणे आपआपसातील तडजोडीद्वारे निकाली काढता यावीत. यासाठी राष्ट्रीय लोकअदालतीचे आयोजन करण्यात आले आहे. या राष्ट्रीय लोकअदालतीचा जास्तीत जास्त पक्षकार मंडळींनी उपस्थित राहून फायदा घ्यावा, असे आवाहन जिल्हा न्यायाधीश-1 तथा तालुका विधी सेवा समितीचे अध्यक्ष आर. व्ही. लोखंडे, वकील संघाचे अध्यक्ष ॲड. एस. ए. वाबळे उमरेकर, सचिव ॲड. ए.एस.वानखेडे यांनी केले आहे. ******

माहिती अधिकार दिनी विविध उपक्रमाचे आयोजन करण्याचे आवाहन

हिंगोली (जिमाका),दि.25 : दरवर्षी 28 सप्टेंबर हा दिवस 'माहिती अधिकार दिन' म्हणून साजरा करण्यात येत असून यादिवशी शनिवार शासकीय सुटीचा दिवस येत आहे. वरील वस्तुस्थिती लक्षात घेऊन यावर्षी माहिती अधिकार दिन शुक्रवार दिनांक 27 सप्टेंबर 2024 रोजी साजरा करावा. या दिवशी 'माहितीचा अधिकार' या विषयावर विविध उपक्रमाचे आयोजन करण्याचे आवाहन करण्यात आले आहे. शासकीय कार्यालये, स्थानिक स्वराज्य संस्था, शाळा, महाविद्यालये, विद्यापीठे व इतर शैक्षणिक संस्थांमध्ये तसेच स्वयंसेवी संस्थांतर्फे जनजागृती कार्यक्रमांचे आयोजन व्हावे. माहितीचा अधिकार या विषयावर आधारित विविध उपक्रमाचे आयोजन करुन जनतेमध्ये जनजागृती करण्याचे आवाहन उपजिल्हाधिकारी सामान्य अनिल माचेवाड यांनी केले आहे. *******

प्रधानमंत्री जनजातीय उन्नत ग्राम अभियान हिंगोली जिल्ह्यातील 81 आदिवासी गावांचा होणार कायापालट

हिंगोली, दि.25 (जिमाका) : दुर्गम व अति दुर्गम भागात राहणाऱ्या आदिवासी बांधवाच्या सर्वागीण विकासासाठी प्रधानमंत्री जनजातीय उन्नत ग्राम अभियानाला केंद्र सरकारने हिरवा कंदील दाखविला आहे. त्यामुळे देशातील 63 हजार तर महाराष्ट्रातील 4 हजार 976 आदिवासी गावांचा कायापालट होणार आहे. त्या माध्यमातून राज्यातील 32 जिल्ह्यातील 12 लाख 87 हजार 702 आदिवासी बांधवाचे सामाजिक आणि आर्थिक सक्षमीकरण केले जाणार आहे. त्यामध्ये हिंगोलीतील 81 गावांचा या अभियानात समावेश आहे. या अभियानासाठी आवश्यक निधी केंद्र आणि राज्य सरकारकडून उपलब्ध होणार आहे. केंद्रीय अर्थमंत्री निर्मला सितारामन यांनी सन 2024-25 च्या अर्थसंकल्पीय अधिवेशनात प्रधानमंत्री जनजातीय उन्नत ग्राम अभियानाची घोषणा केली आहे. या अभियानात पीएम-जनमन अभियानात 17 मंत्रालयांव्दारे राबविण्यात येणाऱ्या विविध 25 उपक्रमांचा समावेश आहे. तसेच आदिवासी क्षेत्र, समुदायांचा सर्वांगीण आणि शाश्वत विकासावर भर दिला जाणार आहे. या अभियानांतर्गत पक्की घरे, ग्रामीण रस्ते, प्रत्येक घरात शुद्ध पेयजलाची सोय, सर्व घरामध्ये वीज जोडणी, फिरत्या वैद्यकीय पथकाची स्थापना, आयुष्मान कार्ड, घरगुती गॅस जोडणी, आदिवासी बहुद्देशीय विपणन केंद्र, आश्रमशाळांच्या पायाभूत सुविधांमध्ये सुधारणा, सिकलसेल अॅनिमियाशी लढण्यासाठी केंद्राची निर्मिती, अंगणवाडी केंद्र बांधणे, कौशल्य विकास प्रशिक्षण देणे, कृषी विभागाच्या योजनाचा लाभ देणे, मत्स्य व्यवसाय करण्यास चालना देणे, पर्यटनाचा विकास करणे इत्यादी विविध प्रकारचे लाभ देण्याबाबतची कार्यवाही ही नियोजनबद्धरित्या पुढील 5 वर्षामध्ये करण्यात येणार असून एकूण 17 विभागामार्फत हे लाभ देण्यात येणार आहेत. यामुळे आदिवासी बहुल गावांचा सर्वांगीण विकास होणार आहे. आदिवासी समाजाची सामाजिक व आर्थिक परिस्थिती उंचावण्यास मदत होणार आहे. या अनुषंगाने हिंगोली जिल्ह्यातील हिंगोली, सेनगाव, औंढा नागनाथ व कळमनुरी तालुक्यातील आदिवासी समाजाच्या सर्वच लाभार्थ्यांनी या योजनेचा वेळोवेळी लाभ घेण्याचे आवाहन हिंगोलीचे जिल्हाधिकारी अभिनव गोयल यांनी केले आहे. तसेच प्रधानमंत्री जनजातीय उन्नत ग्राम अभियानाच्या अनुषंगाने आदिवासी सामाजिक संस्था, संघटना, आदिवासी स्वयंसेवक यांनी आदिवासी प्रकल्प कार्यालयाशी समन्वय साधून या अभियानाचा एक भाग होण्याचे आवाहन कळमनुरी येथील एकात्मिक आदिवासी विकास प्रकल्प अधिकारी डॉ. सुनिल बारसे यांनी केले आहे. ******

पंडित दीनदयाल उपाध्याय यांना जयंतीनिमित्त जिल्हाधिकारी कार्यालयात अभिवादन

हिंगोली (जिमाका), दि. 25 : येथील जिल्हाधिकारी कार्यालयाच्या सभागृहात पंडित दीनदयाल उपाध्याय यांच्या जयंतीनिमित्त उपजिल्हाधिकारी अनिल माचेवाड यांच्या हस्ते त्यांच्या प्रतिमेला पुष्पहार अर्पण करुन अभिवादन करण्यात आले. यावेळी नायब तहसीलदार सी. आर. गोळेगावकर, मिलींद वाकळे, धनंजय निमजे, कुसूम भिसे यांच्यासह विविध विभागाचे अधिकारी, कर्मचारी उपस्थित होते. *******

इतर मागासवर्गीय महामंडळाच्या विविध कर्ज योजनेचा लाभ घ्यावा

हिंगोली (जिमाका), दि. 24 : महाराष्ट्र राज्य इतर मागासवर्गीय वित्त आणि विकास महामंडळामार्फत इतर मागासवर्गीय समाजाच्या सर्वांगीण कल्याणासाठी बेरोजगारांसाठी स्वयंम उद्योगासाठी विविध कर्ज योजना राबविण्यात येतात. तसेच इतर मागासवर्गीय प्रवर्गातील गरजु व कुशल व्यावसायिक व्यक्तींना कृषी संलग्न व पारंपारिक उपक्रम व लघु उद्योग व मध्यम उद्योग उत्पादन , व्यापार विक्री सेवाक्षेत्र इत्यादी व्यवसायासाठी या महामंडळाच्या हिंगोली जिल्ह्यासाठी सन 2024-25 या आर्थिक वर्षासाठी मुख्यालय स्तरावरुन खालील प्रमाणे उद्दिष्ट प्राप्त झालेले आहे. 1) एक लाख रुपयापर्यंतची थेट कर्ज योजना : यासाठी उद्दिष्ट 100 असून या योजनेमध्ये अर्जदाराचा सिबील क्रेडीट स्कोअर किमान 500 पेक्षा जास्त असावा, अर्जदाराचे कौटुंबिक वार्षिक उत्पन्न एक लाख रुपयापेक्षा कमी असावे, परतफेडीचा कालावधी 48 समान मासिक हप्त्यांमध्ये राहिल. नियमित परतफेड करणाऱ्या लाभार्थ्यांना या योजनेत व्याज अदा करावे लागणार नाही, परंतु थकीत झालेल्या हप्त्यांवर द.सा.द.शे. 4 टक्के व्याजदर आकारण्यात येईल. 2) 20 टक्के बीज भांडवल कर्ज योजना : यासाठी उद्दिष्ठ 46 असून या योजनेमध्ये 75 टक्के रक्कम ही बँकेची असून त्यावरील व्याज हे बँकेच्या नियमाप्रमाणे राहील . 20 टक्के रक्कम ही महामंडळाची असून त्यावर द.सा.द.शे. 6 टक्के व्याज आकारण्यात येते व 5 टक्के सहभाग हा लाभार्थ्यांचा आहे. या योजनेची कर्ज मर्यादा पाच लाखापर्यंत असून परतफेडीचा कालावधी पाच वर्षाचा समान 60 हप्त्याचा आहे. 3) वैयक्तिक कर्ज व्याज परतावा योजना : यासाठी उद्दिष्ट 122 असून ही योजना बँकेमार्फत राबविण्यात येत असून कर्ज मर्यादा 10 लाख रुपयापर्यंतची आहे. या योजनेत महामंडळाच्या वेबपोर्टल संगणक प्रणालीवर नाव नोंदणी करणे अनिवार्य आहे. या योजनेत कुटुंबाचे वार्षिक उत्पन्न मर्यादा आठ लाख पर्यत आहे. कर्ज परतफेडीचा कालावधी बँकेच्या निकषाप्रमाणे तसेच कर्ज रक्कमेचे हप्ते नियमित भरल्यास व्याजाची रक्कम (12 टक्केच्या मर्यादेत) व्याज परतावा रक्कम अनुदान स्वरुपात बँक प्रमाणिकरणानुसार लाभार्थ्याच्या आधार लिंक बँक खात्यात दरमहा महामंडळामार्फत जमा करण्यात येईल. तसेच लाभार्थ्याने ऑनलाईन पोर्टलवर उद्योग सुरु असल्याचे किमान दोन फोटो अपलोड करणे अनिवार्य आहे. 4) गट कर्ज व्याज परतावा योजना : या योजनेसाठी 13 चे उद्दिष्ट असून ही योजना बँकेमार्फत राबविण्यात येत आहे. यासाठी कर्ज मर्यादा 10 लाख ते 50 लाख रुपयापर्यंतची आहे. या योजनेत महामंडळाच्या वेबपोर्टल संगणक प्रणालीवर नाव नोंदणी करणे अनिवार्य आहे. गटातील लाभार्थीचे वय 18 ते 45 वर्षे असावे. तसेच गटातील लाभार्थ्यांनी यापूर्वी महामंडळाचा किंवा इतर कोणत्याही शासकीय योजनेचा लाभ घेतलेला नसावा. तसेच इतर मागास प्रवर्गातील महामंडळाच्या निकषांनुसार विहित केलेल्या वार्षिक उत्पन्न मर्यादेतील उमेदवारांच्या बचत गट, भागीदार संस्था, सहकारी संस्था, कंपनी (कंपनी अधिनियम 2013 अंतर्गत), LLP, FPO अशा शासन प्रमाणिकरण प्राप्त संस्थाना बँकेतर्फे स्वयंरोजगार उद्योग उभारणीसाठी जे कर्ज दिले जाईल. त्या कर्ज रक्कमेवरील व्याज परतावा हा बँक प्रमाणिकरणानुसार महामंडळाकडून अदा केला जाईल. 5) शैक्षणिक कर्ज व्याज परतावा योजना : या योजनेसाठी 11 चे उदि्दष्ट असून ही योजना बँकेमार्फत राबविण्यात येत आहे. कर्जरकमेवरील व्याज परतावा देशांतर्गत व परदेशी उच्च शिक्षणासाठी कर्ज मर्यादा 10 लाख ते 20 लाख रुपये पर्यंतची आहे. या योजनेत महामंडळाच्या वेबपोर्टल संगणक प्रणालीवर नाव नोंदणी अनिवार्य आहे. विद्यार्थ्यांचे वय 17 ते 30 वर्षे असावे. अर्जदाराचे कौटुंबिक वार्षिक उत्पन्न मर्यादा 8 लाख रुपये असावी. विद्यार्थी बारावी 60 टक्के गुणासह उत्तीर्ण असावा. रक्कमेवरील व्याज परतावा हा बँक प्रमाणिकरणानुसार महामंडळाकडून अदा केला जाईल. 6) महिला स्वयंसिध्दी व्याज परतावा योजना : या योजनेसाठी 35 चे उदि्दष्ट असून ही योजना बँकेमार्फत राबविण्यात येत आहे. कर्ज मर्यादा प्रथम टप्प्यात 5 लाख रुपयापर्यंत आहे. बचत गटाने नियमित परतफेड केल्यानंतर द्वितीय टप्याकरिता 10 लाख रुपयापर्यंत बँकेकडून मंजूर करुन घेण्यास मान्यता देता येईल. ही योजना महिला आर्थिक विकास महामंडळाच्या लोकसंचलित साधन केंद्राच्या सहाय्याने राबविण्यात येणार आहे. कर्ज परतफेडीचा कालावधी बँकेच्या निकषाप्रमाणे तसेच कर्ज रकमेचे हप्ते नियमित भरल्यास व्याजाची रक्कम (12 टक्केच्या मर्यादेत) व्याज परतावा रक्कम अनुदान स्वरुपात बँक प्रमाणिकरणानुसार लाभार्थ्यांच्या आधार लिंक बॅंक खात्यात दरमहा महामंडळामार्फत जमा करण्यात येईल. तसेच लाभार्थ्यांने ऑनलाईन पोर्टलवर उद्योग सुरु असल्याचे किमान दोन फोटो अपलोड करणे अनिवार्य आहे. वरील कर्ज योजना या बँकेमार्फत असून लाभार्थ्यांने महामंडळाच्या www.msobcfdc.org या संकेत स्थळावर ऑनलाईन अर्ज भरावा. तसेच या योजनेचा लाभ हा इतर मागासवर्गीय समाजातील व्यक्तीने जास्तीत जास्त घ्यावा. अधिक माहितीसाठी महाराष्ट्र राज्य इतर मागासवर्गीय वित्त आणि विकास महामंडळ मर्या. जिल्हा कार्यालय डॉ.बाबासाहेब आंबेडकर सामाजिक न्याय भवन, रिसाला बाजार, हिंगोली-413513, दूरध्वनी क्र. 02456-224465, ई-मेल पत्ता : dmobchingoli@gmail.com वर संपर्क साधावा, असे आवाहन महामंडळाच्या जिल्हा व्यवस्थापकांनी केले आहे. ******

मुख्यमंत्री माझी लाडकी बहीण योजनेच्या पात्र लाभार्थ्यांनी बँक खाते आधार लिंक करावे

हिंगोली (जिमाका), दि. 24 : राज्यात मुख्यमंत्री माझी लाडकी बहीण योजना सुरु करण्यात आली आहे. या योजतेंतर्गत पात्र महिलांना दरमहा 1500 रुपये मिळणार आहेत. या योजनेसाठी ज्या महिलांचे वय 21 ते 60 वर्ष असणे आवश्यक आहे. विवाहीत, विधवा, घटस्फोटित, परितक्त्या आणि निराधार महिला या योजनेसाठी पात्र आहेत. महिलेच्या कुटुंबाचे वार्षिक उत्पन्न अडीच लाखापेक्षा जास्त नसावे. या योजनेसाठी दि. 1 जुलै, 2024 पासून अर्ज भरणे सुरु असून 30 सप्टेंबर, 2024 ही अर्ज करण्याची शेवटची तारीख आहे. या योजनेंतर्गत प्रत्येक पात्र महिलेला तिच्या स्वत:च्या आधार लिंक केलेल्या सक्षम बँक खात्यात डीबीटीद्वारे दरमहा 1500 इतकी रक्कम दिली जाणार आहे. त्यामुळे पात्र लाभार्थी महिलांनी आपले बँक खाते तात्काळ आधार लिंक करावे, असे आवाहन जिल्हा महिला व बालविकास अधिकारी, हिंगोली यांनी केले आहे. *****

शासकीय योजनेच्या लाभासाठी पैसे देऊ नका समाज कल्याण विभागाचे आवाहन

हिंगोली (जिमाका), दि. 24 : मागील काही दिवसांमध्ये जिल्हा परिषदेच्या समाज कल्याण विभागाकडून शिलाई मशीन, पिठाची गिरणी या योजनेचा लाभ देतो म्हणून काही भामटे, भोंदू व्यक्तीकडून फोन, मॅसेज पाठवून त्यांना ऑनलाईन पैसे टाकण्याची मागणी करीत असल्याचे निदर्शनास आले आहे. अशा स्वरुपाच्या शासकीय योजना जिल्हा परिषदेच्या समाज कल्याण विभागाकडून राबविण्यात येत नाहीत. त्यामुळे त्यांच्यासोबत कसल्याही प्रकारचा पैशाचा व्यवहार करु नये. तसेच आपणास कोणत्याही भामट्याचा फोन आल्यास त्याला प्रतिसाद देऊ नका व कोणत्याही प्रकारची माहिती हवी असल्यास आपण स्वत: समाज कल्याण विभाग, जिल्हा परिषद, हिंगोली येथे येऊन विचारपूस करावी, असे आवाहन जिल्हा समाज कल्याण अधिकारी, जिल्हा परिषद, हिंगोली यांनी केले आहे. ******

लॅपटॉप खरेदीच्या अर्थसहाय्यासाठी पात्र लाभार्थ्यांनी अनुदान मागणीचा प्रस्ताव सादर करण्याचे आवाहन

हिंगोली (जिमाका), दि. 24 : जिल्हा परिषद सेस योजना सन 2024-25 मधून 20 टक्के मागासवर्गीय कल्याण निधी अंतर्गत ग्रामीण भागातील मागासवर्गीय विद्यार्थ्यांना लॅपटॉप खरेदीसाठी अर्थसहाय्य पुरविण्यासाठी तालुकास्तरावरुन प्राप्त झालेल्या अर्जामधून अंतिम पात्र ठरलेल्या 123 लाभार्थ्यांच्या निवडीस जिल्हा परिषदेच्या समाज कल्याण विभागाच्या निवड समितीन मान्यता दिली आहे. निवड झालेल्या लाभार्थ्यांची यांदी पंचायत समिती व जिल्हा परिषदेच्या नोटीस बोर्डावर लावण्यात आली आहे. निवड झालेल्या लाभार्थ्यांनी सर्व प्रथम लॅपटॉप खरेदी करुन खरेदीच्या जीएसटी पावतीसह अनुदान मागणीचा प्रस्ताव जिल्हा समाज कल्याण अधिकारी, जिल्हा परिषद, हिंगोली यांच्याकडे सादर केल्यानंतर अनुदानाची रक्कम 30 हजार रुपये लाभार्थींच्या बँक खात्यावर वर्ग करण्यात येणार आहे. त्यामुळे निवड यादीतील लाभार्थ्यांनी सर्वप्रथम स्वखर्चाने लॅपटॉप खरेदी करुन अनुदान मागणीचा प्रस्ताव सादर करावेत, असे आवाहन मुख्य कार्यकारी अधिकारी नेहा भोसले, अतिरिक्त मुख्य कार्यकारी अधिकारी अनुप शेंगुलवार, प्रकल्प संचालक नामदेव केंद्रे, जिल्हा समाज कल्याण अधिकारी राजू एडके यांनी केले आहे. *****

'भरड धान्याचा दैनंदिन आहारात समावेश करावा' • तोंडापूर येथील शेतकरी मेळाव्यात मान्यवरांचे मत

• 'कृषि सुवर्ण समृद्धी सप्ताहाचे आयोजन हिंगोली (जिमाका), दि. 23 : मानवी आहारात भरड धान्य अत्यंत महत्त्वाचे असून, प्रत्येक नागरिकांसह शेतक-यांनी आपल्या दैनंदिन आहारात भरड धान्याचे महत्त्व ओळखून त्याचा समावेश करावा, असे कृषि सप्ताहात उपस्थित मान्यवरांनी सांगितले. भारतीय कृषि अनुसंधान परिषद नवी दिल्ली संत नामदेव सेवाभावी संस्था हिंगोली संचलित कृषि विज्ञान केंद्र तोंडापूर येथे कृषि सुवर्ण समृध्दी सप्ताह अंतर्गत शेतकरी मेळावा पार पडला. कार्यक्रमाच्या अध्यक्षस्थानी माजी खासदार शिवाजीराव माने होते. यावेळी मराठवाडा कृषि विद्यापीठ, परभणीचे विद्यार्थी कल्याण विभागाचे संचालक डॉ. झंवर, जिल्हा अधीक्षक कृषि अधिकारी राजेंद्र कदम, बाबुराव कदम, नारायण गोरे, नागोराव करडे, डॉ. उषा कदम, तालुका कृषी अधिकारी श्री. घुगे, महेंद्र माने, डॉ. माधुरी काटकर-माने व श्री. अवचार उपस्थित होते. या कार्यक्रमास विशेष निमंत्रित नवी दिल्लीचे श्रीअन्न संचालक डॉ.राकेश कुमार सिन्हा यांनी भरड धान्य हे पोटॅशियम, झिंक व इतर विटामिन युक्त भरडधान्य असून, शेतकऱ्यांनी याचा दैनंदिन आहारामध्ये वापर करावा. त्याचबरोबर भरड धान्य हे चार महिन्यात येणारे पीक असून या पिकाला पाणी सुद्धा कमी लागते. हिंगोली जिल्हा हळद उत्पादनात अग्रेसर असून हळदीचे टॅबलेट्स उद्योग शेतकऱ्यांनी करावेत, असे आवाहन केले. हैदराबाद येथील भारतीय श्रीअन्न संशोधन संस्थानचे प्रमुख शास्त्रज्ञ डॉ. राजेंद्र चापके यांनी प्रमुख श्रीअन्न व छोटे श्रीअन्न कोणते व श्रीअन्नचे नऊ प्रकार, त्याच बरोबर विविध राज्यांमध्ये असलेले श्रीअन्नाचे क्षेत्र व उत्पादनाविषयी माहिती दिली. तसेच अनियमित पाऊस, बदलते वातावरण लक्षात घेत शेतकऱ्यांनी श्रीअन्नाची लागवड करावी. श्रीअन्नामुळे आर्थिक बाजू, आर्थिक सुरक्षा व चारा पौष्टिकता मिळते. त्याच बरोबर शेतकऱ्यांनी कृषी विज्ञान केंद्र तोंडापूर यांच्या सल्ल्याने शेती निगडित तंत्रज्ञानाचा अवलंब करावा,असे आवाहन केले. मिलेट मॅन ऑफ तेलंगणा वीरशेटी पाटील यांनी मेरा गाव मेरा दुकान संकल्पना सर्व शेतकऱ्यांनी राबवावी. प्रत्येकाने आपल्या रोजच्या आहारामध्ये 50 ग्रॅम भरड धान्यचे सेवन करावे, असे आवाहन केले. परभणी येथील ज्वारी संशोधन केंद्राचे प्रमुख शास्त्रज्ञ डॉ.एल.एन. जावळे यांनी परभणी मोती, परभणी ज्योती, परभणी शक्ती, परभणी सुपर मोती या वाणाचा अवलंब शेतकऱ्यांनी करावा. रब्बी ज्वारी उत्पादन वाढीसाठी प्रमुख पंचसूत्रे व शेतकरी बांधवांनी 1 ते 31 ऑक्टोबरदरम्यान रब्बी ज्वारीची लागवड करावी, असे आवाहन केले. या कार्यक्रमाचे अध्यक्ष माजी खासदार शिवाजीराव माने यांनी पूर्वी हिंगोली जिल्ह्यामध्ये ज्वारी हे मोठ्या प्रमाणात होत होती. सध्या शेतकरी प्रमुख पीक म्हणून हळद व सोयाबीन घेत आहेत. शेतकऱ्यांनी आर्थिक व आरोग्य सुरक्षेकडे बघता भरड धान्य उत्पादनाकडे वळणे गरजेचे आहे. सध्या बदलते हवामानामध्ये भरडधान्य हे पीक शेतकऱ्याना योगदान ठरू शकेल. सद्यस्थितीत खताचा व कीटकनाशकाच्या अतिरिक्त वापरामुळे जमिनीचा आरोग्य बिघडत चाललेला आहे. याकरिता योग्य वेळेतच मृदा व्यवस्थापन शेतकऱ्यांनी करावे, सांगितले. यावेळी प्रास्ताविकात तोंडापूर कृषि विज्ञान केंद्राचे वरिष्ठ शास्त्रज्ञ तथा प्रमुख डॉ.पी.पी.शेळके यांनी भरड धान्याचे महत्त्व, दैनंदिन आहारामध्ये त्याचे फायदे व त्यापासून तयार होणारे विविध पदार्थ विषयी माहिती दिली. या कार्यक्रमांमध्ये भरड धान्य उत्पादन आणि प्रक्रिया व शेळीपालन या घडी पत्रिकेचे विमोचन करण्यात आले. या मेळाव्यामध्ये कृषि विज्ञान केंद्र तोंडापूर येथे उपलब्ध बियाणे व इतर शेती उपयोगी निविष्ठामध्ये ज्वारी परभणी शक्ती, ज्वारी परभणी मोती, ज्वारी परभणी सुपर मोती, ज्वारी परभणी वसंत हुरडा, हरभरा बियाणे, जीवामृत, ट्रायकोडर्मा, मेटाराझीहयम व टर्मरिक बुस्टर विक्रीसाठी उपलब्ध करुन देण्यात आले होते. तसेच अनेक शेतकऱ्यांचे सुद्धा स्टॉल लावण्यात आले होते. कार्यक्रमाचे सूत्र संचालन विजय ठाकरे यांनी तर आभार प्रदर्शन जिल्हा अधीक्षक कृषि अधिकारी राजेंद्र यांनी केले. या कार्यक्रमास पत्रकार, कृषि विभागाचे अधिकारी व कर्मचारी, अनेक गावातून शेतकरी, महिला शेतकरी, युवक वर्ग मोठ्या संख्येने उपस्थित होते. ******

राज्यातील 4 हजार 975 आदिवासी गावांचा कायापालट होणार प्रधानमंत्री जनजातीय उन्नत ग्राम अभियानात समावेश

हिंगोली (जिमाका), दि. 23 : दुर्गम, अति दुर्गम भागात राहणाऱ्या आदिवासी बांधवांच्या सर्वांगीण विकासासाठी प्रधानमंत्री जनजातीय उन्नत ग्राम अभियानाला केंद्र सरकारने हिरवा कंदील दाखविला आहे. त्यामुळे देशातील 63 हजार तर महाराष्ट्रातील 4 हजार 975 आदिवासी गावांचा कायापालट होणार आहे. यामध्ये हिंगोली जिल्ह्यातील 81 गावांचा समावेश आहे. या माध्यमातून राज्यामधील 32 जिल्ह्यातील 12 लाख 87 हजार 702 आदिवासी बांधवाचे सामाजिक आणि आर्थिक सक्षमीकरण केले जाणार आहे. या अभियानासाठी आवश्यक निधी केंद्र आणि राज्य सरकारकडून उपलब्ध होणार आहे. केंद्रीय अर्थमंत्री निर्मला सीतारामन यांनी सन 2024-25 च्या अर्थसंकल्पीय अधिवेशनात प्रधानमंत्री जनजातीय उन्नत ग्राम अभियानाची घोषणा केली होती. गेल्या आठवड्यात पंतप्रधान नरेंद्र मोदी यांच्या अध्यक्षतेखाली झालेल्या कॅबिनेट बैठकीत या अभियानाला मंजुरी देण्यात आली. या अभियानाचा शुभारंभ ऑक्टोबर महिन्याच्या पहिल्या आठवड्यात होण्याची शक्यता आहे. 'पीएम-जनमन' अभियानात 17 मंत्रालयांद्वारे राबवण्यात येणाऱ्या विविध 25 उपक्रमांचा समावेश असणार आहे. त्याद्वारे सामाजिक पायाभूत सुविधा, आरोग्य, शिक्षण, अजीविका यामधील तफावत भरून काढण्याचा प्रयत्न असणार आहे. तसेच आदिवासी क्षेत्र आणि समुदायांच्या सर्वांगीण आणि शाश्वत विकासावर भर दिला जाणार आहे. प्रधानमंत्री जनजातीय उन्नत ग्राम अभियानात सहभागी प्रत्येक मंत्रालयावर पुढील 5 वर्षात निश्चित उद्दिष्टे साध्य करण्यासाठी अनुसूचित जमातींचा विकास कृती आराखडा तयार करून उपलब्ध निधीद्वारे त्यांच्याशी संबंधित योजना कालबद्ध पद्धतीने कार्यान्वित करण्याची जबाबदारी असणार आहे. दरम्यान, या अभियानांतर्गत समाविष्ट असलेली आदिवासी गावे पीएम गतिशक्ती पोर्टलवर संबंधित विभागाद्वारे त्याच्या योजनेतून मॅप केल्या जातील. पोर्टलचे भौतिक आणि आर्थिक प्रगतीचे परीक्षण केले जाईल. सर्वोत्तम कामगिरी करणाऱ्या जिल्ह्यांना पुरस्कार देण्यात येणार आहे, असे आदिवासी आयुक्तालय, नाशिक यांनी प्रसिद्धीपत्रकाद्वारे कळविले आहे. या सुविधा मिळणार पक्की घरे, ग्रामीण भागात रस्ते, प्रत्येक घरात शुद्ध पिण्याच्या पाण्याची सोय, सर्व घरांमध्ये वीज जोडणी, मोबाईल मेडिकल युनिटची स्थापना, आयुष्मान कार्ड, एलपीजी कनेक्शन, आदिवासी बहुउद्देशीय विपणन केंद्र, आश्रमशाळांच्या पायाभूत सुविधांमध्ये सुधारणा, सिकलसेल ॲनिमियाशी लढण्यासाठी केंद्राची निर्मिती, होम स्टे. जिल्हानिहाय गावांची संख्या राज्यातील जिल्हानिहाय अहमदनगर- 118, अकोला- 43, अमरावती- 321, छत्रपती संभाजीनगर- 11, बीड- २, भंडारा- 14, बुलढाणा- 43, चंद्रपूर- 167, धुळे- 213, गडचिरोली- 411, गोंदिया- 104, हिंगोली- 81, जळगाव- 112, जालना- 25, कोल्हापूर- 1, लातूर- 2, नागपूर- 58, नांदेड- 169, नंदुरबार- 717, नाशिक- 767, उस्मानाबाद- 4, पालघर- 654, परभणी- 5, पुणे- 99, रायगड- 113, रत्नागिरी- 1, सातारा- 4, सोलापूर- 61, ठाणे- 146, वर्धा- 72, वाशीम- 71, यवतमाळ- 366 अशी गावे आहेत. *****

"स्वच्छता ही सेवा" उपक्रमातून एक दिवस गावाच्या स्वच्छतेसाठी हजारो हाताने केले सार्वजनिक ठिकाणाच्या स्वच्छतेसाठी श्रमदान

हिंगोली (जिमाका), दि. 23 : जिल्ह्यात 17 सप्टेंबर ते 2 ऑक्टोबर या कालावधीत स्वच्छता ही सेवा अभियान राबविण्यात येत आहे. या अभियानांतर्गत दि. 19 ते 21 सप्टेंबर 2024 या कालावधीत जिल्ह्यातील सर्व ग्रामपंचायतीमध्ये सार्वजनिक ठिकाणाची श्रमदानातून साफसफाई केली. जिल्ह्यातील अधिकारी व कर्मचारी तसेच गावातील ग्रामस्थांच्या पुढाकारातून थेट गावात जाऊन "एक दिवस गावासाठी" या उपक्रमांतर्गत मोठ्या प्रमाणात श्रमदानात सहभाग घेतला . जिल्हाधिकारी अभिनव गोयल व मुख्य कार्यकारी अधिकारी नेहा भोसले यांच्या आदेशानुसार उपमुख्य कार्यकारी अधिकारी (पाणी व स्वच्छता) संजय कुलकर्णी यांच्या सनियंत्रणाखाली ही मोहीम राबविण्यात आली. स्वच्छता ही सेवा अंतर्गत श्रमदान मोहीम जिल्ह्यातील सर्व महसूल व जिल्हा परिषदेचे अधिकारी, विभाग प्रमुख तसेच पंचायत समिती स्तरावरील अधिकारी व प्राध्यापक, शिक्षक, ग्रामसेवक, गट समन्वयक कर्मचारी सहभागी होऊन ग्रामस्थाच्या मदतीने सर्व ग्रामपंचायतीमध्ये श्रमदानातून सार्वजनिक ठिकाणे, मंदिर, शाळा, ग्रामपंचायत, आरोग्य उपकेंद्र, अंगणवाडी परिसरात स्वच्छता तसेच नदी घाट परिसरात स्वच्छता करुन या सर्व ठिकाणाची श्रमदानातून साफसफाई करण्यात आली. स्वच्छतेची प्रतिज्ञा घेण्यात आली. आईच्या नावाने एक झाड हा वृक्षारोपणाचा कार्यक्रम घेण्यात आला. यामध्ये गावातील ग्रामस्थ, ज्येष्ठ नागरिक, सरपंच, उपसरपंच, ग्रामपंचायत सदस्य, महिला सदस्य, महिला बचत गटातील सदस्य, रोजगार सेवक, शाळेचे विद्यार्थी , गावातील व्यायाम मंडळ, सार्वजनिक गणेश मंडळ, भजनी मंडळ, युवा क्रीडा मंडळ आदींचा मोठ्या प्रमाणात सहभाग घेण्यात आला. *******

रेशीम उत्पादक शेतकरी अभ्यास दौऱ्यासाठी रवाना

हिंगोली (जिमाका), दि. 23 : हिंगोली जिल्ह्यातील रेशीम उत्पादक लाभार्थ्यांचा शेतकरी अभ्यास दौरा रूई ता.गेवराई जि.बीड व जालना येथील रेशीम मार्केट व शेतीस भेट देण्यासाठी आज रवाना झाले आहेत. या दौऱ्यास जिल्हा रेशीम विकास अधिकारी पी. एस. देशपांडे यांनी हिरवा झेंडा दाखवून रवाना केला. या दौऱ्या दरम्यान रूई ता.गेवराई जि.बीड येथील प्रगतशील रेशीम उत्पादक शेतकऱ्यांना भेटी देणार आहेत. तसेच जालना येथील रेशीम मार्केट व प्रगतशील शेतकऱ्यांना भेटी देणार आहेत. यावेळी वरिष्ठ तांत्रिक सहाय्यक अशोक वडवळे, गजानन काचगुंडे तसेच नितीन लोलगे, राजू रणवीर, रजनीश कुटे, कुलदीप हरसुले, केतन प्रधान, कु.राधा पाटील , रमेश भवर, तान्हाजी परघणे आदी शेतकरी उपस्थित होते. ******

पेंन्शन व स्पर्शसंबंधी असलेल्या सर्व अडचणींचे निरसन करण्यासाठी संभाजीनगर येथे शुक्रवारी मेळावा

हिंगोली (जिमाका), दि. 23 : हिंगोली जिल्ह्यातील माजी सैनिक, वीरपत्नी, वीरमाता, वीर पिता व सर्व वयोवृध्द सैनिकांसाठी 97आर्टीलरी ब्रिगेड येथील "सर्वत्रा ऑडीटोरीयम छावणी छत्रपती संभाजीनगर येथे शुक्रवार (दि.२७) रोजी सकाळी ९ वाजता मेळाव्याचे आयोजन करण्यात आले आहे. या मेळाव्यात पेंन्शन व स्पर्श संबंधी अडचणींचे निरसन करण्यासाठी पुणे येथील प्रधान नियंत्रक संरक्षण विभागाच्या लेखा कार्यालयाचे प्रतिनिधी उपस्थित राहणार आहेत. या मेळाव्यामध्ये प्रधान नियंत्रक संरक्षण विभागाच्या लेखा कार्यालयाचे प्रतिनिधी पेंन्शन व स्पर्शसंबंधी असलेल्या शंका व अडचणींचे निरसन करणार आहेत. तसेच 'वन रँक वन पेन्शन" व अन्य शासकीय योजनांबाबत माहिती व मार्गदर्शन करणार आहेत. पेन्शन व स्पर्शसंबंधी अडचणी असल्यास त्यांनी या मेळाव्याला जाताना सर्व मूळ कागदपत्रे व अडचणीसंबंधी वैयक्तिक अर्ज हिंदी अथवा इंग्रजीमध्ये तीन प्रतीत सोबत असावेत. ज्या माजी सैनिक व त्यांच्या कुटुंबियांना लिहिण्या-वाचण्यासंबंधी अडचण असल्यास त्यांनी त्यांच्या कुटुंबातील योग्य व्यक्तीस सोबत घेवून जावे. या मेळाव्यास जाणाऱ्या हिंगोली जिल्ह्यातील सर्व माजी सैनिकांकरिता मध्यवर्ती बसस्थानक, सिडको बसस्थानक व रेल्वेस्टेशन ते 97 आर्टीलरी ब्रिगेड “सर्वत्रा ऑडीटोरियम" छावणी छत्रपती संभाजीनगर पर्यंत सैनिक परिवाहनाची तसेच चहापान व दुपारची भोजन व्यवस्था करण्यात आली आहे. या मेळाव्यास हिंगोली जिल्ह्यातील सर्व सेवानिवृत्त सैनिक अधिकारी, माजी सैनिक, वीरपत्नी, वीर पिता, वीर माता व सर्व सैनिकांनी जास्तीत जास्त संख्येने उपस्थित राहण्याचे आवाहन जिल्हा सैनिक कल्याण अधिकारी यांनी केले आहे. अधिक माहितीसाठी 9404975099 वर कार्यालयीन वेळेत संपर्क करावा, असेही सैनिक कल्याण कार्यालयाने कळविले आहे. ******

मुख्यमंत्री युवा कार्य प्रशिक्षण योजनेंतर्गत खाजगी आस्थापनांमध्ये तात्काळ नियुक्त्या देण्याचे निर्देश

हिंगोली (जिमाका), दि. 23 : मुख्यमंत्री युवा कार्य प्रशिक्षण योजनेच्या माध्यमातून बेरोजगार युवकांना रोजगाराची संधी उपलब्ध व्हावी, यासाठी खासगी आस्थापनांमध्ये त्यांना शिकाऊ प्रशिक्षणार्थी तात्काळ नियुक्ती द्यावी, असे निर्देश जिल्हाधिकारी अभिनव गोयल यांनी सर्व संबंधित विभाग प्रमुखांना दिले. येथील जिल्हाधिकारी कार्यालयात मुख्यमंत्री कार्य प्रशिक्षण योजनेंतर्गत खाजगी आस्थापनांमध्ये नियुक्ती देण्यासाठी आरोग्य, शिक्षण, व्यवसाय शिक्षण, उद्योग, एमआयडीसी, बँक, वस्तू व सेवा कर, कृषी आदी विविध विभागाची जिल्हाधिकारी अभिनव गोयल यांनी आढावा बैठक घेतली. त्यावेळी ते बोलत होते. यावेळी अतिरिक्त मुख्य कार्यकारी अधिकारी अनुप शेंगुलवार, उपजिल्हाधिकारी अनिल माचेवाड, उप मुख्य कार्यकारी अधिकारी अनंत कुंभार, जिल्हा अधीक्षक कृषि अधिकारी राजेंद्र कदम, जिल्हा उद्योग केंद्राचे व्यवस्थापक कदम, जिल्हा व्यवसाय शिक्षण व प्रशिक्षण अधिकारी विशाल रांगणे,कौशल्य विकास विभागाचे सहाय्यक आयुक्त डॉ. राजपाल कोल्हे, डॉ.बालाजी भाकरे आदी उपस्थित होते. मुख्यमंत्री युवा कार्य प्रशिक्षण योजनेंतर्गत जिल्ह्यातील खाजगी उद्योग, कंपनी, कृषी उद्योग, गोदाफार्म, व्यवसाय, खाजगी अनुदानित शाळा, विना अनुदानित शाळा, विद्यालय, महाविद्यालये या आस्थापनांमध्ये हे प्रशिक्षणार्थी काम करू शकणार आहेत. मुख्यमंत्री युवा कार्य प्रशिक्षण योजनेतून इच्छूक उमेदवार आणि रोजगार उपलब्ध करुन देणारे उद्योजक जोडले जाणार आहेत. रोजगार इच्छुक उमेदवारांना प्रत्यक्ष कामाचा अनुभव प्रशिक्षणातून मिळून त्यांची क्षमतावाढ होणार आहे. तसेच उद्योजकांना त्यांच्या कामासाठी लागणारे मनुष्यबळ या योजनेद्वारे 6 महिने कालावधीसाठी उपलब्ध होणार आहे. त्यामुळे जिल्ह्यातील खाजगी आस्थापनामध्ये नियुक्ती देण्यासाठी आरोग्य, शिक्षण, आयटीआय, व्यवसाय शिक्षण, उद्योग, एमआयडीसी, बँक, वस्तू व सेवा कर, कृषी आदी विविध विभागाच्या नोडल अधिकाऱ्यांनी आपणाशी संबंधित खाजगी आस्थापनांशी संपर्क साधून मुख्यमंत्री युवा कार्य प्रशिक्षणाची नियुक्ती करावी. यासाठी प्रत्येक आस्थापनामध्ये भरावयाच्या जागेची यादी तयार करुन तात्काळ नियुक्त्या द्याव्यात. तसेच यापूर्वी नियुक्ती देण्यात आलेल्या युवा कार्य प्रशिक्षणार्थी यांच्या उपस्थितीची नोंद तातडीने संकेतस्थळावर ऑनलाईन भरुन अद्ययावत करावी, असे निर्देशही जिल्हाधिकारी श्री. गोयल यांनी यावेळी दिले. *****

हिंगोली जिल्ह्यातील सहा आचार्य चाणक्य कौशल्य विकास केंद्राचा प्रारंभ

हिंगोली (जिमाका), दि. 20 : राज्यातील एक हजार महाविद्यालयामध्ये आचार्य चाणक्य कौशल्य विकास केंद्राचा प्रारंभ प्रधानमंत्री नरेंद्र मोदी यांच्या हस्ते आज वर्धा येथून ऑनलाईन पध्दतीने झाला आहे. यामध्ये हिंगोली जिल्ह्यातील 6 महाविद्यालयांतील आचार्य चाणक्य कौशल्य विकास केंद्राचा समावेश आहे. आज येथील शिवाजीराव देशमुख सभागृहात संत तुकाराम कनिष्ठ महाविद्यालयातील केंद्राची कार्यक्रम आयोजित करून सुरुवात करण्यात आली. यावेळी माजी नगराध्यक्ष बाबाराव बांगर, दिनकरराव माने, दिलीप मस्के उपस्थित होते. तर जुनियर कॉलेज ऑफ एन्ट्रॉस ऑफ सायन्स ॲन्ड आर्ट्स येथे कौशल्य विकास विभागाचे सहाय्यक आयुक्त डॉ. राजपाल कोल्हे, आशिष वाजपेई, राहूल मेने यांची उपस्थिती होती. जिल्ह्यातील हिंगोली येथील संत तुकाराम कनिष्ठ महाविद्यालय, जुनियर कॉलेज ऑफ एन्ट्रॉस ऑफ सायन्स ॲन्ड आर्ट्स, वसमत येथील श्रीनिवास विद्यामंदीर कनिष्ठ महाविद्यालय, रावसाहेब पतंगे आर्ट्स कॉलेज, कळमनुरी तालुक्यातील कुर्तडी येथील सरस्वती इन्टेलेट्यूट ऑफ फार्मसी, कळमनुरी येथील कै. देवरावजी कल्याणकर माध्यमिक व उच्च माध्यमिक विद्यालय या सहा महाविद्यालयातील आचार्य चाणक्य कौशल्य विकास केंद्राचा प्रारंभ आज प्रधानमंत्री नरेंद्र मोदी यांच्या हस्ते दूरदृष्यप्रणालीद्वारे करण्यात आला. कौशल्य विकास या संकल्पनेचा अधिकाधिक लाभ राज्यातील युवक-युवतींना व्हावा या दृष्टिकोनातून राज्यातील नामांकित महाविद्यालयामध्ये कौशल्य विकास केंद्र स्थापन करण्यात येत आहे. महाविद्यालयीन युवक-युवतींना रोजगारक्षम बनविण्याच्या दृष्टिकोनातून आचार्य चाणक्य कौशल्य विकास केंद्र या योजनेची अंमलबजावणी करण्यात येत आहे. या कौशल्य विकास केंद्राच्या माध्यमातून महाविद्यालयातील व महाविद्यालयाबाहेरील विद्यार्थ्यांना विविध क्षेत्रामध्ये कौशल्याधारित प्रशिक्षण घेण्याची संधी प्राप्त होणार आहे. या उद्घाटन कार्यक्रमाला संबंधित महाविद्यालयाचे प्राचार्य, प्राध्यापक, शिक्षक, विद्यार्थी, नागरिक, विविध क्षेत्रातील मान्यवर उपस्थित होते. विश्वकर्मा योजनेच्या लाभार्थ्यांना जिल्हाधिकारी अभिनव गोयल यांच्या हस्ते धनादेशाचे वाटप येथील जिल्हाधिकारी कार्यालयात जिल्हाधिकारी अभिनव गोयल यांच्या हस्ते आज विश्वकर्मा योजनेच्या लाभार्थ्यांना धनादेशाचे वाटप करण्यात आले. यावेळी कौशल्य विकास विभागाचे सहाय्यक आयुक्त डॉ. राजपाल कोल्हे उपस्थित होते. ******

सुविधा कर्ज योजना व महिला समृध्दी योजनेच्या लाभार्थ्यांची 24 सप्टेंबर रोजी होणार लॉटरी पध्दतीने निवड

• निवड प्रक्रियेस लाभार्थ्यांनी उपस्थित राहण्याचे आवाहन हिंगोली (जिमाका), दि. 20 : येथील साहित्यरत्न लोकशाहीर अण्णाभाऊ साठे विकास महामंडळामार्फत सुविधा कर्ज योजना (एनएसएफडीसी) 5 लाख व महिला समृध्दी (एमएसवाय) 1.40 लाख या योजनेचे कर्ज मागणीचे ऑनलाईन व ऑफलाईन अर्ज स्वीकारण्यात आले आहेत. या योजनेच्या लाभार्थ्यांची निवड दि. 24 सप्टेंबर, 2024 रोजी दुपारी 12 वाजता निवड समितीचे अध्यक्ष तथा निवासी उपजिल्हाधिकारी यांच्या अध्यक्षतेखाली चिठ्ठीद्वारे लॉटरी पध्दतीने होणार आहे. हिंगोली जिल्ह्यातील वरील योजनेच्या अर्ज केलेल्या लाभार्थ्यांनी या निवड प्रक्रियेस स्वखर्चाने उपस्थित राहावेत. पात्र अर्जदारांची यादी साहित्यरत्न लोकशाहीर अण्णाभाऊ साठे विकास महामंडळाच्या जिल्हा कार्यालयातील सूचना फलकावर लावण्यात आली आहे. याची सर्व संबंधितांनी नोंद घ्यावी, असे आवाहन जिल्हा व्यवस्थापक, साहित्यरत्न लोकशाहीर अण्णाभाऊ साठे विकास महामंडळ (मर्या.) हिंगोली यांनी केले आहे. *******

ग्राम बाल संरक्षण समितीच्या माध्यमातून बाल विवाह निर्मूलनासाठी विविध उपक्रम राबवावेत - जिल्हाधिकारी अभिनव गोयल

• जिल्हा संरक्षण कक्षाच्या आढावा बैठकीत जिल्हाधिकाऱ्यांनी घेतला आढावा हिंगोली, दि. 20 (जिमाका) : जिल्ह्यातील प्रत्येक गावात ग्राम बाल संरक्षण समिती स्थापन करावी किंवा असलेल्या समितीचे पुन:र्गठन करावेत. तसेच ग्राम बाल संरक्षण समितीची दरमहा बैठक घ्यावी. तसेच बालविवाह निर्मूलनासाठी निवडण्यात आलेल्या 50 गावांमध्ये ग्राम बाल संरक्षण समितीच्या माध्यमातून विविध कार्यक्रम, उपक्रम राबविण्याच्या सूचना जिल्हाधिकारी श्री. गोयल यांनी महिला व बालविकास आणि पंचायत विभागाला दिल्या. बालविवाह निर्मूलन कृती दलाची आढावा बैठक जिल्हाधिकारी अभिनव गोयल यांच्या अध्यक्षतेखाली घेण्यात आली. त्यावेळी ते बोलत होते. यावेळी अपर पोलीस अधीक्षक अर्चना पाटील, महिला व बालविकास विभागाचे उपमुख्य कार्यकारी अधिकारी गणेश वाघ, शिक्षणाधिकारी संदीप सोनटक्के, जिल्हा समाज कल्याण अधिकारी राजू एडके, जिल्हा सरकारी कामगार अधिकारी टी. ई. कराड, पोलीस निरीक्षक शालिनी नाईक, महिला आर्थिक विकास महामंडळाचे जिल्हा समन्वयक अधिकारी विलास जगताप, एनएसएसचे कार्यक्रम अधिकारी डॉ. टी. आर. हापगुंडे, युनिसेफ एसबी-3 चे नंदू जाधव, मोनाली धुर्वे, जिल्हा महिला व बालविकास अधिकारी आर. आर. मगर, जिल्हा संरक्षण अधिकारी माया सूर्यवंशी, परीविक्षा अधिकारी सुनिल वाठोरे, जिल्हा बाल संरक्षण अधिकारी सरस्वती कोरडे, बाल न्याय मंडळ सदस्य वर्षा कुरील, बाल न्याय मंडळाचे प्रतिनिधी अशोक खुपसे, उज्वल पाईकराव धनेंद्र कांबळे, संदीप कोल्हे आदी उपस्थित होते. जिल्ह्यातील निवडक 125 शाळेत बालविवाह निर्मूलनासाठी घेण्यात येत असलेल्या विद्यार्थी सक्षमीकरण व पालक जागरुकता सत्रास केंद्रप्रमुख, गट शिक्षणाधिकारी यांनी भेटी द्याव्यात. सक्षम युवा शक्ती कार्यक्रमासाठी निवड केलेल्या 50 गावात ग्राम बाल संरक्षण समिती सक्षम करून कार्यान्वित करण्यात यावी. तसेच या 50 गावासाठी एकात्मिक बालविकास विभाग, शिक्षण विभाग, पंचायत विभाग, आरोग्य विभाग, महिला व बाल विकास विभाग यांनी एकत्रित सूक्ष्म नियोजन आराखडा तयार करावा. महिनानिहाय विविध उपक्रम राबविण्याचे नियोजन करावे. ग्राम बाल संरक्षण समितीकडून याची प्रभावीपणे अंमलबजावणी करुन घ्यावी. ही 50 गावे तालुकास्तरीय अधिकारी, कर्मचारी यांना दत्तक द्यावी. तालुकास्तरीय अधिकारी, कर्मचारी यांचे बालविवाह निर्मूलन कृती आराखड्याबाबत प्रशिक्षण आयोजित करावे. स्थलांतरित कामगारांसाठी गावात रोजगार प्राप्त करून देण्यासाठी प्रयत्न करावे, अति जोखिम कुटुंबातील 18 वर्ष पूर्ण झालेल्या मुलींना मुख्यमंत्री युवा कार्य प्रशिक्षणातून युवा प्रशिक्षणार्थी म्हणून नियुक्ती द्यावी. राष्ट्रीय सेवा योजनेच्या सहकार्याने या 50 गावात जनजागृती करण्यात यावी. शाळेत जाण्यासाठी मुलींना वाहनाची सुविधा उपलब्ध नसलेल्या गावांची माहिती घेऊन त्या ठिकाणी मानव विकास मिशन बस सुरु करण्यासाठी काम करावे, असे निर्देशही श्री. गोयल यांनी यावेळी दिले. यावेळी जिल्हा महिला व बालविकास अधिकारी श्री. मगर यांनी बाल संरक्षण कक्षाने राबविलेले विविध उपक्रम, कोविड काळात एक किंवा दोन्ही पालक गमावलेल्या बालकांच्या गृहभेटी, मिशन वात्सल्य, प्रतिपालकत्व आणि प्रायोजकत्व योजनाचा लाभ, बालसंगोपन योजना, चाईल्ड हेल्पलाईन, वन स्टॉप सेंटरच्या कामकाज आदी विविध योजना व उपक्रमांची माहिती दिली. ******

विधानसभा निवडणुकीसाठी नियुक्त पथक प्रमुखांनी आपली जबाबदारी गांभीर्याने पार पाडावी - जिल्हाधिकारी अभिनव गोयल

• निवडणूक पथक प्रमुखांचा जिल्हाधिकाऱ्यांनी घेतला आढावा हिंगोली, दि.20(जिमाका) : जिल्ह्यात विधानसभा सार्वत्रिक निवडणुकीची प्रक्रिया शांततामय आणि भयमुक्त वातावरणात पार पाडण्यासाठी विविध पथके स्थापन करण्यात आली आहेत. या पथक प्रमुखांनी सजग राहून भारत निवडणूक आयोगाच्या निर्देशानुसार आपली जबाबदारी गांभीर्याने पार पाडावी, अशा सूचना जिल्हाधिकारी अभिनव गोयल यांनी आज येथे दिल्या. जिल्हाधिकारी कार्यालयात आयोजित निवडणूक पथक प्रमुखांच्या बैठकीत ते बोलत होते. या बैठकीस मुख्य कार्यकारी अधिकारी श्रीमती नेहा भोसले, पोलीस अधीक्षक श्रीकृष्ण कोकाटे, अपर जिल्हाधिकारी खुशालसिंह परदेशी, अतिरिक्त मुख्य कार्यकारी अधिकारी अनुप शेंगुलवार, अपर पोलीस अधीक्षक श्रीमती अर्चना पाटील, उपजिल्हा निवडणूक अधिकारी रामेश्वर रोडगे, निवासी उपजिल्हाधिकारी अभिमन्यू बोधवड, जिल्ह्यातील तिन्ही विधानसभा मतदार संघाचे सर्व उपविभागीय अधिकारी तथा निवडणूक निर्णय अधिकारी, सर्व तहसीलदार, पोलीस यंत्रणेचे अधिकारी यांच्यासह सर्व पथक प्रमुख, सहायक पथक प्रमुखांची‌ यावेळी उपस्थिती होती. निवडणुकीसाठी नियुक्त प्रत्येक पथकाची जबाबदारी अतिशय महत्त्वाची आहे. निवडणूक प्रक्रिया सुरळीतपणे पार पाडण्यासाठी सर्व पथक प्रमुखांनी आपापली जबाबदारी समजून घेऊन ती काळजीपूर्वक पार पाडावी. निवडणूकविषयक कामाला प्राधान्य देत आपल्या पथकातील सर्व अधिकारी, कर्मचारी यांचा योग्य समन्वय ठेवून काम करावे. यामध्ये कोणत्याही प्रकारचा हलगर्जीपणा होणार नाही, याची काळजी घ्यावी. आतापासूनच आपल्यावर सोपविलेल्या जबाबदारीच्या अनुषंगाने कार्यवाही सुरु करावी, असे जिल्हाधिकारी श्री. गोयल यांनी सांगितले. पोलीस अधीक्षक श्रीकृष्ण कोकाटे यांनी एसएसटी, एफएसटी, व्हीएसटी पथके नेमण्यासाठी दूरसंचार नेटवर्कचा विचार करुन ठिकाणे निश्चित करताना ती योग्य जागेवर निवडावीत. कारण त्या ठिकाणची माहिती घेण्यासाठी संवाद साधणे सोयीचे होईल, असे सांगितले. अपर जिल्हाधिकारी खुशालसिंह परदेशी यांनीही विधानसभेच्या आदर्श आचारसंहिता पालनाबाबत सूचना केल्या. नियुक्त सर्व पथक प्रमुखांनी नेमून दिलेली कर्तव्ये व जबाबदारी पार पाडताना अतिशय दक्ष राहण्याच्या सूचना यावेळी त्यांनी केल्या. उपजिल्हा निवडणूक अधिकारी रामेश्वर रोडगे यांनी सर्व पथक प्रमुख अधिकारी यांना त्यांच्यावर सोपविण्यात आलेल्या जबाबदारीबाबत माहिती दिली. तसेच प्रत्येक पथक प्रमुख अधिकारी यांनी आपल्याला आवश्यक मनुष्यबळाचे योग्य नियोजन करुन निवडणूक कामकाजात कोणतीही त्रुटी राहणार नाही, याची दक्षता घेण्याच्या सूचना केल्या. *****

नुकसानग्रस्त खरीप पिकांच्या विमा दाव्याची पुर्वसूचना दाखल क्षेत्राचे सर्वेक्षण करण्याचे विमा कंपनीला आदेश

हिंगोली (जिमाका), दि. 19 : प्रधानमंत्री पिक विमा योजना खरीप हंगाम-2024 राबविण्यासाठी शासनाने दि. 26 जून, 2023 अन्वये मान्यता दिली आहे. हिंगोली जिल्ह्यामध्ये एचडीएफसी इरगो जनरल इन्शुरन्स कंपनीकडून योजना राबविण्यात येत आहे. त्याअंतर्गत हिंगोली जिल्ह्यातील 4 लाख 72 हजार 15 शेतकऱ्यांनी पिक विमा भरला आहे. हिंगोली जिल्ह्यातील सर्वच महसूल मंडळामध्ये दि. 2 सप्टेंबर, 2024 रोजी अतिवृष्टी झाल्यानंतर 4 लाख 54 हजार 71 शेतकऱ्यांनी विमा दाव्याची पूर्वसूचना कंपनीकडे दाखल केल्याचे कंपनीने कळविले आहे. केंद्र शासनाच्या दि. 17 ऑगस्ट, 2020 च्या मार्गदर्शक सूचनेतील तरतुदीप्रमाणे जिल्ह्यातील तूर, कापूस इत्यादी सर्व पिकामधील दिलेल्या पूर्वसुचनांचे 30 टक्के सॅम्पल सर्वे करुन झालेल्या नुकसानीच्या व क्षेत्राच्या प्रमाणात मदत देण्यात यावी, असे आदेश जिल्हाधिकारी अभिनव गोयल यांनी एचडीएफसी इरगो जनरल इन्शुरन्स कंपनीला दिले आहेत. या सर्वेक्षणासाठी क्षेत्रीय स्तरावर संबंधित कृषि सहाय्यक, विमा प्रतिनिधी व शेतकरी यांची उपसमिती नेमली असून त्यांच्या कामाचे सनियंत्रण संबंधित मंडळ कृषि अधिकारी, तालुका कृषि अधिकारी व तालुकास्तरीय विमा प्रतिनिधी यांनी करावेत, असे आदेशही जिल्हाधिकारी श्री. गोयल यांनी दिले आहेत. ******

दिव्यांगमुक्त जिल्हा करण्यासाठी सर्वांच्या सहकार्याची गरज - जिल्हाधिकारी अभिनव गोयल

हिंगोली (जिमाका), दि. 18 : लहान मुलांमध्ये असलेल्या दिव्यंगत्वाचा शोध घेऊन त्याच्यावर वेळेत उपचार केल्यास 90 टक्के मुले यातून दुरुस्त होऊ शकतात. याचे योग्य नियोजन केल्यास आगामी काळात आपला जिल्हा दिव्यांगमुक्त होण्यास मदत होणार आहे. यामुळे या क्षेत्रात काम करण्यासाठी सर्वांच्या सहकार्याची गरज आहे, असे प्रतिपादन जिल्हाधिकारी अभिनव गोयल यांनी केले. येथील जिल्हा नियोजन समितीच्या सभागृहात आयोजित प्रधानमंत्री नरेंद्र मोदी यांच्या 75 व्या वाढदिवसानिमित्त केंद्र शासनाच्या सामाजिक न्याय मंत्रालयाअंतर्गत दिव्यांगजन सशक्तीकरण विभागामार्फत देशातील 75 आकांक्षित जिल्ह्यात एडिप योजनेतून दिव्यांगाना विविध साहित्याचे मोफत वाटप कार्यक्रमाचे आयोजन करण्यात आले होते. यावेळी केंद्रीय सामाजिक न्याय मंत्री डॉ. विरेंद्र ठाकूर यांनी दूरदृष्य प्रणालीद्वारे सर्वांना ऑनालाईन मार्गदर्शन केले. तसेच त्यांनी यावेळी सर्वांना स्वच्छतेची शपथ दिली. यावेळी आमदार तान्हाजी मुटकुळे, जिल्हाधिकारी अभिनव गोयल, जिल्हा समाज कल्याण अधिकारी राजू एडके, भारतीय कृति अंग निर्माण निगम (एलिम्को) कानपूरचे किरण पावरा, अस्थिरोग तज्ञ डॉ. मनीष बगडीया, मधुकर राऊत, लक्ष्मण मुंढे यांची प्रमुख उपस्थिती होती. यावेळी श्री. गोयल म्हणाले, अपंग अधिनियमान्वये 21 प्रकारच्या अपंगत्वाचा समावेश करण्यात आलेला आहे. अपंगत्वाचे प्रामुख्याने दोन भागात वर्गीकरण करावे. यामध्ये पहिल्या भागात ओळखलेले किंवा सध्या अस्तित्वात असलेल्या दिव्यांगाना उपकरण उपलब्ध करुन देऊन सक्षम करणे तर दुसऱ्या भागामध्ये दिव्यांगमुक्त जिल्ह्याकडे वाटचाल करण्यासाठी शोध मोहिम राबविण्याची गरज आहे. यासाठी ग्रामपातळीवरील सर्व अधिकारी, कर्मचारी, सर्व आरोग्य केंद्र तसेच विविध स्वयंसेवी संघटना यांनीही जिल्हा प्रशासनास दिव्यांगमुक्त हिंगोली जिल्हा करण्यास मदत करावी. शासनाने दिव्यांगासाठी 5 टक्के निधी राखून ठेवला आहे. तसेच त्यांना विशिष्ट ओळख म्हणून युडीआयडी कार्डाचेही वितरण करण्यात आले आहे, त्यामुळे या क्षेत्रात सर्वांनी पुढे येऊन योगदान द्यावे, असे आवाहन जिल्हाधिकारी श्री. गोयल यांनी यावेळी केले. यावेळी प्रास्ताविकात जिल्हा समाज कल्याण अधिकारी राजू एडके यांनी जिल्ह्यात 1069 दिव्यांगांना विविध उपकरण साहित्याचे वाटप करण्यात येणार असल्याचे सांगितले. जिल्ह्यातील दिव्यांग व्यक्तींवर विविध उपचार, तपासण्या मोफत करण्यात येणार असल्याचे सांगितले. यासाठी वंचित दिव्यांगांना याबाबत आपण सर्वांनी माहिती देऊन सहकार्य करावे, असे आवाहन त्यांनी यावेळी केले. यावेळी प्रमुख मान्यवराच्या हस्ते हिंगोली तालुक्यातील 111 दिव्यांगांना तीन चाकी, सायकल, बॅटरी ऑपरेटेड सायकल, कानाची मशीन, अंधाची सेंसर काठी, कुबडी, व्हीलचेअर, कृत्रिम अवयव, चष्मे इत्यादी साहित्याचे वाटप करण्यात आले. जिल्ह्यातील इतर तालुक्यातील लाभार्थ्यांना पुढील कालावधीत तालुकास्तरावर साहित्य वाटप शिबीरे घेण्यात येणार असल्याची माहिती संबंधितांनी दिली. या कार्यक्रमास दिव्यांग संघटनांचे पदाधिकारी, अधिकारी, कर्मचारी, नागरिक व दिव्यांग बांधव मोठ्या संख्येने उपस्थित होते. ******

जिल्हा प्रशासनाकडून ‘ई-पीक पाहणी’साठी अधिकारी पोहचले शेतकऱ्यांच्या बांधावर

• गावातील युवकांची मदत घेण्याचे जिल्हाधिकारी अभिनव गोयल यांचे निर्देश हिंगोली (जिमाका),दि.18 : जिल्ह्यात सप्टेंबरच्या सुरुवातीला अतिवृष्टीने शेती आणि उभ्या पिकांचे मोठ्या प्रमाणावर नुकसान झाले. त्यामुळे जिल्ह्यात झालेल्या शेती आणि पिकांच्या नुकसानीचे सर्व्हे करण्यासाठी जिल्हा प्रशासन ॲक्शन मोडवर आले असून, जिल्हाधिकारी अभिनव गोयल यांच्या निर्देशानुसार प्रशासनातील अधिकारी-कर्मचारी ‘ई-पीक पाहणी’ करण्यासाठी शेतकऱ्यांच्या बांधावर पोहचले आहेत. या विशेष मोहिमेत कमीत कमी वेळेत ई-पीक पाहणी पूर्ण करण्यासाठी प्रशासनाने गावातील शिक्षित युवकांची मदत घ्यावी. या युवकांनी शेतकऱ्यांना ई-पीक पाहणी करण्याबाबत योग्य मार्गदर्शन करण्याचे निर्देशही जिल्हाधिकारी श्री. गोयल यांनी अधिकाऱ्यांना दिले आहेत. अपर जिल्हाधिकारी खुशालसिंह परदेशी यांनी कळमनुरी तालुक्यातील शिवनी खुर्द तर वसमतचे उपविभागीय अधिकारी विकास माने यांनी तालुक्यातील गिरगाव येथे या विशेष मोहिमेमध्ये शेतकऱ्यांना ई-पीक पाहणीची प्रात्यक्षिके करून दाखवत मार्गदर्शन केले. सप्टेंबरच्या सुरुवातीला जिल्ह्यातील सर्वच मंडळांमध्ये अतिवृष्टीची नोंद झाली होती. त्यामुळे हिंगोलीसह ग्रामीण भागात नदी-नाल्यांच्या काठावरील गावांमध्ये पुराचे पाणी शिरल्यामुळे मोठ्या प्रमाणावर नुकसान झाले. यामध्ये अनेक शेतकरी-शेतमजूर पुराच्या पाण्यामुळे शेती-आखाड्यावर अडकून पडले होते. वेळीच जिल्हा प्रशासनासह आपत्ती व्यवस्थापन विभागाची मदत मिळाल्यामुळे त्यांना सुरक्षितस्थळी हलविण्यात आले. या अतिवृष्टीची मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि उपमुख्यमंत्री अजित पवार यांनी दखल घेतली. त्यामुळे जिल्ह्याचे पालकमंत्री अब्दुल सत्तार आणि त्यानंतर मदत व पुनर्वसन, आपत्ती व्यवस्थापन मंत्री अनिल पाटील यांनी पुरबाधित गावांचा दौरा करून बाधितांना धीर देत पंचनामे पूर्ण होताच शासनाकडून तात्काळ मदत करण्यासाठी आवश्यक पावले उचलण्यात येतील, असे सांगितले होते. त्यामुळे जिल्हाधिकारी अभिनव गोयल यांच्या निर्देशानुसार जिल्ह्यात सर्वत्र जिल्हा प्रशासनातील विविध अधिकारी चमूसह ‘ई-पीक पाहणी’ करण्यासाठी शेतकऱ्यांच्या बांधावर पोहचल्याचे दिसून येत आहे. यावेळी गिरगावच्या मंडळ अधिकारी प्रियंका खडसे, वसमतचे राजु क्षीरसागर, तलाठी वंदना म्हस्के, पालीस पाटील श्री. शिवनकर, सरपंच श्रीमती पी. पी. नागरे यांच्यासह शेतकरी बांधवांची यावेळी उपस्थिती होती. *******

‘अतिवृष्टीमुळे झालेल्या नुकसान’ बाबीअंतर्गत सोयाबीन पिक विम्यासाठी 25 टक्के अग्रीम

हिंगोली (जिमाका), दि. 18 : जिल्ह्यात सप्टेंबरच्या सुरुवातीला झालेल्या अतिवृष्टीमुळे बाधित पिकांचे सर्वेक्षण करून शेतकऱ्यांना मदत करण्याबाबत शासनाकडून निर्देश देण्यात आले होते. त्यानुसार क्षेत्रीय संयुक्त समितीमार्फत केलेल्या सर्वेक्षणानुसार सर्व महसूल मंडळामध्ये सोयाबीन पिकामध्ये मध्यम हंगाम प्रतिकूल परिस्थिती लागू होत असल्याने संबंधित विमा धारकांना पिक नुकसानीच्या प्रमाणात विमा संरक्षित रकमेच्या 25 टक्के अग्रीम देण्याचे आदेश सोमवारी पारित केले आहेत. प्रधानमंत्री पिक विमा योजना खरीप हंगाम 2024 अंतर्गत हंगामातील प्रतिकूल परिस्थितीमुळे झालेले नुकसान ही जोखीम लागू करण्यासाठी जिल्हाधिकारी अभिनव गोयल यांच्या अध्यक्षतेखाली नुकतीच जिल्हास्तरीय संयुक्त समितीची बैठक पार पडली. या बैठकीमध्ये क्षेत्रीय स्तरावरील संयुक्त समितीच्या सर्वेक्षणानुसार सोयाबीन पिकाचे नजर अंदाजानुसार अपेक्षित उत्पादन हे मागील 7 वर्षाच्या सरासरी उत्पादनाच्या 50 टक्के पेक्षा कमी आल्याचे निदर्शनास आले आहे. तर तूर व कापूस पिकांच्या नजर अंदाजानुसार अपेक्षित उत्पादनात 50 टक्के पेक्षा जास्त घट दिसून आली नाही. प्रधानमंत्री पीक विमा योजना खरीप हंगाम-2023 ते रब्बी हंगाम 2025-26 करिता राज्यात राबविण्याबाबत दि. 26 जून, 2023 च्या शासन निर्णय निर्गमित केला आहे. या शासन निर्णयानुसार जिल्हाधिकारी यांच्यामार्फत नुकसानीचा अहवाल व अधिसूचना जाहीर झाल्यानंतर एक महिन्याच्या आत वरील तरतुदीस पात्र ठरलेल्या शेतकऱ्यांना विमा कंपनीमार्फत नुकसान भरपाई देण्यात येईल. उपरोक्त बैठकीतील चर्चेनुसार तसेच प्राप्त सर्वेक्षण अहवालानुसार अधिसूचित पिक विमा क्षेत्रातील सोयाबीन पिकासाठी संभाव्य नुकसान भरपाई रक्कमेच्या 25 टक्के आगाऊ रक्कम सर्व विमाधारक शेतकऱ्यांना देण्याचे आदेश एचडीएफसी ईरगो कंपनी लि. यांना जिल्हास्तरीय संयुक्ती समितीच्या मान्यतेने जिल्हाधिकारी यांनी दिले आहेत. ******

सशस्त्र दलातील माजी सैनिकांना भरतीसाठी संधी

हिंगोली (जिमाका), दि. 18 : मराठवाडा पर्यावरण बटालियन अंतर्गत 136 इन्फंट्री बटालियन (टीए)(इको) महारमध्ये सशस्त्र दलातील माजी सैनिक, पर्यावरण, वन आणि हवामान बदल विभाग व राज्य वन विभागाच्या माजी महिला कर्मचाऱ्यातून 53 पदे भरावयाची आहेत. यासाठी छत्रपती संभाजीनगर मिल्ट्री कॅम्प (सर्वत्र स्टेडियम) येथे दि. 23 ते 28 सप्टेंबर, 2024 या कालावधीत भरती मेळाव्याचे आयोजन करण्यात आले आहे. या भरतीअंतर्गत उमेदवारांनी छत्रपती संभाजीनगर मिल्ट्री कॅम्प (सर्वत्र स्टेडियम) येथे दि. 23 ते 28 सप्टेंबर, 2024 या कालावधीत शारीरिक पात्रता तपासणी उपस्थित राहणे आवश्यक आहे. या बटालियनमध्ये सोल्जर जीडी सामान्य कर्तव्य 42 पदे, लिपिक 6 पदे, घरकाम करणारी व्यक्ती 1 पद, लोहार 1 पद, मेस किपर कारागीर 1 पद, आर्टेशियन 1 पद, तसेच स्टीवार्ड 1 पद असे एकूण 53 पदे भरण्यात येणार आहेत. यासाठी माजी सैनिकांचा सेवानिवृत्त झाल्याचा कालावधी 5 वर्षाच्या आतील असावा. माजी सैनिक 50 वर्षापर्यंत सेवा करु शकतात. तसेच वैद्यकीय श्रेणी SHAPE-1 उमेदवार असावा. वजन 50 किलो, छाती माजी सैनिकासाठी 82 सें.मी. (किमान विस्तार 5 सें.मी.) असावा. माजी सैनिकांसाठी पीपीओ, डिस्चार्ज बूक, अलीकडील पासपोर्ट आकाराच्या रंगीत छायाचित्राच्या 8 प्रती, शिक्षण प्रमाणपत्र, निवासी प्रमाणपत्र, आधार व पॅन कार्ड आवश्यक आहे. शारीरिक तंदुरुस्ती चाचणी केवळ पुरुषांसाठी : निर्धारित वेळेत 1.6 किमी धावणे, 8 ते 9 फूट खंदक (वयानुसार) उडी मारुन पार करण्यास सक्षम असावा. पूल अल्पस स्वत:ला पातळीपर्यंत खेचण्यास सक्षम असावा. झिगझॅग शिल्लक-उंच प्लॅटफॉर्मवर चालण्यास सक्षम असणे आवश्यक आहे. मेळाव्याचे आयोजन करणारे अधिकारी भरती मेळाव्यादरम्यान उमेदवारांना झालेल्या अपघात, दुखापतीस जबाबदार राहणार नाहीत. उमेदवारांसाठी 9168168136 हा संपर्क क्रमांक आहे. अधिक माहितीसाठी तसेच अटी व शर्तीसाठी जिल्हा सैनिक कल्याण कक्ष, हिंगोली येथे संपर्क साधावा. हिंगोली जिल्ह्यातील जास्तीत जास्त माजी सैनिकांनी या भरती मेळाव्याचा लाभ घ्यावा, असे जिल्हा सैनिक कल्याण कक्ष, हिंगोली यांनी कळविले आहे. *******

जिल्ह्यातील 6 महाविद्यालयात शुक्रवारी होणार आचार्य चाणक्य कौशल्य विकास केंद्र सुरु

• प्रधानममंत्री नरेंद्र मोदी यांच्या हस्ते वर्ध्यात ऑनलाईन प्रारंभ हिंगोली (जिमाका), दि. 18 : राज्यातील एक हजार महाविद्यालयामध्ये आचार्य चाणक्य कौशल्य विकास केंद्राचा प्रारंभ प्रधानमंत्री नरेंद्र मोदी यांच्या हस्ते वर्धा येथून ऑनलाईन पध्दतीने होणार आहे. यामध्ये हिंगोली जिल्ह्यातील 6 महाविद्यालयांचा समावेश करण्यात आला आहे. कौशल्य विकास या संकल्पनेचा अधिकाधिक लाभ राज्यातील युवक-युवतींना व्हावा या दृष्टिकोनातून राज्यातील नामांकित महाविद्यालयामध्ये कौशल्य विकास केंद्र स्थापन करण्यात येत आहे. महाविद्यालयीन युवक-युवतींना रोजगारक्षम बनविण्याच्या दृष्टिकोनातून आचार्य चाणक्य कौशल्य विकास केंद्र या योजनेची अंमलबजावणी करण्यात येत आहे. या योजनेंतर्गत हिंगोली जिल्ह्यातील 6 महाविद्यालयांना आचार्य चाणक्य कौशल्य विकास केंद्र स्थापन करण्यासाठी मान्यता प्राप्त झाली आहे. या कौशल्य विकास केंद्राच्या माध्यमातून महाविद्यालयातील व महाविद्यालयाबाहेरील विद्यार्थ्यांना विविध क्षेत्रामध्ये कौशल्याधारित प्रशिक्षण घेण्याची संधी प्राप्त होणार आहे. या उद्घाटन कार्यक्रमाला सर्व विद्यार्थी, नागरिक, विविध क्षेत्रातील मान्यवर यांनी जास्तीत-जास्त संख्येने उपस्थित राहावे, असे आवाहन सहायक आयुक्त, कौशल्य विकास, रोजगार व उद्योजकता, हिंगोली यांनी केले आहे. ******

मुख्यमंत्री युवा कार्य प्रशिक्षण योजनेंतर्गत खाजगी आस्थापनांमध्ये नियुक्तीसाठी रोजगार मेळावा

हिंगोली (जिमाका), दि. 18 : मुख्यमंत्री युवा कार्य प्रशिक्षण योजनेच्या माध्यमातून बेरोजगार युवकांना रोजगाराची संधी उपलब्ध व्हावी, यासाठी खासगी आस्थापनांमध्ये त्यांना शिकाऊ प्रशिक्षणार्थी म्हणून 6 महिन्यासाठी नियुक्ती मिळणार आहे. त्यासाठी दि. 20 सप्टेंबर ते 1 ऑक्टोबर, 2024 या कालावधीत प्रत्येक तालुक्यात 2 रोजगार मेळाव्याचे आयोजन करण्यात आले आहे. जिल्ह्यातील खाजगी आस्थापना व सुशिक्षित बेरोजगार युवकांनी या संधीचा लाभ घ्यावा, असे आवाहन कौशल्य विकास, रोजगार व उद्योजकता विभागाचे सहायक आयुक्त डॉ. राजपाल कोल्हे यांनी केले आहे. या मुख्यमंत्री युवा कार्य प्रशिक्षण योजनेतून आयोजित रोजगार मेळाव्यात इच्छूक उमेदवार आणि रोजगार उपलब्ध करुन देणारे उद्योजक जोडले जाणार आहेत. रोजगार इच्छुक उमेदवारांना प्रत्यक्ष कामाचा अनुभव प्रशिक्षणातून मिळून त्यांची क्षमतावाढ होणार आहे. तसेच उद्योजकांना त्यांच्या कामासाठी लागणारे मनुष्यबळ या योजनेद्वारे 6 महिने कालावधीसाठी उपलब्ध होणार आहे. मुख्यमंत्री युवा कार्य प्रशिक्षण योजनेंतर्गत जिल्ह्यातील खाजगी (उद्योग, कंपनी, कृषी उद्योग, गोदाफार्म, व्यवसाय, खाजगी अनुदानित शाळा, विना अनुदानित शाळा, विद्यालय, महाविद्यालय) या आस्थापनांमध्ये हे प्रशिक्षणार्थी काम करू शकणार आहेत. मुख्यमंत्री युवा कार्य प्रशिक्षण योजनेंतर्गत हिंगोली जिल्ह्यात आयोजित करण्यात आलेल्या रोजगार मेळाव्याचा तपशील पुढीलप्रमाणे आहे. दि. 20 सप्टेंबर, 2024 रोजी वायव्हीएस, प्रमोद महाजन ग्रामीण कौशल्य विकास केंद्र, नर्सी नामदेव ता. हिंगोली व वायव्हीएस, प्रमोद महाजन ग्रामीण कौशल्य विकास केंद्र, गोरेगाव ता. सेनगाव येथे रोजगार मेळावा होणार आहे. 23 सप्टेंबर रोजी औद्योगिक प्रशिक्षण संस्था, हिंगोली येथे 24 सप्टेंबर रोजी औद्योगिक प्रशिक्षण संस्था वसमत, येथे 25 सप्टेंबर रोजी औद्योगिक प्रशिक्षण संस्था, सेनगाव येथे होणार आहे. 26 सप्टेंबर रोजी औद्योगिक प्रशिक्षण संस्था कळमनुरी व वायव्हीएस, प्रमोद महाजन ग्रामीण कौशल्य विकास केंद्र, आखाडा बाळापूर ता. कळमनुरी, येथे 30 सप्टेंबर रोजी औद्योगिक प्रशिक्षण संस्था, औंढा नागनाथ व वायव्हीएस, प्रमोद महाजन ग्रामीण कौशल्य विकास केंद्र, जवळा बाजार ता. औंढा नागनाथ येथे होणार आहे. दि. 1 ऑक्टोबर, 2024 रोजी वायव्हीएस, प्रमोद महाजन ग्रामीण कौशल्य विकास केंद्र, कुरुंदा ता. वसमत येथे रोजगार मेळाव्याचे अयोजन करण्यात आले आहे. उमेदवारांसाठी पात्रता : उमेदवाराचे किमान वय 18 व कमाल 35 वर्षे असावे. किमान शैक्षणिक पात्रता बारावी, आयटीआय, पदविका, पदवीधर, पदव्युत्तर असावी. महाराष्ट्राचा अधिवासी असावा. आधार नोंदणी, बँक खाते आधार संलग्न असावे. उमेदवाराने कौशल्य, रोजगार, उद्योजकता व नाविन्यता विभागाच्या https://rojgar.mahaswayam.gov.in या संकेतस्थळावर अद्ययावत नोंदणी केलेली असावी. बँक खात्याविषयीची कागदपत्रे अपलोड करावीत. या कार्य प्रशिक्षणासाठी प्रशिक्षणार्थींना त्यांच्या शैक्षणिक अर्हता प्रमाणे 12 वी पास शैक्षणिक अर्हतेसाठी 6 हजार, आयटीआय व पदविका शैक्षणिक अर्हता असलेल्यांना 8 हजार आणि पदवीधर व पदव्युत्तर शैक्षणिक अर्हता असलेल्यांना 10 हजार याप्रमाणे शासनामार्फत विद्यावेतन लाभार्थ्यांच्या थेट बँक खात्यात डीबीटीद्वारे जमा करण्यात येणार आहे. हिंगोली जिल्ह्यातील 12 वी, आयटीआय, पदविका, पदवीधर, पदव्युत्तर या शैक्षणिक अर्हतेनुसार सुशिक्षित बेरोजगार उमेदवारांनी https://rojgar.mahaswayam.gov.in येथे नोंदणी करावी. आपले आधार कार्डशी संलग्न बँक खात्यावरील माहिती भरुन कागदपत्रे अपलोड करावीत व सदरील आस्थापनेस ऑनलाईन अर्ज करावा. तसेच आपल्याकडील कागदपत्रे सोबत घेऊन जवळच्या रोजगार मेळाव्याच्या ठिकाणी मुलाखतीस उपस्थित रहावे. याबाबत काही अडचण आल्यास 02456-224574 या दूरध्वनीवर किंवा 99767213394, 7972888970, 7385924589 या भ्रमणध्वनीवर संपर्क साधावा, असे आवाहन कौशल्य विकास, रोजगार व उद्योजकता विभागाचे सहायक आयुक्त डॉ. कोल्हे यांनी केले आहे. *******

महिला लोकशाही दिनाचे आज आयोजन

हिंगोली (जिमाका), दि. 17 : राज्यघटनेने प्रत्येक नागरिकाला समान हक्क व समान संधी असा मुलभूत हक्क दिलेला आहे. त्याअंतर्गत समस्याग्रस्त व पिडित महिलांना त्यांचे प्रश्न मांडण्यासाठी व्यासपीठ मिळावे. तसेच त्यांच्या तक्रारी, अडचणी यांची शासकीय यंत्रणेकडून सोडवणूक करण्यासाठी एक प्रभावी उपाययोजना म्हणून जिल्हास्तरावर दर महिन्याच्या तिसऱ्या सोमवारी किंवा तिसऱ्या सोमवारी सार्वजनिक सुट्टी असल्यास त्यानंतर येणाऱ्या कामकाजाच्या दिवशी जिल्हास्तरीय महिला लोकशाही दिन राबविण्यात येतो. माहे सप्टेंबर, 2024 च्या तिसऱ्या सोमवारी व 17 सप्टेंबर, 2024 रोजी सार्वजनिक सुट्टी असल्यामुळे माहे सप्टेंबर, 2024 च्या महिला लोकशाही दिनाचे आयोजन उद्या बुधवार,दिनांक 18 सप्टेंबर, 2024 रोजी सकाळी 11.00 वाजता जिल्हाधिकारी यांच्या अध्यक्षतेखाली त्यांच्या दालनात करण्यात आले आहे. समस्याग्रस्त व पिडीत महिलांनी त्यांच्या अडचणी मांडण्यासाठी विहित नमुन्यातील अर्ज जिल्हा महिला व बालविकास अधिकारी, मध्यवर्ती प्रशासकीय इमारत, दुसरा मजला, कक्ष क्र. एस-7, हिंगोली यांच्या कार्यालयात सादर करावेत. यामध्ये न्याय प्रविष्ठ प्रकरणे, विहित नमुन्यात नसणारे व आवश्यक ती कागदपत्रे न जोडलेले, सेवा विषयक, आस्थापना विषयक बाबी, तक्रार निवेदन वैयक्तिक स्वरुपाची नसेल असे अर्ज स्विकारले जाणार नाहीत. समस्याग्रस्त व पिडीत महिलांनी शासनाने उपलब्ध करुन दिलेल्या व्यासपीठाचा उपयोग आपल्या अडचणी सोडविण्यासाठी करावा, असे आवाहन जिल्हा महिला व बालविकास अधिकारी, हिंगोली यांनी केले आहे. *******

मोबाईल ॲपवर ई-पीक नोंदणीसाठी बुधवार, गुरुवारी विशेष मोहिम

हिंगोली (जिमाका), दि. 17 : खरीप हंगाम 2024 मध्ये अतिवृष्टी झाल्यामुळे शेती पिकांचे मोठ्या प्रमाणात नुकसान झालेले आहे. या नुकसानीमुळे प्रधानमंत्री पीक विमा योजना, नैसर्गिक आपत्तीचे सानुग्रह अनुदान अदा करण्यासाठी ई-पीक पाहणीला अन्यसाधारण महत्व प्राप्त झाले आहे.त्यामुळे येत्या बुधवारी व गुरुवारी विशेष मोहिमेचे आयोजन करण्यात आले असून, शेतक-यांनी आपल्या पिकांची नोंदणी ई पिक अँपवर करण्याचे आवाहन जिल्हाधिकारी अभिनव गोयल यांनी केले आहे. हिंगोली जिल्ह्यात सन 2024 मध्ये खरीप सर्व साधारण क्षेत्र 4 लाख 25 हजार 358 हेक्टर आर पैकी 2 लाख 14 हे.आर क्षेत्राची शेतकऱ्यांनी अँप डाऊनलोड करून नोंदणी पूर्ण केलेली आहे. उर्वरित सर्व शेतकऱ्यांनी सुध्दा त्यांचा पीकपेरा ई-पीक पाहणी मोवाईल अँपव्दारे विहित मुदतीत नोंदविण्यासाठी प्रोत्साहित करण्याच्या हेतूने दि. 18 व 19 सप्टेंबर, 2024 रोजी विशेष मोहिम राबविण्यात येत आहे. या मोहिमेत जिल्ह्यात 1 लाख 40 हजार 200 शेतकऱ्यांनी पीकपेरा नोंदणी पूर्ण करण्याचे उद्दिष्ट निश्चित करण्यात आलेले आहे. त्याबाबतची सर्व जबाबदारी जिल्हा अधीक्षक कृषी अधिकारी, हिंगोली व उपविभागीय अधिकारी (महसूल) यांच्यावर सोपविण्यात आली आहे. जिल्हा अधीक्षक कृषी अधिकारी, हिंगोली व उपविभागीय अधिकारी यांनी त्यांच्या अधिनस्त तालुक्यासाठी तालुकास्तरावर सूक्ष्म नियोजन करून सदर मोहिम यशस्वी करावी, असे निर्देश जिल्हाधिकारी अभिनव गोयल यांनी दिले आहेत. ******

दिव्यांगमुक्त जिल्हा करण्यासाठी सर्वांच्या सहकार्याची गरज - जिल्हाधिकारी अभिनव गोयल

हिंगोली (जिमाका), दि. 17 : लहान मुलांमध्ये असलेल्या दिव्यंगत्वाचा शोध घेऊन त्याच्यावर वेळेत उपचार केल्यास 90 टक्के मुले यातून दुरुस्त होऊ शकतात. याचे योग्य नियोजन केल्यास आगामी काळात आपला जिल्हा दिव्यांग मुक्त होण्यास मदत होणार आहे. यामुळे या क्षेत्रात काम करण्यासाठी सर्वांच्या सहकार्याची गरज आहे, असे प्रतिपादन जिल्हाधिकारी अभिनव गोयल यांनी केले. येथील जिल्हा नियोजन समितीच्या सभागृहात आयोजित प्रधानमंत्री नरेंद्र मोदी यांच्या 75 व्या वाढदिवसानिमित्त केंद्र शासनाच्या सामाजिक न्याय विभागामार्फत देशातील आकांक्षीत तालुके व इतर ठिकाणी असे 75 जिल्ह्यात अपंगांना साहित्य वाटप कार्यक्रमाचे आयोजन करण्यात आले होते. यावेळी केंद्रीय सामाजिक न्याय व अधिकारिता मंत्रालयाचे मंत्री डॉ. विरेंद्र ठाकूर यांनी दूरदृष्य प्रणालीद्वारे संबोधन केले. तसेच त्यांनी यावेळी सर्वांना स्वच्छतेची शपथ दिली. यावेळी आमदार तान्हाजी मुटकुळे, जिल्हाधिकारी अभिनव गोयल, जिल्हा समाज कल्याण अधिकारी राजू एडके, भारतीय कृति अंग निर्माण निगम (एलिम्को) कानपूरचे किरण पावरा, अस्थिरोग तज्ञ डॉ. मनीष बगडीया यांची प्रमुख उपस्थिती होती. यावेळी श्री. गोयल म्हणाले, अपंग अधिनियमान्वये 21 प्रकारच्या अपंगत्वाचा समावेश करण्यात आलेला आहे. अपंगत्वाचे प्रामुख्याने दोन भागात वर्गीकरण करावे. यामध्ये पहिल्या भागात ओळखलेले किंवा सध्या अस्तित्वात असलेल्या दिव्यांगाना उपकरण उपलब्ध करुन देऊन सक्षम करणे तर दुसऱ्या भागामध्ये दिव्यांगमुक्त जिल्ह्याकडे वाटचाल करण्यासाठी शोध मोहिम राबविण्याची गरज आहे. यासाठी ग्रामपातळीवरील सर्व अधिकारी, कर्मचारी, सर्व आरोग्य केंद्र तसेच विविध स्वयंसेवी संघटना यांनीही जिल्हा प्रशासनास दिव्यांगमुक्त हिंगोली जिल्हा करण्यास मदत करावी. शासनाने दिव्यांगासाठी 5 टक्के निधी राखून ठेवला आहे. तसेच त्यांना विशिष्ट ओळख म्हणून युडीआयडी कार्डाचेही वितरण करण्यात आले आहे, त्यामुळे या क्षेत्रात सर्वांनी पुढे येऊन योगदान द्यावे, असे आवाहन जिल्हाधिकारी श्री. गोयल यांनी यावेळी केले. यावेळी प्रास्ताविकात जिल्हा समाज कल्याण अधिकारी राजू एडके यांनी जिल्ह्यात 1069 दिव्यांगांना विविध उपकरण साहित्याचे वाटप करण्यात येणार असल्याचे सांगितले. जिल्ह्यातील दिव्यांग व्यक्तींवर विविध उपचार, तपासण्या मोफत करण्यात येणार असल्याचे सांगितले. यासाठी वंचित दिव्यांगांना याबाबत आपण सर्वांनी माहिती देऊन सहकार्य करावे, असे आवाहन त्यांनी यावेळी केले. यावेळी प्रमुख मान्यवराच्या हस्ते जिल्ह्यातील दिव्यांगांना प्रातिनिधीक स्वरुपात साहित्याचे वाटप करण्यात आले आहे. या कार्यक्रमास पदाधिकारी, अधिकारी, कर्मचारी, नागरिक व दिव्यांग बांधव मोठ्या संख्येने उपस्थित होते. ******

जिल्हाधिकारी कार्यालयात प्रबोधनकार केशव ठाकरे यांची जयंती साजरी

हिंगोली (जिमाका), दि. 17 : येथील जिल्हाधिकारी कार्यालयात प्रबोधनकार केशव सीताराम ठाकरे यांची जयंती साजरी करण्यात आली. यावेळी सामान्य प्रशासन विभागाचे उपजिल्हाधिकारी अनिल माचेवाड यांनी प्रबोधनकार ठाकरे यांच्या प्रतिमेस पुष्पहार अर्पण करुन अभिवादन केले. यावेळी नायब तहसीलदार डी. एस., निमजे यांच्यासह प्रशासकीय इमारतीतील सर्व अधिकारी, कर्मचारी यांनीही प्रबोधनकार केशव ठाकरे यांच्या प्रतिमेस पुष्प अर्पण करुन अभिवादन केले. *****

जिल्हाधिकारी कार्यालयात अभिनव गोयल यांच्या हस्ते ध्वजारोहण

हिंगोली (जिमाका), दि. 17 : मराठवाडा मुक्ती संग्राम दिनाच्या 76 व्या वर्धापन दिनानिमित्त येथील जिल्हाधिकारी कार्यालयाच्या प्रांगणात जिल्हाधिकारी अभिनव गोयल यांच्या हस्ते ध्वजारोहण झाले. यावेळी अपर जिल्हाधिकारी खुशालसिंह परदेशी, निवासी उपजिल्हाधिकारी अभिमन्यू बोधवड, उपजिल्हाधिकारी अनिल माचेवाड, जिल्हा पुरवठा अधिकारी राजेश पुंजाल, उपविभागीय अधिकारी समाधान घुटुकडे, जिल्हा नियोजन अधिकारी सुधाकर जाधव, जिल्हा सूचना विज्ञान अधिकारी बारी सिध्दीकी, तहसीलदार श्रीकांत भुजबळ यांच्यासह विविध विभागातील अधिकारी-कर्मचारी यांची उपस्थिती होती. *****

मराठवाडा मुक्तीसंग्राम दिनानिमित्त पालकमंत्री अब्दुल सत्तार यांच्या हस्ते मुख्य शासकीय ध्वजारोहण मराठवाडा मुक्ती संग्रामात अनेक हुतात्मे आणि स्वातंत्र्य सैनिकांनी दिलेले योगदान अमूल्य - पालकमंत्री अब्दुल सत्तार

• अतिवृष्टीमुळे झालेल्या नुकसानीचे पंचनामे पूर्ण होताच तातडीने निधी उपलब्ध करुन देण्यात येईल • महत्वपूर्ण योजनांचा लाभ समाजाच्या शेवटच्या घटकापर्यंत पोहचविण्याचा राज्य शासनाचा प्रयत्न • अल्पमुदतीचे पीक कर्ज घेणाऱ्या व या कर्जाची नियमित परतफेड करणाऱ्या 45 हजार 920 पात्र लाभार्थ्यांना 2 कोटी 53 लाख रुपये अनुदान स्वरुपात बचत खात्यामध्ये जमा हिंगोली (जिमाका), दि. 17 : स्वातंत्र्यानंतरही देशात तीन संस्थाने विलीन झाली नव्हती. काश्मीर, जुनागढ आणि हैद्राबाद या संस्थानांनमुळे भारतीय संघराज्य पुर्णत्वास गेले नव्हते. स्वामी रामानंद तिर्थ यांच्या नेतृत्वाखाली संपूर्ण हैद्राबाद संस्थानात मराठवाडा मुक्ती संग्रामाचा लढा सुरु झाला होता. मराठवाड्याच्या गावा-गावातून मराठवाडा मुक्ती संग्रामाचा लढा अनेक स्वातंत्र्य सैनिकांनी शौर्याने लढला. हा केवळ संस्थांनाच्या विलिनीकरणाचा लढा नव्हता तर भारताच्या प्रादेशिक अखंडतेचा लढा होता. मराठवाडा मुक्ती संग्रामाचे हे आंदोलन सतत 13 महिने सुरु होते. या आंदोलनात अनेक स्वातंत्र्य सैनिकांनी आपल्या प्राणांची आहुती दिली. अखेर 17 सप्टेंबर, 1948 रोजी निजामाच्या जोखडातून मराठवाडा मुक्त होऊन भारतीय संघराज्यात विलीन झाला. या मराठवाडा मुक्ती संग्रामासाठी अनेक हुतात्म्यांनी आणि स्वातंत्र्य सैनिकांनी दिलेल्या लढ्याचे योगदान अमूल्य आहे, असे प्रतिपादन राज्याचे अल्पसंख्यांक विकास व औकाफ, पणन मंत्री तथा हिंगोलीचे पालकमंत्री अब्दुल सत्तार यांनी केले. मराठवाडा मुक्ती संग्राम दिनाच्या 76 व्या वर्धापन दिनानिमित्त येथील कै. अण्णासाहेब टाकळगव्हाणकर उद्यानातील हुतात्मा स्मारक स्मृतिस्तंभ येथे आयोजित करण्यात आलेल्या मुख्य शासकीय ध्वजारोहण समारंभ प्रसंगी श्री. सत्तार बोलत होते. यावेळी ज्येष्ठ स्वातंत्र्य सैनिकांचे कुटुंबीय श्रीमती रुक्मिणीबाई देवकते, श्रीमती मालती पैठणकर, आमदार तान्हाजी मुटकुळे, माजी आमदार गजानन घुगे, जिल्हाधिकारी अभिनव गोयल, जिल्हा पोलीस अधीक्षक श्रीकृष्ण कोकाटे, जिल्हा परिषदेचे मुख्य कार्यकारी अधिकारी श्रीमती नेहा भोसले, अपर जिल्हाधिकारी खुशालसिंह परदेशी, अतिरिक्त मुख्य कार्यकारी अधिकारी अनुप शेंगुलवार, अपर पोलीस अधीक्षक अर्चना पाटील, जिल्हा ग्रामीण विकास यंत्रणेचे प्रकल्प संचालक नामदेव केंद्रे, निवासी उपजिल्हाधिकारी अभिमन्यू बोधवड, सामान्य प्रशासन विभागाचे उपजिल्हाधिकारी अनिल माचेवाड यांची प्रमुख उपस्थिती होती. यावेळी पालकमंत्री श्री. सत्तार म्हणाले, मराठवाडा मुक्तीसंग्राम दिनाचा 76 वा वर्धापन दिन आज मराठवाड्यात सर्वत्र उत्साहाने साजरा होत आहे. निजामाच्या हुकूमशाही विरोधात स्वातंत्र्य सैनिकांनी आपल्या संपूर्ण आयुष्याची आहुती देऊन मराठवाडा मुक्त केला. मराठी भाषा, मराठी संस्कृती, धार्मिक स्वातंत्र्य, सामाजिक व राजकीय हक्क प्राप्तीसाठी या भागातील जनतेने जो त्याग केला, तो सुवर्णाक्षरांनी लिहावा असाच आहे. महाराष्ट्र शासन स्वातंत्र्य सैनिकांच्या आणि जनतेच्या याच त्यागाबद्दल कृतज्ञ राहून कार्य करीत असल्याचे त्यांनी यावेळी सांगितले. मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार यांच्या नेतृत्वात राज्य शासन विविध महत्त्वाकांक्षी योजना राबवत आहे. यामध्ये मुख्यमंत्री माझी लाडकी बहीण, मुख्यमंत्री युवा कार्य प्रशिक्षण, मुलींना शिक्षणात 50 ऐवजी 100 टक्के शुल्कमाफी योजना, मुख्यमंत्री वयोश्री योजना, मुख्यमंत्री अन्नपुर्णा योजना, मुख्यमंत्री तीर्थदर्शन योजना, बाळासाहेब ठाकरे आपला दवाखाना, मुख्यमंत्री बळीराजा मोफत वीज सवलत योजना यांच्या माध्यमातून समाजाच्या शेवटच्या घटकापर्यंत लाभ पोहचविण्याचा राज्य शासनाचा प्रयत्न असल्याचे श्री. सत्तार यांनी सांगितले मुख्यमंत्री माझी लाडकी बहीण योजनेमध्ये आतापर्यंत जिल्ह्यामध्ये 3 लक्ष 05 हजार 499 बहिणींची नावनोंदणी झाली आहे. त्यापैकी 2 लाख 98 हजार 118 बहिणी पात्र ठरल्या आहेत. या योजनेतून हिंगोली जिल्ह्यातील 1 लाख 49 हजार 219 पात्र लाडक्या बहिणींना दोन महिन्याची रक्कम 44 कोटी 76 लाख 57 हजार रुपये डीबीटीद्वारे वितरीत करण्यात आली आहे. तसेच उर्वरित पात्र लाभार्थ्यांनाही रक्कम वितरीत करण्याची कार्यवाही लवकरच करण्यात येणार आहे. लाडक्या बहिणींच्या खात्यात दोन हप्त्यांचे 3 हजार रुपये जमा झाले असल्याने याचा मनस्वी आनंद होत असल्याचे सांगून लाडक्या बहिणींच्या नावनोंदणीला सप्टेंबर अखेरपर्यंत मुदतवाढ देण्यात आली असल्याचे सांगितले. तसेच युवक-युवतींसाठी मुख्यमंत्री युवा कार्य प्रशिक्षण योजनेत आतापर्यंत जिल्ह्यातील सुशिक्षित बेरोजगारांना 6 महिने शासकीय कार्यालयात कामाचा अनुभव आणि त्याच्या शैक्षणिक पात्रतेनुसार 6 हजार, 8 हजार किंवा 10 हजार रुपये मानधन देण्यात येणार आहे. यासाठी जिल्ह्यात आतापर्यंत 1 हजार 859 युवक-युवतींना नियुक्तीचे आदेश देण्यात आले असून 1 हजार 846 युवक-युवतींनी प्रत्यक्षात रुजू होऊन कार्य प्रशिक्षणाला सुरुवात केली आहे. जिल्ह्यातील सुशिक्षित बेरोजगार युवकांच्या हाताला काम मिळाल्याचा आनंद आहे. धार्मिक अधिष्ठान असलेल्या आपल्या देशाला मोठी सांस्कृतिक परंपरा आहे. देशातील विविध धार्मिक स्थळे ज्येष्ठ नागरिकांना याची देही याची डोळा पाहता यावीत, त्यासाठी राज्य शासनाने मुख्यमंत्री तीर्थदर्शन योजना सुरु केली आहे. हे ज्येष्ठ नागरिक या योजनेत पात्र ठरावेत, प्रवासात कोणताही त्रास होऊ नये यासाठी जिल्हा शल्य चिकित्सक कार्यालयाने आरोग्य तपासणी शिबिरही घेतले. यामध्ये जिल्ह्यातील किमान 1 हजार लाभार्थ्यांना तीर्थदर्शनासाठी 30 हजार रुपयांपर्यंतचा लाभ मिळणार आहे. राज्यातील एकही व्यक्ती सणसुदीला आणि एरव्हीही उपाशीपोटी झोपू नये, त्यासाठी आवश्यक असणारा आनंदाचा शिधा आणि मुख्यमंत्री अन्नपुर्णा योजनेच्या माध्यमातून तो शिजवण्यासाठी त्या मायमाऊलीला वर्षात 3 गॅस सिलेंडर मोफत देण्याचा राज्य शासनाने निर्णय घेतला आहे. यामध्ये जिल्ह्यातील 1 लाख 84 हजार इतक्या माता-भगीनी या योजनेच्या लाभार्थी असून, त्यांना प्रधानमंत्री उज्ज्वला आणि मुख्यमंत्री अन्नपुर्णा योजनेतून सिलेंडर मिळत आहेत. तसेच मुख्यमंत्री वयोश्री योजनेच्या माध्यमातून तीन हजार रुपयांपर्यंत साहित्य खरेदीसाठी त्यांच्या थेट खात्यात जमा करण्यात येत आहे. याचा लाभ जिल्ह्यातील किमान 20 हजार ज्येष्ठ नागरिकांना होणार आहे, असल्याचे पालकमंत्री श्री. सत्तार यांनी सांगितले. राज्य शासन शेतकऱ्यांच्या भक्कमपणे पाठीशी उभे असून, नानाजी देशमुख कृषी संजीवनी प्रकल्पाच्या माध्यमातून 236 गावांमध्ये प्रकल्प राबविण्यात येत आहेत. जिल्ह्यात 80 हजार शेतकऱ्यांपैकी 40 हजार शेतकऱ्यांना ऑनलाईनच्या माध्यमातून जवळपास 15 कोटी रुपये त्यांच्या थेट बँक खात्यात लाभाचे वितरीत करण्यात आले आहेत. मुख्यमंत्री ग्राम सडक योजनेतून ग्रामीण भागातील रस्ते बांधणीला प्राधान्य देण्यात आले असून, 2015-16 ते 2023-24 या सात वर्षांमध्ये 850 किमी लांबीचे 249 रस्ते मंजूर झाल आहेत. त्यापैकी आतापर्यंत 227 कामे पूर्ण झाली असून, 20 कामे प्रगतीपथावर आहेत. ही सर्व कामे डिसेंबर 2024 पर्यंत पूर्ण होतील, असा विश्वास पालकमंत्री श्री. सत्तार यांनी व्यक्त केला. याशिवाय प्रधानमंत्री कृषी सिंचन योजना, कृषी यांत्रिकीकरण, एकात्मिक फलोत्पादन विकास अभियान आणि मा. हिंदुहृदय सम्राट बाळासाहेब ठाकरे (हळद) हरिद्रा संशोधन व प्रशिक्षण केंद्राच्या माध्यमातून जिल्ह्यातील हळद उत्पादक शेतकऱ्यांना उच्च दर्जाचे बियाणे उपलब्ध होणार आहे. प्रधानमंत्री सूक्ष्म अन्न प्रक्रिया उद्योग योजनेच्या माध्यमातून शेतकऱ्यांना त्यांच्या उत्पादनाचे ब्रँडींग आणि विपणन करण्यासाठी, उद्योग उभारणीसाठी निधी उपलब्ध करून देण्यात येत आहे. तसेच नुकतीच वसमत तालुक्यातील पार्डी बुद्रक येथील 40 हेक्टरवर औद्योगिक वसाहतीला मंजुरी दिली आहे. तसेच मुख्यमंत्री बळीराजा मोफत वीज योजनेतून पुढील पाच वर्षे शेतकऱ्यांना मोफत वीज उपलब्ध करून दिल्यामुळे त्यांना कृषी विज बिल भरण्याची गरज राहणार नसल्याचेही श्री. सत्तार यांनी यावेळी सांगितले. हिंगोली जिल्ह्यात सप्टेंबर महिन्यात झालेल्या अतिवृष्टीमुळे 2 लाख 86 हजार 144 हेक्टर क्षेत्र बाधित झाले आहे. तर 2 हजार 153 घराची अंशत: पडझड झाली आहे. याचे पंचनामे करण्याचे काम अंतिम टप्यात असून आतापर्यंत 98 टक्के काम झाले आहे. पंचनामे पूर्ण होताच शासनाकडे तातडीने प्रस्ताव पाठवून निधी उपलब्ध करुन देण्यात येणार आहे. तसेच या अतिवृष्टीमध्ये 2 व्यक्ती मयत झाले असून त्यांच्या कुटुंबियांना प्रत्येकी 4 लाख रुपयाचे सानुग्रह अनुदान वाटप करण्यात आले आहे. तर 213 पशुधनाचे मयत झाले असून त्यांनाही तालुकास्तरावर सानुग्रह अनुदान वाटप करण्याची कार्यवाही सुरु असल्याची माहिती पालकमंत्री श्री. सत्तार यांनी दिली. वित्तीय संस्थांकडून 3 लाख रुपयापर्यंतचे अल्पमुदतीचे पीक कर्ज घेणाऱ्या व या कर्जाची प्रति वर्षी दि. 30 जूनपर्यंत संपूर्ण परतफेड करणाऱ्या शेतकऱ्यांना वार्षिक 3 टक्के दराने व्याज सवलत अनुज्ञेय आहे. सन 2023-24 या आर्थिक वर्षामध्ये व्याज सवलत योजनेच्या 45 हजार 920 पात्र लाभार्थ्यांना 2 कोटी 53 लाख रुपये अनुदान स्वरुपात त्यांच्या बचत खात्यामध्ये जमा करण्यात आलेले आहेत. येथील जिल्हा रुग्णालयातील बालरोग विभागास मुस्कान कार्यक्रमांतर्गत राष्ट्रीय स्तरावरचे मानांकन मिळाले आहे. ही अभिनंदनाची बाब आहे. जिल्हा रुग्णालयातील एकात्मिक सार्वजनिक आरोग्य प्रयोगशाळा, सिमेंट रोड व शेड, हृदयरुग्ण असणाऱ्या लाभार्थ्यासाठी कार्डियाक कॅथेटेरायझेशन प्रयोगशाळा, सहा मॉड्यूलर ऑपरेशन थिएटरचे बांधकाम प्रगतीपथावर सुरु असल्याची माहिती श्री. सत्तार यांनी दिली. अनुसूचित जाती उपयोजनेतून समाजातील दुर्बल, वंचित घटकाला समान न्याय व समान हक्क या भूमिकेतून त्यांना उत्पन्नाची साधने वाढविण्यासाठी शासनाने विशेष घटक योजना 1980 पासून सुरु केली आहे. त्यामुळे अनुसूचित जाती उपयोजनेमध्ये 18 विविध विभागांमार्फत 59 योजना राबविण्यात येतात. मागासवर्गीय व आर्थिकदृष्ट्या मागास मुला-मुलींसाठी शासकीय वसतीगृह सुरु करण्यात आली आहेत. त्यांच्यासाठी विविध शिष्यवृत्ती देण्यात येत आहेत. राज्य शासनाच्या कर्मवीर दादासाहेब गायकवाड स्वाभिमान व सबळीकरण योजनेतून आतापर्यंत 84 जणांना लाभ दिला आहे. तसेच मिनी ट्रॅक्टर, भारत सरकार मॅट्रिकोत्तर शिष्यवृत्ती योजना आणि भारतरत्न डॉ. बाबासाहेब आंबेडकर स्वाधार योजनाही राबविण्यात येत असल्याची माहिती श्री. सत्तार यांनी यावेळी दिली. प्रारंभी राज्याचे अल्पसंख्यांक विकास व औकाफ, पणन मंत्री तथा पालकमंत्री अब्दुल सत्तार यांच्या हस्ते हुतात्मा स्मारकास पुष्पचक्र अर्पण करुन हुतात्म्यांना अभिवादन करण्यात आले. यावेळी पोलीस पथकाने हुतात्म्यांना शोक धून वाजवून हवेत बंदुकीच्या तीन फैरी झाडून मानवंदना दिली. यावेळी श्री. सत्तार यांनी स्वातंत्र्य सैनिकांचे कुटुंबीय रुक्मिनीबाई देवकते, मालतीबाई पैठणकर यांचा शाल, श्रीफळ देऊन सन्मान केला. तसेच श्री. सत्तार यांनी लोकप्रतिनिधी, अधिकारी, पदाधिकारी, नागरिक, पत्रकार यांची भेट घेवून मराठवाडा मुक्ती संग्राम दिनाच्या शुभेच्छा दिल्या. तसेच यावेळी सप्टेंबर महिन्यात झालेल्या अतिवृष्टीमुळे पुरात अडकलेल्या लोकांना आपला स्वत:चा जीव धोक्यात घालून मोलाची कामगिरी बजावणाऱ्या बाबाराव रामरावजी पडोळे यांचा पालकमंत्री अब्दुल सत्तार यांच्या हस्ते शाल, श्रीफळ देऊन गौरव करण्यात आला. पालकमंत्री अब्दुल सत्तार यांच्या हस्ते 'स्वच्छता ही सेवा अभियाना'चा जिल्ह्यात प्रारंभ राष्ट्रपिता महात्मा गांधी यांच्या जयंतीचे औचित्य साधून दि. 2 ऑक्टोबर हा दिवस स्वच्छ भारत दिवस म्हणून साजरा केला जाणार आहे. त्या निमित्ताने स्वच्छता ही सेवा 2024 मोहीम दि. 17 सप्टेंबर ते दि.1 ऑक्टोबर 2024 या कालावधीत राबविण्यात येणार आहे. याचा जिल्हास्तरीय प्रारंभ आज राज्याचे अल्पसंख्यांक विकास व औकाफ, पणन मंत्री तथा पालकमंत्री अब्दुल सत्तार यांच्या हस्ते आज करण्यात आला. यावर्षीच्या स्वच्छता ही सेवा 2024 साठी स्वभाव स्वच्छता, संस्कार स्वच्छता ही थीम निश्चित केली आहे. त्या अनुषंगाने स्वच्छता ही सेवा पंधरवडा कालावधीमध्ये विविध उपक्रम राबविण्याबाबत केंद्र व राज्य शासनाच्या सूचना प्राप्त झाल्या आहेत. त्यानुसार जिल्ह्यात विविध दैनंदिन उपक्रम राबविण्यात येणार आहेत. 17 सप्टेंबर रोजी स्वच्छता ही सेवा अभियानाचा शुभारंभ गाव, तालुका व जिल्हास्तरावर मान्यवरांच्या हस्ते होणार आहे. सफाई मित्र सुरक्षा शिबीर या उपक्रमाद्वारे सफाई मित्रासाठी एक खिडकी योजनेद्वारे सर्व योजनांच्या अनुषंगाने पात्र लाभार्थ्यांकरिता मोहीम राबविण्यात येणार आहे. 19 सप्टेंबर रोजी एक दिवस श्रमदानासाठी हा उपक्रम राबविण्यात येणार आहे. या कार्यक्रमाचे सूत्रसंचालन पंडित अवचार यांनी केले. यावेळी पत्रकार, नागरिक, विद्यार्थी-विद्यार्थिनी, विविध विभागाचे अधिकारी-कर्मचारी यांची मोठ्या संख्येने उपस्थिती होती. **