वसमत आयटीआय मध्ये विजय दिन साजरा

हिंगोली (जिमाका), दि. 25: कारगिल विजय दिनाचे औचित्य साधून वसमत आयटीआयमध्ये दि. 24 जुलै, 2025 रोजी विजय दिवस साजरा करण्यात आला. या विजय दिवसाच्या कार्यक्रमाचे अध्यक्ष म्हणून संस्थेचे प्राचार्य एस. एल. कोंडावार हे होते, विजय दिवसानिमित्त मार्गदर्शन करण्यासाठी प्रमुख वक्ता म्हणून प्रा.डॉ.शशिकांत तोळमारे यांना आमंत्रित करण्यात आलेले होते. तर प्रमुख पाहुणे म्हणून आयटीआयमधील आयएमसीचे सदस्य राजेश भालेराव, सुजित आंबेकर व शंतनु देशपांडे हे उपस्थित होते. यावेळी उपस्थितांना मार्गदर्शन करताना प्रा. तोळमारे यांनी उपस्थितांना कारगील युद्धाबद्दल माहिती देऊन विजय दिवसाचे महत्त्व सांगितले. तसेच संस्थेचे प्राचार्य एस. एल. कोंडावार यांनी सुद्धा विद्यार्थ्यांना विजय दिवसाचे महत्त्व सांगितले, तसेच संस्थेतील गटनिदेशक टी. जे. झाड, शिल्प निदेशक गणेश येमेवार, आर. एन. कानगुले, एन.एस. सबनवार, पी.व्ही वानखेडे, एस. आर. पडघन, मुख्य लिपिक एस.आर खूपसे, वरिष्ठ लिपिक श्रीमती आर.जे शहारे व कार्यालयीन कर्मचारी डी. व्ही साळवे, एन. एच वाहेवळ यांनी कार्यक्रम यशस्वी करण्यासाठी सहकार्य केले. ******

रेड रिबन क्लब महाविद्यालयातील नोडल अधिकारी यांची एचआयव्ही/एड्स विषयक कार्यशाळा संपन्न

हिंगोली (जिमाका), दि. 25: जिल्हा शल्य चिकित्सक डॉ.नितीन तडस यांच्या मार्गदर्शनाखाली जिल्हा रुग्णालयातील जिल्हा एड्स प्रतिबंध व नियंत्रण कक्षामार्फत डापकू सभागृहात जिल्ह्यातील रेड रिबन क्लब महाविद्यालयातील सर्व नोडल अधिकारी व पिअर एज्युकेटर यांची एचआयव्ही/एड्स विषयी आज कार्यशाळा संपन्न झाली. यावेळी जिल्हा कार्यक्रम अधिकारी डी. एस. चौधरी यांनी एचआयव्हीला हद्दपार करण्यासाठी युवकांची भूमिका सर्वात महत्वाची असल्याने त्यांना एचआयव्ही/एड्स याविषयी माहिती असणे किती गरजेचे आहे याविषयी मार्गदर्शन केले. तसेच रेड रिबन क्लब अंतर्गत महाविद्यालय स्तरावर वर्षभर घेण्यात येणाऱ्या विविध कार्यक्रमाविषयी सविस्तर माहिती दिली. कार्यशाळेच्या यशस्वीतेसाठी संजय पवार, श्रीमती टीना कुंदणानी व आशिष पाटील यांनी परिश्रम घेतले. ******

हिंगोली येथे रविवारी पत्रकार कार्यशाळेचे आयोजन

• जिल्ह्यातील पत्रकारांनी कार्यशाळेस उपस्थित राहण्याचे आवाहन हिंगोली (जिमाका), दि. 25: माहिती व जनंसपर्क महासंचालनालयांतर्गत असलेल्या येथील जिल्हा माहिती कार्यालयाच्या वतीने रविवार, (दि. 27) रोजी सकाळी 11 वाजता जिल्हाधिकारी कार्यालयातील जिल्हा नियोजन समितीच्या सभागृहात हिंगोली जिल्ह्यातील पत्रकारांसाठी एकदिवशीय कार्यशाळेचे आयोजन करण्यात आले आहे. या कार्यक्रमाच्या अध्यक्षस्थानी जिल्हाधिकारी राहुल गुप्ता उपस्थित राहणार आहेत. तसेच जिल्ह्यातील विविध पत्रकार संघटनांचे पदाधिकारी यांच्या उपस्थितीत कार्यक्रमाचे आयोजन करण्यात आले आहे. या कार्यशाळेत विविध वक्त्यामार्फत वृत्तसंकलन, संपादनात शुद्धलेखनाचे महत्त्व, एआयचा वापर, पत्रकारांना देण्यात येणाऱ्या शासनाच्या विविध योजनांची माहिती देण्यात येणार आहे. हिंगोली जिल्ह्यातील जास्तीत जास्त पत्रकारांनी या कार्यशाळेस उपस्थित राहावे, असे आवाहन जिल्हा माहिती अधिकारी प्रभाकर बारहाते यांनी केले आहे. ******

अण्णासाहेब पाटील आर्थिक मागास विकास महामंडळाच्या मराठवाडा उपविभागीय कार्यालयाचे बीड येथे रविवारी उद्घाटन

• लाभार्थ्यांच्या समस्यांचे त्वरित निवारण व योजनांचा व्यापक प्रसार हे उद्घाटनाचे मुख्य उद्दिष्ट हिंगोली, दि. 25 (जिमाका): अण्णासाहेब पाटील आर्थिक मागास विकास महामंडळाच्या योजनेची मराठवाड्यातील वाढती व्याप्ती लक्षात घेता, महामंडळाच्या मराठवाडा विभागासाठी उपविभागीय कार्यालय स्थापन करण्यात आले असून, याचे उद्घाटन रविवार, (दि.27) रोजी सकाळी 11 वाजता यशवंतराव चव्हाण नाट्यगृह, बीड येथे होणार आहे. या उपविभागीय कार्यालयाची स्थापना अण्णासाहेब पाटील विकास फाउंडेशनच्या विशेष सहकार्यातून करण्यात आली असून, उद्घाटनप्रसंगी लाभार्थींच्या विविध समस्यांवर मार्गदर्शन व त्वरित निवारणासाठी विशेष मेळाव्याचेही आयोजन करण्यात आले आहे. महामंडळाच्या योजनांचा सरल व थेट लाभ मराठवाड्यातील मराठा समाजापर्यंत पोहोचवणे, ई-सेवा व खाजगी केंद्रांमधून होणारी फसवणूक रोखणे, प्रलंबित कर्ज प्रकरणे व व्याज परतावा त्रुटींवरील समस्यांचे निवारण करणे, तसेच तक्रारींवर हेल्पलाईनद्वारे त्वरित कारवाई करण्यासाठी हे कार्यालय कार्यरत राहणार आहे. राजू कॉम्प्लेक्स, २रा मजला, हिना हॉटेलसमोर, जालना रोड, बीड येथे हे सुसज्ज व अद्ययावत उपविभागीय कार्यालय सुरु होणार असून, लाभार्थ्यांना येथे महामंडळाच्या सर्व सुविधा एकाच छताखाली उपलब्ध होतील. या कार्यालयामुळे मराठवाड्यातील लाभार्थ्यांना मुंबई किंवा पुण्यासारख्या ठिकाणी धावपळ न करता स्थानिक पातळीवर सेवा मिळणार आहे. महामंडळाचे अध्यक्ष नरेंद्र पाटील यांनी सांगितले की, भविष्यात तालुकास्तरावरही योजना पोहोचवण्यासाठी दौरे आयोजित करण्यात येणार आहेत. कार्यक्रमास मोठ्या संख्येने उपस्थित राहून महामंडळाच्या योजनांची माहिती घेण्याचे व आपली तक्रार निवारण करून घेण्याचे आवाहन विभागीय समन्वयक प्रवीण आगवण पाटील यांनी केले आहे. ******

मुख्यमंत्री सहाय्यता निधी व धर्मादाय रुग्णालय मदत कक्षाशी जिल्ह्यातील तीन रुग्णालये संलग्नीत

पात्र व गरजू रुग्णांना 1 जानेवारीपासून 14 लाख रुपयांचे अर्थसहाय्य वितरीत हिंगोली (जिमाका), दि. 25: मुख्यमंत्री सहाय्यता निधी व धर्मादाय रुग्णालय मदत कक्ष पात्र व गरजू रुग्णांसाठी वरदान ठरत आहे. 1 जानेवारी ते आतापर्यंत या कक्षामार्फत हिंगोली जिल्ह्यातील 17 रुग्णांना 14 लाख 10 हजार रुपयांची मदत वितरीत करण्यात आली आहे, अशी माहिती मुख्यमंत्री सहाय्यता निधी कक्षाचे नोडल अधिकारी डॉ.नामदेव कोरडे यांनी दिली आहे. राज्यातील नागरिकांना दुर्धर आजारांवरील उपचारासाठी मुख्यमंत्री सहाय्यता निधी कक्षाकडून आर्थिक सहाय्य देण्यात येते. तसेच आपत्ती प्रसंगीही आर्थिक मदत देण्यात येते. यासाठी राज्यातील कानाकोपऱ्यातून मदत मिळविण्यासाठी नागरिक मंत्रालयात जात असत. परंतु नागरिकांना या सेवा सहजपणे त्यांच्या जिल्ह्याच्या ठिकाणी उपलबध व्हाव्यात, म्हणून आता प्रत्येक जिल्ह्याच्या ठिकाणी मुख्यमंत्री सहाय्यता निधी व धर्मादाय रुग्णालय मदत कक्षाची स्थापना करण्यात आली आहे. सध्या हिंगोली येथे हा कक्ष जिल्हाधिकारी कार्यालयाच्या इमारतीत कार्यरत आहे. वैद्यकीय मदत मिळण्यासाठी मुख्यमंत्री सहाय्यता निधी व धर्मादाय रुग्णालय मदत कक्षाशी संलग्नीत हिंगोली जिल्ह्यातील उर्मिला हॉस्पिटल नांदेड रोड, हिंगोली, नाकाडे हॉस्पिटल हिंगोली, जिल्हा सामान्य रुग्णालय हिंगोली या तीन रुग्णालयांचा समावेश आहे. या निधीच्या मदतीतून रुग्ण या रुग्णालयात उपचार करुन घेतात. गरजू व पात्र रुग्णांनी या उपक्रमांचा लाभ घ्यावा,असे आवाहन करण्यात आले आहे. अधिक माहितीसाठी हिंगोली जिल्हाधिकारी कार्यालयातील मुख्यमंत्री सहायता निधी व धर्मादाय रुग्णालय मदत कक्ष येथे संपर्क साधावा, असे डॉ. कोरडे यांनी केले आहे. *******

हिंगोली जिल्ह्यासाठी उद्या ऑरेंज अलर्ट जाहीर

* प्रादेशिक हवामानशास्त्र केंद्र मुंबईकडून सतर्कतेचा इशारा; नागरिकांना खबरदारी घेण्याचे आवाहन हिंगोली (जिमाका), दि. 25: प्रादेशिक हवामानशास्त्र केंद्र, मुंबई यांनी दिलेल्या हवामान अंदाजानुसार हिंगोली जिल्ह्यात दि. 25 जुलै 2025 रोजी येलो अलर्ट तर दि. 26 जुलै 2025 रोजी ऑरेंज अलर्ट घोषित करण्यात आलेला आहे. या कालावधीत जिल्ह्यात तुरळक ठिकाणी ताशी 30 ते 40 किमी वेगाने वादळी वारे वाहण्याची शक्यता असून, विजेच्या कडकडाटासह आणि ढगांच्या गडगडाटासह मुसळधार ते अतिमुसळधार स्वरूपाचा पाऊस पडण्याचा इशारा देण्यात आला आहे. या नैसर्गिक स्थितीच्या पार्श्वभूमीवर नागरिकांनी आवश्यक ती खबरदारी घ्यावी, असे आवाहन प्रशासनाकडून करण्यात आले आहे. संभाव्य धोका टाळण्यासाठी खालील मार्गदर्शक सूचना लागू करण्यात आल्या आहेत: काय करावे: विजेच्या गडगडाटासह पावसाची शक्यता असल्यास बाहेर जाणे टाळा. मोकळ्या जागेत असल्यास सखल भागात जाऊन गुडघ्यात डोके घालून बसा. विजा चमकत असल्यास घरात किंवा सुरक्षित इमारतीत आश्रय घ्या. बाल्कनी, छत किंवा ओट्यावर थांबू नका. घरातील विजेची उपकरणे बंद करा. तारांचे कुंपण, विजेचे खांब व इतर धातूच्या वस्तूंपासून दूर रहा. पाण्यात उभे असल्यास तत्काळ सुरक्षित जागी हलवा. काय करू नये: विजा चमकत असताना लँडलाईन फोन, विद्युत उपकरणांचा वापर, शॉवरखाली अंघोळ किंवा बेसिनच्या नळाला स्पर्श करू नये. धातूच्या तंबू किंवा शेडमध्ये आसरा घेऊ नका. उंच झाडाखाली थांबू नका. धातूच्या उंच मनोऱ्याजवळ थांबू नका. उघड्या दरवाजातून किंवा खिडकीतून वीज पाहण्याचा प्रयत्न करू नका. हवामान खात्याच्या सूचनांनुसार जिल्हा प्रशासन सतर्क असून आपत्ती व्यवस्थापन यंत्रणा तयार ठेवण्यात आली आहे. नागरिकांनी सामाजिक माध्यमांवरील अपप्रचार टाळून अधिकृत माहितीवर विश्वास ठेवावा, असेही प्रशासनाकडून स्पष्ट करण्यात आले आहे. *******

हिंगोलीत 27 वी सब-ज्युनियर राज्यस्तरीय फेन्सिंग स्पर्धा ८ ऑगस्टपासून • जिल्हाधिकाऱ्यांकडून आयोजनाबाबत आढावा

हिंगोली (जिमाका), दि. 24 : येथील जिल्हाधिकारी कार्यालयात 27 वी राज्यस्तरीय सब-ज्युनियर फेन्सिंग स्पर्धा आयोजनाच्या अनुषंगाने जिल्हाधिकारी राहुल गुप्ता यांच्या अध्यक्षतेखाली आज आढावा बैठक संपन्न झाली. या बैठकीत जिल्हाधिकारी श्री. गुप्ता यांनी आयोजनासंदर्भात महत्त्वाच्या बाबीवर आढावा घेऊन संबंधित यंत्रणांना सूचना दिल्या. या बैठकीस निवासी जिल्हाधिकारी अभिमन्यू बोधवड, जिल्हा क्रीडा अधिकारी राजेश मारावार, क्रीडा अधिकारी आत्माराम बोथीकर, वैद्यकीय अधिकारी डॉ. विशाल पवार, नगरपालिका उपमुख्याधिकारी प्रकाश साबळे, पोलीस विभागाचे अखिल जब्बार व अतुल बोरकर, सार्वजनिक बांधकाम विभागाचे ए. ओ. कटोळे, ग्रामीण पोलीस स्टेशनचे पोलीस निरीक्षक एस. पी. डोंगरे, हिंगोली जिल्हा फेन्सिंग संघटनेचे अध्यक्ष कल्याण देशमुख, सचिव संजय भुमरे, सहसचिव नरेंद्र रायलवार आणि राष्ट्रीय खेळाडू संदीप वाघ आदी उपस्थित होते. यावेळी जिल्हाधिकारी राहुल गुप्ता यांनी दि. 8 ऑगस्ट ते दि. 10 ऑगस्ट रोजी आयोजित राज्यस्तरीय सब ज्युनिअर फेन्सिंग स्पर्धेसाठी आवश्यक असलेल्या बाबीचा आढावा घेतला. यामध्ये जिल्हा क्रीडा संकुलात स्पर्धा होत असल्यामुळे त्या ठिकाणी खेळाडूंना सोयी-सुविधा उपलब्ध करण्यासाठी त्यांनी आवश्यक किरकोळ दुरुस्ती याचबरोबर स्वच्छतेची कामे करण्याच्या सूचना दिल्या. स्पर्धा कालावधीत खेळाडूंना भोजन, निवास या संदर्भात आढावा घेऊन आवश्यक सूचना केल्या. स्पर्धेच्या ठिकाणी पोलीस बंदोबस्त, आरोग्य विभागामार्फत सुसज्ज रुग्णवाहिका व वैद्यकीय पथक ठेवावेत. जिल्हा क्रीडा अधिकारी राजेश मारावार यांनी आवश्यक ती तयारी करावी, अशा सूचनाही जिल्हाधिकारी राहुल गुप्ता यांनी दिल्या. या बैठकीचे प्रास्ताविक असोसिएशनचे अध्यक्ष कल्याण देशमुख यांनी केले. या बैठकीत 14 वर्षांखालील मुला-मुलींसाठीची ही राज्यस्तरीय फेन्सिंग स्पर्धा दिनांक 8 ते 10 ऑगस्ट 2025 दरम्यान जिल्हा क्रीडा संकुल, लिंबाळा (मक्ता), हिंगोली येथे संपन्न होणार आहे. या स्पर्धेच्या यशस्वी आयोजनासाठी सुरक्षा, निवास, भोजन, आरोग्य तपासणी, आणि मैदानी व्यवस्था याबाबत सविस्तर चर्चा झाली. हिंगोली जिल्ह्याला प्रथमच अशा दर्जेदार फेन्सिंग स्पर्धेचे आयोजन करण्याचा मान लाभत असल्याने सर्व विभागांनी समन्वयाने काम करण्याचे ठरवण्यात आले. **