उमेदवाराबाबत माहिती जाणून घेण्यासाठी संकेतस्थळ व मोबाईल ॲपचा करा वापर - जिल्हाधिकारी

हिंगोली (जिमाका), दि.05: लोकसभा मतदार संघात निवडणुकीसाठी उमेदवारांकडून दाखल करण्यात येणारे नामनिर्देशन पत्र व त्यासोबतचे शपथपत्र भारत निवडणूक आयोगाच्या https://affidavit.eci.gov.in या संकेतस्थळावर नियमितपणे अपलोड करण्यात येत आहे. त्यामुळे नागरिकांना उमेदवारांची माहिती सहजपणे जाणून घेता येणार आहे. यासोबतच ‘नो युवर कॅन्डीडेट’ (Know Your Candidate-KYC) या ॲपच्या माध्यमातूनही उमेदवारांची माहिती व गुन्हेगारी पूर्ववृत्तबाबत माहिती जाणून घेता येणार आहे. हे ॲप अड्रॉईड व आयओएस दोन्ही प्लॅटफॉर्मसाठी प्लेस्टोअरवर उपलब्ध आहे. नागरिकांनी या संकेतस्थळावरून व मोबाईल ॲप द्वारे उमेदवारांनी सादर केलेली माहिती जाणून घ्यावी, असे आवाहन जिल्हा निवडणूक अधिकारी जितेंद्र पापळकर यांनी केले आहे. *****