निवडणूक निरीक्षक (सामान्य) श्रीमती एम.एस. अर्चना यांची माध्यम प्रमाणीकरण व संनियंत्रण समिती कक्षाला भेट

हिंगोली (जिमाका), दि. 04 : लोकसभा सार्वत्रिक निवडणूक-2024 च्या अनुषंगाने 15-हिंगोली लोकसभा मतदारसंघाचे निवडणूक निरीक्षक (सामान्य) श्रीमती एम. एस. अर्चना यांनी आज जिल्हा माहिती कार्यालयात स्थापन जिल्हा माध्यम प्रमाणीकरण आणि संनियंत्रण समिती कक्षाला भेट देत पाहणी केली. हिंगोली लोकसभा मतदारसंघाच्या निवडणूक निरीक्षक (सामान्य) म्हणून श्रीमती अर्चना काम पाहणार आहेत. उप जिल्हा निवडणूक अधिकारी रामेश्वर रोडगे, उपजिल्हाधिकारी समाधान घुटुकडे, श्रीमती एम.एस. अर्चना यांच्या संपर्क अधिकारी पुष्पा पवार, जिल्हा माध्यम व प्रमाणन सनियंत्रण समितीचे सदस्य सचिव तथा जिल्हा माहिती अधिकारी प्रभाकर बारहाते, समितीचे सदस्य प्राचार्य सुरेश कोल्हे, रमेश कदम, सहायक माहिती अधिकारी चंद्रकांत कारभारी, माध्यम कक्षातील कैलास लांडगे, श्रीमती जयश्री नाईक, परमेश्वर सुडे, नवनाथ ठोंबरे, दत्तात्रय मुळे पाटील, राजकुमार टिळे, गोरखनाथ कदम, भीमाशंकर कदम आदी यावेळी उपस्थित होते. निवडणूक‍ निरीक्षक (सामान्य) श्रीमती एम. एस. अर्चना यांनी माध्यम प्रमाणीकरण आणि संनियंत्रण समितीच्या राजकीय जाहिरातींचे प्रमाणीकरण, वृत्तवाहिन्यांवरील जाहिरातींचे संनियंत्रण, पेड न्यूजवर लक्ष ठेवणे, निवडणूक आचारसंहिता कालावधीत माध्यमांमध्ये येणारे वृत्त वाचन करुन जिल्हा निवडणूक निर्णय अधिकारी यांच्या ते निदर्शनास आणून देणे, पेड न्यूजचे अहवाल, माध्यमांना निवडणुकीसंदर्भातील माहिती वेळेत उपलब्ध करुन देणे आदी बाबींची माहिती घेतली. यावेळी प्रसारमाध्यमांना निवडणूकविषयक विविध आढावा बैठकांचे वृत्त, पत्रकार परिषदांचे आयोजन, वृत्तपत्रांतील वृत्ताचे संकलन करून त्यावर आवश्यक कार्यवाही करणे, निवडणूकविषयक बातम्यांबाबत अहवाल तयार करून तो भारत निवडणूक आयोग व राज्य निवडणूक आयोगाला सादर करणे याबाबतची माहिती पथकप्रमुख तथा जिल्हा माहिती अधिकारी प्रभाकर बारहाते यांनी निवडणूक निरीक्षकांना दिली. जिल्हा संपर्क केंद्र व तक्रार निवारण कक्षाला भेट निवडणूक निरीक्षक (सामान्य) श्रीमती एम. एस. अर्चना यांनी जिल्हा नियोजन कार्यालयात स्थापन करण्यात आलेल्या जिल्हा संपर्क केंद्र व तक्रार निवारण कक्षाला भेट देऊन पाहणी केली. पथक प्रमुख सुधाकर जाधव यांनी जिल्हा संपर्क केंद्र व तक्रार निवारण कक्षाकडे 1950 व 18002330820 हे दोन निशुल्क दूरध्वनी क्रमांक आहेत. हे संपर्क व तक्रार निवारण केंद्र निवडणूक कालावधीमध्ये 24X7 सुरु असून, तक्रार निवारण कक्षातील कार्यान्वित 1950 व 18002330820 या निशुल्क क्रमांकावर येणाऱ्या कॉल्सची तात्काळ दखल घेत कार्यवाही करण्यात येत असल्याची माहिती दिली. निवडणूक निरीक्षक श्रीमती एम. एस. अर्चना यांनी येथील कामकाजाबाबत समाधान व्यक्त करत निवडणूक कालावधीत या कक्षाने अधिक सक्रियपणे काम करण्याच्या सूचना दिल्या. ******