सेवा संकल्प अभियानांतर्गत निशाणा येथे विविध उपक्रम

*स्वच्छता, वृक्षारोपण, आरोग्य तपासणीसह नागरिकांना विविध प्रमाणपत्रांचे वाटप*

हिंगोली, दि. २६ (जिमाका) : सेवा संकल्प अभियानांतर्गत ‘सेवा माझे योगदान’ या उपक्रमाच्या माध्यमातून औंढा नागनाथ तालुक्यातील ग्रामपंचायत निशाणा येथे विविध उपक्रमांचे आयोजन करण्यात आले. उपमुख्य कार्यकारी अधिकारी (सामान्य प्रशासन) श्रीमती समृद्धी दिवाणे यांच्या उपस्थितीत स्वच्छता ही सेवा, प्लास्टिकमुक्त गाव, वृक्षारोपण, आरोग्य तपासणी तसेच सुशासन व नागरिक सेवा उपक्रम राबविण्यात आले.

यावेळी ग्रामस्थांना प्लास्टिकमुक्त गाव अभियानांतर्गत प्लास्टिक कचऱ्याचे योग्य व्यवस्थापन, प्लास्टिकचा वापर टाळण्याचे महत्त्व आणि स्वच्छतेबाबत मार्गदर्शन करण्यात आले. तसेच गाव परिसरात वृक्षारोपण करण्यात आले. नागरिकांसाठी आरोग्य तपासणी उपक्रमही राबविण्यात आला.

‘सुशासन व नागरिक सेवा’ उपक्रमांतर्गत नागरिकांना आवश्यक विविध प्रमाणपत्रांचे वाटप करण्यात आले. यामध्ये जन्म प्रमाणपत्र, विवाह प्रमाणपत्र, महिला शेतकरी प्रमाणपत्र तसेच आयुष्मान भारत कार्डचे वाटप करण्यात आले. शासनाच्या विविध नागरिकाभिमुख सेवा स्थानिक पातळीवर उपलब्ध करून देत सेवा सुलभ व गतिमान करण्यावर यावेळी भर देण्यात आला.

या उपक्रमास ग्रामस्थ, संबंधित अधिकारी-कर्मचारी, प्रशासक तसेच ग्रामपंचायत अधिकारी उपस्थित होते. सेवा संकल्प अभियानाच्या माध्यमातून शासनाच्या विविध योजना व सेवा नागरिकांपर्यंत प्रभावीपणे पोहोचविण्यासाठी प्रशासनाकडून विविध उपक्रम राबविण्यात येत आहेत.