हिंगोली जिल्ह्यातील ५६३ ग्रामपंचायतींमध्ये ‘प्लास्टिकमुक्त दिन’ उत्साहात

⏺️उपमुख्य कार्यकारी अधिकारी केशव गड्डापोड यांची पिंपळदरी ग्रामपंचायतीला भेट

⏺️ ‘माझं गाव, आरोग्य संपन्न गाव’ अभियान राबविण्याचे आवाहन

हिंगोली, दि. २६ (जिमाका) : जिल्ह्यातील ५६३ ग्रामपंचायतींमध्ये ‘प्लास्टिकमुक्त दिन’ अभियान उत्साहात राबविण्यात आले. मुख्य कार्यकारी अधिकारी विवेक गायकवाड यांच्या मार्गदर्शनाखाली ग्रामपंचायतींमध्ये विविध उपक्रम घेण्यात आले. औंढा नागनाथ तालुक्यातील पिंपळदरी ग्रामपंचायतीत उपमुख्य कार्यकारी अधिकारी केशव गड्डापोड यांच्या उपस्थितीत प्लास्टिकमुक्तीचा संदेश देण्यात आला.

पिंपळदरी येथील जिल्हा परिषद प्राथमिक शाळेला भेट देऊन गड्डापोड यांनी शैक्षणिक कामकाजाची पाहणी केली. यावेळी त्यांनी विद्यार्थ्यांशी संवाद साधत अध्यापन केले. तब्बल दोन तास विविध वर्गांमध्ये जाऊन त्यांनी विद्यार्थ्यांना बाराखडी तसेच मूलभूत शैक्षणिक घटकांचे मार्गदर्शन केले. त्यांच्या या उपक्रमाला शिक्षक आणि ग्रामस्थांचा उत्स्फूर्त प्रतिसाद मिळाला.

पिंपळदरी परिसर आदिवासीबहुल असून गावाचा सामाजिक आणि आरोग्यविषयक दर्जा उंचावण्यासाठी ‘माझं गाव, आरोग्य संपन्न गाव’ अभियान प्रभावीपणे राबवावे, असे आवाहन गड्डापोड यांनी केले.

गावात स्वच्छता, आरोग्य आणि विकासाची कामे सातत्याने राबविण्याची गरज त्यांनी व्यक्त केली. यापूर्वी पिंपळदरी ग्रामपंचायतीमध्ये ‘मुख्यमंत्री समृद्ध पंचायतराज अभियान’ राबविण्यात आले आहे. या पार्श्वभूमीवर ग्रामपंचायतीने यंदाही अभियानात सक्रिय सहभाग घेऊन गावाच्या विकासाला गती द्यावी, असे त्यांनी सांगितले.

यावेळी ग्रामसेवक, शाळेचे मुख्याध्यापक, शिक्षक, ग्रामपंचायत कर्मचारी आणि ग्रामस्थ उपस्थित होते.