दुष्काळाच्या पार्श्वभूमीवर अधिकारी-कर्मचाऱ्यांना पूर्वपरवानगीशिवाय रजा नाही
जिल्हाधिकारी राहुल गुप्ता यांचे निर्देश
हिंगोली, दि. २८ (जिमाका) : खरीप हंगाम २०२६ मधील Trigger-1 (प्रथम कळ) अंतर्गत जिल्ह्यात दुष्काळी परिस्थिती घोषित करण्यात आली आहे. या पार्श्वभूमीवर दुष्काळ निवारणाची कामे आणि नागरिकांना आवश्यक सेवा-सुविधा उपलब्ध करून देण्याच्या कामांना प्राधान्य देण्यात यावे, असे निर्देश जिल्हाधिकारी राहुल गुप्ता यांनी जिल्ह्यातील सर्व कार्यालय प्रमुखांना दिले आहेत.
दुष्काळी परिस्थितीच्या कालावधीत जिल्हाधिकारी यांची पूर्वपरवानगी घेतल्याशिवाय अधिनस्त अधिकारी-कर्मचाऱ्यांची कोणत्याही प्रकारची रजा मंजूर करू नये, असे स्पष्ट निर्देश देण्यात आले आहेत. अत्यंत अपरिहार्य आणि अपवादात्मक परिस्थितीत रजेची आवश्यकता असल्यास संबंधित बाब जिल्हाधिकाऱ्यांच्या निदर्शनास आणून, पूर्वपरवानगी प्राप्त झाल्यानंतरच रजा मंजूर करावी.
या कालावधीत सर्व अधिकारी-कर्मचाऱ्यांनी कार्यालयीन कर्तव्यावर नियमित उपस्थित राहून दुष्काळाच्या अनुषंगाने सोपविण्यात येणारी कामे तत्परतेने, जबाबदारीने आणि प्राधान्याने पूर्ण करावीत. जिल्हाधिकारी यांच्या पूर्वपरवानगीशिवाय कोणताही अधिकारी अथवा कर्मचारी कर्तव्यावरून अनुपस्थित राहणार नाही, याची दक्षता कार्यालय प्रमुखांनी घ्यावी.
सदर सूचनांचे काटेकोरपणे पालन करण्याचे निर्देश देण्यात आले आहेत. अनधिकृतपणे अनुपस्थित राहणाऱ्या अधिकारी-कर्मचाऱ्यांविरुद्ध प्रचलित सेवा नियमांनुसार शिस्तभंगविषयक कार्यवाही करण्यात येईल, असेही स्पष्ट करण्यात आले आहे.
मदत व पुनर्वसन विभागाच्या शासन निर्णय क्रमांक समिती-२०२६/प्र.क्र.८२/मदत-२, दि. २५ सप्टेंबर २०२६ अनुषंगाने या परिपत्रकाची तत्काळ प्रभावाने अंमलबजावणी करण्याचे निर्देश जिल्हाधिकारी राहुल गुप्ता यांनी दिले आहेत.
No comments:
Post a Comment