सामाजिक न्याय व विशेष सहाय्य विभागाच्या वतीने
माहितीचा अधिकार दिवस कार्यक्रम उत्साहात साजरा
हिंगोली, दि. २८ (जिमाका) : सामाजिक न्याय व विशेष सहाय्य विभागाच्या वतीने माहितीच्या अधिकाराचा प्रचार व प्रसार करण्याच्या उद्देशाने माहितीचा अधिकार दिवस कार्यक्रम आज भारतरत्न डॉ. बाबासाहेब आंबेडकर सामाजिक न्याय भवन, हिंगोली येथे उत्साहात साजरा करण्यात आला. सहाय्यक आयुक्त, समाज कल्याण श्रीमती गीता गुठ्ठे यांच्या मार्गदर्शनाखाली सकाळी हा कार्यक्रम घेण्यात आला.
कार्यक्रमाच्या अध्यक्षस्थानी वरिष्ठ समाज कल्याण निरीक्षक श्रीमती शकुंतला घुगे होत्या. प्रमुख मार्गदर्शक म्हणून शिवाजी महाविद्यालय, हिंगोलीचे प्रा. धाराशिव शिराळे उपस्थित होते. प्रमुख पाहुणे म्हणून डॉ. बाबासाहेब आंबेडकर समाज भूषण पुरस्कारार्थी बबनराव मोरे, बार्टीचे जिल्हा प्रकल्प अधिकारी सिद्धार्थ गोवंदे, गृहपाल श्रीमती एस. व्ही. ढोणे, गृहपाल श्रीमती ए. ए. अवचार, लघुटंकलेखक श्रीमती पी. पी. गीते आदी मान्यवर उपस्थित होते.
प्रारंभी उपस्थित मान्यवरांच्या हस्ते महामानव डॉ. बाबासाहेब आंबेडकर यांच्या प्रतिमेचे पुष्पपूजन करून अभिवादन करण्यात आले. यावेळी मान्यवरांचे पुष्पगुच्छ देऊन स्वागत करण्यात आले. कार्यक्रमाचे प्रास्ताविक वरिष्ठ समाज कल्याण निरीक्षक श्रीमती शकुंतला घुगे यांनी केले.
माहितीचा अधिकार अधिनियम, २००५ या विषयावर प्रा. धाराशिव शिराळे यांनी उपस्थितांना सखोल मार्गदर्शन केले. माहितीचा अधिकार हा नागरिकांना शासनाच्या कामकाजातील पारदर्शकता व उत्तरदायित्वाबाबत माहिती मिळवून देणारा महत्त्वपूर्ण कायदा असून, नागरिकांनी त्याचा योग्य पद्धतीने वापर करण्याचे आवाहन यावेळी करण्यात आले.
कार्यक्रमाचे सूत्रसंचालन समतादूत सुरेश पठाडे यांनी केले, तर आभार प्रदर्शन समतादूत श्रीमती सुनिता आवटे यांनी केले. कार्यक्रमास जिल्ह्यातील सुमारे २०० ते २५० नागरिकांची उपस्थिती होती. कार्यक्रमाच्या यशस्वी आयोजनासाठी सामाजिक न्याय व विशेष सहाय्य विभागातील अधिकारी व कर्मचाऱ्यांनी सहकार्य केले.
00000
No comments:
Post a Comment