जिल्हाधिकारी कार्यालयात शौर्य दिन साजरा
सन १९७१ च्या युद्धातील माजी सैनिकांचा शॉल, श्रीफळ व पुष्पगुच्छ देऊन सन्मान
हिंगोली, दि. २९ (जिमाका) : भारतीय सैन्य दलाच्या शौर्यपूर्ण कामगिरीचे स्मरण आणि माजी सैनिकांप्रती कृतज्ञता व्यक्त करण्यासाठी जिल्हाधिकारी कार्यालयातील सभागृहात आज शौर्य दिन साजरा करण्यात आला. यावेळी सन १९७१ च्या भारत-पाकिस्तान युद्धात शौर्याचे कार्य बजावलेल्या माजी सैनिकांचा शॉल, श्रीफळ व पुष्पगुच्छ देऊन सन्मान करण्यात आला.
दिनांक २९ सप्टेंबर २०१६ रोजी भारतीय सैन्य दलाने पाकिस्तानच्या हद्दीत दहशतवादी तळांवर सर्जिकल स्ट्राइक करून दहशतवाद्यांचा खात्मा केला. भारतीय सैन्याच्या या शौर्यपूर्ण व अभिमानास्पद कामगिरीची माहिती जनतेपर्यंत व्यापक स्वरूपात पोहोचविण्यासाठी तसेच माजी सैनिकांचा सन्मान करण्याच्या उद्देशाने दरवर्षी २९ सप्टेंबर रोजी शौर्य दिन साजरा करण्यात येतो.
कार्यक्रमाची सुरुवात निवासी उपजिल्हाधिकारी तथा जिल्हा सैनिक कल्याण अधिकारी अभिमन्यू बोधवड, उपजिल्हाधिकारी अनिल माचेवाड, लेखा अधिकारी, माजी सैनिक संघटनेचे पदाधिकारी, वीरमाता व वीरपिता यांच्या हस्ते दीपप्रज्वलन करून करण्यात आली. त्यानंतर भारतमाता व वीर जवानांच्या प्रतिमेस पुष्पहार अर्पण करून अभिवादन करण्यात आले.
जिल्हा सैनिक कल्याण कार्यालयाचे कल्याण संघटक ऑनरेरी कॅप्टन तुकाराम रामराव मुकाडे यांनी कार्यक्रमाचे प्रास्ताविक केले. निवासी उपजिल्हाधिकारी अभिमन्यू बोधवड यांनी शौर्य दिनाचे महत्त्व विशद केले. यावेळी सन १९७१ च्या युद्धातील माजी सैनिकांचा सन्मान करण्यात आला. राष्ट्रगीताने कार्यक्रमाची सांगता झाली. जिल्हा सैनिक कल्याण कार्यालयाचे ऑनरेरी कॅप्टन तुकाराम रामराव मुकाडे यांनी आभार मानले.
कार्यक्रमास जिल्ह्यातील माजी सैनिक संघटनेचे अध्यक्ष सय्यद मीर, जिल्हा सैनिक कल्याण कार्यालयाचे कल्याण संघटक ऑ. कॅप्टन तुकाराम रामराव मुकाडे, संघपाल खराटे, कडूजी टापरे, पाईकराव काशिनाथ सुदामराव तसेच जिल्हाधिकारी कार्यालयातील अधिकारी व कर्मचारी उपस्थित होते. शासनाच्या निर्देशांचे पालन करून साधेपणाने कार्यक्रमाचे आयोजन करण्यात आले.
No comments:
Post a Comment