जिल्हा परिषद येथे आंतरराष्ट्रीय माहिती अधिकार दिन उत्साहात साजरा

 जिल्हा परिषद येथे आंतरराष्ट्रीय माहिती अधिकार दिन उत्साहात साजरा

        हिंगोली, दि. 30 सप्टेंबर (जिमाका) : जिल्हा परिषद, हिंगोली येथे २८ सप्टेंबर रोजी आंतरराष्ट्रीय माहिती अधिकार दिन विविध उपक्रमांच्या माध्यमातून उत्साहात साजरा करण्यात आला. अतिरिक्त मुख्य कार्यकारी अधिकारी डॉ. सुधीर ठोंबरे यांच्या अध्यक्षतेखाली अधिकारी व कर्मचाऱ्यांसाठी माहितीचा अधिकार अधिनियम, २००५ बाबत मार्गदर्शनपर कार्यक्रमाचे आयोजन करण्यात आले.

        कार्यक्रमात मार्गदर्शक म्हणून पंचायत समिती औंढा नागनाथचे सहाय्यक गटविकास अधिकारी आर. बी. परांडकर यांनी माहितीचा अधिकार अधिनियमातील विविध तरतुदी, माहिती मागणी करण्याची प्रक्रिया, अर्ज सादर करण्याची कार्यपद्धती तसेच प्रथम व द्वितीय अपीलाची प्रक्रिया याबाबत सविस्तर मार्गदर्शन केले. प्रशासनाच्या कामकाजात पारदर्शकता व उत्तरदायित्व आणि नागरिकांना माहिती मिळण्याच्या अधिकाराचे महत्त्व त्यांनी स्पष्ट केले.

        अतिरिक्त मुख्य कार्यकारी अधिकारी डॉ. सुधीर ठोंबरे यांनी आपल्या मनोगतात माहितीचा अधिकार हा नागरिकांच्या सक्षमीकरणासाठी महत्त्वपूर्ण कायदा असल्याचे सांगितले. माहितीच्या अधिकाराचा प्रभावी व जबाबदारीने, कायदेशीर तरतुदींनुसार वापर करण्याचे आवाहन त्यांनी केले. तसेच सार्वजनिक प्राधिकरणांनी आपल्या कार्यपद्धतीत पारदर्शकता व उत्तरदायित्व कायम ठेवण्याची आवश्यकता असल्याचे त्यांनी नमूद केले.

        यावेळी माहिती अधिकार अर्जावर विहित कालमर्यादेत कार्यवाही करणे, सार्वजनिक प्राधिकरणांची माहिती उपलब्ध करून देण्याची जबाबदारी, प्रथम व द्वितीय अपीलाची कार्यपद्धती तसेच माहितीचा अधिकार अधिनियमाच्या प्रभावी अंमलबजावणीसंदर्भात उपस्थित अधिकारी व कर्मचाऱ्यांना मार्गदर्शन करण्यात आले.

        कार्यक्रमास प्रकल्प संचालक डॉ. नामदेव केंद्रे, मुख्य लेखा व वित्त अधिकारी दिगंबर माडे, उपमुख्य कार्यकारी अधिकारी (सामान्य प्रशासन) श्रीमती समृद्धी दिवाणे, उपमुख्य कार्यकारी अधिकारी (पंचायत) श्री. गड्डापोड, उपमुख्य कार्यकारी अधिकारी (महिला व बाल विकास) विजय बोराटे, शिक्षणाधिकारी (योजना) संदीप सोनटक्के यांच्यासह जिल्हा परिषदेतील विविध विभागांचे अधिकारी व कर्मचारी उपस्थित होते.

        कार्यक्रमाच्या माध्यमातून ‘पारदर्शक प्रशासनासाठी माहितीचा अधिकार’ या विषयाबाबत जनजागृती करण्यात आली. नागरिकांना त्यांच्या माहितीच्या अधिकाराची जाणीव करून देतानाच प्रशासनातील पारदर्शकता, उत्तरदायित्व आणि लोकाभिमुखता अधिक बळकट करण्याचा संदेश यावेळी देण्यात आला.