गाव स्वच्छतेचा आता डिजिटल ‘आरसा’ ग्रा.पं.चे होणार स्वयं मूल्यांकन

 गाव स्वच्छतेचा आता डिजिटल ‘आरसा’  ग्रा.पं.चे होणार स्वयं मूल्यांकन

        हिंगोली, दि. २८ (जिमाका) : स्वच्छ भारत मिशन (ग्रामीण) टप्पा-2 अंतर्गत ग्रामीण भागातील स्वच्छता व्यवस्थेला अधिक सक्षम, पारदर्शक आणि शाश्वत करण्यासाठी ‘स्वच्छ सेवा आकलन’ उपक्रम राबविण्यात येत आहे. उपक्रमांतर्गत हिंगोली जिल्ह्यातील ग्रामपंचायतींचे वार्षिक डिजिटल स्वयंमूल्यांकन करण्यात येणार असून, ग्रामपंचायत स्तरावरील स्वच्छता सेवांची सद्यस्थिती आणि कार्यक्षमता तपासली जाणार आहे.

        हिंगोली जिल्हा परिषदेच्या मार्गदर्शनाखाली ग्रामपंचायतींच्या स्वच्छता विषयक कामकाजाचे आता डिजिटल पद्धतीने मूल्यांकन होणार आहे. स्वच्छ पाणी, घनकचरा व्यवस्थापन, द्रवरूप कचरा व्यवस्थापन, शौचालय वापर व देखभाल, सार्वजनिक स्वच्छता यासारख्या विविध निकषांवर ग्रामपंचायतींचे स्वयं मूल्यांकन करण्यात येईल. यामुळे स्वच्छता कामांत पारदर्शकता येऊन नागरिकांचा सहभाग वाढणार आहे.

३१ ऑक्टोबर पर्यंत करण्यात येणार स्वयमूल्यांकन

        ग्रामपंचायतींनी निर्धारित कालावधीत स्वयंमूल्यांकन प्रक्रिया पूर्ण करावी, असे आवाहन जिल्हा परिषदेचे मुख्य कार्यकारी अधिकारी विवेक गायकवाड यांनी केले आहे.‘स्वच्छ सेवा आकलना’मध्ये स्वच्छतेची स्थिती, शाश्वत, घनकचरा व्यवस्थापन, द्रव कचरा व्यवस्थापनाच्या साधनांचे कार्यान्वयन व देखभाल तसेच समुदायाचा सहभाग यावर भर दिला जाणार आहे.

२ ऑक्टोबरला विशेष ग्रामसभा

        ‘स्वच्छ सेवा आकलन’च्या तिसऱ्या टप्प्यात २ ऑक्टोबर ते ३१ ऑक्टोबर २०२६ या कालावधीत ग्रामपंचायतस्तरावर स्वयं-मूल्यांकन करण्यात येणार आहे. स्वयं-मूल्यांकनानंतर प्राप्त अहवाल तयार करून २ ऑक्टोबर २०२६ रोजी विशेष ग्रामसभा आयोजित करण्यात येणार आहे. या ग्रामसभेत अहवालावर चर्चा करून माहितीची पडताळणी केली जाणार आहे. चर्चेनंतर आवश्यक सुधारणा करून अंतिम माहिती पोर्टलवर सादर करण्याची प्रक्रिया पार पडणार आहे.

ग्रामपंचायतीची महत्त्वाची भूमिका

१. स्वच्छ सेवा आकलनाच्या प्रक्रियेत ग्रामपंचायत सचिवांची भूमिका महत्त्वाची आहे. ग्रामपंचायत सचिवांनी आपल्या ग्रामपंचायतीच्या लॉगिनमधून ई-ग्रामस्वराज पोर्टलवर ओडीएफ प्लस (मॉडेल) ग्रामपंचायतींची प्राप्त माहिती भरायची आहे.

२. त्यानंतर ही माहिती ग्रामसभेसमोर चर्चा व पडताळणी साठी ठेवून आवश्यक ठरावावर मंजुरी घेण्यात येणार आहे.

३. ग्रामसभेच्या मान्यतेनंतर आवश्यक सुधारणा करून अंतिम माहिती पोर्टलवर सादर करावी लागणार आहे.

मुख्य कार्यकारी अधिकारी यांचे मनोगत

        “हिंगोली जिल्ह्यातील अनेक ग्रामपंचायतींनी ओडीएफ प्लस आणि घनकचरा व्यवस्थापनात चांगले काम केले आहे. मात्र आता या कामाची डिजिटल पडताळणी होणे गरजेचे आहे. ग्रामपंचायतीने ई-ग्रामस्वराज पोर्टलवर भरलेली माहिती हीच खरी आरसा आहे. ती माहिती गावकऱ्यांसमोर मांडली तर पारदर्शकता वाढेल. सर्व ग्रामपंचायत अधिकारी, प्रशासक आणि सरपंचांनी ही प्रक्रिया गांभीर्याने घ्यावी.” - जि.प.चे मुख्य कार्यकारी अधिकारी विवेक गायकवाड