पदवीधर मतदारसंघाच्या प्रारूप मतदान
केंद्रांबाबत राजकीय पक्षांच्या प्रतिनिधींची बैठक
हिंगोली जिल्ह्यात ३६ प्रारूप मतदान केंद्रे प्रस्तावित
हिंगोली, दि. २८ (जिमाका) : भारत निवडणूक आयोगाने २२ सप्टेंबर २०२६ रोजी महाराष्ट्र विधान परिषदेच्या पदवीधर व शिक्षक मतदारसंघाच्या निवडणुकीचा कार्यक्रम जाहीर केला आहे. त्यानुसार ०५-औरंगाबाद विभाग पदवीधर मतदारसंघासाठी २३ ऑक्टोबर २०२६ रोजी मतदान होणार आहे. या निवडणुकीच्या अनुषंगाने हिंगोली जिल्ह्यातील प्रारूप मतदान केंद्रांबाबत मान्यताप्राप्त राजकीय पक्षांच्या जिल्हा प्रमुखांची बैठक जिल्हाधिकारी तथा जिल्हा निवडणूक अधिकारी राहुल गुप्ता यांच्या अध्यक्षतेखाली आज जिल्हाधिकारी कार्यालयात घेण्यात आली.
बैठकीस निवासी उपजिल्हाधिकारी अभिमन्यु बोधवड, उपजिल्हाधिकारी निवडणूक प्रगती चौंडेकर, नायब तहसीलदार (निवडणूक) विविध राजकीय पक्षाचे जिल्हा प्रमुख तसेच निवडणूक विभागातील अधिकारी व कर्मचारी उपस्थित होते. यावेळी ०५-औरंगाबाद विभाग पदवीधर मतदारसंघाच्या निवडणुकीसाठी हिंगोली जिल्ह्यात प्रस्तावित करण्यात आलेल्या प्रारूप मतदान केंद्रांची माहिती राजकीय पक्षांच्या प्रतिनिधींना देण्यात आली.
हिंगोली जिल्ह्यात ०५-औरंगाबाद विभाग पदवीधर मतदारसंघासाठी एकूण ३६ प्रारूप मतदान केंद्रे प्रस्तावित करण्यात आली आहेत. तालुकानिहाय प्रस्तावित मतदान केंद्रांची संख्या पुढीलप्रमाणे आहे— हिंगोली तालुका १०, कळमनुरी ०७, सेनगाव ०६, वसमत ०९ आणि औंढा नागनाथ ०४.
ही मतदान केंद्रांची यादी सध्या प्रारूप स्वरूपाची असून, सदर यादी ०५-औरंगाबाद विभाग पदवीधर मतदारसंघाचे विभागीय आयुक्त तथा निवडणूक निर्णय अधिकारी यांच्या कार्यालयास सादर करण्यात येणार आहे. त्यानंतर भारत निवडणूक आयोग तसेच मुख्य निवडणूक अधिकारी कार्यालयाकडून आवश्यक मान्यता प्राप्त झाल्यानंतर अंतिम मतदान केंद्रांची यादी जाहीर करण्यात येईल, अशी माहिती बैठकीत देण्यात आली.
बैठकीच्या शेवटी उपजिल्हा निवडणूक अधिकारी प्रगती चौंडेकर यांनी उपस्थितांचे आभार मानले.
00000
No comments:
Post a Comment