हिंगोली,( दि. २६) सप्टेंबर:-देशाचे पंतप्रधान नरेंद्र मोदी यांच्या संविधानिक पदावरील कारकीर्दीला २५ वर्षे पूर्ण झाल्याचे औचित्य साधून संपूर्ण महाराष्ट्रात १७ सप्टेंबर ते १७ ऑक्टोबर २०२६ या कालावधीत 'सेवा संकल्प अभियान' राबविण्यात येत आहे. या अभियानांतर्गत 'मुख्यमंत्री समृद्ध पंचायत राज अभियान' आणि विविध लोककल्याणकारी योजनांच्या प्रभावी अंमलबजावणीला गती देण्याचे प्रशासकीय निर्देश देण्यात आले आहेत.
शासन निर्णय (सामान्य प्रशासन विभाग, दि. ९ सप्टेंबर २०२६), ग्रामविकास विभाग (दि. १६ सप्टेंबर २०२६) आणि जिल्हा परिषद, मुख्य कार्यकारी अधिकारी यांच्या आदेशानुसार (दि. २२ सप्टेंबर २०२६) जिल्ह्याभरात विविध उपक्रम राबवले जात आहेत.
याच पार्श्वभूमीवर, आज दिनांक २६ सप्टेंबर २०२६ रोजी सकाळी ठीक ०७ वाजता जिल्हा परिषदेचे अतिरिक्त मुख्य कार्यकारी अधिकारी सुधीर ठोंबरे यांनी औंढा नागनाथ तालुक्यातील ग्रामपंचायत मौजे वसई येथे प्रत्यक्ष भेट देऊन पाहणी केली व ग्रामस्थांना मोलाचे मार्गदर्शन केले.
'सेवा माझे योगदान' मोहिमेअंतर्गत विविध उपक्रम
ग्रामपंचायत मौजे वसई येथे 'सेवा संकल्प अभियाना'अंतर्गत 'सेवा माझे योगदान' या मोहिमेखाली विविध कार्यक्रमांचे आयोजन करण्यात आले होते:
स्वच्छता ही सेवा (प्लास्टिकमुक्त गाव): गावात स्वच्छता मोहीम राबवून प्लास्टिकमुक्त गाव करण्यासाठी ग्रामस्थांमध्ये जनजागृती करण्यात आली.
वृक्षारोपण: पर्यावरण संवर्धन व हरित गावाच्या ध्येयाने परिसर वृक्षारोपण करण्यात आले.
सेवा ज्योत यात्रा: अभियानाचा संदेश घरोघरी पोहोचवण्यासाठी सेवा ज्योत यात्रेचे आयोजन करण्यात आले.
आरोग्य तपासणी शिबिर: ग्रामस्थांच्या आरोग्याची काळजी घेण्यासाठी मोफत तपासणी व सल्ला शिबिर आयोजित करण्यात आले.
सेवा सेतू अभियान (दाखले व प्रमाणपत्रे वाटप): नागरिकांना आवश्यक असणारे विविध शासकीय दाखले आणि प्रमाणपत्रांचे तात्काळ वाटप करण्यात आले.
अधिकारी व ग्रामस्थांची उपस्थिती
अतिरिक्त मुख्य कार्यकारी अधिकारी सुधीर ठोंबरे यांनी या सर्व उपक्रमांची पाहणी करून समाधान व्यक्त केले. शासकीय योजनांचा लाभ शेवटच्या घटकापर्यंत पोहोचवण्यासाठी ग्रामपंचायतीने पुढाकार घ्यावा, असे आवाहन त्यांनी केले.
या प्रसंगी ग्रामपंचायत मौजे वसईचे प्रशासक, ग्रामपंचायत अधिकारी, तसेच पंचायत समिती औंढा नागनाथचे सहाय्यक गटविकास अधिकारी आणि ग्रामस्थ मोठ्या संख्येने उपस्थित होते.
No comments:
Post a Comment