मसोड येथे ‘सेवा संकल्प’ अभियानांतर्गत आरोग्य शिबिर
१५६ रुग्णांची तपासणी; विविध आरोग्य तपासण्या व औषधोपचार
हिंगोली, दि. २८ (जिमाका) : प्राथमिक आरोग्य केंद्र, मसोड, ता. कळमनुरी येथे ‘सेवा संकल्प’ अभियानांतर्गत आरोग्य शिबिराचे आयोजन करण्यात आले. शिबिरात विविध आजारांची तपासणी करून आवश्यक औषधोपचार व आरोग्यविषयक मार्गदर्शन करण्यात आले. एकूण १५६ रुग्णांची तपासणी करण्यात आली.
जिल्हाधिकारी राहुल गुप्ता व मुख्य कार्यकारी अधिकारी विवेक गायकवाड यांच्या मार्गदर्शनाखाली आयोजित या शिबिरात जिल्हा आरोग्य अधिकारी डॉ. कैलास शेळके, जिल्हा शल्यचिकित्सक डॉ. नितीन तडस आणि जिल्हा क्षयरोग अधिकारी डॉ. देवेंद्र जायभाये यांच्या उपस्थितीत विविध आरोग्यविषयक उपक्रम राबविण्यात आले.
‘माझं गाव, आरोग्यसंपन्न गाव’ अभियानांतर्गत नागरिकांची आरोग्य तपासणी करण्यात आली. आयुष्मान भारत वंदना कार्ड काढण्यात आले. ‘तिशीचा पल्ला—तपासणी अन् सल्ला’ उपक्रमांतर्गत आरोग्य तपासणी करण्यात आली. क्षयरोगमुक्त भारत अभियानांतर्गत ५० नागरिकांची एक्स-रे तपासणी करण्यात आली.
गरोदर मातांची हिमोग्लोबिन, उच्च रक्तदाब व मधुमेह तपासणी करण्यात आली. आवश्यकतेनुसार रुग्णांना औषधोपचार व आरोग्यविषयक मार्गदर्शन देण्यात आले.
शिबिरात अस्थिरोग विभागात १८, नेत्र विभागात १९, गरोदर मातांची ३४, क्षयरोगासाठी एक्स-रे ५०, तर इतर सामान्य आजारांच्या ३५ रुग्णांची तपासणी करण्यात आली.
यावेळी डॉ. विशाल पवार, तालुका आरोग्य अधिकारी डॉ. डी. व्ही. सावंत, वैद्यकीय अधिकारी डॉ. बालाजी भाकरे, डॉ. शाहरुख शेख, डॉ. जनार्दन बोथीकर, डॉ. राम आसोले, डॉ. संभाजी भोकरे यांच्यासह आरोग्य विभागातील अधिकारी-कर्मचारी, आशा सेविका व ग्रामस्थ उपस्थित होते.
No comments:
Post a Comment