दुष्काळाच्या पार्श्वभूमीवर अधिकारी-कर्मचाऱ्यांना पूर्वपरवानगीशिवाय रजा मंजूर करू नये

 दुष्काळाच्या पार्श्वभूमीवर अधिकारी-कर्मचाऱ्यांना पूर्वपरवानगीशिवाय रजा मंजूर करू नये

        हिंगोली, दि. 28 (जिमाका) : खरीप हंगाम 2026 मधील Trigger-1 (प्रथम कळ) अंतर्गत जिल्ह्यात दुष्काळी परिस्थिती घोषित करण्यात आली आहे. या पार्श्वभूमीवर दुष्काळ निवारणाची कामे तसेच नागरिकांना आवश्यक सेवा-सुविधा उपलब्ध करून देण्याच्या कामांना प्राधान्य देण्याच्या सूचना जिल्ह्यातील सर्व कार्यालय प्रमुखांना देण्यात आल्या आहेत. 

        दुष्काळी परिस्थितीचा कालावधी लक्षात घेता, जिल्ह्यातील सर्व कार्यालय प्रमुखांनी जिल्हाधिकारी, हिंगोली यांची पूर्वपरवानगी घेतल्याशिवाय अधिनस्त अधिकारी-कर्मचाऱ्यांची कोणत्याही प्रकारची रजा मंजूर करू नये, असे निर्देश देण्यात आले आहेत. अत्यंत अपरिहार्य व अपवादात्मक परिस्थितीत रजेची आवश्यकता असल्यास संबंधित अधिकाऱ्यांनी त्याबाबतची बाब जिल्हाधिकाऱ्यांच्या निदर्शनास आणून, पूर्वपरवानगी प्राप्त केल्यानंतरच संबंधितांची रजा मंजूर करावी.

        या कालावधीत सर्व अधिकारी-कर्मचाऱ्यांनी आपल्या कार्यालयीन कर्तव्यावर नियमितपणे उपस्थित राहून दुष्काळाच्या अनुषंगाने सोपविण्यात येणारी कामे तसेच कार्यालयीन कामकाज तत्परतेने, जबाबदारीने आणि प्राधान्याने पार पाडावे, असेही निर्देश आहेत. जिल्हाधिकारी यांच्या पूर्वपरवानगीशिवाय कोणताही अधिकारी अथवा कर्मचारी कर्तव्यावरून अनुपस्थित राहणार नाही, याची दक्षता कार्यालय प्रमुखांनी घ्यावी, असे परिपत्रक जिल्हाधिकारी राहुल गुप्ता यांनी निर्गमित केले आहे. 

        सदर सूचनांचे काटेकोरपणे पालन करण्याचे निर्देश देण्यात आले असून, अनधिकृतपणे अनुपस्थित राहणाऱ्या अधिकारी-कर्मचाऱ्यांविरुद्ध प्रचलित सेवा नियमांनुसार शिस्तभंगविषयक कार्यवाही करण्यात येईल, अशी स्पष्ट सूचना देण्यात आली आहे.

        दरम्यान, मदत व पुनर्वसन विभागाच्या शासन निर्णय क्रमांक : समिती-2026/प्र.क्र.82/मदत-2, दि. 25 सप्टेंबर 2026 अनुषंगाने सदर परिपत्रकाची तात्काळ प्रभावाने अंमलबजावणी करण्याचे निर्देश देण्यात आले आहेत.