जिल्हा परिषद हिंगोलीतर्फे ‘सेवा संकल्प अभियान’च्या दुसऱ्या आठवड्यात विविध लोकाभिमुख उपक्रम

जिल्हा परिषद हिंगोलीतर्फे ‘सेवा संकल्प अभियान’च्या दुसऱ्या आठवड्यात विविध लोकाभिमुख उपक्रम

हिंगोली, दि. ३० सप्टेंबर (जिमाका) : राज्य शासनाच्या निर्देशानुसार जिल्हा परिषद हिंगोलीअंतर्गत १७ सप्टेंबर ते १७ ऑक्टोबर २०२६ या कालावधीत ‘सेवा संकल्प अभियान’ राबविण्यात येत आहे. अभियानाच्या दुसऱ्या आठवड्यात जिल्ह्यातील विविध विभाग, पंचायत समित्या व ग्रामपंचायतींच्या माध्यमातून नागरिकाभिमुख विविध उपक्रम प्रभावीपणे राबविण्यात आले.

घरकुल लाभार्थ्यांच्या घरी ‘आशीर्वादाचा दिवा’

जिल्हा ग्रामीण विकास यंत्रणेमार्फत विविध घरकुल योजनांच्या लाभार्थ्यांच्या घरी ‘आशीर्वादाचा दिवा’ प्रज्वलित करण्यात आला. प्रधानमंत्री आवास योजनेतील २१०, रमाई आवास योजनेतील १७०, शबरी आवास योजनेतील १२ आणि मोदी आवास योजनेतील ७० लाभार्थ्यांच्या घरी हा उपक्रम राबविण्यात आला.

कृषी योजनांच्या लाभार्थ्यांना विविध सुविधांचा लाभ

जिल्हा परिषदेच्या कृषी विभागामार्फत डॉ. बाबासाहेब आंबेडकर कृषी स्वावलंबन योजना आणि बिरसा मुंडा कृषी क्रांती योजनेअंतर्गत अनुसूचित जाती व अनुसूचित जमाती प्रवर्गातील लाभार्थ्यांना विविध कृषीविषयक घटकांचा लाभ देण्यात येत आहे.

डॉ. बाबासाहेब आंबेडकर कृषी स्वावलंबन योजना २०२६-२७ अंतर्गत नवीन विहीर, जुनी विहीर दुरुस्ती, इनवेल बोअरिंग, विद्युत जोडणी आकार, पीव्हीसी/एचडीपीई पाईप, परसबाग आदी घटकांचा लाभ देण्यात येत असून, एकूण २९६ लाभार्थ्यांपैकी २१ लाभार्थ्यांच्या घरी ‘आशीर्वादाचा दिवा’ प्रज्वलित करण्यात आला.

बिरसा मुंडा कृषी क्रांती योजना २०२६-२७ अंतर्गतही नवीन विहीर, जुनी विहीर दुरुस्ती, इनवेल बोअरिंग, विद्युत जोडणी आकार, पीव्हीसी/एचडीपीई पाईप, परसबाग आदी घटकांचा लाभ देण्यात येत आहे. या योजनेतील एकूण १४६ लाभार्थ्यांपैकी १४ लाभार्थ्यांच्या घरी ‘आशीर्वादाचा दिवा’ लावण्यात आला.

तसेच, जिल्हा परिषद सेस निधीतून कडबा कुट्टी यंत्र, जनावरांच्या गोठ्यावर सोलर दिवे आदी सुविधा उपलब्ध करून देण्यात येत असून, ३५ लाभार्थ्यांच्या घरी ‘आशीर्वादाचा दिवा’ प्रज्वलित करण्यात आला.

लाभार्थ्यांच्या घरी दिवा प्रज्वलित करून घरकुलाच्या चाव्यांचे वाटप

पंचायत समिती सेनगावअंतर्गत आजेगाव, लिंगदरी, खेरखेडा, काहाकर बु. आणि दाताडा बु. आदी ग्रामपंचायतींमध्ये प्रधानमंत्री आवास योजना तसेच इतर लोकाभिमुख योजनांच्या लाभार्थ्यांच्या घरी ‘आशीर्वादाचा दिवा’ प्रज्वलित करण्यात आला.

पंचायत समिती हिंगोलीअंतर्गत राहोली, भोगाव, नांदुरा आणि लासीना ग्रामपंचायतींमध्येही घरकुल लाभार्थ्यांच्या घरी ‘आशीर्वादाचा दिवा’ प्रज्वलित करण्यात आला. पूर्ण झालेल्या घरकुलांच्या लाभार्थ्यांना घरांच्या चाव्यांचे वाटप करण्यात आले.

दरम्यान, अतिरिक्त मुख्य कार्यकारी अधिकारी डॉ. सुधीर ठोंबरे यांनी राहोली बुद्रुक येथील डॉ. बाबासाहेब आंबेडकर कृषी स्वावलंबन योजनेच्या लाभार्थी श्रीमती रेखाताई लोणकर यांच्या घरकुल व फुलशेतीची पाहणी केली. संबंधित लाभार्थ्यांनी ५० फूट विहीर खोदली असून, दुष्काळी परिस्थितीतही विहिरीत ४५ फूट पाणी उपलब्ध आहे. तसेच त्यांनी फुलशेतीचे उत्कृष्ट नियोजन केले आहे. डॉ. ठोंबरे यांनी लाभार्थी शेतकऱ्यांची प्रत्यक्ष भेट घेऊन योजनेच्या माध्यमातून झालेल्या लाभाची माहिती जाणून घेतली व कामाबाबत समाधान व्यक्त केले.

वसमत तालुक्यात स्वच्छता व जनजागृती

पंचायत समिती वसमतअंतर्गत ‘सेवा संकल्प अभियान’च्या माध्यमातून शाळा, अंगणवाडी, ग्रामपंचायत, पंचायत समिती तसेच तालुका आरोग्य अधिकारी कार्यालय परिसरात स्वच्छता मोहीम राबविण्यात आली.

शाळांमध्ये विद्यार्थ्यांच्या सहभागातून रॅली काढून प्लास्टिकमुक्त अभियानाबाबत जनजागृती करण्यात आली. शौचालय अनुदानाचा लाभ घेतलेल्या लाभार्थ्यांच्या घरांवर ‘सेवा संकल्प आशीर्वाद दिवा’ प्रज्वलित करण्यात आला. सार्वजनिक शौचालयांची स्वच्छता करून नागरिकांनी त्यांचा नियमित वापर करावा, याबाबतही जनजागृती करण्यात आली.

गंभीर आजारांनी पीडित रुग्णांना आर्थिक मदत

जिल्हा परिषदेच्या आरोग्य विभागामार्फत ग्रामीण भागातील गंभीर आजारांनी पीडित रुग्णांना जिल्हा परिषद सेस निधीतून आर्थिक मदत देण्याची कार्यवाही करण्यात येत आहे. या उपक्रमासाठी ३० लाख रुपयांचा निधी उपलब्ध असून, प्रति रुग्ण १० हजार रुपये आर्थिक मदत देण्याचे नियोजन आहे. या माध्यमातून ३०० लाभार्थ्यांना मदत देण्याचे उद्दिष्ट असून, लाभार्थी निवड प्रक्रिया सुरू आहे.

नागरिकाभिमुख प्रशासनाला प्राधान्य

‘सेवा संकल्प अभियान’च्या माध्यमातून ग्रामीण भागातील पात्र लाभार्थ्यांपर्यंत विविध शासकीय योजनांचा लाभ पोहोचविणे, स्वच्छता व पर्यावरण संवर्धनाबाबत जनजागृती करणे, तसेच गरजू नागरिकांना आवश्यक शासकीय सेवा उपलब्ध करून देण्यावर जिल्हा परिषद हिंगोलीकडून भर देण्यात येत आहे.

अभियानाच्या पुढील टप्प्यातही सर्व विभाग, पंचायत समित्या आणि ग्रामपंचायती यांच्या समन्वयातून विविध लोकाभिमुख उपक्रम प्रभावीपणे राबविण्यात येणार आहेत.