केंद्र पुरस्कृत प्रधानमंत्री किसान सन्मान निधी योजना · लाभार्थ्यांनी आधार-कार्ड प्रमाणे PM-KISAN पोर्टल वरील नावात दुरुस्ती करुन घ्यावी.

केंद्र पुरस्कृत प्रधानमंत्री किसान सन्मान निधी योजना

·         लाभार्थ्यांनी आधार-कार्ड प्रमाणे PM-KISAN पोर्टल वरील नावात दुरुस्ती करुन घ्यावी.

हिंगोली, दि.6 : केंद्र पुरस्कृत प्रधानमंत्री किसान सन्मान निधी योजनेअंतर्गत हिंगोली जिल्ह्यात 1 लाख 90 हजार 958 लाभार्थ्यांची ऑनलाईन नोंदणी PM-KISAN पोर्टलवर झालेली आहे. त्यानुसार पात्र लाभार्थी यांचे खात्यावर पहिल्या, दुसऱ्या व तिसऱ्या हप्त्याची रक्कम जमा करण्याची कार्यवाही केंद्र शासनाकडून सुरु आहे. तथापि केंद्रशासनाच्या निर्देशानुसार PM-KISAN योजनेचे पुढील हप्ते (चौथा हप्ता) Aadhar base payment वर आधारीत असल्याने लाभार्थी यांनी आधार-कार्ड प्रमाणे लाभार्थ्यांचे नाव PM-KISAN पोर्टलवर दुरुस्त करण्याचे निर्देश दिले आहेत. आधार-कार्ड प्रमाणे PM-KISAN पोर्टलवरील नाव दुरुस्त करण्यासाठी पुढीलप्रमाणे तालुकानिहाय लाभार्थी संख्या आहे. औंढा नागनाथ 17 हजार 415, वसमत 18 हजार 236, हिंगोली 16 हजार 440, कळमनुरी 16 हजार 347 व सेनगाव 18 हजार 484 अशी एकूण 86 हजार 922 लाभार्थी संख्या आहे.

            त्यानुषंगाने तालुकास्तरावर तहसिलदार, तालुका कृषि अधिकारी, गट विकास अधिकारी यांच्यामार्फत मेळावे आयोजित करण्यात आले आहेत. या सन्मान योजनेत नावात त्रुटी असलेल्या लाभार्थ्यांच्या याद्या तहसिलस्तरावर व तलाठी, कृषि सहायक, ग्रामसेवक यांच्याकडे उपलब्ध आहेत. त्यानुसार PM-KISAN पोर्टलवर ज्या लाभार्थ्यांचे नाव PM-KISAN पोर्टलवरील नाव आधार-कार्ड प्रमाणे नसेल त्यांनी आधार-कार्ड वरील नावाप्रमाणे दुरुस्ती करावयाचे आहे. त्यांना सदर सुविधा https://www.pmkisan.gov.in या वेब लिंक वर Farmer Corner या Tab मध्ये Edit Aadhaar failure record मध्ये असून शेतकऱ्यांनी स्वत: आपल्या ॲड्राईड मोबाईल द्वारे किंवा आपल्या गावातील आपले सरकार सेवा केंद्रावर (CSC) जावून आधार-कार्ड वरील नावाप्रमाणे PM-KISAN पोर्टलवरील नाव लवकरात लवकर दुरुस्त करुन घेण्याचे आवाहन जिल्हाधिकारी रुचेश जयवंशी  हिंगोली यांनी केले आहे.

*****