जिल्ह्यात सर्वत्र कलम 37 (1) (3) लागू
हिंगोली,दि.13: कायदा आणि
सुव्यवस्था आबाधित राखण्यासाठी हिंगोली शहर आणि पूर्ण जिल्ह्यात मुंबई पोलीस
अधिनियम 1951 चे कलम 37(1)(3) लागू करण्यात आला आहे. हा आदेश 13 ते 27 मार्च, 2020
या कालावधीत लागू असेल, असे अतिरिक्त जिल्हादंडाधिकारी चंद्रकांत सुर्यवंशी यांनी
कळवले आहे.
जिल्ह्यात उच्च
माध्यमिक (12 वी) परीक्षा दिनांक 18 मार्च पर्यंत चालणार आहेत तर माध्यमिक (10 वी)
परीक्षा 23 मार्च पर्यंत चालणार आहेत, 25 मार्च रोजी गुढीपाडवा हा सण, श्री संत
शिरोमनी नामदेव महाराज यात्रा तसेच विविध संघटने तर्फे त्यांच्या मागणी संदर्भात
मोर्चा, धरणे, आंदोलने, रास्ता रोको, उपोषणे सुरु आहेत. या पार्श्वभूमीवर हे आदेश
जारी करण्यात आले आहेत. या आदेशानुसार कोणत्याही व्यक्तीस शस्त्र, काठी, तलवार,
बंदुक बाळगता येणार नाही. कोणतेही क्षारक पदार्थ, स्फोटक जन्य बाळगता येणार नाही.
दगड, क्षेपणिक उपकरणे गोळा करता येणार नाही किंवा जवळ बाळगता येणार नाही. सभ्यता,
नीतीमत्ता यास बाधा येईल किंवा अराजक माजेल अशी चिन्हे, निशाणी, घोषणा फलक
बाळगण्यास मनाई असेल. व्यक्ती किंवा समूहाच्या भावना दुखावतील असे असभ्य वर्तन करता
येणार नाही. पाच किंवा अधिक व्यक्तींना रस्त्यावर जमता येणार नाही. मात्र शासकीय
कामावर असणाऱ्या अधिकारी, कर्मचारी , विवाह अंत्ययात्रा, धार्मिक कार्यक्रम,
यात्रा, परवानगी दिलेले मिरवणूक कार्यक्रमास हे आदेश लागू होणार नाहीत, असे या
आदेशात नमूद करण्यात आले आहे. कार्यक्रम मिरवणुकीस परवानगी देण्याचे अधिकार पोलीस
अधिक्षक अथवा त्यांनी प्राधिकृत केलेल्या अधिकाऱ्यांना राहतील, असेही या आदेशात
नमूद करण्यात आले आहे.
*****
