संचारबंदीच्या कालावधीत अत्यावश्यक कारणासाठी भ्रमणध्वनी व ई-मेलवर संपर्क साधावा --- जिल्हाधिकारी रुचेश जयवंशी

 

हिंगोली, (जिमाका) दि. 01 : कोरोना विषाणू कोविड-19 विषाणूचा प्रादुर्भाव रोखण्यासाठी उपाययोजना अंतर्गत संपूर्ण हिंगोली जिल्ह्यात दि.01 मार्च, 2021 ते दि. 07 मार्च,2021 या कालावधीत संचारबंदी लागू केली आहे. या कालावधीत नागरिकांची गैरसोय होऊ नये म्हणून जिल्हाधिकारी कार्यालय, उपविभागीय अधिकारी कार्यालय तसेच तहसील कार्यालयात पत्रव्यवहार करण्यासाठी खालील भ्रमणध्वनी व ई-मेल पत्यावर संपर्क साधावेत, असे आवाहन जिल्हाधिकारी रुचेश जयवंशी यांनी प्रसिध्दीपत्रकाद्वारे केले आहे.

संपर्कासाठी कार्यालयनिहाय भ्रमणध्वनी व ई-मेल पत्ता पुढीलप्रमाणे आहे.

 

अ.क्र.	कार्यालयाचे नाव	संपर्क क्र.	कार्यालयाचा Email
01	जिल्हाधिकारीकार्यालय हिंगोली	९४०५४०८९३९	rdc.hingoli123@gmail.com
02	उपविभागीय अधिकारी हिंगोली	९०४९४२७७७६	sdohingoli123@gmail.com
03	उपविभागीय अधिकारी वसमत	९४२२१३२१०१	sdobasmath0@gmail.com
04	उपविभागीय अधिकारी कळमनुरी	७३५०५१४८४८	sdokalamnuri@gmail.com
05	तहसीलदार हिंगोली	९४०५३९०३९०	tahhingoli1234@gmail.com
06	तहसीलदार कळमनुरी	९६२३५०८१४५	tahkalamnuri123@gmail.com
07	तहसीलदार सेनगाव	८६९८९९५०९२	tahsilsengaon@gmail.com
08	तहसीलदार वसमत	७७७६८८९९९९	tahbasmat123@gmail.com
09	तहसीलदारऔंढा ना.	९६३७८५९९८७	tahaundha123@gmail.com

*****

संचारबंदी कालावधीत परिवहन महामंडळाच्या जिल्हांतर्गत होणाऱ्या वाहतुकीस व हिंगोली येथून इतर जिल्ह्यात सुटणाऱ्या बसेसवर बंदी

 

 

हिंगोली, (जिमाका) दि. 01 : राज्यात तसेच जिल्ह्यात कोविड-19 बाधित रुग्णांमध्ये दिवसेंदिवस वाढ होत असल्याने जिल्ह्यात कोरोनाचा प्रादुर्भाव वाढू नये म्हणून संपूर्ण हिंगोली जिल्ह्यात 7 दिवससंचारबंदी लागू करण्यात आली आहे.  या संचारबंदीच्या कालावधीत महाराष्ट्र राज्य परिवहन महामंडळाच्या हिंगोली जिल्हा अंतर्गत होणारी वाहतूक व हिंगोली येथून इतर जिल्ह्यात सुटणाऱ्या गाड्यांवर बंदी घालण्यात आली आहे. परंतु आंतर जिल्हा वाहतुकीसाठी या जिल्ह्यातून वाहतूक करणाऱ्या वाहनांच्या (इतर जिल्ह्याच्या आगारातून येणाऱ्या वाहनांच्या) व्यवस्थापनासाठी जिल्ह्यातील सर्व बस स्थानक कार्यरत ठेवण्यासाठी परवानगी देण्यात आली आहे.

जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष रुचेश जयवंशी यांनी संचारबंदीच्या काळात महाराष्ट्र राज्य परिवहन महामंडळाच्या हिंगोली जिल्हा अंतर्गत होणारी वाहतूक व हिंगोली येथून इतर जिल्ह्यात सुटणाऱ्या गाड्यांवर बंदी घातली आहे. परंतु आंतरजिल्हा वाहतुकीसाठी या जिल्ह्यातून वाहतूक करणाऱ्या इतर जिल्ह्यांच्या वाहनांचे (इतर जिल्ह्यांच्या आगारातून येणाऱ्या वाहनांचे) व्यवस्थापन करण्यासाठी जिल्ह्यातील सर्व बस स्थानक कार्यरत ठेवण्यासाठी परवानगी दिली आहे. तसेच इतर जिल्ह्यातून येणाऱ्या वाहनांमधील सर्व प्रवाशांच्या ॲंटिजेन (Antigen) तपासण्या अनिवार्य करण्यात आल्या आहेत. यासाठी जिल्हा शल्यचिकित्सक हिंगोली तसेच जिल्हा आरोग्य अधिकारी जि.प. यांच्याशी समन्वय साधण्यात येणार आहे. या दरम्यान शासनस्तरावरुन कोरोनाच्या अनुषंगाने देण्यात आलेल्या नियमांचे पालन करणे, सामाजिक अंतराचे पालन करणे, प्रवाशांनी मास्कचा वापर करणे इत्यादी खबरदारी घेण्याबाबत कार्यवाही करण्याच्या सुचना देण्यात आल्या आहेत. बस स्थानक परिसराचे व वाहनांचे वेळोवेळी सॅनिटायझेशन करण्यात यावे, असेही आदेशात सूचित केले आहे.

या आदेशाची आवज्ञा करणाऱ्या कोणत्याही व्यक्तीने भारतीय दंड संहिता 1860 चे कलम 188 अन्वये शिक्षेस पात्र असलेला अपराध केला आहे असे मानण्यात येणार असून व आपत्ती व्यवस्थापन कायदा 2005, साथरोग प्रतिबंध कायदा 1897, महाराष्ट्र कोविड-19 उपाय योजना नियम 2020 अंतर्गत संबंधितावर कार्यवाही करण्यात येणार आहे.

वरीलप्रमाणे आदेशाची सक्तीने अंमलबजावणी करण्याची जबाबदारी ही पोलीस अधीक्षक हिंगोली, विभाग नियंत्रक, राज्य परिवहन महामंडळ, परभणी, आगार प्रमुख हिंगोली, वसमत, कळमनुरी व इतर संबंधित अधिकारी, कर्मचारी  यांची असणार असल्याचेही  आदेशात नमूद केले आहे.

*****

संचारबंदी कालावधीत दूध विक्री केंद्राच्या वेळा निश्चित

 

 

हिंगोली, (जिमाका) दि. 01 : राज्यात तसेच जिल्ह्यात कोविड-19 बाधित रुग्णांमध्ये दिवसेंदिवस वाढ होत असल्याने जिल्ह्यात कोरोनाचा प्रादुर्भाव वाढू नये म्हणून संपूर्ण हिंगोली जिल्ह्यात 7 दिवस संचार बंदी लागू करण्यात आली आहे. या दरम्यान दूध विक्री केंद्रे (दूध डेअरी) यांना त्यांची केंद्रे उघडण्यास मुभा देण्यात आली आहे. परंतु अशा ठिकाणी गर्दी होऊ नये म्हणून जिल्हाधिकारी तथा अध्यक्ष जिल्हा आपत्ती व्यवस्थापन प्राधिकरणाचे अध्यक्ष रुचेश जयवंशी यांनी दूध विक्री केंद्रांच्या वेळा निश्चित केल्या आहेत.

जिल्ह्यात संचारबंदीच्या काळात दूध विक्री केंद्राच्या (दूध डेअरी) ठिकाणी गर्दी होऊ नये म्हणून जिल्ह्यातील दूध विक्री केंद्रे (दूध डेअरी) सकाळी 7.00 ते सकाळी 9.00 व सायंकाळी 7.00 ते रात्री 9.00 या कालावधीत उघडण्यास परवानगी देण्यात आली आहे. या दरम्यान शासन स्तरावरुन कोरोनाच्या अनुषंगाने देण्यात आलेल्या नियमांचे पालन करणे, सामाजिक अंतराचे पालन करणे, केंद्रावर येणाऱ्या व्यक्तींनी तसेच केंद्र चालकांनी मास्कचा वापर करणे बंधनकारक असेल. दूध विक्री केंद्राचे व साहित्याचे  वेळोवेळी  सॅनिटराईझ (Sanitization) करण्याची केंद्र चालकांनी दक्षता घ्यावी.

या आदेशाची आवज्ञा करणाऱ्या कोणत्याही व्यक्तीने भारतीय दंड संहिता 1860 चे कलम 188 अन्वये शिक्षेस पात्र असलेला अपराध केला आहे असे मानण्यात येईल व आपत्ती व्यवस्थापन कायदा 2005, साथरोग प्रतिबंध कायदा 1897, महाराष्ट्र कोविड-19 उपाययोजना नियम 2020 अंतर्गत संबंधितावर कार्यवाही करण्यात येणार असल्याचेही आदेशात नमूद केले आहे.

*****

संचारबंदीच्या काळात जिल्ह्यातील शेतमाल बाहेर जिल्ह्यात घेऊन जाण्यास परवानगी --- जिल्हाधिकारी रुचेश जयवंशी आदेश

 

हिंगोली, (जिमाका) दि. 01 : राज्यात तसेच जिल्ह्यात कोवडि-19 बाधित रुग्णांमध्ये दिवसेंदिवस वाढ होत असल्याने जिल्ह्यात 7 दिवस संचारबंदी लागू केली आहे. या संचारबंदीच्या काळात जिल्ह्यातील शेतमाल बाहेर जिल्ह्यात घेऊन जाण्यासाठी जिल्हाधिकारी तथा जिल्हा आपत्ती व्यवस्थापनाचे अध्यक्ष रुचेश जयवंशी यांनी परवानगी दिली आहे.

यासाठी संबंधित शेतकरी , व्यापारी यांनी जिल्हा सामान्य रुग्णालयात जाऊन कोरोना अँटीजेन तपासणी करुन घ्यावी व चाचणीचा अहवाल घ्यावा. त्यानुसार ज्यांची कोरोना अँटीजेन चाचणी निगेटीव्ह प्राप्त झाली आहे अशा शेतकरी, व्यापारी यांना तहसील कार्यालयामार्फत परवानगी घ्यावी. तहसील कार्यालयाने संबंधित शेतकरी, व्यापारी यांना बाहेर जिल्ह्यात जाण्यासाठी सर्व बाबींची तपासणी करुन एका गाडीत केवळ वाहक व इतर दोन अशी परवानगी द्यावी, असे आदेश दिले आहेत.

या आदेशाची आवज्ञा करणाऱ्या कोणत्याही व्यक्तीने भारतीय दंड संहिता 1860 चे कलम 188 अन्वये शिक्षेस पात्र असलेला अपराध केला आहे असे मानण्यात येईल व आपत्ती व्यवस्थापन कायदा 2005, साथरोग प्रतिबंध कायदा 1897, महाराष्ट्र कोविड-19 उपाययोजना नियम 2020 अंतर्गत संबंधितावर कार्यवाही करण्यात येईल याची नोंद घ्यावी, असेही आदेशात नमूद केले आहे.

*******

सेनगाव तालुक्यातील केंद्रा खु. येथे कंटेनमेंट झोन घोषित

 

 

हिंगोली, (जिमाका) दि. 01 : सेनगाव तालुक्यातील केंद्रा खु. गावात कोविड-19 चे रुग्ण आढळून आले आहेत. त्यामुळे या रोगाचा फैलाव इतरत्र होऊ नये म्हणून केंद्रा खु. गावाचे संपूर्ण क्षेत्र हे कंटेनमेंट झोन म्हणून घोषित करण्यात आले आहे. 

या परिसरातील नागरिकांच्या हालचालींवर बंधने घालण्यात आली आहेत. या परिसरातील सर्व आवश्यक त्या सेवा या आदेशान्वये बंद करण्यात आल्या आहेत. नागरिकांना आवश्यक त्या सेवा   ग्रामपंचायत मार्फत वेळोवेळी आवश्यकतेनुसार देण्यात येणार आहेत.

            या आदेशाचे उल्लंघन केल्यास त्यांच्या विरुध्द भारतीय दंड संहिता (45 ऑफ 1860) चे कलम 188 व साथरोग कायद्यानुसार दंडात्मक कारवाई करण्यात येईल याची नोंद घ्यावी, असे आवाहन जिल्हाधिकारी रुचेश जयवंशी यांनी केले आहे.

****

जिल्ह्यातील सर्व आस्थापना, दुकानदार यांच्या अँटीजेन तपासण्या करणे बंधनकारक --- जिल्हाधिकारी रुचेश जयवंशी आदेश

 

 

हिंगोली, (जिमाका) दि. 01 : राज्यात तसेच जिल्ह्यात कोवडि-19 बाधित रुग्णांमध्ये दिवसेंदिवस वाढ होत असल्याने जिल्ह्यात कोरोनाचा प्रादुर्भाव वाढू नये यासाठी जिल्ह्यातील सर्व आस्थापना मालक, दुकानदार तसेच जिल्ह्यात येणाऱ्या व जिल्ह्यातून बाहेर जाणाऱ्या प्रवाशांची अँटीजेन तपासणी करण्याचे आदेश यापूर्वीच निर्गमित केले आहेत. त्याअनुषंगाने सध्या जिल्ह्यात सुरु असलेल्या संचारबंदी नंतर जिल्ह्यातील सर्व आस्थापना मालक, दुकानदार यांना त्यांची आस्थापना, दुकाने उघडण्यासाठी अँटीजेन तपासण्या करणे बंधनकारक करण्यात आले आहे. ज्या आस्थापना मालक, दुकानदार व त्यांच्या येथे काम करणारे कर्मचारी यांची कोरोना रॅपिड अँटीजेन तपासणी  अहवाल निगेटीव्ह आली आहे अशांना त्यांची आस्थापना, दुकाने उघडण्यास परवानगी देण्याचे आदेश जिल्हाधिकारी तथा जिल्हा आपत्ती व्यवस्थापनाचे अध्यक्ष रुचेश जयवंशी यांनी दिले आहेत .

यासाठी आरोग्य विभागामार्फत यापूर्वी आस्थापना मालक, दुकानदार (सर्व प्रकारची दुकाने) यांच्या अँटीजेन तपासण्यासाठी उभारण्यात आलेल्या कॅम्पप्रमाणे यावेळी देखील  जिल्ह्यातील सर्व आस्थापना मालक, दुकानदार व त्यांच्याकडे काम करणाऱ्या कर्मचाऱ्यांची कोरोना अँटीजेन तपासणी करण्यासाठी कॅम्प उभारुन तपासण्या करण्यात याव्यात . यासाठी आरोग्य विभागाने पोलीस विभाग, उपविभागीय अधिकारी, तहसीलदार, मुख्याधिकारी नगर परिषद/नगर पंचायत इ. व इतर संबंधित अधिकारी यांच्याशी समन्वय साधून तात्काळ कार्यवाही करावी. यानुसार जिल्ह्यातील सर्व आस्थापना, दुकानदार यांच्या अँटीजेन तपासण्या करण्यात याव्यात. यामध्ये जे नागरिक कोरोना बाधित आढळतील अशांना कोरोनाच्या अनुषंगाने उपचारासाठी कार्यवाही करावी, असे आदेश दिले आहेत.

या आदेशाची आवज्ञा करणाऱ्या कोणत्याही व्यक्तीने भारतीय दंड संहिता 1860 चे कलम 188 अन्वये शिक्षेस पात्र असलेला अपराध केला आहे असे मानण्यात येईल व संबंधितांवर आपत्ती व्यवस्थापन कायदा 2005, साथरोग प्रतिबंध कायदा 1897, महाराष्ट्र कोविड-19 उपाययोजना नियम 2020 अंतर्गत संबंधितावर कार्यवाही करण्यात येईल याची नोंद घ्यावी.

या आदेशाची सक्तीने अंमलबजावणी करण्याची जबाबदारी ही मुख्य कार्यकारी अधिकारी, जि.प. हिंगोली, पोलीस अधीक्षक, हिंगोली, सर्व उपविभागीय अधिकारी, जिल्हा शल्यचिकित्सक , जिल्हा आरोग्य अधिकारी, जि.प. हिंगोली, सर्व तहसीलदार, सर्व मुख्याधिकारी, नगर परिषद/नगर पंचायत, ग्रामसेवक, तलाठी व इतर संबंधित अधिकारी, कर्मचारी यांच्यावर सोपविण्यात आली आहे.

*******

हिंगोली जिल्ह्यात 1 ते 7 मार्च या कालावधीत संचारबंदी लागू --- जिल्हाधिकारी रुचेश जयवंशी

 

हिंगोली, (जिमाका) दि. 27 : राज्यात तसेच जिल्ह्यात कोवडि-19 बाधित रुग्णांमध्ये दिवसेंदिवस वाढ होत असल्याने जिल्ह्यात कोरोनाचा प्रादुर्भाव वाढू नये म्हणून जिल्हाधिकारी तथा जिल्हा आपत्ती व्यवस्थापनाचे अध्यक्ष रुचेश जयवंशी यांनी संपूर्ण हिंगोली जिल्ह्यात 7 दिवस संचारबंदी लागू केली आहे.

या संचारबंदीच्या कालावधीत संपूर्ण हिंगोली जिल्ह्याच्या (ग्रामीण/शहरी) हद्दीतील सर्व प्रकारच्या हालचालीस (व्यक्ती/वाहन) व सर्व आस्थापना, दुकाने, खानावळ इत्यादीकरिता दि. 1 मार्च, 2021 रोजी सकाळी 7.00 ते दि. 7 मार्च, 2021 रोजी रात्री 12.00 या कालावधीत संचारबंदी लागू केली असून खालीलप्रमाणे आदेश दिले आहेत.

1. या कालावधीत दूध विक्री केंद्र, दूध विक्रेते यांना सकाळी 9.00 ते सायंकाळी 5.00 पर्यंत चालू ठेवण्यास मुभा राहील.

2. या कालावधीत जिल्ह्यातील सर्व शासकीय, निमशासकीय कार्यालये, बँका या कामकाजासाठी चालू राहतील. या कालावधीत बँका केवळ शासकीय कामकाजासाठी चालू राहतील. यासाठी संबंधित अधिकारी, कर्मचारी यांना ये-जा करण्यासाठी मुभा राहील. परंतु सोबत ओळखपत्र ठेवणे बंधनकारक राहील.

3. या कालावधीत जिल्ह्यातील  सर्व धार्मिक, प्रार्थना स्थळे, सर्व शाळा, महाविद्यालये, सर्व मंगल कार्यालये, लॉन्स हे बंद राहतील.

4. या कालावधीत औषधी दुकाने चालू ठेवण्यास मुभा राहील.

5. या कालावधीत पत्रकार व त्यांचे कार्यालयीन कर्मचारी यांना या कालावधी वार्तांकन व कार्यालयीन कामकाजासाठी ये-जा करण्यास मुभा राहील. परंतु सोबत ओळखपत्र ठेवणे बंधनकारक राहील.

6. जिल्ह्यातील राष्ट्रीय महामार्ग आणि राज्य महामार्गाची कामे व दुरुस्ती करण्यास, आरोग्य, शासकीय विभागाशी संबंधित बांधकामे, महावितरण, महापारेषण आणि इतर विद्युत विषयक विभागाकडील देखभाल व दुरुस्तीची कामे, दूरसंचारशी संलग्न सेवा, पाणीपुरवठा, जलनिस्सारण आणि स्वच्छता विषयक कामे, जिल्हाधिकारी कार्यालयामार्फत परवानगी देण्यात आलेल्या वाळू घाटातून रेती उत्खनन व वाहतूक संबंधित कामे करण्यास मुभा राहील. यासाठी संबंधित विभागाकडील आदेश, ओळखपत्र सोबत ठेवणे बंधनकारक राहील.

7. या कालावधीत जिल्ह्यातील पेट्रोल पंप केवळ शासकीय वाहने, अत्यावश्यक सेवा देणारी वाहने व कृषी सेवा संबंधित वाहने यांना इंधन पुरवठा करण्यासाठी चालू राहतील.

8. या कालावधीत बाहेरील विद्यार्थी , बाहेर जिल्ह्यातील अडकलेले नागरिक यांच्यासाठी परवानाधारक खानावळ, हॉटेल केवळ पार्सल सुविधेसाठी सकाळी 9.00 ते रात्री 7.00 पर्यंत उघडण्यास मुभा असेल.

वरीलप्रमाणे संचाराची मुभा दिलेल्या व्यक्तींना सामाजिक अंतर राखणे तसेच मास्कचा वापर करणे बंधनकारक राहील. यानुसार संचारबंदी काळात अत्यावश्यक सेवा, परवानगी घेतलेल्या व्यक्तीशिवाय इतर कोणतीही व्यक्ती रस्त्याने, बाजारामध्ये , गल्लीमध्ये , गावामध्ये, घराबाहेर फिरताना आढळून आल्यास त्यांच्या विरोधात भारतीय दंड संहिता 1860 चे कलम 188 अन्वये शिक्षेस पात्र असलेला अपराध केला आहे असे मानण्यात येईल व आपत्ती व्यवस्थापन कायदा 2005, साथरोग प्रतिबंध कायदा 1897, महाराष्ट्र कोविड-19 उपाययोजना नियम 2020 अंतर्गत संबंधितावर कार्यवाही करण्यात येईल याची नोंद घ्यावी.

वरीलप्रमाणे आदेशाची सक्तीने अंमलबजावणी करण्याची जबाबदारी ही मुख्य कार्यकारी अधिकारी, जि.प. हिंगोली, पालीस अधीक्षक, हिंगोली, सर्व उपविभागीय अधिकारी, सर्व तहसीलदार, सर्व मुख्याधिकारी, नगर परिषद/नगर पंचायत, ग्रामसेवक, तलाठी व इतर संबंधित अधिकारी, कर्मचारी यांच्यावर सोपविण्यात आली आहे.

*******