योजनांच्या नावाखाली पैशांची मागणी, गैरप्रकार खपवून घेणार नाही– महामंडळाचे अध्यक्ष नरेंद्र पाटील

हिंगोलीत महामंडळाच्या योजनांचा आढावा; लाभार्थ्यांच्या समस्या सोडविण्याचे निर्देश

हिंगोली, दि. ३० (जिमाका) : अण्णासाहेब पाटील आर्थिक मागास विकास महामंडळाच्या योजनांचा आढावा घेतानाच लाभार्थ्यांच्या समस्या जाणून घेऊन त्यांचे निराकरण करण्यासाठी महामंडळाचे अध्यक्ष नरेंद्र अण्णासाहेब पाटील यांच्या उपस्थितीत हिंगोली येथे आढावा बैठक व लाभार्थी समस्या निवारण मेळावा घेण्यात आला. यावेळी संबंधित अधिकाऱ्यांना लाभार्थ्यांच्या अडचणींवर तातडीने कार्यवाही करण्याचे निर्देश देण्यात आले. 

तसेच उपोषणकर्त्यांशी संवाद साधून त्यांच्या समस्या जाणून घेण्यात आल्या.

दौऱ्याच्या प्रारंभी अध्यक्ष नरेंद्र पाटील यांनी जिल्हाधिकाऱ्यांची भेट घेऊन त्यांना जन्मदिनाच्या शुभेच्छा दिल्या. त्यानंतर झालेल्या आढावा बैठकीत जिल्हा परिषदेचे मुख्य कार्यकारी अधिकारी विवेक गायकवाड यांनी महामंडळाच्या व्याज परतावा योजनेचे कौतुक केले. ही योजना आदर्श ठरल्यामुळे अन्य २६ महामंडळांमध्येही अशा स्वरूपाच्या योजना सुरू करण्यात आल्याचे त्यांनी नमूद केले. महामंडळाच्या कार्यपद्धती व मार्गदर्शनामुळे मागील आर्थिक वर्षात सुमारे ७५० कोटी रुपयांचा निधी प्राप्त झाल्याचेही त्यांनी सांगितले.

वाहन व्यवसायासोबतच इतर क्षेत्रांतही उद्योग सुरू करण्याचे आवाहन

महामंडळाच्या योजनांचा लाभ घेणाऱ्या युवकांनी वाहन व्यवसायापुरते मर्यादित न राहता सेवा, उत्पादन आणि माहिती तंत्रज्ञान क्षेत्रातही उद्योग सुरू करावेत. स्वतःचा व्यवसाय उभारण्यासोबतच इतर युवकांनाही रोजगाराच्या संधी उपलब्ध करून द्याव्यात, असे आवाहन यावेळी करण्यात आले.

लाभार्थ्यांची आर्थिक पिळवणूक सहन करणार नाही

महामंडळाच्या योजनांचा लाभ मिळवून देण्याच्या नावाखाली कोणत्याही व्यक्तीने किंवा ऑनलाइन सेवा केंद्राने पैशांची मागणी करणे चुकीचे आहे. योजनांच्या नावाखाली होणारा गैरप्रकार खपवून घेतला जाणार नाही. लाभार्थ्यांची आर्थिक पिळवणूक किंवा दिशाभूल करणाऱ्यांविरुद्ध आवश्यक कार्यवाही करण्यात येईल, असा स्पष्ट इशारा अध्यक्ष नरेंद्र पाटील यांनी दिला. अशा प्रकारांचा अनुभव आल्यास लाभार्थ्यांनी संबंधित अधिकाऱ्यांकडे तक्रार करावी, असे आवाहनही त्यांनी केले.

लाभार्थ्यांच्या समस्यांवर तातडीने कार्यवाहीचे निर्देश

समस्या निवारण मेळाव्यात अध्यक्षांनी लाभार्थ्यांच्या अडचणी प्रत्यक्ष जाणून घेतल्या. संबंधित जिल्हा समन्वयकांच्या माध्यमातून या समस्यांवर आवश्यक कार्यवाही करण्याच्या सूचना त्यांनी दिल्या. उपोषणकर्त्यांशी संवाद साधताना लाभार्थ्यांची नावे, अर्ज क्रमांक आणि समस्यांचा सविस्तर तपशील महामंडळाकडे सादर करण्याचे आवाहन केले. सन २०२४-२५ मधील पात्रता प्रमाणपत्रांशी संबंधित कामकाज तसेच कर्ज घेतलेल्या लाभार्थ्यांची केवायसी प्रक्रिया सुरू असल्याची माहितीही यावेळी देण्यात आली.

दुपारी ३.३० वाजता आयोजित पत्रकार परिषदेत महामंडळाच्या विविध योजनांचा आढावा, लाभार्थ्यांच्या समस्या आणि उपोषणकर्त्यांसोबत झालेल्या चर्चेची माहिती देण्यात आली.

यावेळी कळमनुरीचे माजी आमदार  गजानन घुगे, मराठा महासंघाचे मराठवाडा विभागीय अध्यक्ष अडकिने, विविध मराठा संघटनांचे पदाधिकारी, लाभार्थी, महामंडळाचे विभागीय समन्वयक प्रवीण आगवण पाटील आणि जिल्हा समन्वयक कालिदास थावरे उपस्थित होते.